Yeh Rishta Meetha Sa ❤

part 62 - Mishbir win Kuku's heart!

Varsha ki baat sunte hi Mishti chataak se bol padti hai - "Kunal pita bhi banega aur Kuhu-Kunal ki apni family bhi hogi".

Mishti ki baat sunke sablog uski taraf dekhne lagte hain. Tejaswini bhi aa jati hai aur Yashpal se apni nazrein churaati rehti hai. Woh Meenakshi ko dekhne ki koshish karti hain lekin uska chehra unhe nahi dikhta.

Abir Mishti ke paas jaata hai. Mishti Kuhu aur Kunal ko apne paas bulaati hai aur fir dono ka haath pakad ke apne baby bump pe rakh deti hai.

Kuhu aur Kunal kuch samajh nahi paate. Abir aur Mishti ek-dusre ke taraf poore confidence se dekhte hain.

Parul - Mishti tu kehna kya chahti hai?

Abir - Main aur Mishti aap sab ko kuchh batana chahte hain.

Mishti - Aap sab jaante hi hain ki mere andar do jaan pal rahi hai.

Mishti ki ye baat sunte hi sabko samajh aa jata hai ki woh aage kya bolne wali hai.

Abir aur Mishti Kuhu-Kunal ka haath thaam lete hain.

Abir - Isliye humne faisla kiya hai ki hum apna ek baby Kuhu-Kunal ko de denge.

Abir ki baat sunke sabke dilon pe bijli si girti hai. Kunal aur Kuhu Mishbir ka haath chhod dete hain.

Kunal - Nahi bhai! Ye aap kya keh rahe hain?

Kuhu - Ye aapke babies hain, aur aapke hi rehne chahiye.

Kunal - Aur main aur Kuhu toh inke chachu-chachi rahenge hi na.

Kuhu - Tab bhi humara pyar inke liye utna hi hoga.

Mishti - Kuhu! Kunal! Hum jaante hain ki tum dono humare babies se bahut pyar karoge.

Abir - Lekin hum chahte hain ki tum dono chachu-chachi nahi mumma-papa bano.

Mishti - Tum dono apne bachhe ko apne tarike se paalo, unpe tumhara haq ho.

Abir - Tum dono haq se unhe daant sako, haq se unhe pyar kar sako aur haq se keh sako ki tum unke parents ho.

Abir aur Mishti ki baatein sunke Kuhu-Kunal ek-dusre ko dekhne lagte hain.

Meenakshi Mishti ke paas jaakar usey gale lagaate hue kehti hai - "Galti mujhse hui, chot maine apne bachhe ko pahuchai lekin uski bharpaai tum apna bachha dekar kar rahi ho. Sach! Tumse achi bahu toh mujhe mil hi nahi sakti thi".

Fir woh Abir ke gaalon pe hath ferte hue kehti hai - "Aur mera Abir toh apne nanko ke liye kuch bhi kar sakta hai".

Meenakshi Kuhu aur Kunal se kehti hai -
"Mishti aur Abir bahut bada tyaag kar rahe hain, tumdono uska apmaan mat karo. Unki baat maan lo".

Varsha apni bhaunhe uchkaaye Kuhu aur Kunal ki taraf badhti hai, lekin Shaurya usey rok dete hain.

Parul - Kuhu! Kunaal! Abir-Mishti ki baat maan lo! Hmm!

Kuhu-Kunal kuch sochte hue Mishti aur Abir ki taraf badhte hain.

Kunal - Bhai-bhabhi! Hum ek hi shart pe aap dono ki baat maanenge.

Shart wali baat sunke sab chaukanne ho jaate hain.

Abir - Kaisi shart?

Kuhu - Shart ye hai ki agar same gender wale babies honge toh koi baat nahi, lekin agar ek ladka aur ek ladki hui toh hum ladki hi lenge.

Mishti turant muskurate hue "okay" bol deti hai. Sablog taaliyan bajaate hain.

Naira-Kartik Abir aur Mishti ko gale lagaa lete hain.