"جابك الله في زحام العمر صدفة "

23

~~~ في شقة ابو سطام ~~~
سطام بعصبية : هديل احسن لك اذلفي ترا ان قمت ماهو زين لتس
هديل : طيب قم بعدين نتهاوش يلا ياسطام
سطام بصراخ : لاتسحبين البطانيه وشغلي المكيف هدييل
هديل وهي تضحك : طيب قم وبسوي لك كل شى
سطام : انتي الي جنيتي على نفستس
هديل : يبهه يمه الحقوني ثوركم هاج علي
ابوسطام : وشفيك على بنيتي
سطام : خلها تذلف عني يايبه جايه تحارشني من صباح الله خير تعالي
هديل : مت قهرر ابوسطام تفاهم مع ولدك المجنون ذا
ابوسطام : روحي انتي روحي ماتجتمعون بمكان الا تتهاوشين وانت ليه ماتسمع كلام اختك انا الي مرسلها تقومك اخلص اجهز بنطلع نفطر
سطام : وانتو طلعاتكم ماتجي الا اذا نمت طيب قايم
ابوسطام : وانت مغير نايم لا صلاة لا عبادة لا اكل لاقومه مع المسلمين اسمعني ياسطام كان ذا نظامك والله لارجعك للشرقية لحالك تمسك الشغل
سطام : اي هذا الي انت تبيه يبه ترجعني
ابوسطام : عاد علمتك وحط كلامي براسك اذا ماتعدلت وصرت مثل الرجال رجعتك لحالك وجرب الحياة بدون امك واختك هذا بدال ماتقمز مثل الرجال الصبح وتصلي فالمسجد الدلع طال معك وانت ماتستاهل عندك ٥ دقايق تخلص وتنزل
ام سطام : وشفيك يرجال عليه مايبي يطلع خل يقعد
ابوسطام : لا يطلع وهو مايشوف الدرب دلعناه بزيادة
ام سطام : اي بس ماله داعي تهاوشه ماسوا شى
ابوسطام : دلعتس هذا له مخربه خليه علي وغير عن كذا انا مابي يده تطول على اختة
هديل : يبه لاتزعل منه انا نرفزته الخطا مني ماهو منه
ابوسطام : معليه يبنتي انا ماعجبني نومته الين ٨ ومايقوم يصلي وانتي خفي على محارشه اخر مره انا الي بهاوشتس
هديل : ابشر يبه عطني مفتاح السيارة بنزل اشغلها تحمي
ابوسطام : اي يلا امسكي
~~~ عند درج الشقق ~~~
ابوفهد : وينه تاخر ايوه هذا هو
هديل : احم الحين ابوي بيجي الي يبي يركب معنا يجي بشغل السيارة
زامل : اسلم تعرف تسوق
ندى : عقبال ماتعلمني
زامل : انا خليني اشتري سيارة لنفسي بعدين اعلمتس
سطام : صبحكم الله بالخير معليش انا الي اخرت اهلي
ابوفهد : حصل خير يولدي وين ابوك
سطام : هذا هو
ابوسطام : اعذرنا يبوفهد تاخرنا عليكم تفضل عالسيارة
هايل : انا بنتظر فهد وسياف يمروني ونجيكم
زامل : اي حتى انا
عزام : زامل خذ سيارتي واهلك مع اهلي ورح انا وهايل بنجلس
زامل : على خير هات المفتاح
سطام : وانا من يركب معي امشو ياعيال معي
- ركبو السيارات -
~~~ في سيارة ابوسطام ~~~
ابوسطام : فيه حديقة معينة تبونها
ابوفهد : اقرب حديقة عندك نزلنا عندها والعيال يجيبون الفطور معهم
ابوسطام : طيب طيب ها هذي اقرب حديقة وقريبة من شقتنا
ندى : مسرع
هديل : معليتس فالليل ابقنع ابوي نطلع مع بعض غير هالطلعة
ندى : ابوتس بيوافق بس ابوي لا
هديل : اكلم ابوتتس
ندى : وخزياه انزلي انزلي برجع للقريه مافريت هالرياض كلها
هديل : تاخذين اخوي وافرفرتس
ام سطام : هديل خلي عندتس كثره الكلام وانزلي نزلي الاغراض
هديل : أبشري
ابوفهد : يلا جيبو الفرشات ياعيال ودقو على فهد علموه موقعنا
ابوسطام : ابو محمد وابو خالد مارح يجون
ابوفهد : لا والله عندهم اشغال احنا العاطلين بس
ابوسطام : لاتذكرني يبوفهد هي كلها كم شهر وبرجع للشرقيه والله ماودي جازت لي الشرقية وحنيت لايامنا قبل
ابوفهد : ليتها ترجع هذيك الايام يبوسطام اي والله ليتها ترجع
ابوسطام : متى بترجعون للقرية
ابوفهد : هاليومين ان شاء الله
ابوسطام : اجل شكلي بسبقكم عندي اشغال بالقرية وحرقو جوالي
ابوفهد : وش شغلك بالقرية
ابوسطام : اراضي وكانك تبي تشتغل معنا دخلتك معي
ابوفهد : وش نظام الشغل
ابوسطام : اراضي نبيع ونشتري فيها
ابوفهد : لها مكسب قوي
ابوسطام : والله البنك الي يشتغل فيها ولد اخوك عزام من هالشغل فتحتها
ابوفهد : ان شاء الله لاشفت فيه مكسب من حلال المزرعه دخلت معكم ابسالك وش نظام شغل البنك حقك
ابوسطام : ابد بنك مثل باقي البنوك يجونك عملاء يبون يعدلون صرافه يبون يفتحون صرافه وهكذا
ابوفهد : ودي توظف ولدي سياف تعرف مقبل على زواج وماهو كل مره بصرف عليهم انا
ابوسطام : هذا خطاك يبوفهد عودتهم على شغل القريه وماخليتهم يعتمدون على انفسهم بس ابشر عيالك كراسيهم جاهزة باي وقت
ابوفهد : زامل ماودي اخليه يروح ابخليه هو وهايل يشيلون الشغل الي هنا وابوظف سياف عندك
ابوسطام : ابد تم خله يمرنا فالبنك ومايصير خاطرك الا طيب
ابوفهد : ماقصرت
ابوسطام : متى بتحطون عرسكم
ابوفهد : لو علي خليته اليوم قبل بكرا
ابوسطام : وش رايك تخلي العرس علي والله عيالك هم عيالي
ابوفهد : العرس فالقرية
ابوسطام : استهد بالله وخله علي وماعليه اذا ماودك تخليني ادفع ندفع مع بعض ونحط عرس يتكلمون فيه كل اهل الرياض
ابوفهد : ماودي اسوي كذا لسياف وانا ماسويت لفهد وزامل
ابوسطام : يبو فهد وش فيها لو حطيته غير هم اعرسو وخلصو وجابو عيال بعد
ابوفهد : فهد توه معرس ووقت عرسه جاه حادث وماتت زوجه محمد
ابوسطام : اجل عذرك معك تحتلفون وعندكم ميت قل تم يبوفهد واترك الباقي علي
ابوفهد : تعرفني مقدر ارفضك تم
ابوسطام : باذن الله الجمعة الجاي العرس لو خلصت العروس اغراضها
ابوفهد : باذن الله وين فهد
هايل : بالطريق يبه
عبدالرحمن : السلام عليكم
ابوفهد : هلا وين ابوك
عبدالرحمن : ابوي عنده شغل تعرفون انا العاطل هنا
ابوفهد : وابوسالم
عبدالرحمن : ابوسالم شكله حتى مارح يرجع للقريه
ابوفهد : ليه عسى ماشر
عبدالرحمن : مامن شر ياعمي بس تعرف سالم صار عمره ٧ سنين وصار لازم يدخل الروضة ومحمد محيوس يدور له روضه
ابوفهد : صار لازم لاخوك زوجه
عبدالرحمن : للحين ماجف تراب المرحومة مرته ياعم بعدين على هالكلام
ابوسطام : اخوه الي معه ولد هو الي زوجه متوفية
ابوفهد : اي هو الله يرحمها
ابوسطام : امين وين الفطور للحين ابدق اشوف سطام
سطام : هلا يبه
ابوسطام : رايحين تجيبون الفطور من الشرقية
سطام : هذانا نشوفكم يلا قريبين
ابوسطام : يلا جهزو السفرة ياهديل
هديل : سم يبه أبشر يلا ندى ساعديني
هايل : ندى ندى
ندى : وشفيك خوفتني
هايل : ترا سياف جايب لتس جوال
سياف : انت محد يعلمك
ندى : صدقق
سياف : اي تستاهلينه ياحبيبة اخوتتس
ندى وهي تصيح وتحضنه : سياف ياخي والله اني احبك
سياف : ههههههههههههههههههههههههههههههه وفيت لوعدي لتس
فهد : زينب
زينب : هلا
فهد : سياف يبي رقم حرمته
زينب : طيب بعطيه ندى تعطينه اياه
فهد : زين السلام عليكم
ابوفهد : وينك رايح من الصبح
فهد : رحنا نجيب لسياف جوال تعرف طلب حرمته تكلمه
ابوفهد : لاعاد تطلع بدون شوري
فهد : يبه انا مارح ارجع معكم للقرية
ابوفهد : وليش
فهد : اجازه الزواج حقتي خلصت لازم ارجع لشغلي
ابوفهد : اي معك حرمتك ارجع احنا بنجلس هنا بعده لمدة
فهد : كويس
ابوفهد : سياف ترا عرسك الجمعة الجاي
سياف : ليش مستعجلين يبه
ابوفهد : نبي نرجع لديارنا ووصيت عمك ابوسطام يدور لك شغل
زامل : واحنا
ابوفهد : انت وهايل تبقون عندي تشيلون الشغل
زامل : وش المعنى سياف اي وانا لا
ابوفهد : كلمتي وحده ماتكرر قلت سياف يعني سياف
زامل : طبعا نسيت الدلع كله لفهد وسياف
هايل : يبه خل زامل يتوظف وانا بمسك الشغل الين اتزوج وبعدين اتوظف
ابوسطام : وانا اتفق مع كلام هايل زامل متزوج وعنده عيال لازم يتوظف
ابوفهد : ومن بيساعد امك بشغل البيت ندى وبتتزوج واخوانك وحريمهم بيروحون
هايل : انا اساعدها بعد
ابوفهد : دامك تكلمت تحمل الي يجيك
هايل : ابد تم افرح يبوعبدالله بتروح وبتفتك من شغل القرية
ابوفهد : يلا يلا افطرو
هديل : اممم من زمان عن المناقيش
زينب : خلاص ياندى مسحي دموعتس وكولي
ندى : مابغى سياف يتزوج ويخليني
هديل : ههههههههههههههههههههههههههههههه والله مجنونة هالندى
ام فهد : خلاص افطري ياندى
ندى : طيب
~~~ في بيت ميهاف ~~~
ام عفراء : خلصتي كل شغلتس
ميهاف : اي كل اوكي
ام عفراء : اطلعي جيبي الناقص من البقالة ولاتنسين تجيبين الاشياء الي يحبونها عيال بنتي
ميهاف : طيب بقترح اقتراح عشان تاخذين راحتتس انتي وبنتتس انا بروح لبيت خويتي فاتن شرايتس
ام عفراء : لا انطقي القهوة لازم تجدد
ميهاف : طيب بجيب خويتي عندي
ام عفراء : اي ميخالف بس لاتطول
ميهاف : تمام ان شاء الله
فاتن : ها وش عندتس متصلة
ميهاف : وشفيتس علي
فاتن : ليش ترسلين رسالة حبيبتس جاني جفاف
ميهاف : ههههههههههههههههههههههههههههههه اسمعي
فاتن : ها
ميهاف : تعالي عندي اليوم اشتقت لتس
فاتن : وش جدولتس
ميهاف : امم نسولف ونتابع وناكل فيه احلى من كذا نجتمع بمكان غير المستشفى
فاتن : فيه مليون مكان يمدي نجتمع فيه بس زوجه ابوتس ذي اخخ لو اصيدها بس
ميهاف : يوه يافاتن لاتخربين روقاني اليوم مابغى ازعل ابدا يلا بقفل تعالي الساعه ٤ زين
فاتن : طيب طيب
~~~ في الحديقة ~~~
هايل : وانا ماجبت لي جوال
سياف : لا ليه اجيب لك
هايل : اي طبعا لقى احبابه نسى اخوانه
سياف : ههههههههههههههههههههههههههههههه انا واعد ندى من مبطي انت ماوعدتس
هايل : سهله اوعدني الحين وجبه لي بكرا
سياف : وراي عرس انا بتطفرون فيني
هايل : كلك ديون يخوي هي وقفت على جوال
فهد : خلك منه ذا امرك عندي ياهايل
هايل : صادق
فهد : اي اي صادق من متى اقول كلمة واتراجع عنها
هايل : يلا بنسى عشان لو جبته يعنني مادري
سطام : ههههههههههههههههههههههههههههههه عليه حركات اخوكم ذا
ابوفهد : عبدالرحمن
عبدالرحمن : هلا عمي
ابوفهد : ابوي وينه
عبدالرحمن : والله ياعمي جدي احسه ماهو بخير
ابوفهد : عسى ماشر وشقيه
عبدالرحمن : بعد ملكه سياف امس قال بينام بالمجلس عيا ينام بغرفته وقال تعالو اقعدو عندي وفجاه يحس بالبرد وفجاه بالحر ومشغل عالتلفزيون وضعه غريب
ابوفهد : دق دق على ابوك يطمنا
عبدالرحمن : ابوي بالشغل
ابوفهد : دق على اي احد اختك امك
ابوسطام : اهدا يبوفهد ان شاء الله مافيه الا العافية
عبدالرحمن : زين زين انتبهو له
ابوفهد : وش صار قل
عبدالرحمن : بخير هو تطمن ياعمي
ابوفهد : يلا يلا رجعنا
هديل : يبه وصلنا للمول انا والبنات
ابوسطام : وش موله الي تبونه
ابوفهد : كانك بتنزل بنتك بكيفك ندى ماتخطي خطوة
ندى : يمه اقنعي ابوي تكفين
ام فهد : الحين ابوتس معصب ولو تكلمنا بيهاوش اجلوها بعدين
ابوسطام : بتروحين لحالتس
هديل : لا باخذ البنات معي
ابوسطام : وافق يبوفهد ترا جيلههم غير جيلنا هي هالمره وبترجعون للقرية خلهم ينبسطون
ابوفهد : خلاص روحي
ندى : يس
زينب : احم فهد
فهد : وشتبين
زينب : ابطلع مع البنات للمول
فهد : وش لتس شغل هناك
زينب : مع البنات بنبسط وبطلع مصيرنا بنرجع لقريتكم
فهد : ومن قال بنرجع
زينب : ها اجل
فهد : ابنجلس هنا شقتي موجودة وبرجع لشغلي
زينب : لا عاد شلون بتجمع معك انا في بيت اهلك وجايتني كتمة
فهد : نامي في بيت اهلتس
زينب : طيب الحين وش قلت ابروح معهم
فهد : روحي ابحول لتس فلوس وخذيها لتس انتي وندى كل شى تبيه ندى تشتريه
زينب : اوهه تمام
ندى : جد قال كذا
زينب : اي اي اليوم يومتس مدلعه من كل الاتجاهات
عفراء : زامل يلا وقف لنا سيارة ونروح لبيت أهلي
زامل : اي يلا
~~~ بعد مرور أسبوع ~~~
ابوسطام : وشرايتس نحط العرس بفندق
ام سطام : وانا اتفق مع رايك
هديل : انا اقول ناخذة بقاعه حصلت قاعة حلوة بس قولو تم ونروح ونشوفها
ابوسطام : يلا كلميهم يرسلون الموقع ونمشي اخوتس وينه
هديل : طالع كلمه العريس يروحون يحجزون اشياء
ابوسطام : وش يحجزون انا قايل كل شى علي ابدق على ابوفهد
ابوفهد : هلا بابوسطام
ابوسطام : وش سمعت يبوفهد انا قايل لك كل شى علي وش رايحين يحجزون هم
ابوفهد : سامع العلم غلط ولدك سطام رايح يختار الحلويات والتقديمات وهذا سياف عشان يختار بذوقة
ابوسطام : غلطان انا ابي كل شى مفاجأة
ابوفهد : الغلط على ولدك يبوسطام
ابوسطام : طيب طيب اجهز العصر ابمرك واخذك تشوف القاعه انت وابو محمد
ابوفهد : خلاص على خير ان شاء الله

انتهى البارت

| قراءة ممتعة اعتذر عن التاخير البارتات كانت جاهزة بس حبيت انزلها بالويكند عشان تقدرون تقرونها بالتوفيق |