Paano nga bang sasabihin,
Akin kayang maisatinig,
Pasasalamat na sa iyo ay hatid,
Sa labi kaya'y manatiling nakapiit?
O baka sakaling makalaya ang tinig?
Nang minsang subukin
Na ang salita ay maiparating
Tila naman tukso, dila'y biglang naumid-
Sa lalamunan ay may kung ano'ng bumikig...
Sa isang tabi ay piniling manahimik.
Minsan pa'y sumubok na sa iyo ay sabihin,
Ngunit itong dila'y nautas-napinid,
Sa hangi'y sinubok na ipinarating,
Ibinulong yaring nais;
Pasasalamat at pagmamahal nawa sa iyo ay ihatid.
Maraming salamat, o aking Ina,
Sa lahat ng bagay na sa amin ay 'yong alay
Pagmamahal na hatid ay walang kapantay
Pag-aaruga sa amin, wagas at siyang tunay
Kaya ngayong araw mo-Salamat.
Hindi man maisatinig,
Sa papel ko na lamang pararaanin
Isusulat gamit yaring pluma,
Puso yaring sandata...
"Maligayang Araw ng mga Ina."
