The Journey Of The Bratty Chosen Ones V-3: Journey To Mysterious Land

Chamni 48: Imortal Jiro and Steffy

Inalis na ni Jiro ang tingin sa may pintuan saka tagpo ang kilay na tiningnan si Steffy na nakatayo at matalim ang mga matang nakatitig sa kanya. "Steffy, hanggang kailan mo ba papasakitin ang ulo ko ha?"

"Bakit nilagyan mo na naman ako ng seal ha? Gusto mo bang mahuli ako ng mga Mystikan na yun? Alisin mo to alisin mo." Tinaas niya ang wrist at inilapit sa mukha ni Jiro.

"Bakit mo ninakaw ang Mysterian core ha? Pati ang Empire seal, at nang dahil sayo makikipaggiyera na ang mga Mystikan sa mga Chamnian. Alam mo ba kung gaano kabigat ang ginawa mo ha? Gusto mo ba talagang madadagdagan ang parusa mo?" Sabay tulak sa noo ni Steffy.

"Alam mo namang mabigat bakit pinaalam mo sa lahat na kagagawan ko yun? Paano kung patayin nila ako ha?"

Ngumiti namang bigla si Jiro. "Gusto ko lang malaman ang magiging reaksyon ng dalawang matandang yun lalo na si Rushka kapag malalaman nilang naisahan sila ng tulad niyo." Sabay tawa pa nito na parang tuwang-tuwa kapag naalala ang napipikon na mukha nina Rushka at ng pinuno ng mga Mystikan.

"Lika, manonood tayo." Pinaupo si Steffy sa tabi niya at ikinumpas ang kamay. May lumitaw na puting ulap sa tapat nila. At sa mga puting ulap may makikitang mga eksena.

"Siguradong naibalita na ng mga espiya nila ang anumang nakita at narinig nila kanina sa labas ng Academy." Excited niyang sambit.

Pinaningkitan naman ni Steffy ng mga mata ang gwapong lalaking kaharap na halos mas bata pang tingnan kaysa sa kanyang ama. Hindi lang yun, mas bata din ang utak. At kung magbangayan silang dalawa para lamang silang magkapatid.

"Wag mo akong tingnan ng ganyan. Alam kong napakagwapo ko. Pero hindi ako papatol sayo." Muntik ng mapasubsob dahil nabatukan ni Steffy.

"Steffy baka nakakalimutan mong..."

"Ano?"

Napabuga ng hangin si Jiro saka sinabing "wag nalang. Kahit sabihin ko di mo naman maiintindihan kasi di mo dala ang common sense mo." Sagot ng lalaki.

"Sabihin mo nga, sino ba talaga kina ina at ama ang anak mo ha? Bakit parang wala namang namana sayo si ama?" Hindi lang sa walang namana kay Jiro ang ama niya kundi mas mukhang anak lang ng kanyang ama si Jiro.

"Iyon nga din ang tanong ko e. Bakit ba ang boring ng Steffin na yun? Saan ba yun nagmana?"

Pinili na lamang ni Steffy ang manahimik kaysa makipagtalo sa lalaking to. Matatalo lang din naman siya at walang katapusang bangayan lang ang mangyayari sa pagitan nilang dalawa.

Hinding-hindi sila nagkakasundo. Higit sa lahat, ang daming ipinagbabawal ng lalaking ito sa kanya na halos ikakasakal na niya. Kundi lang niya alam, ang lakas makatawa nito kapag may mga kalabang naasar sa kanya. Tulad nalang ngayon.

"Ang mga batang yun pala ang dahilan? Sabi ko na nga ba." Sambit ni Rushka habang naninilim ang paningin malamang kaya pala nagalit sa kanya ang mga Mystikan dahil din pala sa kagagawan ng mga kabataang nanggugulo sa kanya.

Kahit alam na niya ngayon, nangyari na ang lahat. Marami na ang pinsalang naidudulot nina Steffy at ng mga Mystikan sa kanya lalo na sa mga tauhan niya.

"Bakit kasi kayo nagpakita sa kanya? E di sana mas magugulat pa siya kung malaman niyang naisahan siya ng mga bata lang." Hindi kuntentong sambit ni Jiro.

Napabuntong-hininga na lamang si Steffy. Sa mga mata ng lahat, Isang kagalang-galang na panginoon o imortal ang matandang ito pero sa mga mata niya, mas isip bata pa ito sa kanyang ina.

"Ano bang nakita nila sa matandang to at sinasamba nila? Sa mukha lang siya nakakalamang sa iba, saka sa edad. Hindi naman siya matino para sambahin at hangaan."