رواية مهلكتي من جزء 1 : 18

الجزء_الثامن (الحلقه السادسه ) ( اشمعنى انا يارب ) ❤ ❤

................
ف الحلقة السابقه :_
( تحت بيت احمد ف عربية سلمى )
سلمى : يلا ياختى انتى وهى . وبقولك ايه انتى وهى مش عاوزه مرقعه فوق من واحده فيكو فاهمين ؟ احترمو نفسكو يا شويه مهزاين
منه : ههههههههههههههههه اموت انا ف المرقعه وخصوصا مع الواد ده
فريده : بزمتك هو فيه احلى م المرقعه على حمو هههههههه يلا يلا
سلمى : صبرنى يارب
............. ( السادسه ) ❤
( سالى وندى وملك بياخدوا بعضهم وبينزلوا يشتروا شويه طلبات هما التلاته ومنها فسحه )
..................
غاده : فكيت الجبس اهو الحمد لله ؟
احمد : اه لسا امبارح
غاده : استعجلت ليه كنت استنى شويه
احمد : هى احسن الحمد لله ...
غاده : وقت ما تحب ترجع الشغل كلمنى على طول . مكانك محدش قادر يسده
احمد : البركه ف حضراتكو وف كابتن هايدى
هايدى : لا بجد البركه فيك انت .. ابنك ده توهنا خالص والله يا طنط .. ماشاء الله عليه انا ماسكه الخشب اهو عشان ماتقولوش بحسده ولا حاجه بس ماشاء الله كان مدى طاقه وروح للمطعم وفيه زباين كتيره بتسال عليه مع انه عدد ايام الشغل كانت قليله . بس قدر يكسب قلوب الناس اللى جات المطعم وشافته
ام احمد : ربنا يحبب فيه خلقه كمان وكمان
احمد : ( بيسمع صوت سلمى والبنات من بره الباب وهما طالعين ع السلم وبيتكلموا بيبرق ل مالك وبيوشوشه : على فكره انا بروح ف داهيه اهو )
مالك : ( ماسك نفسه بالعافيه )
احمد :اتفضلى يا استاذه غاده الصالون من هنا تشربوا ايه بقي
غاده : تسلم يارب ... ولا حاجه لسا شاربين
احمد : لا يمكن والله مانتى خارجه وهقفل عليكو اصلا دلوقتى غير لما تشربو حاجه
غاده : ههههههههههههه خلاص لو ينفع قهوه ...
احمد : حاضر اتفضلو ... ( الباب بيخبط ... بيقفل عليهم الباب بجد )
هايدى : ههههههههههههههههه الواد قفل الباب بجد تصدقى
غاده : واد غريب . بس الصراحه تتقال .... مقبلتش حد زيه قبل كده . رغم بساطة عيشته وبيته إلا انى محستش انه مكسوف مننا . بالعكس ده بيضايفنا كأننا ف فيلا ... الواد ده حكايه
...
احمد : ماما ... يا طنط . لو الدنيا اتقلبت محدش يعرف ان فيه ناس جوه
ام احمد : ليه ؟ هى ؟؟؟ جايه ؟
ام مالك : ايه الحكايه
مالك : هفهمك دلوقتى يا ماما بس ابوس ايديكو محدش يعرف ان فيه ناس جوه
احمد : ( بيفتح الباب ) اهلا !!! مزز اسكندريه كلهم هنا يا مرحبا
سلمى : ايه ياعم اتلطعنا ع الباب .. كل ده كنتو فين .... اوبااا . القمر دى مامتك يا مالك ؟
مالك : هههههههههه اه ايه رأيك
سلمى : ههههههههههههههه زى القمر يا طنطى اومال انتى جايبه ابنك ده ازاى
ام مالك : هههههههههههههههههه ده عسل
مالك : دى سلمى يا ماما . ودى منه .. ودى فريده
ام مالك : اه وانا اقول الواد مبلط ليه ف اسكندريه وفين وفين لما بشوفه ف القاهره اتاريك قاعد مع البنات الحلوه دى
مالك : ( بيتكلم بتناكه ) لا دول هما اللى قاعدين معايا
احمد : قوم يالا اعملنا شاى
مالك : حاضر امرك يا كبير
ام مالك : ههههههههههههههههههه يا لهوى عليكو
منه : ازى حضرتك يا طنط ماشاء الله زى العسل
فريده : والله اسكندريه كلها نورت والله يا جماعه
احمد : ايه يا جماعه انتو متشيكين كده وكنتو رايحين فين
سلمى : مافيش كنا نازلين نيجى نسلم على مامت مالك وهننزل ,,,زهقانين والله من ساعة الاجازه دى واحنا مش عارفين نروح فين ولا نيجى منين . صحيح فين البت لوكه اختك
وفين اخواتك يا احمد انا لسا ماشوفتهمش
احمد : نزلوا من شويه ... وانتو كمان يلا عشان ام مالك هتريح شويه وانا نازل معاكو اصلا
ام مالك : لا انا قاعده مش مريحه
احمد : لا هتريحى ايش عرفك
ام مالك : ( بتفهم وبتضحك )
سلمى : طيب نستناك طيب لغاية ما تجهزوا
احمد : لا انا جاى معاكو . انتو جايين بأنهى عربيه
سلمى : بعربيتى
احمد : كويس . استنونى وانا نازل معاكو اهو .. اسبقونى على العربيه
سلمى : ( بتبدا تقلق من رإكشنات احمد ) هو فيه ايه انت بتطردنا ؟
احمد : ماعاش ولا كان اللى يقدر يطردكوا .. خلاص انا جاى معاكو
سلمى : هتيجى كده ؟ ماتدخل تلبس يابنى واحنا قاعدين مع امك وام مالك لغاية ما تجهزوا
( طبعا ام احمد وام مالك بيتفرجوا على الحوار وبيضحكوا من تحت لتحت )
احمد : ( بزعيق ) طيب اقعدوا هنا
سلمى : ماحنا قاعدين اهو هنروح فين يعنى
احمد : ماتتحركوش ...
مالك : ( كاتم بؤه بإيده وبيضحك من بطنه بكل غل وشماته ف احمد )
احمد : اضحك اضحك . يلا بقولك ايه يا ماما اعملى فنجانين قهوه كده عشان العمال اللى شغالين فوق ف شقة دكتور عادل
ام احمد : ( بتفهم ابنها ) امرك يابنى
.........
( احمد بيغير هدومه بسرعه وبيلبس اى حاجه بيلاقيها قدامه لدرجة انه قلع بنطلون الترنج ولبسه تانى من لبخته وبيقول لنفسه : لا بقولك ايه عبط مش عاوز اخلص )
.............
ام مالك :عملتو ايه ف امتحانتكو يا قمرات
سلمى : الحمد لله يا طنط عدت على خير ... من خضتنا على احمد ومن اللى حصله تقريبا كلنا كنا بندخل الامتحان من غير نفس ... بس عميد الكليه مقدر ده وفاهم .. وممكن ينجحونا كده سفلقه هههههههههههههههههههه
منه : ههههههههههههههههههههههه ربنا ما يخضنا على حد تانى
ام مالك : امين يارب .. انا يوم ما عرفت حسيت يومها انه مالك ابنى . غلاوة احمد من غلاوة مالك بالظبط
سلمى : هو غالي علينا كلنا . يلا الحمد لله
ام مالك : الحمد لله يا حبايبي ... مامت احمد راحت فين
مالك : بتعمل القهوه يا ماما انتى نسيتى
ام مالك : اه بتعمل قهوه للناس اللى
مالك : احححم اه بتعمل للناس اللى شغاله فوق عند دكتور ابراهيم
سلمى : على فكره اسمه دكتور عادل ... ركز احمد قايل دكتور عادل
مالك : ههههههههههههههههههههههههههه
ام مالك : هههههههههههههههههههه
سلمى : ايه يا جماعه بتضحكوا على ايه هههههههههههههه ضحكونا معاكو
احمد : بتضحكوا على ايه يا جماعه ... وبعدين يلا بينا
ام مالك : هههههههههههههههههههههه يا وقعتك السوده يا احمد
احمد : وقعتى انا ؟ وانا مالى انتو قولتو ايه
سلمى : هو فيه ايه بالظبط
فريده : انا بدات اشك ف حاجه كده
احمد : اسكتى انتى دلوقتى والنبى . اشربي عصير يا فريده واسكتى
فريده : ماحنا مش فاهمين يا عم ايه اللى بيحصل
احمد : طب يلا بينا ولا ايه
سلمى : يلا ياعم .. سلام يا طنط .. سلام يا ام احمد
منه : سلام يا قمرات ..
فريده : باى يا جماعه هنجيلكو تانى
ام مالك : مع السلامه يا حبايبي خلو بالكو من نفسكوا
.......
( تحت البيت احمد بيركب العربيه وبيخليهم يركبوا وبيقولهم انه ناسي حاجه وطالع يجيبها )
احمد : اااخ . نسيت المحفظه والرخصه
سلمى : ده كلام ده ؟ طب اطلع هاتهم بسرعه
احمد : ماشي . ماتتحركوش
سلمى : ياعم هنتحرك نروح فين بسرعه انت بس
..........
( على باب الشقه )
احمد : فين يا ماما القهوه
ام احمد : اهى بسرعه بقا لسا مخلصاها
احمد : هاتى .. منوره يا طنط
ام مالك : ههههههههههههههههه ( مسخسخه م الاخر )
مالك : ( فرحان ف صاحبه وضايع من الشماته )
.........
احمد : اتأخرت عليكو انا يا جماعه صح
غاده : لا ولا يهمك احنا كنا سامعين اصوات بره عرفنا ان حد كان جاي يزوروك تقريبا مش كده
احمد : فعلا . جماعه معارفى ... بس جالهم تليفون مزعج كده نزلوا بسرعه وشويه كده وهنزل اروحلهم
هايدى : تليفون ايه خير
احمد : واحد قريبنا كده هفته ف عربيه . دخل فيه لورى محمل زلط
غاده : ياساتر يارب .. طب انا الحمد لله انه انا اتطمنت عليك وان شاء الله زى ما قولتلك كده . اول الشهر بالظبط تيجى تستلم شغلك . ماشي
احمد : متشكر جدا يا استاذه غاده . بس ايه ده انتو مالحقتوش تقعدوا معايا شويه
هايدى : لا عشان تتطمن على قريبكو .. ولو البنات جاتلك بكره هبقي احاول اجى معاهم
احمد : انتى تنورى اى حته يا ريسه
غاده : طيب هنستاذن بقا
احمد : خلاص حاضر اتفضلوا معايا
.......
( بينزل معاهم ع السلم وبيتكلم وهما ع السلم نازلين )
احمد : انتو راكنين فين يا جماعه
غاده : قدام محل التليفونات اللى تحت
احمد : ايه ! العربيه العاليه السوده ؟
غاده : ايووه هى دى
احمد : بس دى مش عربيتك
غاده : هههههههههه لا عربيتى انا لسا مغيراها من اسبوع
احمد : احييييه
غاده : ايه
احمد : لا قصدى احيه يعنى جمالها ... طب بصوا . خليكو هنا واقفين ماتطلعوش ثوانى
غاده : ليه
احمد : لا اصل كان فيه واحد قافل على عربيتكو هجيب منه المفتاح واطلع عربيته وابقي اندهلكو . عشان القهوه اللى قدام بس محدش يشوفكو وكده
غاده : هههههههههههه خلاص ماشي
احمد : دقيقتين بس وجاى
.........
احمد : ايه يا جماعه يلا بينا
سلمى : ايه ياعم كل ده بتجيب ام المحفظه بتاعتك
احمد : بقولك ايه صوت امك ده مايعلاش انا جالى الضغط بسببك
سلمى : انت عمال تعرق كده ليه
احمد : م الخضه
سلمى : خضة ايه دى بقي ان شاء الله
( احمد بيشغل عربية سلمى وبيمشى بيها 10 متر وبيدخل من تقاطع الشارع اللى قدام البيت بعيد عن عربية غاده )
احمد : ااااخ دنا نسيت تليفونى
سلمى : يووووه ياعم يلا لو مامتك احتاجتك اوى يعنى هتبقي ترن عليا انا معاها رقمى ورقم منه ورقم فريده كمان . يلا بقي
احمد : لا عشان ابقي براحتى يا سلمى معلش ... دقيقه وجاى مش اكتر ..... ولا يا زيزو عينك ع عربية الانسات دى لغاية ماجى
زيزو : عيونى يا هندسه
........
احمد : يلا يا جماعه
غاده : ايه خلاص ؟
احمد : اه الحمد لله اتفضلو
هايدى : متشكرين يا احمد .. قاطع بينا انت والمطعم مالوش حس من غيرك والله
احمد : متشكر جدا يا هايدى حسكوا ف الدنيا . خلاص هانت كلها كم يوم وهتشوفونى تانى
............
منه : خدتوا بالكو يا بنات م العربيه اللى كانت تحت بيت احمد
سلمى : اه عربيه شيك اوى
منه : انا بفكر اخلى بابي يجيبلى زيها المعدله .. بس تكون اوطى من كده شويه
سلمى : لا انا هجيب زيها كده . هى بصراحه عربيه مالهاش حل
فريده : جامده بصراحه ... صاحبها اكيد مزاجه عالي وفنان
سلمى : ناويه اجيبها واخليها مع احمد تبقي خاصه بالشله بتاعتنا كده وممكن تاخدنا كلنا شباب وبنات
فريده : بلاااش . احمد هيزعل
سلمى : سيبهالى انا بس انا هجيب الموضوع بصياعه كده مش هيقول حاجه .. هو اتأخر ليه
.................
منه : اهو اهو جاى اهو خلاص .. الواد ده وشه احمر كده ليه
سلمى : طلوعه ونزوله ع السلم مرتين ورا بعض ورجله لسا مش سليمه 100 % تعبته انا عارفه
احمد : ايه اتأخرت عليكو يا بنات
سلمى : ايه ياعم انت كل ده تأخير
احمد : معلش بقي يعنى انزل معاكو من غير الرخصه ولا من غير التليفون ؟ عشان ابقي براحتى .. المهم قولولى هتروحو فين
سلمى : احنا جايين عشان هنسهر معاك النهارده شوف اى مكان حلو كده نروح نقعد فيه
احمد : اسهر معاكو ايه .. انتو مش عارفين ان فيه ضيوف معانا .
سلمى : يا احمد احنا بقالنا اكتر من شهر مخرجناش ولا روحنا ولا جينا ... ده غير الضغط اللى كنا فيها بسبب حادثتك
احمد : طيب . عاوزين تروحو فين
منه : اى مكان . على ذوقك بقا . عشان عاوزين نسالك على كام حاجه كده بما اننا هنكون لوحدنا
احمد : حاجات ايه
فريده : لما نروح ياعم انت مستعجل ليه
احمد : طيب يلا بينا
..........
( على كافيه على البحر كلهم قاعدين .. احمد جنبه فريده .. وقصادهم منه وسلمى )
منه : احمد ناوى على ايه
احمد : ناوى على ايه ف ايه
سلمى : ف الموضوع بتاعك .. احنا لينا فيك اكتر ما ليك ف نفسك . ولو سمحت عاوزين نعرف انت ناوى على ايه ف موضوع الواد التافه اللى اسمه طارق ده وابوه
احمد : الاحسن انكو ماتتكلموش ف الموضوع ولا تفتحوا السيره دى معايا من اساسه عشان مانزعلش من بعض . انتو مالكو انتو
فريده : مالنا ازاى . انت عمال تكابر ومصدر للكل انك ناسي الموضوع بس من جواك كلنا عارفين انك بتفكر هتعمل ايه تنكر ؟
احمد : مقدرش انكر ؟
سلمى : طيب قول بقي طيب ناوى على ايه
احمد : هقولكو حاجه
وانا صغير جدا ف ابتدائي كده .. كان لما حد اتخن منى واطول منى ييجى ياخد سندويتش حد من العيال زمايلى كنت بدافع عنه وكنت ممكن اكسر سنان اللى بياخد منهم السندويتشات .. لكن لو حد كان ييجى ياخد السندويتش بتاعى انا كنت اديهوله وانا مسامح وبقوله خد كمان وانا مسامح . لان عمرى ما عمرى ماكت بحب اشترى عداوة حد . الا اللى بيحب يعادينى بخليها نار على دماغه وبكسر ايده ورجله وبعدها اسامحه
سلمى : طيب معنى الكلام ده ايه
احمد : معنى الكلام ده يا ست سلمى انى انا اخر واحد ف الدنيا ممكن يفرط ف حقه وحق اصحابه وحق اهله ... انا لما حصلى كده امى قلبها اتشق
اخواتى ماكانوش بياكلو
اصحابي اتخضوا خضة عمرهم .. لازم حد يتحاسب ع القلق والقهره اللى كنتو فيها ولازم يدفع تمنها
لازم حد يدفع الفاتوره
لازم حد ينكوى بالنار اللى كل القريبين منى انكوا بيها
عاوزينى افرط ف حقكو ؟ وحق امى ؟ وحق اخواتى ؟ وحق نفسي ... لو عليا انا كنت هسامح . لكن ماتعودتش اسامح ف حقوق حد
منه : طيب الحنا المفروض نعمل ايه طيب . احنا قلقانين عليك
احمد : هههههههههههههههه حقكو تقلقوا . وحقى انى اتطمنكو . اتطمنو صاحبكو مش صغير والدنيا هرست فيه لما شبعت وكان كل شويه بيقوم واقف على رجله . زى مانتو دلوقتى شوفتونى وقفت من تانى بعد ما الدنيا اسودت ... بس عشان خاطرى لو ليا معزه عندكو ماتفتحوش السيره دى تانى . اشطا
سلمى : اشطا
منه : اشطا
فريده : اشطا يا مغلبنا
احمد : واحده فيكو تدخل تلاعبنى طاوله بقا
منه : انا ألاعبك
احمد : طيب يلا .. لو سمحت يا حبيبى تلاته نسكافيه وانا عاوز شيشه الله يكرمك
.....
( بعد 10 دقايق . احمد بيلاعب منه طاوله وبيشرب شيشه ونسكافيه والبنات حواليه )
سلمى : بقولك ايه يا احمد . شوف الصوره دى كده
احمد : صورة ايه
سلمى : حتة عربيه كانت واقفه تحت البيت عندكو . سوده وكبيره .. بس حكايه . بفكر اجيب زيها . انا صورتها . خد شوف كده
احمد : ( بيتف النسكافيه من بؤه ) يارب اشمعنى انا يارب
............
الي اللقاء في الحلقه القادمه

كاتب الروايه هو احمد سعد و تم نشر الروايه مسبقا علي بيدج هو و هي و بيدج stories and novels

لينك الكاتب
https://www.facebook.com/profile.php?id=100010381862587

لينك بيدج/ هو و هي
https://www.facebook.com/howa.weheyaa/

لينك بيدج/ stories and novels
https://www.facebook.com/StoriesAndNovels2020