Yeh Rishta Meetha Sa ❤

Part 49 - A shocker for Naksh

Evening:

Switzerland:

Naksh aur Yashika lawn mein baithe 'rock paper scissor' khel rahe hain.

Naksh - Acha Yashika beta! Mujhe ye bataiye ki aapko daddy jyada love karte hain ya mumma?

Yashika - Mumma!

Naksh - Aur daddy Yashika se love nahi karte?

Yashika - Offo Nikk uncle! Kon se daddy? Main toh sirf apni mumma ke sath rehti hoon.

Ye sunke Naksh ko thoda ajeeb sa lagta hai aur woh mann hi mann bolta hai - "Ye badi hi ajeeb baat hai, Yashika apne papa ke baare mein nahi jaanti. Naa hi iss poore ghar mein kahi pe bhi Sanju ke husband ki koi picture hai, aisa kaise ho sakta hai! Mujhe Sanju se baat karni hogi".
___________________________________________

Udaipur Park!!

Sablog park mein baithe hain. Kairav aur Vansh khel rahe hain. Riddhi aur Siddhi park ka sundar nazara dekh kar videos banane lagti hain jise dekh Suhasini ki bhaunhe tann jaati hai.

Suhasini - Inn dono ladkiyon ko zara kadar nahi hai Goenka parivaar ke izzat ki. Jahaan dekho apna mobile leke shuru ho jaati hain.

Surekha - Maaji aap toh jaanti hain na ki....!

Suhasini - Rehne do Surekha, humare saamne zubaan kholne ke bajaaye apni bahuon par lagaam kaso.

Suhasini ka aisa jawaab sunkar Surekha muh banaa leti hai lekin Swarna baat sambhaalti hai.

Swarna - Maaji! Dekhiye park ka maahaul kitna sundar hai. Chaliye jhoola jhoolne chalte hain.

Fir sablog jhoola jhoolne jaate hain. Saare pati apni-apni patniyon ko jhoola jhoolane lagte hain.

Damini ko Suhasini aur Suhasini ko Damini jhoola jhoolati hai.

Chikki ko Dhruv jhoola jhulata hai jise dekh Suhasini, Surekha aur Damini muskurati hai.

Mauka paate hi Kartik-Naira wahaan se nikal jaate hain.

Kartik aur Naira park ki sabse shant jagah par jaate hain aur romantic time spend karte hain. Kabhi Naira Kartik ke upar bubbles udaati hai toh kabhi Naira ke baalon ki khushboo mein Kartik kho saa jaata hai. Kabhi Kartik Naira ko kamar ke bal apni taraf kheechta hai toh kabhi Naira Kartik ko kiss karti hai aur aise hi dono ek-dusre mein kho jaate hain.

Idhar Dhruv aur Chikki panipuri kha rahe hote hain lekin Dhruv panipuri khane se jyada Chikki ko nihaar raha hota hai. Usne Chikki ko pehli baar itna khus dekha tha aur isliye woh khud ko rok nahi paa raha tha. Isi beech Damini wahaan aati hai.

Damini - 'Dhruv'....!

Achanak Damini ki aawaz sunkar Dhruv akchaka sa jaata hai.

Dhruv - Kya maa! Dara diya aapne.

Damini - Lo batao! Darr khud rahe ho aur bol mujhe rahe ho.

Dhruv - Haan meri hi galti hai.

Damini - Acha muh mat bana! Ye bata ki Chikki tujhe kaisi lagti hai?

Dhruv - Bahut pyari lagti hai.

Dhruv ka jawaab sunkar Damini bahut khus hoti hai.

Dhruv - Lekin aap kyun pooch rahi hain maa?

Damini - Bas aise hi! Tu panipuri kha, main aati hoon.

Damini wahaan se chali jaati hai aur piche mudkar ek nazar Dhruv aur Chikki ko dekhti hai.