"جابك الله في زحام العمر صدفة "

28

~~~ في سيارة ابوسطام ~~~
ابوسطام : وين سالم
هديل : جدته قالت لي خليه بالروضه وهم بجون وياخذونه
ابوسطام : قالت لتس شى ماهو زين
هديل : تعرفني يبه مقدر اخبي عليك شى سالم اكثر شكاويه من جدته وانها دايما تسب امه وتصرخ عليه عشانه يدافع امه اول شى قلت طبيعي بتعصب عليه بس لما شفت كلامه صدقت سالم
ابوسطام : ليه وش قالت لتس
هديل : اول مادخلت قالتها بوجهي كذا ماله داعي الي سويتيه علقتي الولد فيتس وهو مصيره عندنا وقالت عشان مايتعود عليتس خليه بالروضه واحنا بناخذه وانا وعدت سالم مااتركه ومااكذب عليه وش اسوي
ابو سطام : يبنتي الي عليتس سويتيه وبعدين يمكن ابوه وده يجيبه ويونسه واكيد بيجي للقريه وبيشوفتس وبتشوفينه
هديل : ان شاء الله
~~~ في بيت ابومحمد ~~~
ابومحمد : ماقام ولدتس للحين
ام محمد : لا خله يرتاح
ابومحمد : مابقى شى على طلعه ولده يقوم لاصلخ جلده اخوه مخليه سنين فالقريه لا نومه نوم ولا اكله اكل مانيب عجزان عن الثاني
ام محمد : بروح اشوفه
محمد : استريحي يمه مايحتاج قمت اعتذر يبه اعتذر يمه الي سويته حركات بزران بس والله فوق طاقتي
ابومحمد : كلنا على هالطريق ماشين وانا فقدت امي الي اغلى منك ومن امك بعد وهذاني عايش
محمد : يايبه مامرت سنين على موت هدى عشان اقدر انسى وامشي واسلك انا مقدر أتحمل مسؤولية سالم مدرسته يرفضون ادخل اتفاهم معهم
ابومحمد : بنت ابوسطام محامية وراحت وحلت الموضوع باذن لله الحين الي ابيه منك ترجع محمد الي نعرفه وتروح تاخذ ولدك وتطلعه وتمشيه وتشتري كل شى يبيه والله يعينك على صياحه
محمد : ليه وش فيه
ابومحمد : متعلق في بنت ابوسطام
محمد : الله يعين انا رايح
ابومحمد : محمد حط هالكلام ببالك وفكر ورد لي خبر
محمد : سم يبه وش
ابومحمد : بزوجك اذا ماهو هالشهر الشهر الي بعده بعطيك مهله تفكر على راحتك وبنت الحلال موجودة
محمد : يبه تكفى لاتفتح هالموضوع معي مره ثانيه
ابومحمد : متوقع عشانك انا بزوجك عشان سالم سالم فاقد حنان الام وبحاجه ام معه تقوم فيه وتدرسه وتساعده وانت عاد وقتها خذ فراشك ورح نام عند قبر المرحومة سالم بيصير بيد امينة
محمد : مارح انزوج وحده تعنف ولدي بغيابي انا وعدت هدى
ابومحمد : البنت الي اخترتها لك احن منك على ولدك رح جب ولدك لاتتاخر عليه وفكر فالموضوع
محمد : مليون مره اقول موضوع الزواج لاتجيبونه مدري ليه تعاندون
ام محمد : منهي بنت الحلال الي لاقيها
ابومحمد : بنت ابوسطام ومن غيرها
ام محمد : وشهو
ابومحمد : ان وافقت بنحمد ربنا لاتنسين هي بنت وماتزوجت وبتاخذ ولدتس وهو متزوج وعنده ولد
ام محمد : امها فيها شوفه نفس وهم فالشرقية مابي ولدي يبعد عني
ابومحمد : ومن متى الرجال يتبع اهل حرمته وين يسكنون يروح وراهم لو على كذا كان بنتنا شهد عندنا الحين اخوي عبدالله نصحني وانا اشوف نصيحته من ذهب
ام محمد : محد مخرب حياتنا الا اخوك ذا بنتي وزوجتها ولد اخوك وانا ماكنت ابيه وولدي محمد زوجته وحده اهلها موصينك عليها عبدالرحمن لاتتدخل بزواجه
ابومحمد : عبدالرحمن بياخذ البنت الي يحبها وانا مااوقف بوجه عيالي ولا اتحكم فيه شهد لو قالت لا على سياف والله مايمسك يدها وعلى محمد فهو مايبي يعرس الحين عشان كذا بغصبه عشان سالم ماله ذنب بكل ذي الحكايه وانتي لاتدخلين الشور بيدي
~~~ في روضه سالم ~~~
سالم : بابا ليش جاي
محمد : جاي اخذك نروح للحديقة شرايك
سالم : وين خاله هديل راحت وخلتني صح كذبت علي
محمد : لا لا هي موجودة وبتروح عندها بس انا طلبت منها اخذك للحديقة تستانس
سالم : ليش ماجت هي بعد
محمد : عيب يابابا وين علوم المرجلة؟
سالم : بس انت بتخليني بالحديقة وبتروح
محمد : ياروح ابوك انت لا وعد بلعب معك بكل لعبه تختارها شرايك
سالم : بعدها نروح لخاله هديل
محمد : اي تم
سالم : طيب يلا
~~~ في المزرعه ~~~
ابوفهد : الله يعطيكم العافية ياعيال
هايل : الله يعافيك يبه
ابوفهد : اقعدو اقعدو مايحتاج تقومون جيت اشيك وش سويتو
زامل : والله يايبه شوفه عينك البيت قدرنا عليه صحيح الاثاث وكل شى بس يتعوضون اما الزرع
ابوفهد : فهمتك فهمتك يعطيكم العافية ابروح اشيك على باقي حلالنا كملو
هايل : والله يايبه دمعتك الي مسحتها بشماغك وصديت وجهك عشان مانشوفها لاخلي الي حرق هالمزرعة ينزلها دبل
عبدالرحمن : ياعيال لقيت هالولاعه
هايل : وطيب
عبدالرحمن : صدق انك فاهي فالقرية هنا من يدخن؟ سعيد مايبيع دخان ولا ولاعات ببقالته وسعيد بقالته بحارتنا احنا
زامل : وحارتنا محد يدخن ولانقدر نروح للحاره الثانيه عشان بقالتهم
هايل : يعني الي فعل هالفعله من الحارة الثانية
زامل : حييك يادحيم
سطام : انا شاك لي بواحد
هايل : من قل
سطام : تخبر يوم كنا نورع كروت عرس اخوك
هايل : اي
سطام : جينا هنا واخذنا سعيد وكان فيه رجال من بعيد يناظرك وكانه يتوعد ووريتك اياه وقلت ان بينكم خلاف مدري وش كان اسمه
سعيد : خلف قصدك
سطام : اي
هايل : كنت حاس ان مارح يكف عن حقده اسمعوني ياعيال مارح نخلي هالموضوع يعدي والله لااحرق حارتهم كلها
زامل : ماينرد الشر بالشر ياهايل
هايل : ينرد ولايوصل العلم لابواننا
سعيد : وش بتسوي
هايل : بحرق محل ابو خلف وسعد هم كلهم جماعه وحده
سطام : ولو كشفونا
هايل : مارح يكشفونا وعدنا اليوم فالليل بنقعد بحجه نزوع الخضار والفواكه
سعيد : ياهايل استهد بالله تكفى
هايل : الي خايف لايجي
زامل : ماهي قصه خوف الموضوع بتتدخل فيه الشرطه وبتكبر وبيطلبون تعويض
هايل : ماارجع عن كلامي
عبدالرحمن : انا معك وين ماتروح رجلي على رجلك
هايل : كفو ياصويحبي
سطام : وانا معك قلبًا وقالبًا حرقوا مزرعه ابوي
خالد : وانا معكم بعد
عزام : وانا بعد انا وولد عمي ضد الغريب
هايل : كفو وقبلها نبي نضربه
زامل : وش صار على فهد ياعزام
عزام : اهله جو عنده
~~~ في المركز الصحي ~~~
ميهاف : عطتني رقمه ندى ارسل ؟
فاتن : ارسلي
ميهاف : لا لا المبادرة من الولد دائمًا
فاتن : اكسري هالقانون انتي وبادري
ميهاف : لا لا مارح ارسل
فاتن : بكيفتس
ميهاف : بس وش اقول
فاتن : تعاندين ؟
ميهاف : انتي وش رايتس
فاتن : اذا تبين تطمنين عليه ارسلي وخلصنا
ميهاف : طيب وش اقول
فاتن : سلمي وقولي انتس ميهاف وعاد الباقي الكلام بينكم
ميهاف : اوف يالتوتر
فاتن : لو سمحتوو انتهى وقت الزيارة
ام فهد : انتبه لنفسك يولدي تكفى
فهد : لاتوصين حريص يمه
زينب : عادي لو يبقى احد عنده
فاتن : اي عادي مو مشكلة بس شخص واحد
زينب : زين ندى خلتس عنده
ندى : واحنا مزوجينه عشان نقعد عنده
زينب : اجل تبين انا انغث
ندى : زوجتس
زينب : اخوتس قبل يصير زوجي
فهد : مابي احد يقعد عندي
ام فهد : زينب اقعدي
زينب : اوف متى بتاخذ حبيبتك وافتك
فهد : محد قالتس تقترحين احد يقعد
زينب : من غبائي
فاتن : ههههههههههههههههههههههههههههههه احنا برا لو بغيتو شى
ميهاف : قراها قراها قراها فاتن فاتن
فاتن : وشفيتس يالمصروعه
ميهاف : صار خطين ازوق قراها يعني صح
فاتن : بعد بعلمتس عن ذا
ميهاف : يكتب يكتب
فاتن : وترتيني معتس
هايل : يامرحبا بحبيبة القلب سمي وامري وش بغيتي تبين شى ناقصتس شى ولا مشتاقه لي اعترفي
ميهاف : مقدر اكتب فاتن اصابعي عيت تتحرك
فاتن : ياحبتس للدراما هاتي انا ارد ، لا مو مشتاقه لك بس بسال وش صار معكم
هايل : خويتها رجعي الجوال لها
ميهاف : يوه يافاتن ليش تقولين كذا
فاتن : عشان ترجع اصابعتس تكتب
ميهاف : فاتن الي كتبت معليش
هايل : اعرف اسلوبتس واسلوبها وش بغيتي
ميهاف : وش صار معكم وش ناوين تسوون
هايل : ابد مارح نسوي شى وجالسين نرجع البيت
ميهاف : اكلت شى
هايل : اي فول وتميس يحبه قلبتس
ميهاف : ههههههههههههههههههههههههههههههه بالعافية
هايل : عاد اشتقت لتس بما انتس مارح تقولين انا بقول
ميهاف : حتى انا
فاتن : خنافس الحب ابلشوني
هايل : تزوج اخوي سياف تجهزي باقي انا
ميهاف : سمعت انك وعدت اهلك تقعد وتنظف بس ينقلون اخوانك للرياض
هايل : هذا مايمنع اني اخذتس
فاتن : اساليه متى يجي يخطب عشان نعرف نحجز كل شى من الان تعودت عالعروس من كثرهم
ميهاف : مستحيل بيقول مشفوحه لا لا
فاتن : وش ذا الحب الرسميات
هايل : تبين شى ؟
ميهاف : لا سلامتك وانتبه لنفسك لاتجي تنسدح عندنا فالمستشفى مثل اخوك
هايل : كان طيحتي فيها شوفتس ابطيح الحين
ميهاف : لا لا انتبه
هايل : أبشري
فاتن : انتظركم تتبادلون شعر
ميهاف : انتهت المحادثة
زينب : بنات جيعانه
فاتن : هذا حالنا يوميا تدرين وزني قبل ٥٥ الحين نزلت ٥٠
ميهاف : تراها تكذب وزنها جالس يزيد
زينب : مايهم الوزن انا جد جيعانه شنسوي
فاتن : تروحين تطبخين لنا طبخه واحنا ننتبه لزوجتس
زينب : جد
فاتن : اكيد شغلتنا
زينب : تم اجل بروح وش مشتهين
فاتن : مكرونه حمراء وكثري الفلفل والليمون والشطة واذا فيه اصناف جانبيه مانقول لا
زينب : ماتحلى المكرونه الا بسلطه تم انتظروني
ميهاف : خلتس دايما عندنا بالله
زينب : رقمي بعطيتس اياه واصير ارسل لكم اكل لاجعتو
فاتن : حتى انا عندي رقم ترا
زينب : بعطيتس رقمي انتي بعد
فاتن : لو رحنا للرياض توصلين
زينب : انا بسكن فالرياض
فاتن : تعجبيني
~~~ في الحديقة ~~~
محمد : ها باقي شى بخاطرك مالعبته
سالم : همم لا كذا خلاص الباقي العاب كبار
محمد : وين تبي نروح الحين
سالم : كم الساعه
محمد : ١ الظهر ليه
سالم : وقت غداء نبي نروح ناكل
محمد : كبسه
سالم : ليش لا يلا لتس قو
محمد : وش صار بموضوع مدرستك
سالم : جت خاله هديل وحلت الموضوع واعتذروا لي بالطابور امام كل الطلاب وارسلو لك رساله اعتذار
محمد : شفتها بعدين تعال بنتخاصم ليش ماتقول لي ان معلماتك طالبين اغراض للفنيه
سالم : قلت لك بس انت نسيت يمكن انا اسف
محمد : معليه بسامحك بشرط
سالم : يوه كثيره شروطكم وش
محمد : الحين اذا جاء الغداء تاكله كله لو مااكلت كثير مارح تروح لخالتك
سالم : تم اتفقنا بابا
محمد : لبيه
سالم : عادي اخذ كل كتبي واخلي خاله هديل تذاكر لي عندي مطويات واعمال فنيه كثيرة
محمد : الي تبيه يصير بعد الاكل نروح للمكتبه وتاخذ كل شى طالبينه هم
سالم : بابا دايما خلك كذا ولا بجلس عند عمي عبدالرحمن
محمد : مقدر بدونك يابابا
~~~ في بيت ابو سطام ~~~
ام سطام : ماكان له داعي تسوين كذا واخر شى تسمعين هالكلام من جدته ماقلت لتس يابنتي لاتساعدين احد قلت ولا ماقلت
هديل : ماهمني جدته وجده وابوه ماهمني احد يمه انا رحمته لانه طفل
ام سطام : بتصيرين ترحمين فلان وعلان ارحمي نفستس ولاتساعدين احد بكرا بيجيتس عيال ساعديهم هم
هديل : وانتي يمه وشعرفتس يمكن مااجيب عيال
ام سطام : لو الله يفكنا من افكار ابوتس وخويه ابوفهد الي مخرب حياتنا من جينا سلمنا وسلمتي انتي بعد
هديل : وليه ابوي وش مسوي
ام سطام : احترق قلبي وانا اسمع احترققق
هديل : قولي يمه وش فيتس وش قايل ابوي
ام سطام : ابوفهد اقنع اخوه ابومحمد يخطبوتس لمحمد وعلى اساس ابوتس مايعرف بس ابوفهد قال له وجالسين يقنعون محمد يعرس ومافكرو فيتس شافوتس ساعدتي ولده قالو راضيه وتبيه
هديل : وشذا الكلام البايخ متى قلت كذا انا صار الي يسوي خير ينفهم غلط
ام سطام : انا قلت لتس وحذرتس بس ماتسمعيني
هديل : لاتخافين يمه انا مارح اوافق
ام سطام : ان شاء الله تثبتين على كلامتس اعرف ابوتس يعرف يقنعتس
هديل : معليتس يمه بس تكفين اذا جاء سالم لاتسمعينه كلام يكفي جدته
ام سطام : مااوصل لهالمرحله من القسوة انتبهي ياهديل توافقين انتبهي
هديل : أبشري
~~~ في المستشفى ~~~
زينب : تفضلو تفضلو
فاتن : امم يالريح يمال العافية
زينب : عسى ماتاخرت عليكم
فاتن : مره تاخرتي
ميهاف : لا لا ماتاخرتي جيتي بوقتتس وتسلم يدينتس
زينب : صحه وهنا بروح اعطي فهد ياكل
فهد : اوه كنت مشتهيها
زينب : عاد ماسويتها عشانك سويتها عشان البنات
فهد : مارح تقعدين عندي
زينب : بروح اكل معهم اقعد لحالك
فاتن : بسالتس
زينب : اسالي
فاتن : وش صار على حبيبة زوجتس
زينب : كان مفكر ياخذها بس موضوع مزرعه ابوه خلاه ياجل
ميهاف : انتي وش بتسوين
زينب : بعطيه مهري يعطيها اياه وبتطلق وبروح لبيت اهلي
فاتن : وخالد وفرح
زينب : خالد وفرح مالهم دخل فهد يبي يتزوج وانا ماارضى وحده تجي على راسي
فاتن : كفو بس موضوع تعطيه المهر ماعجبني
زينب : انا بطلب الطلاق ف بكل الحالتين برجع له مهره وبعدين خليه يعطيها اياه فضلتي وانا واصله اعلى مراحل الاستغناء
ميهاف : مايستاهلتس صراحه
زينب : انتي وشصار عليتس ميهاف هايل متى بيخطبتس
ميهاف : مدري
فاتن : تكذب ترا اليوم فتح معها الموضوع وقال تجهزي بقى انا اتزوج
زينب : اوه الله يوفقكم عزالله اخترتي الشخص الصح وانتي فاتن متى ناويه تتزوجين
فاتن : والله ماافكر اتزوج تطبيقنا هنا باقي شهر ونخلصه ب ١/١ نرجع للرياض بروح اقدم على المستشفيات الي هناك واذا توظفت ماتزوجت
زينب : ليه رابطه هذولي ببعض
فاتن : امي ميته الله يرحمها وابوي ماعنده احد يخدمه وانا يتقطع قلبي عليه اربع شهور لا نومه نوم ولا اكله اكل
زينب : يعمري ليه ماقلتي لي لما كنت فالرياض ارسل له اكل
فاتن : ماجاء ببالي وبعدين ابوي داعمني اروح وراضي هالاربع شهور يقعد بدوني ف اول ماخلص بعوضه
زينب : ان شاء الله تلقين الشخص الصح الي يحافظ عليتس وعلى ابوتس ويخدمه
فاتن : هذا ملاك من السماء
زينب : فيه فيه ههههههههههههههههههههههههههههههه
ميهاف : كلو كلو لايبرد
~~~ في بيت ابو سطام ~~~
هديل : يبه
ابوسطام : هلا ابوي
هديل : صدق الي سمعته
ابوسطام : ووش سمعتي
هديل : انكم مفكرين تزوجوني ابوسالم عشان بس ساعدت ولده
ابوسطام : وشفيها يبنتي انتي كبرتي صار لازم تتزوجين
هديل : ولو قلت لا
ابوسطام : بعض الكلام مانتطاوع
هديل : يبه وش غير تفكيرك من جيت للقريه وتفكيرك متغير
ابوسطام : بما انتس سمعتي هالكلام من امتس فانتي ٨٠ بالميه غلطانه
ام سطام : وليه عشانها سمعت لي ولا صار خويك ذا الاول والاخير فالقرارات الي تخص حياتنا
ابوسطام : لانتس نقلتي العلم لها بطريقة غلط يبنتي وشفيها لو ارفقتي بهاليتيم وعوضتيه عن فراق امه ماهو انتي الي امس تقولين بساعده لانه يتيم وماعنده احد يدافع عنه
هديل : بس ماكانت نيتي اخذ ابوه يايبه
ابوسطام : ومن قال ان احنا مفكرين عنتس كذا كل الي صار ان امه وابوه يبونه يتزوج ولقو له قبلتس بنت الحلال بس هو عيا وقالت عمه سالم انها بتقوم بسالم ومايحتاج زوجه واقتنعوا ولما تزوجت عمته صار لازم يتزوج محمد وشافو تعلق سالم فيتس وقالو مارح نلقى افضل من نسابتنا بس هذا
هديل : بس انا مابيه لانه اكيد يفكر عني كذا
ابوسطام : بتمشين على تفكير الناس مارح تفلحين يابنتي صلي استخارة وتذكري هاليتيم ولو تبين كلمتي انا من عندي موافق وبنتي تاخذ واحد عنده وفاهم الحياة الزوجية ومقدر حرمته قبل ياخذتس والكل شاهد افضل من تاخذين شباب مايعرف كوعه من بوعه
هديل : يعني لو رفضت مارح تغصبني صح
ابوسطام : انا اقول ابعدي كلمه رفض من راستس وصلي استخاره وترا للحين ماصار شى رسمي الله يهدي امتس
~~~ فالليل فالمزرعة ~~~
هايل : جاهزين ياعيال
زامل : هذي مغامره كبيره ياهايل والمفروض ناخذ شور ابوي
هايل : ابوي بيقول لا وبخاطره مليون اي وزامل تكفى لاتخرب
سطام : ارسلت لاهلي رساله لو صار وكذا
هايل : ليكون وضحت ياولد
سطام : لا لا
عبدالرحمن : وانا ارسلت بعد
هايل : كلكم ارسلتو
خالد : يوم فكرنا بالخطه عرفت ان حرمتي حامل
هايل : بصير خال فالجنة
زامل : وليش كل ذا هايل ليكون
هايل : اي اي اخذتها معي مانيب طالع من حارتهم الا معلم على وجهه وكل ماشافها تذكرني
سطام : اهجد ياابن الحلال
عبدالرحمن : تعال هايل ولد لاتنسى اهلك وحبيبتك الى متى بتنتظرك لو انسجنت متوقع ابوها مارح يزوجها تخرب حياتك عشان حثاله اهجد واتركها رايحين نتهاوش بس مانسوي شى اقوى
هايل : طيب طيب بحطها
عبدالرحمن : هاتها انا احطها
هايل : امسك
~~~ في بيت ام فهد ~~~
ندى : اهدي يايمه ليتني ماقلت لتس
عفراء : حتى زامل قال لي نفس الكلام وش ناوين عليه
ام فهد : يمه عيالي عيالي عطيني عباتي جلالي اي شى بروح لهم عيال مايدخلون السجن لا لا
ابوفهد : وش بيفيد صياحتس الحين اسكتي رايح اشوف الموضوع
ندى : يربي انك تحميهم
ام فهد : حسبي الله ونعم الوكيل
عفراء : خالتي تكفين اهدي خوفتي العيال تكفين
ابوسطام : وشو هديل يابنت
هديل : هلا يبه
ابوسطام : اخوتس مرسل شى
هديل : اي مرسل لي كلام غريب وتوقعته يمزح
ابوسطام : كلهم مخططين اجل مع بعض جهز وضعك يبوفهد رايحين للحارة الثانية
ابوفهد : يلا يلا ابوعزام ابوفارس
ابوعزام : بسم الله وشفيك ياخوي
ابوفهد : عيالنا راحو راحو
ابوعزام : وين راحو
ابوفهد : خذ اهلك وودهم لبيتي عيالنا رايحين يتهاوشون مع الحارة الثانيه
ابوعزام : بنرجع للمشاكل من جديد وش رايحين يسوون
ابوفهد : ماهو وقتك تسال ابروح انادي ابوفارس حتى ولده رايح
ابوفارس : حسبي الله حسبي الله جاي جاي
فرح : بيصير الي ببطني يتيم
ندى : وشذا الكلام انتي بعد اهدي
عفراء : يارب يرجعون سالمين
~~~ في المركز ~~~
زينب : فهد جايتك رساله من اخوك
فهد : اقريها
زينب : خذ اقراها انت
فهد : اقريها على يدي ابر
زينب : اخوك هايل يقول انتبه لاهلي يافهد ولاتخلي حلالنا يروح احنا رايحين ناخذ حقنا ان كان رجعنا فالحمدلله وان كان لا انتبه لعيال زامل ولاخواني واختار لندى الزوج الصالح وانتبه لامي وابوي وحلالي انت تعرفه
فهد : وشهو قايل لهم مايروحون بدوني اخ ياهايل وزامل وخري وخري
زينب : لاتفك الابر فهد يافهد وين رايح
فاتن : بسم الله الواحد حتى بشغله ماينام وين رايح ذا
زينب : هايل كاتب له رساله وقام وقال قايلهم مايروحون بدوني وراح
ميهاف : هايل حتى مرسل لي
فاتن : اشوف كانه رساله وداع
ميهاف : وين رايح ووش بيسوي وليه مارح يرجع
فاتن : من ذا الي كاتب كذا مو لازم تعرفيني بس خفت اروح وماارجع وانا مااعترفت لتس وتبقى بقلبي انا احبتس يافاتن من اول يوم جيتي فيه للقرية وقايل لاهلي عنتس وبخطبتس ادعي لي ارجع عشان اثبت لتس صدق كلامي وحبي حبيبتس دحيمم ، ثقه مره واثق اني احبه وبوافق اخذه بس وين راحين ذول وكيف جاب رقمي
ميهاف : طلبه هايل واعطتيه رقمتس
فاتن : ماشاء الله عليتس ياميهاف وبدون استئذان
ميهاف : خلينا من ذا انا خايفه عليه وش صار ووين رايحين
~~~ في حاره خلف ~~~
خلف : مجمع لك رخوم وجايبهم اشتقت للمجالد جلدك يحكك
هايل : انا ماني عشان ارجع هواش قبل وافتح مواضيع مالنا دخل فيها وتسكرت من سنه جدك انا جاي ارد لك الحريق حريقين وبدال مااحرق بيت اهلك بحرق حارتك كلها وبكتب لاهل حارتك الرخمه الي عندكم مايعرف يواجهه يعرف مثل الحرامي يحرق وينحاش
خلف : كانك ولد ابوك جرب واقدم واحرق
سطام : سد حلقك ياخلف
خلف : من اي مزبله جايبينك انت جابكم ابوفهد وخلاكم تصرفون عليه
زامل : الزم حدودك ياخلف لاخليك تصيح
عبدالرحمن : وين جماعتك مااشوفهم
خلف : ماكانوا بيجون بس دامك مشتاق لهم جوك
سعد : اذا ناوين تحرقون حارتنا احنا جايين نحرق روسكم
هايل : مايهبى الا وجهك
"قامت الهوشه بينهم وعيال حاره ابوفهد ماحسبو حساب ان جماعه خلف معهم عصيان"
زامل : هايل انتبه معه سكين

انتهى البارت

|قراءه مممتعة بكرا بارت جديد 💙💙|