كرونيك:💕💕 تزوجت هندية💕💕

51

الحلقة 51 ❤️
_ صباح النور
_ صباح الفل رقدتي مليح
_ ايه حمدلله وانت
_ لباس
هز شوميز تاعوا ولبسها عدلها فسروال ويربط فلقفايل وقرب من المرايا يريقل في شعروا على جنب لبس الڤاست ناضت راحت عندوا تعدلوا فلفاست وتهدر معاه : رد بالك على روحك ومتنساش تتصل بيا
باسها من جبهتها وهزلها راسها وقال : وكتا توحشتيني هزي تلفون وعيطيلي راح نحكي معاك
تبسمت معاه وقالت : اوكي
نروح نبدل قشي ونجي استناني سراج
سراج : اوكي حبيبتي
راحت تجري بدلت لبست لبسة هندية وجات عندو قالت : فطرتي ؟
_ لا مزال
_ نفطروا وتروح
_ لا راح نفطروا في دارنا ونودعهم
_ ايه هيا
خرجوا ركبت فطموبيل تاعوا وراحوا مع وصولهم لقاو عائشة وجدها واسعد يستنوا فيهم سلموا عليهم وقعدوا يفطروا
عائشة : ولدي رد بالك على روحك وارجعلنا عن قريب
سراج : امي نوعدك منطولش عليكم خاطر انا نتوحشكم بزاف وبالي راح يظل عندكم
راجيني تلعب بلماكلة فصحن تاعها
سراج شاف معاها وحس بيها قال : راجيني انتي اقعدي عند ماما هنا في غيابي
مردتش عليه وقعدت مركزة مع افكارها هو حط يدوا على يدها وقال : راجيني نحكي معاك راني !
فاقت من سرحتها وخزرنطت فيه وقالت : نعم واش كنت تقول
اسعد : بنتي سراج كان يقلك بلي تبقى هنا عندنا حتى يروح
راجيني : اااا اوكي نورمال اما مطولش علينا
سراج : نوعدك منطولش عليكم انا راح نرجع عن قريب
تبسمت معاه وهو بادلها تبسيمة حس بيها قداش موجوعة على فراقوا من عنيها لي مغرغرين بدموع فهمت انوا قلبها وجعها وموش متحملة انوا يبعد عليها
اسعد : سراج جا الوقت هيا
ناضوا كل وهي تمشي بخطوات خايفة وموش متحملة لي يصير قعدوا كامل في خط سلم على جدوا وباسلوا يدوا وهو تمنالوا التوفيق وباباه ثاني سلم عليه وقالوا بلي هو راح يتوحشوا جا لاموا لي تبكي في حالة ومهيش حباتوا يبعد وهو بسيف لا قنعها بلي هو راح يرجع بعد 15 يوم وفات لراجيني وهم كامل دخلوا حبو يخلوهم وحدهم حط يدوا على كتافها وقال : راجيني ....
طرشقت بلبكاء وحظناتوا وتحكي بلخنقة : سراج متروحش متخلنيش وحدي
يمسح على شعرها ويقول : راح نرجع قريبا متبكيش حبيبتي تعرفيني منحبش نشوف دموعك يا روحي
هزلها راسها ومسحلها دموعها وقال : نوعدك نحكي معاك كل يوم ونخمم فيك في كل دقيقة يا روحي باسها من جبهتها وخدها ومشاء لطموبيل لي كان شوفير يستنى فيه ثم عمللها بيدوا باي وهي ردتلوا ودموعها على خدها دار عطاها بظهروا خاف انوا يضعف وميقدرش يسافر اصلا دموعها يخلو قلبوا يعصر عليه ويضعف قدامهم بزاف صل للباب حلوا وكان حيركب اما محس كان بيدين صغيرة حوطتوا من لورا وتكمشت في صدروا ودموع سخونة على ظهروا ويسمع في شهقة دارلها شوي حط جبهتوا على جبهتها وقال : يا روحي راكي تعذبي فيا هكا راح تخليني نبطل على لخدمة ومنروحش تعرفيني قداش ضعيف قدام عنيك
قالت بصوت ضعيف : منقدرش نبعد عليك موش بيدي والله
قرب من شواربها لي يرعشوا وطبعلها بوسة طويلة وهي تفاعلت معاه قالها : صدقيني بعد ما نرجع راح تتبدل حياتنا بزاف اما اوعديني متبكيش
سكتت وهو حط يدوا على خدها ومسح عليه بشوي وقال : اوعديني حبيبتي
_ نوعدك
قالتها وغلبتها دموع ورجعت خظناتوا وهو حظنها طبس من رقبتها يتنفس بقوة وكأنوا ياخذ في جرعة الاكسجين لي باش تخليه يقوى على غيابها 15 يوم
بعد عليها شوي ومسحلها دموعها وباسها من راسها وقال : اتهلي في روحك متخلنيش نتقلق عليك
سيبها وركب فطموبيل وقال لشفور : خلينا نروح مشا ومخزرش وراه خايف انوا قلبوا يوجعوا ويبطل ميروحش
هي تشوف فطموبيل تبعد وزادت فلبكا اما مسحت دموعها ودخلت قعدت بحذاء عايشة وسندت راسها عليها وهي ظمتها لصدرها وقاتلها : متحزنيش راح يرجع عن قريب
دارت براسها ايه