رواية مهلكتي من جزء 1 : 18

الجزء_العاشر (الحلقه السابعه ) ( يا ويلك ..! ) ❤ ❤

................
(ف الحلقات السابقه )
( احمد بيقف بالعربيه الناحيه التانيه قصاد الملهى وقصاد عربية سلمى ... بيبص للملهى وبيرجع يبص ل سلمى وساره وهما داخلينه وبيرجع يبص للملهى تانى وحاجه ف منتهى النيله والاذبهلال ومش فاهم حاجه نهااااااااااائي ) : ايوه . هى البنات دى انحرفت ولا ايه الحكايه بالظبط ... هو يوم اسود أنا عارف
................... ( السابعه ) ❤
( أمام الملهى يوجد حارس )
سلمى : بقولك ايه لو سمحت من فضلك ( بتديله 200 جنيه )
الحارس : خير يا انسه
سلمى : هييجى واحد دلوقتى هيسألك ويقولك فيه بنتين دخلو من شويه .. قوله اه هما جوه وخليه يدخل
الحارس : تمام تمام
سلمى : ( بتناوله 50 جنيه تانيه ) متشكره جدااا
( بتاخد ساره وبيمشوا من ورا الجنينه اللى جنب باب الدخول وبيستنوا يشوفوا أحمد )
.....
احمد : مساء الخير يا هندسه
الحارس : مساء النور
احمد : بقولك ايه لو سمحت هو فيه بنتين دخلوا هنا من شويه
الحارس : اه لسا داخلين
احمد : بنتين هما
الحارس : اه حضرتك
احمد : واحده لابسه أخضر مقلم كده والتانيه قميص أبيض
الحارس : بالظبط هما دول ( الحارس ماسك نفسه من الموقف ومش عاوز يضحك ) هتدخل يا فندم ولا ايه ؟ عشان فيه ناس وراك بس عاوزه تدخل
احمد : ( بيلاقى فيه شباب شكلها مش مظبوط وبنات متدلعه اوى بتدخل ) لا انا هدخل هدخل . كام التذكره
................
سلمى : يلا يابت بسرعه ع العربيه
ساره : يلا ! انا خايفه يشوفنا
سلمى : ومين سمعك ... انا مرعوبه .. استنى ادى الواد ده كمان عشرين جنيه ولا حاجه كان ممثل رهيب .... ( بتناوله 20 جنيه ) خدمه تانيه معلش ممكن ؟
الحارس : اؤمرى يا فندم
سلمى : بص ! وقت ما يطلع . لو طلع بعد خمس دقايق ولا طلع بعد ساعه ولا طلع الفجر حتى .وقت ما يطلع قوله انهم لسا طالعين حاااااااااالا
الحارس : هههههههههه لا حاضر اتطمنوا
........
( سلمى وساره بيركبوا العربيه وطيران ع البيت)
...........
( داخل الملهى )
الويتر : اتفضل يا فندم واقف كده ليه ... اتفضل
احمد : ( عينه بتمسح المكان وبيدور على البنات ) ماتحرمش اصلى داخل مع ناس ف بدور عليهم بس معرفش راحوا فين
الويتر : تحت أمرك ... تحب تشرب حاجه
احمد : حبيبى ربنا يخليك . شويه بس لما اقعد
...
احمد : انتوا روحتوا فين يا ولاد الجزم وحياة أمى لنا معلقكوا من رجليكو ... ملهى ليلى ؟ اجيبكو من ملهى ليلى ؟ شويه شويه هتروحوا تسقفوا ورا فيفى عبدو
..........
( ف العربيه . البنات راجعين ع البيت )
ساره : ( بتضحك وبتمسك بطنها ) سلمى انا عارفه ومتأكده ان كل ده هيتعك فوق نافوخنا ف الاخر بس معرفش ليه ماشيه معاك ومكمله ههههههههههههههه يخربيت ده يوم .. ايه اليوم العسل ده .. وايه الواد العسل ده . أحمد ده احلى واجمل صدفه عرفتها ف حياتى . اقسم بالله يابنتى ده جوهره .
سلمى : ( بتبتسم احراجا وخجلا وحبا ف أحمد ) نلم لساننا شويه عشان معوركيش ... وبعدين انا قولتلك قبل كده ان احمد ده هو رهان عمرى .. ومش هسمح لحد يخسرنى الرهان .. انا بعيش معاه طفولتى وشبابى .. وحابه وعاوزه اعيش معاه انوثتى وحياتى الجايه كلها ..
ساره : لا وهو مش مقصر هههههههههههه معيشك كل الحاجات دى ... سلمى اسالك حاجه كده قليلة الادب
سلمى : خير
ساره : محصلش بينكوا تجاوز ؟
سلمى : ههههههههههه أنا عن نفسي ... نفسي يحصل بس هو مابيرضاش .ههههههه ولما بحس انه هيتجاوز غصب عنه بيرجع ف الاخر ..
ساره : يالهوى .. ازاى بيقدر يستحمل جمالك يا عم الحاج انت هههههههههه دانتى عينك لوحدها حكايه يا سلمى ... يابنتى دول اخواتى مش مسميينك سلمى صاحبتى .. مسميينك سلمى الحوريه
سلمى : ههههههههههه مش اوى كده ... استنى ( بتنادى ل عم محمد بواب البيت ) عم محممممممد دى عربية مين اللى واقفه قدام البيت
عم محمد : لا مؤاخذه يا ست سلمى دى عربية واحد بتاع دش هيخلص ونازل اهو
سلمى : لا والنبى انده عليه عاوزه اطلع ضرورى بسرعه
ساره : انت مش قولتى هتنزلى العربيه الجراج
سلمى : غيرت رأيى ... عاوزه احمد يشوف العربيه هنا عشان يعرف ان احنا فوق لما ييجى
...............
( ف الملهى بعد ساعه )
الويتر : اجبيبلك حاجه تانيه يا فندم
احمد : جرى ايه ياعم . دى خامس كوباية شاى . ارحم امى شويه . هو انت كل ما هتشوف خلقتى هتقولى اجيبلك ايه
الويتر : هههههههههه معلش .. انت بتدور على حد ؟ ممكن افيدك ؟
احمد : ياريت والنبى .. بدور على بنتين كده ولاد ناس مش وش المكان ده .. لامؤاخذه يعنى ماتزعلش ...
الويتر : ولا يهمك .. طيب ماهو المكان مليان بنات
احمد : منا مسحت ام المكان كله خمسين مره مش لاقيهم مع انى شايفهم بأم عينى داخلين .. هو فيه اماكن تانيه هنا ممكن حد يقعد فيها غير الصاله دى
الويتر : اه طبعا .. الكواليس ورا
احمد : طب ولما هو فيه كواليس كانت فين من زمان دى ماقولتش على طول .. انت مش سالك يالا ... ورينى فين الكواليس دى
..............
( احمد دخل اوضه كده على شلة بنات بيغيروا هدومهم )
البنات : يا قليل الادب يا حيوان اقفل الباب
احمد : لا مؤاخذه معلش ... لا مؤاخذه ... ( بيتخض وبيقفل الباب بسرعه ) . ماشي يا سلمى . وحياة امك لنا معلقك ف قلب الجامعه ... انت والكلبه اللى ساحباها وراك دى ... ماشي
( بيدخل اوضه تانيه بيلاقي فيها بنات تانيين بردو بيغيروا هدومهم وقبل ما يشتموه بيتكلم )
احمد : هقفل الباب عشان انا حيوان والله واستاهل ... لامؤاخذه ( بيقفل الباب )
..............
( ف اوضة سلمى )
سلمى : ( ايديها على خدها ) يا ترى بيعمل ايه دلوقتى وبيدور عليا وبيشتم بيقول ايه
ساره : هههههههههههههه داحنا زماننا اتشمنا احلى شتايم
سلمى : ههههههههههههههههههههه بس احنا ف السليم الحمد لله ... هو احنا خرجنا من البيت النهارده
ساره : ابداااا . ولا عتبنا بره عتبة الاوضه
سلمى : ( بيضحكوا هما الاتنين ) بقولك ايه قومى اعمليلنا سندويتشين مع شويه شاى بلبن . انا جوعت من كتر الضحك اللى ضحكته انهارده
ساره : هههههههههههه على رأيك ... إلهام موجوده النهارده
سلمى : لا هى اجاززه النهارده ماما اديتلها اجازه .. قومى انتى بقي اتصرفى طيب
ساره : ماشي .. كويس ان عمو مش ف مصر اليومين دول والا كانت هتبقي فضايح
سلمى : هههههههه اه والله .. بابا راجع كمان كم يوم كده
ساره : ييجى بالسلامه .. انا قايمه وجايه
...........
( سلمى بتطلع صورة احمد وبتسرح فيها بشكل يخوف وبتمشى ايديها على وشه ف الصوره وبتتخيل انه قدامها )
.........
( احمد بيخرج يبص على عربية سلمى مش بيلاقيها بيرجع جرى على الحارس )
احمد : بقولك ايه يا هندسه . انا كنت سالتك عن بنتين اذا كان دخلوا ولا لا .. ماشوفتهمش خارجين
الحارس : اه دول لسا ماشيين حالا .
احمد : حالا ؟
الحارس : حاااااالا .. دانت لو بصيت على اول الشارع ممكن تلاقيهم
احمد : شكرا يا رياسه
.............
( احمد بيركب العربيه وبيطير ف الطريق عاوز يشوفهم )
.................
( بيلاقى العربيه راكنه قدام البيت )
احمد : وحياة اللى خلفكوا لنا بايت هنا الليلادى
.............
البنات بياكلوا سندويتشات على السرير وسلمى بتقوم عشان تبص م الشباك على بره .. بتلاقى العربيه بتاعة احمد واقفه ورا عربيتها )
سلمى : ( عينيها بتلمع من الفرحه وبتبتسم )
ساره : ايه ده ؟ مالك فاشخالنا سنانك كده ليه
سلمى : احمد جه ههههههههه
ساره : هههههههههه فين ؟
سلمى : اهو ورا عربيتى
ساره : ههههههههههه طب ايه الكلام . هنعمل ايه دلوقتى
سلمى : ولا اى حاجه .. خلى تليفونك مقفول لانه اكيد اكيد بيرن وهيرن وهيفضل يرن . ولو شاف واحده فينا ولا سمع صوتها هيرمينا ف البحر هههههههههه ف خلينا بعيد الليله
ساره : والله على قد منا مبسوطه من رد فعله على قد ماهو بيصعب عليا .... حرام عليك يا شيخه اللى بتعمليه فيه ده هههههههههههههه الواد شكله مانامش بقاله ييجى شهرين
سلمى : ههههههههههههههه هو مش عاوز يبقي اخويا .. يستحمل بقا ... وبعدين طفى النور بقي مش عاوزين نخيله
..................
مصطفى : الو !
احمد : ايوه
مصطفى : انت فين يابنى
احمد : موجود . عاوز ايه
مصطفى : مافيش بسال بس انت جاى القهوه ولا ايه نظامك
احمد : لا انا بره الليله خالص .... الواد زياد معاك
مصطفى : اه جنبى اهو
احمد : طب اديهونى
زياد : الو !
احمد : ايه يا زوز معلش عاوز العربيه الليلادى وهجيبهالك بكره ان شاء الله
زياد : وانت بروح امك يعنى كنت قولتلك انى عاوزها . هههههههه ما تخليها معاك ياعم لغاية ما تزهق منها وابقي هاتها .. عيب ياسطا
احمد : حبيبى يا زوز ...
زياد : بس الحوار فيه ايه طيب رسينى
احمد : لما افهم انا الاول هبقي افهمك . اقفل بقي ماتشغلنيش
..............
( الساعه 12 بالليل ... احمد بيروح للصخر اللى كان كاتب عليه " معقول ماوحشتكيش " وبيبصلها )
( سلمى متابعاه من فوق وواقفه ف الضلمه من غير ما ياخد باله منها )
سلمى : ( بتكلم نفسها ) يا قلببببببببببي ... اقسم بالله عاوزه انزل ابووووسك دلوقتى )
...
( احمد بيكلم نفسه )
احمد : وبعدين يا ابو حميد ... وبعدين معاك . ايه اللى بيحصل بالظبط .. البنات دى راحوا المكان ده ليه وقعدوا جوه كل ده ليه وكانو فين اصلا ... يكونش البت انحرفت لما قولتلها اننا هنكون اخوات .. وبعدين اخوات ايه يا عم الاهطل انت . دانت عيل أوفر .. اشرب بقي . اشرب جاتك نيله تاخدك انت كمان ... ( بيبص للكلام اللى مكتوب ) معقول ماوحشتكيش .. ! حلوه بردو الكلمه .. ( بيلاقى علبة الرش اللى كان كاتب بيها الكلام ده مرميه على الصخر تحت ) الله اكبر ... حلوه هتنفعنا دى
...........
( الساعه 2 بالليل سلمى بتبص من مكان متدارى كده بتشوف احمد لسا ع الصخر قصادها ولا رجع العربيه بتلاقيه كاتب جنب كلمه " معقول ماوحشتكيش " كلمه " يا ويلك " )
سلمى : ههههههههههههههههه همووووووووووت
ساره : بتضحكى على ايه
سلمى : تعالى بصى كاتب ايه وقاعد ازاى ؟ هههههههههههههه
ساره : هههههههههههههه والله حرام عليك .. عمال يشرب ف سجاير لما قرب يخس
سلمى : ههههههههههههه بطلى بقا . وبعدين انا بعمل كده عشان ارجع كل حاجه زى الاول .. بس بعد زيارة بكره
ساره : هتعملى ايه تانى
سلمى : لازم اروح ل حاتم .. ولازم كمان اخد حق احمد منه .. وهحط النقط ع الحروف ..
ساره : طب والبيه اللى تحت ده . هتخلعى منه ازاى ؟
سلمى : ماهى دى المصيبه ( بتبص على احمد وبتبتسم ) دى احلى واجمل مصيبه عرفتها ف حياتى
ساره : ايوه عشان هو شكله كده مش عاتقك .. وهيفضل وراك لغاية ما يعرف ارار موضوع الملهى اللى روحناه النهارده ده ايه
سلمى : أراهنك انه دلوقتى عمال يكلم نفسه وهو باصص ناحية شباكى وعمال يقول شويه كلااااام انما ايه .. عسل .. ومش بعيد يكتب كمان كلمه دلوقتى )
.......
احمد : ( بيكلم نفسه لسا ) انتوا ايه مخمودين بدرى يعنى ولا حكايتكوا ايه ؟ اطلعى ياختى بصى اطلعى طلعت روحك . امين يارب ... اطلعى بصى على ميتين اللى خلفونى نشفت م البرد ربنا يهدك ع اللى انتى عاملاه فيا ده .... وأل ايه رايحالى كباريه .. مش بعيد تكونى شربتى هناك حشيش وجايه دايخه وعشان كده نايمه ... اه يانارى ادفع نص عمرى . نص عمرى ايه لا عمرى كله وحد يناولنى زمارة رقبتك يا معتوهه يا بنت المعتوهه ... ولا بلاش . امك طيبه وابوك طيب ... انتى اللى معتوهه لوحدك ... وانا دونا عن بنات الناس كلهم رايح احب المعتوهه دى ... ليه بقي ؟ عشان انا معتوه أكتر منها .. ماحنا كلنا شلة معاتيه ف بعض كده ... يارب .. يارب انا واحد مش فاهم حاجه خالص ... الدنيا برد كده ليه يا جدعان .. اما اروح اقعد ف المخروبه العربيه
...........
الي اللقاء في الحلقه القادمه

كاتب الروايه هو احمد سعد و تم نشر الروايه مسبقا علي بيدج هو و هي و بيدج stories and novels

لينك الكاتب
https://www.facebook.com/profile.php?id=100010381862587

لينك بيدج/ هو و هي
https://www.facebook.com/howa.weheyaa/

لينك بيدج/ stories and novels
https://www.facebook.com/StoriesAndNovels2020