"جابك الله في زحام العمر صدفة "

54

~~~ في الدكه ~~~
هايل : ياعيال ابوي وعماني جالسين يخططون على شى
عبدالرحمن : ماسمعت وش يقولون
هايل : لا ابوي عيا يخليني اقعد قال حط الشاهي وقم
عزام : وش بيخططون عليهم خططهم ماتتعدا القريه مااقول الا حسبي الله على ابوسطام قطع رزقي الله يقطع اسمه
هايل : والله حتى انا بس العيال اخوياء سطام للحين لهم تواصل معي
زامل : السلام
هايل : شعندك جاي
زامل : اوجعني راسي من صراخ اخوك وحرمته
هايل : اي ذا الي كان ناقص وابوخالد يسحب يده من مزرعه ابوي ونفقر فقر جماعي
زامل : الرازق الله اقول دحيم قم جب لنا من البقاله مفرحات
عبدالرحمن : هات قرشك
زامل : عاجز يالبخيل تدفع
عبدالرحمن : اي انا اجمع عشان اعرس
زامل : امسك امسك الموت ولا مذلتك
عزام : جب مشروب صاحي لااشوفك جايب كودرد وطقته تقل شخ ابل
عبدالرحمن : الله يقرفك ياشيخ
هايل : والله جبتها ياولد العم كفك
ابوفهد : قم انت واياه على حيلك وانت وين رايح
عبدالرحمن : البقاله تبي شى منها ياعم ؟
ابوفهد : انثبر محلك
هايل : جو ثلاثتهم قايل لكم وراهم شى
ابومحمد : اسمعوني انتم الثلاثه
زامل : الحمدلله طالع منها انا
هايل : تفضل ياعم
ابومحمد : نبي نوديكم مكان ثاني
عزام : صحيح ان قربنا للافلاس بس ماتوصل ياعمي تبيعونا ؟
ابوفهد : بنفتح وش يسمونه ياهايل
هايل : بزنس يابوفهد
ابوفهد : ايوه هو بنفتحه فالرياض ومن بيشتغل
عبدالرحمن : ايوه ذلحين انتم عيني فهمت عليكم كل شوي بتنقلوني بجهه صح
ابومحمد : ووش وراك انت لا ورعان وحرمه
عبدالرحمن : الا يبه انا ابي اعرس شف محمد فاضي
ابومحمد : اخوك محمد اظن عنده وظيفه ويشتغل فيها انت الي بتشتغل
عزام : والله شوفو اذا بيطلع لنا حلال من بزنس حقكم ذا اي بنروح
ابوعزام : ماحنا قاعدين نشاوركم احنا قاعدين نعلمكم بياخذكم عمكم ابومحمد وبيوديكم هنا كل شى جاهز والبضاعه بتجي بكرا الصبح وعندكم رجال هناك هو الي بيعلمكم كل شى الرجال عنده بنت بس ماندري كم عمرها اياني واياكم اسمع منه شى مايسرني بنته مثل اختكم فاهمين
هايل : سم طال عمرك انتم خيطو واحنا نلبس
عبدالرحمن : وزواجي يبه
ابومحمد : لاحق عليه انا اكلم ابوالبنت واعلمه بكل شى مانيب مزوجك ياولدي وانت ماعندك وظيفه صح ولالا يابوفهد وابوعزام
ابوفهد : الا صح كلامك وبعدين وش زواجه وانت توك ورع
عبدالرحمن : جاء عمي عاد يبي يكحلها اعماها زواج حلال على سنه الله ورسوله لاهو خطا ولا هو حرام
ابومحمد : وعلى هالشنب يابوي ان البنت لك ومحد ياخذها غيرك وش تبي غير هالكلام
عبدالرحمن : وعد رجال يايبه ترا مابي غيرها
ابومحمد : وعد رجال وانا اذا وعدت مااخلف وانت عارف
عبدالرحمن : زين وش بنشتغل هناك
ابوعزام : هايل بيشتغل فالورشه لان ابوفهد الي بيمسكها وانت ياعزام بتشتغل فالبقاله وانت يادحيم بتشتغل فالمحطه وهم كلهم في مكان واحد
هايل : ووين نرقد
ابوفهد : الرجال الي طلب ابومحمد نعينه بارضه عنده بيت جنب الحلال الي بنحطه وتسكنون فيه وبنته الي تطبخ لكم
زامل : وش بيستفاد هالرجال
ابومحمد : الارض ارضه عيا يبيعها يبينا نبني عليها بايجار يعني الي نستفاده من حلالنا نعطيه منه ذي فكرته
هايل : ابد تم بس ليه يابوفهد تختار ورشه انا وش عرفني بشغل الورشات
ابوفهد : اودك تتدرب في ورشه الي هناك وبس تصير معلم
عزام : وانا ويني وين الحسابات
ابوعزام : غاثنا بشهاده هالبكورس حقتك
عبدالرحمن : بكالوريس ياعم ههههههههههههههههههههههههههههههه
ابوعزام : الي هي
ابومحمد : وتعبيه البانزين مايبيلها شى تعرف
عبدالرحمن : اي انا اعرف لكل شى
ابوفهد : وعمتكم جهير بتحط مسجد وياويلكم مااسمع صوت الاذان وانا هنا
هايل : وشلون بتسمعه
ابوفهد : المقصد ماتهجرونه كل فرض تاذنون وتصلون فيه سمعتوني
هايل : اي اي سم
ابوفهد : زين استوعبتو بكرا الصبح تمشون والحين يلا اقمزو لمحطه ابوسحر عشان تتدربون يله
~~~ في محطه ابوفهد~~~
ابوسحر : يامرحبا وش بغيتو
ابوفهد : ياهلا والله شلونك شلون الاهل
ابوسحر : ابد كلهم بخير ولولا الله ثم انت واخوانك ماتعيشنا ودخلت اللقمه ببطونا
ابوفهد : مالي فضل عليك يابن الاجاويد بس جايك وابطلبك طلب
ابوسحر : ابد الي تبيه يجيك
ابوفهد : عيالي هذولي الثلاثه ابي اشغلهم بحلالي الي فالرياض مابين ورشه وبقاله ومحطه بانزين وهم مايعرفون بهالاشياء فابيك تدربهم واضغط عليه لان بكرا الصبح بيمشون لشغلهم
ابوسحر : اي ياهلا بالشباب ويامرحبا مليون تعالو يابوي انتو ابد بعيوني هم وبطلعهم لك معلمين فالورش بس اي واحد فالورشه واي واحد فالمحطه واي واحد فالبقاله
ابوفهد : ذا عزام بيشتغل فالبقاله وذا هايل فالورشه وذا عبدالرحمن فالمحطه
ابوسحر : ابد تم على يديني ان شاء الله يطلعون معلمين
عزام : والله ماضنتي وابوك وراه يقول اضغط عليهم
هايل : قل عمي وبعدين وشدريني انا جيزي من جيزك
عبدالرحمن : الله يعين على افكارهم
ابوسحر : تعال ياسمير شف ابيك تعلم هالولد على شغل البقاله ابيه يصير مثلك يحاسب ويكيس وييبيع ويعطي الاسعار وهو واقف
عزام : لا الله يحفظك يابوي مخي ماهو كمبيوتر
ابوسحر : وش قلت
عزام : ولا شى سلامتك اروح مع ذا
ابوسحر : اي رح وراه وانت يارضا خذ ذا وابيك تعلمه شلون يعبي بنزين وتعلمه طريقه الاسعار وشلون يخدم مليون سياره بدقيقه
عبدالرحمن : مايدري انهم حاطينا في مقطعه البانزين بيعفن وماجاء احد
هايل : انت الي بتعفن من قال البانزين يعفن
ابوسحر : يلا وش تنتظر واقف رح مع رضا
عبدالرحمن : وينك يارضا فكني من ذا
ابوسحر : وعاد انا شغلتي الورشه امش وراي
هايل : وانا ماطحت الا فيك انت ياعيال
عبدالرحمن : يلا يلا اذلف وراه قايل لك بدلني
~~~ في بيت ابوعبدالعزيز~~~
ام عبدالعزيز : ها يابنتي وشلون عبدالعزيز معتس عساه ماهوب مجننتس
ميهاف : والله ياخاله انا صريحه مثل ابوي ولدكم ناشب بحلقي
عبدالعزيز : اسرار البيت ماتطلع
ام عبدالعزيز : انت اسكت قولي لي ياحبيبتي وش مسوي لتس واوريتس فيه
ميهاف : والله مجنني بكل شى مايبي يساعد ولا يبي ياكل ولا يبي يطلع
عبدالعزيز : يمه تراها تتسذب ذي هي الي تسوي كذا
ميهاف : ههههههههههههههههههههههههههههههه
ام عبدالعزيز : الله يهديكم خفي على وليدي يابنت صقر تراه وحيدي وماعندي غيره
ميهاف : على كذا بخليه عندتس وبعيش لحالي فالشقه
ام عبدالعزيز : لا ماهو اتفاقنا انتم بتجون وتسكنون عندنا البيت كبير وفاضي
عبدالعزيز : اي اكيد يمه بنجي واصلا عفشنا فالسياره بنزله الحين وميهاف تخدمكم
ميهاف : الله يصبرني
ام عبدالعزيز : بما انه راح قولي لي يابنتي وش فيتس على ولدي
ميهاف : مافيني شى كنت احارشه بس
ام عبدالعزيز : يابنتي عبدالعزيز ليله عرسكم جانا الفجر وجلس يصيح ويصارخ هنا وطرش دم وش صاير
ميهاف : اها قصدتس ليله العرس مدري انا نمت
ام عبدالعزيز: تدرين يابنتي يوم شفناه انا وابوه كذا قلنا طلقها الحين بس تدرين وش قال
ميهاف : وش قال
ام عبدالعزيز : قال انا احبها ومابي غيرها وحتى لو هي ماتبيني انا بنتظرها الين تصير تبيني يابنتي وين بتلقين احد يحبتس كثره
ميهاف : ياخاله انا مارفضته الا لسبب وكلكم تعرفونه وانا قلته له قبل اتزوجه ليش اصريتو تخطبون ياخاله اذا على حبه فانا لاقيه الي يحبني اكثر منه والحب لاهو عيب ولا هو حرام وعبدالعزيز ماقصر مع كل الي صار للحين يعاملني كويس وبدال مايضربني على الي صار بليله العرس راح وطلع كل غضبه عندكم وجاني بكل ابتسامه وحنان عبدالعزيز يستاهل بنت افضل مني وتحبه اكثر مني وانا قلت له وبقولتس الحين وياليت تقولين لعمي بعد انا مستحيل احب احد كثر الي كنت احبه حتى لو حياتي صارت هاديه مع عبدالعزيز ومستقره فهذا اجبار من ابوي ولا انا مستحيل احب عبدالعزيز بتقبله لاني مجبوره وبكمل حياتي معه وبعزه وبحترمه وبقدره بس احبه لا والله ياخاله لاينتظر مني هالشي
ابوعبدالعزيز : كنتنا هنا وانا مدري
ميهاف : هلا عمي
ابوعبدالعزيز : وين عبدالعزيز
ام عبدالعزيز: ينزل الشناط
ابوعبدالعزيز : اي زين زين وشلونتس يابنتي وشلون ابوتس
ميهاف : بخير
عبدالعزيز : ميهاف تعالي عشان نرتب الاغراض فوق
ميهاف : اي يلا أستأذن
ام عبدالعزيز : اذنتس معتس يابنتي
ابوعبدالعزيز : وش كنتو تتكلمون فيه
ام عبدالعزيز : سوالف حريم
ابوعبدالعزيز : بكت لها رجال
ام عبدالعزيز : وش تقصد
ابوعبدالعزيز : وانا جاي شفت عبدالعزيز واقف وراء الباب ويوم شافني مسح دمعته بغترته ومشى وماظنتي ذي دموع فرح
ام عبدالعزيز : والله مافي بهاليد حيله الله يصلح بينهم ويهديهم
~~~ في شقه عبدالعزيز وميهاف ~~~
ميهاف : ليش احنا نرتب فيه شغاله هنا ترتب
عبدالعزيز : عارف انتس رفلاء ومانديتس عشان نرتب
ميهاف : خير ان شاء الله وش هالاسلوب
عبدالعزيز : اي تعودتي تغلطين وتنطلين كلام كبر الجبال وانا ارد عليتس بكلام مثل العسل صح ولالا
ميهاف : وش له داعي العصبيه خلاص نرتب الحين
عبدالعزيز : ومن قال اني مناديتس عشان ترتبين
ميهاف : تستهبل انت ؟
عبدالعزيز : الي بيننا مايطلع لا اهلي ولا لاهلتس ماهو عشان احفظ غلاتس عندهم لا والله ماهميتيني بس عشان مايشيلون هم
ميهاف : ومن قال اني تكلمت عن حياتنا عندهم
عبدالعزيز : لو ماجاء ابوي وقاطعكم كبيتي كل العفش انتي ماتستحين على وجهتس تقولين كلام كذا لام زوجتتس ؟
ميهاف : صارت الصراحه تزعل
عبدالعزيز : ماتزعلني تعالي قوليها بوجهي لاتقولينها لامي
ميهاف : خلاص خلاص بلا كثره كلام اطلع
عبدالعزيز : والله لو انتس منتي مره لافرشتس هنا بس المرجله ماهي عالحريم
ميهاف : انت حتى الرجال ماتقواهم اطلع اطلع الله يصلحك وارسل لي خدامتكم
عبدالعزيز : تخدمين انتي وانتي ماتشوفين الدرب يلا
ميهاف : تجي ترتب اشيائك علمتك
عبدالعزيز : تخسين وخليني ارجع وماشوف كل شى مكانه
ميهاف : يمه خوفتني وش بتسوي يعني
عبدالعزيز : عمي صقر مايقصر بهالمواقف هو قدها
ميهاف : تهددني بابوي ياعبدالعزيز
عبدالعزيز : ماعاد عندي لتس ذره لا احترام ولا تقدير ولا محبه ولا موده ودامتس تبين كذا حالنا من ليله العرس يلا انبسطي قلبت عليتس
ميهاف : اطلع برا لاتطلع اصواتنا لهم
عبدالعزيز : لاتطرديني من بيتي
ميهاف وهي تصيح : انقلع الله ياخذك
فاتن : ليش تبكين
ميهاف : احمدي ربتس ان هذا ابوتس تكفين احمدي ربي
فاتن : الحمدلله الف مره بس وش الطاري متصله تقولين كذا
ميهاف : متهاوشه مع الي عندي
فاتن : قال لتس شى
ميهاف : مابقى شى ماقاله يوم جينا عند اهله طلع وجهه الحقيقي
فاتن : بعد الصبر حدود ياميهاف
ميهاف : مابيه مابيه
فاتن : وكلي امرتس لربي والي كاتبه بيصير
ميهاف : خلينا منه هو الحين انتي وش مسويه خلاص تثبتي فالوظيفه
فاتن : لا للحين تحت التدريب وجمعت شهادات تدريب وتطوع وبيفيدوني انوظف بسرعه انتي شصار عليتس للحين زوجتتس رافض تتوظفين
ميهاف : ماكلمته فموضوع الوظيفه وماله حق يرفض شصار عليتس انتي ودحين
فاتن : اخر مره جيت للقريه عشان اخته كلم ابوي انه يبي يجي يخطب والسالفه صار لها اسابيع وليومتس ذا ماجاء ولا اتصل ابوه على ابوي
ميهاف : تتوقعين رفضو مثلي
فاتن : مايهمني ولدهم الي يبيني ولا انا مادريت عنه همي ابوي ووظيفتي
ميهاف : تصدقين بعد كل الي صار لي توني اقتنعت بكلامتس الي لما كنتي تقولينه لي اول ماتعرفت على هايل
فاتن : كان نصايحي ذهب بس وينتس ووين السمع
ميهاف : لو ماحبيت هايل كان عطيت عبدالعزيز فرصه بما انه هو نصيبي
فاتن : صدقيني لو هو نصيبتس رح تحبينه وتكملين حياتتس كلها معه انسي لي ولد القريه الحين وعطي زوجتتس فرصه بكل الاحوال حتى لو انفصلتي عن عبدالعزيز مارح يجي هايل يخطبتس سبق لتس زواج وهو ماسبق له
ميهاف : ماانتظره يجي يخطبني ولا انتظر عبدالعزيز يطلقني يكمل الحياه الي ابوي اختارها لي
فاتن : بس وريحي راستس من المشاكل
ميهاف : صادقه اقول اشتقت لتس ماودتس تجيني
فاتن : والله انا ياله امسك جوالي وارد عليتس الشغل كثير تعرفين مستشفى حكومي وزحمه وانا تحت التدريب لازم ابرز نفسي لهم
ميهاف : اجل الله يوفقتس بين فتره وفتره دقي علي طمنيني عنتس وتعالي لبيتي اشوفتس
فاتن : من عيوني وانتي اعقلي وعيشي حياتتس وانسي الماضي كله
ميهاف : ان شاء الله بحاول
~~~~ في محطه ابوسحر ~~~
ابوفهد : ها بشر عساهم تعلمو
ابوسحر : ابد ان شاء الله كلهم صارو معلميين بهالشغله
عزام : ياعيال عطوني كيس بطرش
عبدالرحمن : وش ماكل
عزام : اكلني ارقام وحسابات اشوف ارقام قدام عيوني الحين
هايل : الله يقرفك عطه ماء ولا مناديل
عبدالرحمن : افضخ ثوبي ولا من وين اجيب له
ابوعزام : امسك ذا الحين الجامعي
عزام : بسلم شهادتي واقعد فالبيت
ابوفهد : ذا شغلكم هناك ومحد بيوقف فوق روسكم سامعيني ولالا
هايل : والله يابوفهد صرنا حرييفين مدري معلميين اي شى يجي سيارتك تعال عندي
ابوفهد : ياله عسى تفلحون بشي روحو جهزوا اغراضكم عشان تمشون للرياض يلا بيجي ابومحمد الحين ياخذكم
عزام : الله يعيني عليكم ياعمي ويابوي

انتهى البارت 💞