စာအုပ်ထဲကဗီလိန်အကြီးစားအဖြစ်သို့ ကူးပြောင်းလာခြင်း (ဘာသာပြန်)

Ch: 7 (U+Z)

Unicode

Chapter-7 ဘယ်သူက ပိုရမ်းကားနိုင်မလဲ?

စစ်ယွိဟန်၏ နှလုံးသားလေးသည် တုန်လှုပ်သွားခဲ့၏။
ဒါကြောင့် သူမြန်မြန် အကြည့်လွှဲလိုက်သည်။ ခဲ့ရွမ်သည် ဇာတ်လိုက်စစ်ယွိဟန်က သူ့ကို သဘောမကျသေးမှန်း သိသဖြင့် ပြုံးပြနေတာကိုရပ်တန့်လိုက်၏။

ခဲ့ရွမ်လည်း ခေါင်းပြန်ငုံ့လိုက်သည်။

စစ်ယွိဟန်သည် သူဘာကြောင့် ခဲ့ရွမ်ရဲ့မျက်လုံးတွေကို မကြည့်ရဲတာလဲဆိုတာကို နားမလည်နိုင်ဖြစ်နေသည်။ တကယ်ဆို ရှက်သင့်တဲ့လူက ခဲ့ရွမ်ဖြစ်ရမှာ မဟုတ်လော။

သူခဲ့ရွမ်ကို ပြန်ကြည့်လိုက်တဲ့အခါ ခဲ့ရွမ်သည်
ပိုင်ရှင်က စွန့်ပစ်ထားတဲ့ ခွေးကလေးကဲ့သို့ ခေါင်းငိုက်စိုက်ကျနေသည်ကို တွေ့လိုက်ရသည်။

သူ ရယ်ချင်သည်။
သို့သော် သူ့အပြုံးက ပြန်ပြီး အေးခဲသွား၏။

ဘာတွေဖြစ်နေတာလဲ? ငါ ရူးနေတာပဲ ဖြစ်ရမယ်!
စစ်ယွိဟန် တွေးလိုက်၏။ သူ့အပြုံးက မပေါ်ခင်မှာပဲ ပြန်ပျောက်ကွယ်သွားလေသည်။ စစ်ယွိဟန်သည် မျက်ခုံးနှစ်ခုကြားကနေရာလွတ်ကို ပွတ်သပ်လိုက်သည်။

ထိုအချိန်မှာ ရထားလုံးက ရုတ်တရက် လှုပ်ရမ်းသွား၏။
ခဲ့ရွမ်သည် သူကိုယ်တိုင် ရထားလုံးရဲ့ သစ်သားထောင့်စွန်းနဲ့ ဝင်တိုက်မိတာတောင်
မသိစိတ်က စစ်ယွိဟန်အား ကာကွယ်ရန်မမေ့ပေ။ စစ်ယွိဟန်ကို သူ့လက်မောင်းတွေကြားမှာ
တင်းကျပ်စွာ ပွေ့ဖက်လိုက်၏။

ဘမ်း!

စစ်ယွိဟန်သည် တုန်လှုပ်သွားပြီး သူ့အား တင်းတင်းကြပ်ကြပ် ပွေ့ဖက်ထားတဲ့ ခဲ့ရွမ်ကို ကြည့်လိုက်သည်။ တိုက်မိသွားတဲ့အရှိန်ကြောင့် ခဲ့ရွမ်ရဲ့စိတ်တွေ လွတ်ထွက်သွား၏။

စစ်ယွိဟန်သည် ခဲ့ရွမ်၏ပွေ့ဖက်မှုကြောင့် အသက်တောင် မရှူနိုင်တော့ပေ။ ခဲ့ရွမ်သည် ထိတ်လန့်မှုကြောင့် အသိစိတ်ကို ပြန်မစုစည်းနိုင် သေးချေ။ သူလုပ်လိုက်သည့် အရာသည် စစ်ယွိဟန်ရဲ့ နှလုံးသားအား ခဲဆွဲထားသလို လေးလံသွားစေ၏။

"အိုက်ယားး..." ခဏကြာတော့ ခဲ့ရွမ် စိတ်နဲ့လူနဲ့ ပြန်ကပ်သွားပြီး နာကျင်မှုကြောင့် ညည်းညူလိုက်သည်။ သူသည် စစ်ယွိဟန်ကို လွှတ်လိုက်ပြီး စိတ်လှုပ်ရှားစွာ မေးလိုက်သည်။