تادخلات لداخل كاتبان ليها نعيمة متكية فالفراش وحداها واحد المرأة أخرى لابسة بيجامة زوينة وسخونة بالبينوار ديالها ودايرة زيف واخا كاتبان كبيرة ولكن فوجها ماباينش بالتهلو لي دايرة لراسها ..
شهد : السلام عليكم ..
نعيمة : ( شافتها ) شهد الله اله على ابنيتي جات لعندي ..
المرأة : ناضت من الكرسي بابتسامة ) السلام عليكم ابنتي ( سلمات عليها بلابيز ) صاڤا عليك بيخير ..
شهد : لاباس الحمد لله ( شافت فنعيمة ) خالتي كيبقيتي ..
نعيمة : الف خير ابنتي مين شفتك ..
المرأة : خالتي هاني مشيت لاحتاجيتي شي حاجة عيطي لغفران هي تجي لعندي ..
حركاتليها نعيمة راسها ومشات خرجات هي والخدامة غفران وسدو موراهوم الباب بقات غير شهد ونعيمة ..
نعيمة : كيدايرة ابنيتي لاباس ؟ ..
شهد : الحمد لله اخالتي نتي لي كيف بقيتي ..
نعيمة : ايوا ابنيتي مولفة كل صباح نصبح على نورك كيف بغيتي نكون ..
شهد : ( باستليها يديها ) لهلا يخطيك اخالتي نعيمة ..
نعيمة : فرحت أبنيتي باش قبلتي تعتاني بيا ولبتي طلب حفيدي ..
شهد : ( عضات على شفايفها وخدات نفس عاد هضرات ) صراحة اخالتي انا ماقبلتش ومالبيتش الطلب ديالو ..
نعيمة : كيفاش وعلاش واش على الخطأ لي دار معاك ..
شهد : ماهضرش معايا بطريقة مزيانة وعلى أساس انا خدامة عندو ومجبورة نقبل الطلب ديالو نتي اخالتي اه على الراس والعين وكون قلتيهالي فالتيليفون نجي طايرة ولكن باش جا وكون غير طلبها محتارمة واخا سمحتلو على البارح حيت عتابرت راسي انا لي غالطة ولكن اليوم لا ( شداتليها فيديها حناكها حومر واخا كتهضر ولكن حشمانة منها ) سمحيلي اخالتي ولكن هادشي لي غانقوليك نفوت كولشي ومانفوتش كرامتي حيت النفس عندي صعيبة وقاسحة وهي لي مخلياني واقفة لدابا على رجلي ..
نعيمة : الله على بنت ونعمة من رباك هاكاك نبغيك وهاداك ماتديش عليه راه يهضر وي فرفر ولف هاكا من صغرو عذريه راه ماكيعرفش كيفاش اهضر الماسخ لاخور ( ضحكاتها ) سمعي ابنتي ديري لي يريحك ولكن راه انا لي صدعتهوم وقتليهوم منها نخلاق ومن محبتو ليا جا كيجري عندك على الصباح ..
شهد : فهمتك أخالتي ولكن هادا لي عندي منقولو ..
نعيمة : ماشي موشكيل ودابا جيتي جيتي غادي تعاودي معايا وتشربي شي كويس عاد تمشي ..
شهد : هه مرحبا ..
كلسات معاها داك الصباح كامل تاقرب جوايه الغدا عاد ناضت سلمات عليها ومشات خرجات ركبات فطوموبيلتها ورجعات للمستشفى .. دخلات بشرى ( المرأة ) لعند نعيمة ..
بشرى : فيناهي الطبيبة ؟ ..
نعيمة : ( شادا كتاب فيديها ) مشات ..
بشرى : وعلاش مشات ؟ ..
نعيمة : حيت رفضات تخدم ..
بشرى : شناهو كيفاش تجر..
نعيمة : ولدك السباب غير سكتيني سيري شوفي اش قال لدرية تاغضبات هاداك حسابو معايا ..
بشرى : لا اخيرتها طبيبة ديال منعرف اش تشرط على ولدي انا ..
نعيمة : مالو ولدك باطمان اوا سيري نعلي الشيطان ..
بشرى : ولدي سيد الرجال وهو لي هاز هاد الدار فوق كتافو ..
نعيمة : ايه الدار ولكن الدريات ( حركات راسها بلا ) والو والو 0 ولف غير لي عجباتو حك جر والله اعاون ..
بشرى : ( حشماتها تاضربات الطم ) ..
نعيمة : ( هبطات النضاضر شوية وشافت فيها ) صافي تقاداوليك اسوا نتوما كيعجبكوم تاتسمعو خل ودنيكوم عاد طمو داك الفم ..
رجعات من مور داك اليوم المرهق كانت كتسنا مكالمة منو هه طبعا ماغاتاصلش هي واخا منعرف اش ايوق فيها غايعجبها اه وتحتارمو ولكن ماتنفذش طلباتو الا على الرغبة ديالها وهادا نوع آخر من حب البالغين حب من طعم آخر حبي لي كيجي من مور ماكاتخادي بزاف ديال الدروس فحياتك من مور ماكاتشوفي لي ماعمرو عجبك يعني ولا كيجيك اي حاجة ساهلة تقبليها واي صدمة غادوز كيف لي سبقوها وديك الساعة فين كيجي الحب بطعم آخر اه كيعجبها ولكن من غدا لاماشافتوش ماغاديش تقلب عليه وهو نفس الشيىء وكلها عايش حياتو تبغيه ولكن كولشي بالمهل وبالعقل وبالاحترام كيتحل حيت الزرية الخاوية غير ماكاتقد الزمة بلاصت متفكها والحاجة لاماجابتها الثقالة ماتجيبهاش الخفة وحب المراهقة سالاو منو ولاحوه ..
دازت سيمانة وكيف سبق القول رجعات لروتينها اليومي خدمة وماكلة ونعاس حتا الصحابات لي غاتخرج معاهوم من آحر الغدر ضربات على كولشي اللهم تمشي هانية وتجي هانية ولا صداع الراس مرة مرة كتجي خالها لي هي صغيرة منها فالعمر كتونسها وترجع تمشي وهاكا ساعات حياتها كيمشيو من داك النهار مارجعات مشات عند نعيمة ولا انتضرات من البعد اتصالاتو صافي ميفما دخل غايخرج ..
خرجات من الدوش كتنشف شعرها من مور يوم مرهق تكتسمع بلي وصلها ميساج ماتسوقاتش كيف ديما حطات الفوطة وهزات المشطة كتمشط حطاتها وقبل ماتمشي لماريو هزات ايليفونها تشوف الساعة تاكاتقرا ..
المجهول x : (بالانجليزية ) مشغولة ؟ ..
تصدمات وماضناتهاش منو نهائيا قلبها رجع كيضرب وكتبات بلا ماتحس ( لا ) وسيفطاتها ..تاكيوصلها
المجهول x : الى مكانش موشكيل تعطيني 5 دقائق من وقتك ؟ ..
يتبع_غدااا الثلاثاء
أنت تقرأ
🌺 كَــــحْـٰلة آلــعْــيــون 👀🌺( مكتملة )
Любовные романыوأخيرا القصة المنتضرة ❤️ الكاتبة زهور السليماني في قنبلة الموسم غادي نقيس بزاف ديال المشاعر فهاد القصة غانقيس مشاعر كل أنثى وكل مرأة غانعطيكوم نبدة عن حياة مرأة تقدر تعيش بلاصتها اي وحدة قصة خدات من عقلي مدة كبيرة وخدات من وقتي ساعات لا تحصى ولا ت...
