بسم الله الرحمن الرحيم
بما إن الرواية إنتهت بشكل رسمي ففي كام نُقطة و كام رسالة كنت عايزة أوضحهم من أول الرواية و عملت الفصل ده عشان أوضح إللي عايزة أوصله من الرواية دي ...
هنبدأ الأول باسم الرواية " قلب محظور " و ليه سميت الرواية بالاسم ده ؟؟
تصنيف الرواية رومانسي، طبعًا في كوميديا و في شوية أكشن و جرايم قتل بس أساس الرواية هيفضل رومانسي عشان كدة ركزت أكتر على العلاقة إللي ما بين الأبطال و إزاي بيتخطو كل الظروف و المصايب دي مع بعض، و لو لاحظتو إن أبطال الرواية كلهم قلوب محظورة، يعني ناس فاكرة إنها لا يُمكن تحب و تتحب، خاصة شخصية ميرال إللي فاكرة إنها مؤذية لكل إللي حواليها بعد إللي حصل مع صاحبتها فريدة .
و شخصية يوسف كمان، هو صحيح فاكك عن ميرال بس بردو عنده عقدة من و هو صغير خليته يبقى الطرف الأقوة في العلاقة عشان ميحسش بالخسارة تاني.
أما بقى شخصية إياد فكان واضح هو ليه كان قافل قلبه، و ده عشان حُبه و إخلاصه لفاتن إللي كان بيحبها و ماتت، و مايا كمان كانت قافلة قلبها على أمل إن جوزها يرجع من السفر خصوصًا و هو سابها و هي معاها طفل.
و شخصية مالك كانت رافضة الحُب لأنه عايش على الخداع و النصب لغاية ما نسي يعني إيه حُب أصلًا، و هاجر كمان إللي تبان هبلة و عبيطة في الأول بس الحقيقة إنها كانت بتتجنب كل مشاعر الحُب عندها عشان خايفة تِظهر للناس ظروفها و حقيقتها.
و حتى شخصية جومانا إللي تبان حياتها بسيطة و ساذجة كانت قلب محظور بالنسبة لعُمر إللي أهله مكانوش موافقين عليها لأنها مختلفة عنهم .
و أحمد إللي كانت قصته ثانوية بردو كان محظر قلبه عشان كل همه هو مصلحته و بس لدرجة إنه آذى ناس كتير لغاية ما إتعاقب في الآخر .
بإختصار شديد كل الشخصيات كان عندها أكتر من سبب يخليها تحس إنها مكروهة و متعرفش يعني إيه حُب عشان كدة هي قلوب محظورة ....
تاني حاجة هتكلم فيها هي الهدف و الرسالة من الرواية ...
الرواية دي إتكلمت فيها عن أكتر من موضوع و أكتر من قضية، يمكن مديتش حلول صريحة بس حاولت أبين طريقة تعاملنا مع المشاكل دي ...
من أهم رسايل الرواية هي التصالح مع الذات، دي الحاجة إللي إتكلمت فيها من أول الرواية لآخرها، إننا مهما عملنا ذنب و مهما كانت الغلطات إللي بنعملها لازم يكون في جزء جوانا متسامح، جزء عايز يبقى أحسن، و دا بالظبط ظهر في حكاية ميرال إللي كانت عايشة على ذنب موت صاحبتها و الراجل إللي قتلته دفاعًا عن النفس .... صحيح هي عانت كتير من الموضوع ده و بقيت مترددة و متوترة و دايمًا فاكرة إنها مصدر آذى للي حواليها بس في الآخر إتصالحت مع نفسها و قررت إنها تبقى إنسان أحسن مهما كانت الظروف إللي بتواجهها .... صحيح هي إتخانقت كتير مع يوسف و كذا مرة كانت عايزة تسيبه بس ده الطبيعي بالنسبة لشخص زي ميرال بعصبيتها و تسرعها ..
أنت تقرأ
قلب محظور ( مكتملة )
Romanceهناك قلوب تحيا لتكتنفها نفحات العشق و الحنان ، و هناك آخرى تسعى لنيل المجد و المكانة بين الناس ، لكنني تركتهم جميعهم و إخترت أن أحكي عن تلك القلوب المشتتة التي لا تعرف ذاك الممر الوعر الذي ألقيت به ، فلا هي قادرة على إكماله و لا هي قادرة على العودة...
