رواية مهلكتي من جزء 1 : 18

الجزء_الحادي_عشر ( الحلقه الثالثه) ( مولانا ) ❤ ❤

................
(ف الحلقات السابقه )
فتحت الجواب لقت مكتوب فيه " الجواب ده بدات اكتبه من اليوم التانى لمهلة ال 30 يوم .. اكتشفت انى كنت اغبى بنى ادم ف الدنيا انك تكونى صاحبتى بس وانك ماينفعش تكونى غير حبيبتى . علمتينى معنى الحياه ومعنى الدنيا وحليتى ايامى وعيشت معاك 30 يوم ف الجنه .. لو حد سالنى عمرك اد ايه . هقوله 30 يوم بس ... والليله انا نويت افاتحك واقولك انى عاوز اكمل ال 30 يوم لاخر عمرى ... موافقه ؟ "
ويدوب دقات الساعه دقت 12 بالظبط قلبه وقف . والدنيا ضلمت
ضمته لصدرها وقالتله " موافقه " وهى بتعيط
بت يا سلمى ايه يا بنات انتو بتعيطوا ليه خير .. ماعدتش حاكى حاجه
........................... ( الثالثه ) ❤
سلمى : سلمى ايه بس يا أخى انت خليت فيها سلمى ؟ ايه النكد ده يا احمد ؟
احمد : ولا نكد ولا حاجه .. دى قصه حقيقيه على فكره
ساره : ياراجل ؟
احمد : اه زمبؤلك كده
فريده : واد يا احمد
احمد : ايووه
فريده : أنا عاوزه اسالك سؤال .. واتوقع اننا كلنا عاوزين نساله من بدرى
احمد : خير
فريده : انت حبيت قبل كده ؟ ههههههههههه
احمد : ايه السؤال ده .. مانتو عارفين انى أعذر لسا . بكرتونتى
فريده : اه صح نسيت انك برج العذراء
احمد : ماله يعنى برج العذراء .. هو برج عبيط شويه بس حلو ههههههههههههههه
سلمى : لا والله ده برج رايق ف نفسه كده ...
احمد : اهو اللى لقيناه بقا هنعمل ايه
ساره : بس انت عارف ! انت فعلا مايليقش عليك غير البرج ده
احمد : اشمعنى ؟
ساره : برج يُعتمد عليه وبيهتم باللى حواليه وباللى جنبه وبأهله . وصاحب شخصيه
احمد : مابصدقش انا بحكاية الابراج دى على فكره . اهو اى هطل بيقولوه وبيضحكوا بيه ع الناس ..
لا وتلاقى البنت من دول بتقرأ البرج بتاعها وتقول اه فعلا ياسلام ده كأنكوا بتتكلمو عليا .وهى قاعده اصلا بتقور بتشنجان
فريده : ههههههههههههههههه الله الله . حلوه بتنشجان دى جيبتها منين
احمد : من الاستاذه عبله كامل .. فاطنه اللى ف عبد الغفور عارفاها
فريده : طبعااااا دنا بحب اتفرج على المسلسل ده جدا
سلمى : انا كمان بتفرج عليه لما بييجى ف التلفزيون بس انا مش حابه شخصيه ابنه .. بحسه تافه كده ... يعنى ايه يعنى يفضل رافض انه يشتغل مع ابوه او انه يخاف ان نجاح ابوه يغطى عليه ... ايه المُبهر يعنى ف انك لا لازم تعمل لنفسك شخصيه بعيد عن ابوك .. ده ابوك .. إيتز ابوك يعنى
احمد : ماهو ف الاخر اشتغل مع ابوه بردو ...
سلمى : على رايك .. اسراء وايمان نامو يا عينى
احمد : دول مش بتوع سفر وفرهده دول
سلمى : بس واضح انك بتحبهم
احمد : جدااا . بنات بريئه كده محاوطين عليهم احنا من زمان
سلمى : يعنى ايه محاوطين عليهم
احمد : يعنى .. هما تربيتنا احنا ولاد المنطقه .. هو تستجرى واحده منهم تخرج مثلا متأخره ؟ . .... بتلاقينا احنا كلنا رايحه فين وجايه منين وبتبقي ليله هههههههههه لسا بردو ولاد البلد موجودين
سلمى : كان نفسي احس بالشعور ده .. بس يلا بقي البركه ف ايام الجامعه
فريده : بردو ماقولتلناش . حبيت قبل كده ؟ مش شرط حُب حُب ... يعنى . اعجاب الثانوى اعجاب الجيران قرايب .. كده يعنى
احمد : ( بيبص ل سلمى ) هو حصل اه
سلمى : ( بتتعدل ف قعدتها وبتبصله ) طب ما تحكيلنا طيب فرحنا معاك
منه : ( بتبص ل احمد ومركزه معاه ) احكي احكي
احمد : بقولكو ايه . اللى معاها ممنوعات ترميها احنا داخلين ع النفق
سلمى : نفق ؟ نفق ايه هتحكي بردو
احمد : لما نعدى النفق ... خليكو طبيعين بقي مش عاوزين حاجه تبان علينا
فريده : هههههههههههه مافيش فايده مسخره ... ايه يعنى اللى هيبان علينا . انت بتقول ايه يا جدع
.................
( بعد نص ساعه تفتيش وتأخير ف نفق قناة السويس )
سلمى : اوووف ايه ده كله .. انا الشمس كلت نافوخي
احمد : ماحجزتوش ليه طيران بجد بدل التعب ده يا بنتى .. واحنا الشباب كنا جينا براحتنا ...
سلمى : طيران ايه بس . ما الرحله حلوه اهى .. ها بقا احكيلنا كنت مُعجب بمين يا سي مُعجب انت
احمد : حقنه . والله حقنه . مابتنسيش ليه
ايمان : قويهم عيا البت حبيبه يا حمو
احمد : حبيبه مين دلوقتى الله يحرقك . انتى ايه اللى صحاك
سلمى : وايه حكايه حبيبه دى كمان
احمد : لا ماتشغليش بالك
سلمى : قول قول
احمد : دى واحده كده غلبانه كنت بعطف عليها
اسراء : ههههههههههههههه غلبانه جدا يا سلمى واخدالى بالك
سلمى : ياعم انطق . انطططططططق
منه : انطق والله مش هنسيبك .. اخلص واحكي
احمد : دى كانت زميلتى ف الثانوى ... سنه تانيه وسنه تالته معايا ... دخلت علمى مخصوص عشان تبقي معايا ... بس ربنا كرمها ودخلت هندسه خاصه ف المنصوره
سلمى : ايه حكايتها بقا
احمد : كانت هتخلينى اتفصل م المدرسه ههههههههههه
سلمى : ياعم انت هتنقط أمى ماتخلص واحكي الحكايه كلها لوكشه واحده . ده ايه ده . انت خانقنى ياد انت والله
احمد : انتى هتتًخلقى على امى ليه . طب مش حاكي
سلمى : أحسن . مش عاوزين نعرف .. دانت رخخخخخخم
احمد : احسن
سلمى : ( بعد 10 ثوانى ) انت ياعم خلص واحكي
احمد : هههههههههههههههه طيب
اول ما دخلنا تانيه ثانوى ..كانت هى معايا ف الفصل بتاعى
من أول يوم طبعا قعدت ف البنج اللى قصادى على طول
وخدى عندك بقا . أحمد معاك قلم زياده اصل نسيت بتاعى
احمد انت جبت الكتاب .. طب هاته كده هبص فيه ... وتكتبلى ف الصفحات اللى جوه الكتاب رقم تلفون البيت عندها . وحاجه نيله خالص وانا زى مانتى عارفانى كده ف الكنافه خالص ولا كنت باخد بالى من اساسه ... برج عذراء برج عذراء يعنى مش هزار ف الطراوه خالص
سلمى : ايوه ايوه ظيط علينا ظيط ماحنا هٍبل وهنصدق ايوه
احمد : ( بيبتسم ) وبعدين بقاااااااااا انتى مش قولتى احكي . منا بتنيل احكي اهو
سلمى : يعنى عاوز تقنعنى انك ماتصلتش عليها
احمد : لا ماتصلتش والله .. واتصل ليه انا يعنى
سلمى : البت كانت حلوه ؟
احمد : ايه ! لا ابدا
ايمان : هششششش يالا . والله يابت يا سيمى كانت قمي ... ده اتقدميها 3 مديسين م المدرسه .. دى كانت ميكة جمال المديسه
احمد : الله يحرقك روحى . اشوفك والعه كده . ماتتخمدى يامُهزأه
ايمان : لا انا قاعدايك
احمد : قاعدايي ؟ قاعدايي ايه طب اتنيلى اسكتى
سلمى : بقا قولتلى ملكه جمال بقي . هاا . وانت يا حنين ؟ مضعفتش قدام جمالها الفتاك ده
منه : كلمتها يا احمد مش كده
احمد : محصلش
فريده : طب احلف
احمد : ومقام سيدى عبد الكريم
سلمى : سيدك عبد الكريم مين ؟ ياعم بنقولك احلف انا مش مرتاحالك ياد انت . بقولك ايه نزلنى هنا
احمد : انزلك هنا فين ؟ ف الجبال دى
سلمى : معلش نسيت .. اننا على طريق ... اخلص احلف انك مكلمتهاش
احمد : وحياة معزتكو وغلاوتكو عندى ما كلمتها
سلمى : ماشي . كده نصدقك . ها بقا كمل
احمد : البت طبعا غرورها وكبريائها انه ازاى ولد هى عاوزه تكلمه وتكتبله رقم تليفونها وان كل الناس بتجرى وراها وشايفه حالها مايكلمهاش ... اتبلت عليا واستنت الاستاذ محروس بتاع الكيميا دخل الفصل وقالتله لو سمحت يا مستر احمد ده لمسنى وانا داخله الفصل وعمل حركات مش كويسه
طبعا الاستاذ محروس كان عارفنى وعارف ومتأكد انى مش انا اللى ممكن اعمل كده .. بس كان لازم ياخد اجراء عشان البت ماتقولش انه واخد صفى
سلمى : احيه ! وبعدين
احمد : ولا قبلين ... خدنى للمدير . اللى بردو كان عارفنى وعارف انى معملش كده . وجات البنت وقالت للمدير نفس الكلام انى لمستها وعملت مش عارف ايه حركات كده مش كويسه
المدير هزقنى قدامها وفضل يقول كلام مش تمام ..
احمد : قومت انا قايله ارفدنى يا استاذ زغلول . ارفدنى انا استاهل
قامت البت قايلاله ماترفدوش يا مستر هو معملش حاجه انا مسامحاه
وقعنا ع الارض م الضحك انا والاستاذ محروس والمدير هههههههههههههه والبت اتكسفت وطلعت ع الفصل بس انا طلعت راضيتها بكلمتين وعرفتها اننا اصحاب وزمايل وبس .الروايه ملك للكاتب أحمد سعد فقط وبيدج هو وهى.. وفضلت على النحو ده طول السنه كل شويه تعمل فيا مقالب .. بقولكو ايه . نامو شويه بقي عشان الطريق اللى جاي ده محتاج تركيز كله جبال ولفات بنت لذينه .. ف مش عاوز دوشه بقا ونامو شويه عشان أركز .. الساعه كام ف ايدك يا سلمى
سلمى : 11
احمد : طيب نامو . نامو يا جماعه انتو مانمتوش الليلادي
...............
(بعد ساعتين ف استراحه ع الطريق )
ساره : سلمى بقولك صحيح . هيحصل ايه لو حد م الفندق كلمك قالك ع الحجز ولا حاجه قدام احمد
سلمى : لا لا لا ماتقلقيش خالص انا كلمت البنت اللى حجزت معاها وفهمتها كل حاجه وأكدت عليها ان محدش يعرف حاجه حتى قولتلها تقول ان صاحب الفندق هو اللى حاجزهالنا .. وكمان جابتلى رقم البنت اللى واقفه ف الاستقبال اسمها فيروز . وكلمتها وفهمتها بردو وطلعت على علم بالموضوع ...
ساره : يعنى الدنيا متظبطه ؟ لانى مش متفائله
سلمى : ساره ! احنا عملنا مصيبه ولازم نكملها على خير انا قلبى نفسه بيترعش كل ما بفكر ف اللى ممكن احمد يعمله او يقوله لو عرف ... لغاية دلوقتى الدنيا ماشيه تمام . وهتكمل على خير .. انا مش عامله كل ده غير عشانه والله . هو يستاهل كل حاجه حلوه
ساره : طب يلا يلا عشان بينادى علينا عشان نمشي
......................
( ف استقبال الفندق كل الشله قاعدين على كراسي .. سلمى بتروح للاستقبال ومعاها احمد وقلقانه )
سلمى : مساء الخير . كان فيه حجز 5 غرف
فيروز : مساء الورد . حمد الله ع السلامه ... الغرف جاهزه يا فندم
سلمى : متوصى عليها الغرف مش كده ههههههههه
فيروز : هههههههه اه طبعا .. رحله سعيده وانشاء الله تتبسطوا معانا
............
سلمى : يلا يا جماعه كل واحده معاها مفتاح غرفتها ... وانت يا احمد معاكو مفاتيحكوا . هتعملوا ايه
مصطفى : هنعمل ايه ف ايه هنطلع ننام . انا مش شايف قدامى
سلمى : ياعم اسكت فضحتنا . كل شويه تتوه حتى وانت ماشي ورانا
مصطفى : اعمل ايه طيب ماهى الدخلات غريبه ...
احمد : هنطلع ننام دلوقتى وعلى بعد السساعه 8 كده نصحى ونشوف هنعمل ايه
سلمى : تمام .. عشان هلكانين .. يلا يا جماعه يلا
.................
ابو سلمى : ايه يا حبيبتى البنات وصلوا
ام سلمى : اه يا حبيبى لومه لسا مكلمانى دلوقتى بتقول لسا واصلين وهينامو
ابو سلمى : ماراحوش ليه طيران نفسي افهم بس
ام سلمى : سيبها مع اصحابها
ابو سلمى : يلا ربنا يسعدها
ام سلمى : البنت شكلها عكت الدنيا
ابو سلمى : ليه خير ؟
ام سلمى : سمعتها بالصدفه كده بتتكلم مع ساره بتقولها مش عاوزه احمد يعرف انى دفعت فلوس الغرف لانه لو عرف ان انا اللى دفعت مش هيطلع
ابو سلمى : احيييييييه ؟ هى البنت مفهماه ان هى مش اللى دافعه ولا ايه ؟ اومال مفهماهم ايه
ام سلمى : مفهماهم ان واحد صاحبك اللى عزم عليك بالغرف دى وسلمى خدتهم هههههههههههه
ابو سلمى : ههههههههههههههه احيه عليها وعلى ابوها .. البنت دى مابتتعلمش
ام سلمى : يا حبيبى ماهى مش حابه انها تبان اعلى من زمايلها . بالعكس دنا فرحت ان البنت عملت كده . حسيت ان عرفت اربي
ابو سلمى : ايوه يا ماما ماشي . هو شعور نبيل وكل حاجه انها تعمل كده وانها مش عاوزه تجرحهم او تجرح شخص واحد بس لان انا وانتى عارفين ان كل الشله بتاعتها ف نفس وسطنا كده ماعدا شخص واحد ... بس مش ده اللى قالقنى
ام سلمى : اومال ايه اللى قالقك ؟
ابو سلمى : صاحبهم لو عرف بالكلام ده بعد ما طلع واتفسحوا سوا هيزعل . والمرادى هتبقي زعله ممكن مايبقالهاش علاج .. هيحس انها كسرته .. انا عارف الواد ده وعارف اللى بيحس واللى هيحس بيه لانى كنت ف يوم من الايام زيه كده وف نفس ظروفه
ام سلمى : طب اتصل بيها اخليها تقوله ؟
ابو سلمى : بعد ايه بقي ! خلاص .. ادعيلها بقا انه مايعرفش
............
( الجانب المُظلم )
حاتم : ايوه ؟ وايه تانى
عمر : بس يا ريس هو ده .. كلهم طالعين
حاتم : طب اقفل اقفل
....
حاتم : الو ! عمو ازي حضرتك ؟
ابو سلمى : اهلا يا حاتم . ازيك يا حبيبى
حاتم : عمو كنت عاوز اشوف حضرتك واكلمك
ابو سلمى : اوى اوى . تعالى عدى عليا انا ف البيت مش خارج النهارده
حاتم : تمام . هعدى على حضرتك
.............
( ف غرقة احمد ومصطفى )
مصطفى : ما تنام يابنى شويه انت منمتش من امبارح
احمد : احنا المفروض مكناش جينا يا درش المشوار ده
مصطفى : ليه يا عمنا
احمد : ازاى نيجى على حساب غيرنا
مصطفى : يا احمد ما الموضوع كله هديه
احمد : مش عارف بقا بس انا مستغلط نفسي انى قبلت اجى
مصطفى : ياعم ما قولنالك الموضوع كادوه ... هديه من واحد عنده قرية زى دى ومش هيخس حاجه عليه انه يدى غرفه ولا اتنين ولا عشره حتى كم يوم مجامله لواحد صاحبه
احمد : أديك قولت . واحد صاحبه . ايش دخلنا احنا
مصطفى : خلاص بقا ماتعكننش ع البنات ولا تعكنن على نفسك . الرحله لسا بتبدا .. اومال لو كان حد من البنات مثلا اللى عزمنا
احمد : ( بيبص ل مصطفى ) عارف كنت هعمل فيك ايه هههههههههه
مصطفى : يلا يا واطي . انا بقول مثلا يعنى كنت هتعمل ايه
احمد : كنت هعمل ايه ؟ لا يا بيضا انت احسنلك ماتعرفش انا هعمل ايه هههههههههههه
مصطفى : طب نام ناملك شويه . وماتعكننش على نفسك وعلينا يا عم احمد ... الرحله عاوزين نستمتع بيها . والعيال اللى معانا دول عيال جدعه ...
احمد : ماشي ياعم مصطفى ... ناملك شويه
...............
سالى : مالك يا ماما قاعده كده ليه
ام احمد : كنت بصلى يا حبيبتى وبدعيلكو .. اغرفلك
سالى : لسا مش جعانه . احمد وصل ل الشيخ ده
ام احمد : هههههههههه اه يا ماما لسا واصل الشيخ .. ربنا يحرسه ويحرسكوا يا حبيبتى .. وربنا يعديها على خير
.................
( الساعه 9 بالليل )
سلمى : ما يلا يا ساره شهلى شويه ... هيمشوا
ساره : منا بخلص اهو ... فين الروج بتاعى مش لاقياه
سلمى : خدى من بتاعى وماتكتريش
........
( ف اللوبى تحت . احمد قاعد مع مصطفى وعلى )
احمد : يعنى حسن مش جاى
على : سيبه ياعم ده عيل فقرى بيقولك عضمى مكسر وسيبونى انام
احمد : سيبوه نايم سيبوه مش حمل فرهده ده ....
منه : مساء الفل
احمد : اهلا يا منون ... فين الباقى
منه : فريده نازله ورايا .. واسراء وايمان خلاص نازلين
احمد : والابلتين اللكعين اللى معانا نازلين امتى
منه : ههههههههههههه لا سلمى دى بالها طويل
احمد : هتقوليلى . دى شلل .. اهى نزلت اهى
سلمى : شكلكوا كنتو بتنموا علينا
احمد : طبعا ! ايه القمر ده
سلمى : اححم متشكره
احمد : ايه شلة البنات دى يا جدعان . هنمشي بيكو ازاى احنا دلوقتى ... دانتو مغطيين ع الاجانب والروسيات والطلاينه اللى هنا .. يخربيت كده
سلمى : بطل بكش بقي
احمد : والله مغطيين عليهم كلهم .... سلمى ولا ساره ولا منه ولا فريده .... وايمان واسراء .. ايه ده ايه ده ؟؟ ايه القمر بتاعى ده
ايمان : ايه يايك ؟
أحمد : يأيي ؟ يأيي اللى هو مين ؟
سلمى : رأيك يا احمد رأيك ؟ ههههههههههههههه بتقولك رأيك
احمد : ااااه رأيي ؟ قمر يا مونى قمممممر .. وايه الاحمر اللى حاطاه على خدودك ده ؟ وايه ده حاطه ايلاينر
ايمان : اه . ايه يأيك ف الايلاينيي بتاعى
احمد : طيب يلا يا جماعه
ايمان : بقولك ايه يايك ف الايناينيي
احمد : يا جماعه بقولكوا يلا ....
( سلمى ومنه بيضحكوا بصوت عااااالى )
منه : والله العظيم فقر ... ههههههههههههه حتة مانجايه يا ايمان والله
اسراء : هو على طول كده كابسنا
احمد : ايه ده ؟ انتى حاطه ايه ف خدودك يا اسراء ؟ ايه الاحمر ده كله . انتى سارقاه ولا ايه
اسراء : انت هتستلمنى ولا ايه
احمد : وايه ده ؟ ترتر ؟ حاطه ترتر يا أم فتحي
سلمى : ترتر ايه هههههههههههههه ههههههههههههههههه هموووت يخربيت فقرك . ده اسمه هايلايتر
احمد : يامه بقا . انتو بصراحه حوارتكوا كتيره . يلا خلينا نروح نِعمه نتمشي شويه
منه : يلا
فريده : يلا ..... ايه رأيكو ف الكاميرا دى بقا
احمد : يابنت الجنيه ! كويس انك جبتيها عشان تصورينا طول الرحله
سلمى : دى فكرتى على فكره ... قولتلها ماتسيش كاميرتك
احمد : الله ينور ياسطا .. يلا بينا
.........................
حاتم : مساء الخير يا طنط
ام سلمى : اهلا يا تومه اتفضل يا حبيبى .
حاتم : عمو جوه ؟
ام سلمى : اه يا حبيبى جوه مستنيك
حاتم : متشكر جدا ... كنت عاوزه ف موضوع كده
ام سلمى : طيب هو ف اوضة المكتب مستنيك وانا هعملكو حاجه تشربوها وهبعتهالكو
حاتم : تسلم ايديكى يا طنط ...
...
( غرفة المكتب )
ابو سلمى : اهلا يا حاتم . اهلا يا حبيبى تعالى
حاتم : اهلا بيك يا عمو . ازي حضرتك
ابو سلمى : الحمد لله
حاتم : اخبار صحة حضرتك ايه
ابو سلمى : الحمد لله ... هتتعشي معانا النهارده بقي
حاتم : لا يا حبيبى انا جاي ف كلمه كده لحضرتك وماشي على طول
ابو سلمى : خير يا حاتم
حاتم : هو حضرتك كنت موافق على الرحله اللى موجوده سلمى فيها دلوقتى
ابو سلمى : كنت موافق ؟ يعنى ايه ؟ وايه دخلك بسلمى من أساسه
حاتم : يا عمو انا بكلم حضرتك من حيث انى فرد من العيله ويهمنى أمر سلمى
ابو سلمى : محدش يهمه أمر سلمى غير ابوها وامها وبس .. واوعاك ف يوم تحاول تدخل ف شئونها
حاتم : انا اسف يا عمى بس ازاى حضضرتك توافق انها تطلع رحله مع ناس غريبه مانعرفهمش ومعاهم شباب كمان
ابو سلمى : بس انا اعرفهم
حاتم : تعرفهم ؟
ابو سلمى : جرا ايه يا ولا ! هو انت فاكرنى قاعد طيشه .. دى بنتى الوحيده ولازم اعرف رايحه فين ومع مين ومين اللى معاها . واللى معاها دول ناس أمنهم على بنتى ولا لا
حاتم : يعنى حضرتك عارفهم . ومأمنهم على سلمى وهى معاهم
ابو سلمى : 100 %
حاتم : اااه ! تمام انا متاسف لحضرتك
ابو سلمى : حااااتم ! سلمى بنتى حُره .... بنت حُره . والحُره مابتغلطش ولا بتتغصب على حاجه ... واللى عاوزاه هى بس .. بس هو ده اللى هيتم .... قيس على الكلمتين دول كل حاجه ف حياتها
حاتم : متأسف يا عمي انا آسف
....................
( ف أحد الكافيهات على ممشي خليج نعمه )
سلمى : احمد ما تعلمنى الطاوله دى
احمد : الله الله ! خشي .. هنلعب 31
سلمى : 31 ايه ؟ هى طاوله واحده بس اللى هنلعب بيها
مصطفى : ههههههههههههههه بيضحك وبيدبدب برجله ) همووووووووووت حرام عليك
سلمى : بتضحك على ايه يا زفت انت
على : ههههههههههههههههههههههه والله العظيم كمية براءه ماتتصوفش
منه : العيال دى بتضحك عليك ليه يا سلمى
احمد : ( بيبص على سلمى ومسسهم معاها وهى بتتكلم مع منه وبيبتسم )
سلمى : انا عارفه ...بيقولى هنلعب 31 قولتله هنلعب بطاوله واحده بس
منه : يا غبيه 31 يعنى هتلعبو 31 دور
احمد : ( بيتف النسكافيه اللى بيشربوا من بؤه وبيضحك ضحك هيستيرى هو ومصطفى وعلى ) انا همووووووووووت . بقولكو ايه محدش يتكلم . انا هفهمك اللعبه من سكات
فريده : والله غبيه انتى وهى وضحكتيهم عليكو
احمد : استنو يا جماعه ..... طيب يعنى ايه 31 يا ديدا
فريده : اكيد يعنى عدد الزراير اللى بتلعبوا بيها دى
احمد : ههههههههه هههههههههههه انا هتشل . هتشل والله ربنا يهدكو
ايمان : يابنت الهبيه انتى وهي 31 دى يعنى النتيجه اللى ف الاخي .. هتفضيوا تيعبوا لغاية اول واحد يجيب نتيجة ال 31
احمد : سقفه يا جماعه ل ايمان
( جرسونات الكافيه كلهم بيسقفوا ل ايمان لانهم اساسا كانو مركزين مع الحوار وخفة دم الشباب كلهم وهما قاعدين وجمالهم الطاغي والمُلفت )
احمد : ( بيبص عليهم ) ايه ده ؟ ايه خير يا جماعه
احد العاملين : ههههههههههههه باشا والله قعدتكو زي الفل .. معلش ركزنا معاكو . ماقدرناش والله من اللى سامعينه
احمد : متشكر يا ريس ... ..
سلمى : انا حاسه ان شكلنا وحش مش كده
احمد : ههههههههههههه ماتقلقوش . بصى يا سلمى انا هفهمك بتتلعب ازاى وركزى معايا . عشان لو اتعلمتيها هلعبها معاك على طول
منه : خلاص علمهالى انا وهلعب معاك على طول
سلمى : ارجعى مكانك يا ماما . ارجعى لأديك ف وشك
احمد : بصى يا ستى ركزى معايا . اولا دول ماسمهمش زراير زى الابله فريده ما بتقول . ركزى بقا
.....................
سلمى : بقولك ايه يا احمد عاوزين ننزل البحر بكره
احمد : ماشي . هننزل طبعا
سلمى : عادى يعنى
احمد : اه عادى , هو احنا جايبينكو هنا نحبسكوا ف الفندق ولا ايه . عادى اتمتعوا بحياتكو ودنيتكو ال 3 ايام دول انتو تعبتوا السنه كلها ..
منه : الله عليك ...
مصطفى : اوبااااا شوفت البنت الطليانيه دى يا احمد بصوا يا جماعه
احمد : ( بيبص ل سلمى ) لا يجوز يا اخ مصطفى
سلمى : ( بتبصله ف الخباثه كده ومستنياه يغلط بس ويبص )
احمد : هو انا نفسي ... بس والله يابنى لا يجوز
منه : فعلا البنت حلوه اوى
فريده : ايه ده يخربيت كده هههههههههههه البت عامله كده ليه
احمد : ( بيبص ل سلمى اللى عينيها متعلقه ف عينه وبتستحلفله لو بص ) .. طيب بص يا مصطفى اوصفلى اللى انت شايفه عشان مش عارف ابص
سلمى : ( بتضحك غصب عنها ) ويوصفلك ليه انا اوصفلك
احمد : اوصفى
سلمى : اهى واحده سافله .. سافله وخلاص
احمد : يلا ربنا يهديها ...
........................
( تانى يوم ع البحر )
احمد : ايه اللى انت لابسه ده يابنى انت وهو
مصطفى : ايه ياعم عاوز ايه
احمد : اطلع البس فانله دارى بيها بطنك وصدرك يا اهطل انت وهو . انتو طالعين لوحدكو . اتلمو انتو معاكو زمايلكو
مصطفى : وفيها ايه
احمد : يا عم ماينفعش . اخلص انت وهو واطلع البس حاجه استر نفسك ..
.....................
سلمى : احمد خليك حكم بينى وبين منه ؟ شوف مين هيسبق
احمد : يلا ... من هنا لغاية مكان ما مصطفى هناك كده وترجعو تانى تلمسوا ايديا . اشطا
سلمى : اشطا .. يلا يا منه
احمد : هاا . وااااحد اتنييييين تلاااااته
........
( البت الطليانيه بتعدى على احمد وهو مستنى سلمى ومنه يييجو وبتسأله بالايطالى على مكان المطعم وبيكلمها بالايطالى وبيوصفلها المكان وعماله تتدرش معاه وتقوله انها شافتهم امبارح ف الكافيه . وانهم شدو نظرها . وفرحت لما شافتهم معاها ف الفندق .. واحمد منسجم جدا ف الحوار .... بيلاقى جردل رمل مضروب ف ضهره من وراه )
احمد : اااااااااي ! ايه ده يخربيت اب.... مين ؟ سلمى هانم بنت بلدى
سلمى : انت بتعمل ايه ؟ والبت دى هنا بتعمل ايه هى معانا ف الفندق ؟
احمد : قصدك مين ... الانسه كارمن ؟ دى اخت فاضله
سلمى : وكمان عرفت ان اسمها كارمن ؟ يعنى سايبنى انا ومنه بنتسابق وانت هنا بتظبط الهوامش
احمد : اسمها بفيش الهوامش .. نخلى بالنا من الافيهات بتاعتنا
كارمن : شاو
سلمى : شاو ياختى عاوزه ايه
كارمن : ( بالايطالى فيما معناه ... دى صاحبتك )
سلمى : بتقولك ايه بنت الظريفه دى
احمد : بتقولك انك حلوه اوى
سلمى : والله !
منه : انت ايه اللى موقفك معاها يابنى انت
احمد : انا لا وقفت ولا روحت ولا جيت
كارمن : ( بالايطالى فيما معناه : انا حاسه انى مبسوطه معاكو واتمنى اقضي معاكو اليومين دول )
سلمى : بتقول ايه .. ترجم يا عفيفى
احمد : بتقولك انها حبيتكو وعاوزه تبقي صاحبتكو
سلمى : نو ! فاهمانى ؟ نووووووووو وامشي يلا من هنا
احمد : ( بيقع م الضحك )
كارمن : بيركيه ؟
سلمى : ايه بيركيه دى . يعنى ايه ؟
احمد : بتقولك ليه ؟ ليه بتقوليلها لا يعنى
سلمى : اهو كده ... وامشي بقي ... جوو . جو من هنا
مصطفى : انا همووووووووووت ههههههههههههههه ايه الرحله القمر دى
سلمى : وانت ؟ انت بنى ادم سافل .. جاى تظبط هنا
احمد : انا لا ظبطت ولا اتنيلت
سلمى : طب يلا نمشي
ايمان : استنو شويه لسا مالحقناش نبلبط
سلمى : يلا يابنت الهبله انتى وهى . والله ماحنا نازلين الشط تانى .. ايه ده . ايه كمية البنات اللى قالعه دى . اللى مافيه واحده ساتره نفسها
سمر : مساء الخير !
احمد : إبعت ياللى بتبعت
سلمى : ( بتهبده بالشنطه بتاعتها ف دماغه )
احمد : ااااه . فيه ايه
سلمى : اهلا مساء النور .. اؤمرى
سمر : انتو اسكندرانيه مش كده
سلمى : اه !
سمر : باين عليكو . انا جايه بقالى يومين انا واصحابي . وبصراحه انتو شلتكو دمها خفيف اوى
سلمى : دمنا خفيف اه . وانتو شلتكو بقا كام واحد ولا كام واحده
سمر : لا احنا اربع بنات بس .. من القاهره احنا م المعادى عارفاها
سلمى : اه طبعا عارفاها ياسلام
سمر : ايه رايكو نسهر النهارده سوا
سلمى : لا اصل صاحبنا ده تعبان النهارده
احمد : لا انا مش تعبان
سلمى : لا تعبان ايش عرفك انت . ورايحين نكشف عليه معلش خليها يوم تانى
سمر : خير بس فيه ايه ماهو كان حلو من شويه
سلمى : لا ده بعيد عنك بيجيله تهيؤات .. بيمشى يحدف الناس بالطوب
احمد : هو مين .. مين ده يا معلم اللى بتتكلم عنه
سلمى : هشششش
سمر : هههههههههههههه واضح انك بتهزرى .. هنخرج الليلادى ماشي
سلمى : وماله ! نخرج
........
سمر : زى ما قولتلك .. شلة اصحاب بس مش مرتبطين ولا حاجه
رشا : والله باين انهم شله زى العسل ... البنات حلوين اوى وقمامير ايه ده
سمر : هههههههههه واسكندرانيه كمان
رشا : لا دى واضحه .. كلامهم اصلا زى العسل بس البت اللى لابسه النضاره دى ماشوفتش كده ف جمالها قبل كده .الروايه ملك للكاتب احمد سعد وبيدج هو وهى فقط . مش انا بنت اهو وحلوه . بس يخربيتها يا شيخه صاروخ
سمر : دى كانت هتضربنى وانا بقولها نخرج معاكو
رشا : ههههههههههههه اشمعنى
سمر : معرفش .. الظاهر بتغير على الواد
رشا : هو يتغار عليه بصراحه . بس باين اخته يا بنتى ..
سمر : لا لا اخته ايه
رشا : والله باين اخته ... دول شبه بعض
سمر : معقول ؟
رشا : مش معقول ليه .
سمر : بس كلامها وانفعالها مايقولش ان دى غيرة اخوات يعنى
رشا : معرفش ! اصلهم شبه بعض ماشاء الله
سمر : هيبان . اتفقت معاهم هنخرج على 10 كده
.....................
ابو سلمى : بقولك ايه . رنيلى على سلمى كده
ام سلمى : ليه هتقولها ايه ؟
ابو سلمى : اديهالى بس تليفونى جوه
........
سلمى : الووووو ! ايه يا حبيبى
ابو سلمى : ايه يا روح حبيبك . اجازتك عامله ايه ؟
سلمى : بخير يا حبيبى . مبسوطين وكلنا كويسين الحمد لله
ابو سلمى : روحتو فين النهارده
سلمى : لسا جايين من ع البحر وهنخرج بالليل كده هنروح المشايه او السوق او هنطلع ع الهضبه
ابو سلمى : طيب ايه العكه اللى انتى عكيتيها دى وليه ماقولتيش لصاحبكو انك انتى اللى حاسبتى ع الغرف . ليه يا سلمى تعملى كده وتجرحيهم ليه
سلمى : والله العظيم يا بابا انا كل همى انى مجرحهمش وكل همى انى .. طب بص هكلمك كمان شويه عشان فيه ناس جنبي
ابو سلمى : ده احمد اللى جه جنبك صح
سلمى :: احححم اه
ابو سلمى : طب اديهونى
سلمى : حاضر ..... احمممد بابا عاوز يكلمك
احمد : ماشي هاتيه ... اهلا ازيك يا عمى
ابو سلمى : بخير يا ابو حميد خلى بالك م البنات
احمد : ف عنينا يا عمى . ماتقلقش دول ف عينينا والله
ابو سلمى : مش هوصيك يا احمد .. ماتزعلهمش
احمد : هههههههههههه ازعلهم ايه بس . وصيهم هما علينا
ابو سلمى : ( بيسكت كده وبيبقي عاوز يقوله بس بيمنع نفسه ) طيب يا حبيبى خلو بالكو من بعض وترجعوا بالسلامه ان شاء الله
احمد : حاضر يا عمى .. مش عاوز حاجه اجيبها لحضرتك من هنا
ابو سلمى : لا يا حبيبى ماتحرمش منك .. خلو بالكو بس من بعض
احمد : حاضر .. مع السلامه
ابو سلمى : سلام يا حبيبى
........
ابو سلمى : اوووووووووووف عليكى يا سلمى . غبيه . غبيييييييييه . لو عرف هيبعد عنهم
ام سلمى : ليه قالك ايه ؟
ابو سلمى : هو لحق يقول ولا يتكلم ؟ بس انا عارف هو هيعمل ايه لو عرف .بنتك دى غبيه جدا
ام سلمى : اللى حصل بقي يا حبيبى . اللى حصل
ابو سلمى : يعنى ايه اللى حصل . هى لسا صغيره ؟ دى انسه وكبيره ودلوقتى مسؤوله عن تصرفاتها ...
ام سلمى : سلمى ماشيه ورا قلبها . لاغية عقلها خالص وكل اللى هاممها انها تشيل شويه من اللى عليه ... مابتشوفهاش لما بتيجى تحكيلى عنه وتقولى يا مامى ماعدتش بشوفه من كتر الشغل اللى بيشتغله ... مطعم وبيروح ساعتين الصبح ف وكالة مش عارف ايه وناسي نفسه . عاوزه تشيل عنه شويه . ده قصدها
ابو سلمى : اللى تاعبنى ف الموضوع كله الولا .... الولا هيتكسر كسرة عمره وبكره تشوفى
ام سلمى : طيب معندكش حل طيب
ابو سلمى : كلمى سلمى ضرورى وقوليلها تتصرف وتجيبلى رقم صاحب الفندق باى شكل .. وانا هتصرف وهخلى الموضوع كأنه بجد وكانه مجامله فعلا ...
...................
احمد : بقولك ايه يا لوم ! تعالى اشترى هديه لباباك
سلمى : ( بتبصله ومستغربه ) بابايا ؟ افتكرته ليه
احمد : بحبه هههههههههههه وبعدين انا كنت ناوى اجيبله حاجه والله ونجيب لوالدتك بردو ..
سلمى : ايوه بس انا اللى هحاسب
احمد : هو انتى مُصره تزعلينى ليه يا سلمى . ليه يا ماما بتقولى الهطل ده .. فيه ايه يا بنتى ؟ ايه الغباء ده . بقولك تعالى نروح يعنى انا اللى هشترى يعنى انا اللى هحاسب ..
سلمى : سورى يا احمد والله انا بهزر .. طب هتجيبلهم ايه طيب
احمد : معرفش .. فصلتينى اصلا .. انا هطلع اغير هدومى واخدلى دش وانام شويه
سلمى : بلاش رخامه بقا . والله هزعل منك بجد
احمد : هتهبلى ف الكلام تانى ؟
سلمى : لا والله خلاص
احمد : طيب .. هننزل السوق القديم واحنا بره ونروح كده ف الخباثه نشترى حاجه سوفينير كده
سلمى : اشطا يا مولانا
احمد : بقالك كتير ما قولتليش مولانا .. ههههههههه يلا بقا اطلعى ناميلك شويه
سلمى : اوكى ... وانت كمان اطلع نام
............
سلمى : الو ! ايوه يا مامى انا جبت رقم صاحب الفندق من الاستقبال
ام سلمى : طب ابعتهولى على تليفونى . وباباك هيكلمه
سلمى : حاضر ! انا مش عارفه اقولكوا ايه والله . انتو بجد أحلى حاجه ف حياتى
ام سلمى : تانى مره ماتشغليش دماغك .. وفكرى كويس يا ماما
سلمى : حاضر يا حبيبتى ...
ام سلمى : هتعملو ايه دلوقتى
سلمى : هننام شويه .. عشان من الساعه 9 الصبح تحت .. وهنخرج على 9 كده كده
ام سلمى : ماشي يا روحى . كلمينى لما تصحي
سلمى : حاضر .. وبوسيلى بابي كتيييييييييييير وقوليله بحبك اوى
................
مصطفى : ايه يا رايق كنت فين ؟
احمد : كنت تحت مع سلمى .. الواد حسن لسا نايم
مصطفى : اه دخلتله دلوقتى . نزل فطر وطلع نام تانى
احمد : ماشي
مصطفى : مالك بالك مشغول ليه
احمد : مافيش ... هكلم امى اتطمن عليهم وهاجى انام ..
.........
( بعد نص ساعه )
احمد : مصطفى شوف مين بيخبط
مصطفى : انت طلبت حاجه م الروم سيرفس ؟
احمد : هطلب ايه ياعم .. شوف مين لايكون حد م العيال
مصطفى : طيب خليك .....
الويتر : مساء الخير يا فندم
مصطفى : مساء النور
الويتر : دى هديه من صاحب الفندق لنزلاء الخمس غرف اللى جنب بعض لحضراتكو يعنى
مصطفى : صاحب الفندق ؟ ااااااااااااااااااه متشكرين جدااا . انتو عديتو ع باقيت الاوض ؟
الويتر : اه يا فندم ... بالهنا والشفا .. عن اذنكو
مصطفى : اتفضل يا حبيبى اتفضل
............
مصطفى : الظاهر كده ابو سلمى ده مسيطر خالص . شوف الراجل صاحب ابوها صاحب الفندق ده جايبلنا ايه هههههههههههه وجبات وعصاير فريش وحاجه فخمه اوى ...
احمد : باين كده . بس ماهو ده كله تُقل ع الراجل يا عم
مصطفى : يابنى تُقل ايه ؟ بيزنس يا معلم ومجاملات . واكيد بيجامل سلمى واصحابها عشان بردو ابو سلمى اكيد هيجامله ف شغله ..
احمد : باين بقي ... ادي الوجبه بتاعتى والحاجه دى ل على انا مش واكل
مصطفى : ليه يا عمنا
احمد : ماليش نفس والله ... مش جاى على بالى اكل خالص
مصطفى : طيب اسيبهملك شويه كده لما تقوم تاكلهم
احمد : لا لا . إلحق على بس قبل ما ينام واديهاله خليه يزود على اكله هو وحسن
مصطفى : ماشي ياعم !
............
فريده : مالك يا منوش
منه : مافيش يا حبيبتى . مش هتنامى
فريده : اه هنام شويه عشان هلكانه
منه : هنام انا كمان شويه .... بقولك ! هما اسراء وايمان يعرفوا بحكايه الفندق وان سلمى هى اللى دافعه
فريده : احيه لا ! اوعى تغلطى قدامهم وتقولى حاجه .. كلنا عارفين بس احمد واسراء وايمان بس اللى مايعرفوش ...
منه : انا بسال بس ..
فريده : ايوه مش عاوزين زعل والنبى . الرحله لغاية دلوقتى ماشيه اخر حلاوه .. وزى مانتى شوفتى وسمعتى سلمى وهى بتأكد علينا
منه : على فكره سلمى مكنتش هتقولى ولا هتقولك غير لما انا عرفت بالصدفه لما شوفت تحويل الفلوس لما جيت سالت السكرتاريه ف الشركه قالتلى ان سلمى هى اللى حولت الفلوس
فريده : ما علينا . بس اهو الموضوع حلو لغاية دلوقتى
منه : على رأيك ! تفتكرى احمد لو عرف حركه زى دى ؟ ممكن يعمل ايه
فريده : مش عاوزه افتكر ! يابااااااي على ده هيبقي احساس زباله وخصوصا اننا عارفين هو ممكن يعمل ايه ساعتها .. بس اللى هتبققي صعبانه عليا ساعتها بجد هى سلمى . هى اللى هتاخد الضريبه
منه : ( بتبصلها ) اه فعلا معاك حق ... ممكن يبعد عنها خالص .. قصدى عننا كلنا يعنى
...................
الي اللقاء في الحلقه القادمه

كاتب الروايه هو احمد سعد و تم نشر الروايه مسبقا علي بيدج هو و هي و بيدج stories and novels

لينك الكاتب
https://www.facebook.com/profile.php?id=100010381862587

لينك بيدج/ هو و هي
https://www.facebook.com/howa.weheyaa/

لينك بيدج/ stories and novels
https://www.facebook.com/StoriesAndNovels2020