ပြိုင်ဘက်ကင်းဆေးနတ်ဘုရား(part-3)

Chapter 591

ပြိုင်ဘက်ကင်းဆေးနတ်ဘုရား

ဘာသာပြန်သူ-ဖြိုးသူဝင်း

Book(45)

Chapter-8

(အစစ်အမှန်နဂါးတစ်ကောင်၏ ခွန်အားကို စုစည်းပြင်ဆင်ခြင်း)

အဋ္ဌမအလွှာ၏ ခက်ခဲမှုက ယီယွမ်၏ အကန့်အသတ်သို့ ရောက်ရှိနေခဲ့ပြီဟူ၍ ပြောနိုင်ပေသည်။

အနည်းငယ် အဆင့်မြင့်လာသည်နှင့် ယီယွမ်က တောင့်ခံနိုင်မည်မဟုတ်ပေ။

သို့သော် နဝမအလွှာ၏ ခက်ခဲမှုက အဋ္ဌမအလွှာ၏ ခက်ခဲမှုထက် အနည်းငယ်မျှသာ ပိုမိုမြင့်မားမည်မဟုတ်ပေ။

ယီယွမ်၏ ဓာတ်သဘာဝ ဉာဏ်အလင်းများဖြင့်ပင် ထိုအရာကို ဖြတ်ကျော်နိုင်ရန် မဖြစ်နိုင်ပေ။

နဝမအလွှာကို
ဖြတ်ကျော်နိုင်တဲ့လူတွေဆိုတာ ရှိနိုင်ပါဦးမလား…..

ဒီဗိုင်းဘုရင် ပုဂ္ဂိုလ်ကြီးတွေက သူတို့ရဲ့ ကျင့်ကြံခြင်းကို နှိမ့်ချပြီး ကျယ်ပြန့်သော ကောင်းကင်ဘုံဘုရားကို ဝင်ရောက်လာမှ နဝမအလွှာကို ဖြတ်ကျော်ဖို့ ဖြစ်နိုင်တော့မှာ မဟုတ်လား…..

ဒီလို ကျော်ဖြတ်ဖို့ မဖြစ်နိုင်တဲ့အလွှာကို ထည့်သွင်းထားတာဆိုတော့ ကျယ်ပြန့်သော ကောင်းကင်ဘုံဘုရား ပိုင်ရှင်က ဘာတွေတွေးနေတာလဲ…..

ဒီဟာက အရည်အချင်းနှင့် ခွန်အားကို စမ်းသပ်ဖို့ဆိုရင်တောင် ဂျီးနီးယပ်တွေရဲ့ အကန့်အသတ်ထက် ကျော်လွန်တာက အဓိပ္ပာယ်လုံးဝမရှိတော့ဘူး မဟုတ်လား…..

ယီယွမ်က နားမလည်နိုင်တော့ပေ။ သူက သူ၏ ဝှက်ဖဲအားလုံးကို အသုံးပြုခဲ့လျှင်ပင် ကျော်ဖြတ်နိုင်ရန် မျှော်လင့်ချက် မမြင်ခဲ့ရပေ။

"အနက်ရောင်ဝတ်စုံဝတ် ပုဂ္ဂိုလ်က ငါ့ကို ဒီနေရာမှာ ဘာတွေများ နားလည်သဘောပေါက်စေချင်တာလဲ... ဖြစ်နိုင်တာက….." ယီယွမ်က ရုတ်တရက်ပင် ဉာဏ်အလင်းပွင့်သွားပြီး တစ်စုံတစ်ရာကို တွေးလိုက်မိ၏။

အနက်ရောင်ဝတ်စုံဝတ် ပုဂ္ဂိုလ်က ရစ်ခွေနဂါး ကောင်းကင်ဘုံဖျက်ဆီးခြင်း လက်ဝါးမှာ အစစ်အမှန်နဂါးတစ်ကောင်၏ ခွန်အားကို အသုံးပြုထားခဲ့သည်ဟု ပြောဆိုခဲ့သည်။ အစစ်အမှန်နဂါးတစ်ကောင်၏ ခွန်အားက အန္တိမအစစ်အမှန်အသိနှင့် တူညီသောအဆင့်တွင် ရှိပေ၏။