................
(ف الحلقات السابقه )
مها : ماشي .. ( بتقرب من احمد وبتبصله ورايحه عليه عشان تهزر معاه شويه )
مها : ازيك يا عسل انت
احمد : اهلا ازيك يا انسه مها
( زبونه بتيجى من ورا بسمه وهى ماسكه صينية وبتخبطها بخباثة على مها وهى واقفه مع احمد والاكل بيبهدل مها )
....................... ( الثانيه ) ❤
مها : حرام عليكى يا بسمه ايه اللى عملتيه ده ؟
بسمه : غصب عنى والله .. معرفش ايدى اتخبطت ف مين
احمد : ( بيبص ورا بيلاقي سلمى راجعه على ترابيزتها وبتبصله وبتطلعله لسانها .. وبتشاورله بايديها على رقبتها انها هتدبحه )
احمد : ( بيكلم نفسه وهو سرحان ف جمالها ) عشمان يا سيدنا النبى ! الناس تحب الناس ....
.....................
( بعد ربع ساعه )
احمد : اتفضلوا !
سلمى : ومالك بتنزل الطلب وانت مكشر ليه كده ؟ افرد بوزك يا بابا احنا المفروض زباين جديده والمفروض انك شطور ف شغلك زى ما سمعت من اللى هنا بيتكلمو عنك ... ولا مانتش فالح غير ف المرقعه وبس
احمد : ( بيمسك نفسه مش عاوز يضحك ) انتى عاوزه ايه ؟
سلمى : هعوز منك ايه يعنى . جايه اتعشي !
احمد : عاوزه ايه قوليلى . جايه تجرى شكل ليه ؟
سلمى : انت لسا شوفت شكل ؟ دنا هوريك ... عشان مش كل شويه اجيبك من حته شكل ....
احمد : ماتهدى صاحبتك شويه يا كانزايه انتى .. ولا مش فالحه غير ف الاكل
ساره : ولاااا ! انت ماتشطرتش ع الحمار جاى تتشطر عليا انا
سلمى : هو مين ده اللى حمار يابنت الحماره
احمد : هههههههههههههههههه انا ماشي ... الفوجين اللى مستنيهم وصلوا
سلمى : روح ياخويا .. وعلى الله اشوفك بتهئ ولا بتمئ معاهم .. انا قاعدالك هنا لاخر الشيفت بتاعك
احمد : يابااااااااااااي . حقنه
...................
( ترابيزه جنب ترابيزه سلمى وساره قاعد فيها اتنين شباب عمالين يبصوا على سلمى وساره ... سساره بتاخد بالها وبتكلم سلمى )
ساره : اعوذ بالله على وجع البطن
سلمى : مالك
ساره : الاتنين الهُطل اللى قاعدين ف الترابيزه اللى جنبنا دول مركزين معانا
سلمى : طب فكك منهم وماتبصيش عليهم ... مش عاوزين مشاكل يا ساره .. احمد لو خد باله هيعمل مشكله وهيترفد من شغله .. مش عاوزين مشاكل الله يسترك .. ولا اقولك . تعالى نروح نمشي ... بدل ما العمليه تكبر .. انا مش عاوزه احمد يخسر شغله
ساره : ماحنا لو جينا نمشي . شكل العيال دى لبش وهيمشوا ورانا
سلمى : لا مش للدرجادى . دنا اديهم على دماغهم
ساره : طب يلا
احمد : ( بيبص عليهم بييجى ناحيتهم ) ايه يا بنات رايحين على فين ؟
سلمى : مش عارفه مصدعه كده . هروح بقي شكلى هنام بدرى
احمد : هههههههههههههه طب اقعدوا بطلوا هزار . لسا هجيبلكو الحلو
سلمى : مش قادره بجد
احمد : يابت اقعدى . اقعدى يا ساره . فيه ايه ؟
......
محمود ( أحد الشباب اللى قاعدين ف الترابيزه اللى جنب سلمى ) : بقولك ايه الواد الويتر ده شكله معرفة البنتين دول
شهاب : باين كده . البنتين دول حاجه حلوه اوى يا اخى ايه ده
محمود : بقولك ايه ما تلاغى الواد ده كده شوف ايه النظام .
شهاب : ياعم لاحسن مايكونوش زى ما بتفكر والواد يعمل معانا السليمه انت مش شايف ايده عامله ازاى
محمود : ( يتلفظ بالفاظ نابيه ) هتخلينى اتغابي على امك . هو مين ده ياض اللى يعمل حاجه ؟ ده جرسون ؟ استنى انت بس خليك على جنب ... يا بسسسس يا باشا
احمد : ( بيشوفه وبييجى ناحيتهم وماسك الصينيه ) تحت امرك
محمود : هو ايه النظام ؟
احمد : نظام ايه يا ريس ؟
محمود : اللى بالى بالك ( وبيغمزله على ترابيزه سلمى )
احمد : ايوه هو ايه اللى بالى بالك ؟
محمود : هما معارفك البنتين اللى جنبنبا دول ولا لا . انا بسال بس ؟
احمد : ( بيبص على سلمى وساره وبيرجع يبص للشباب دول ) مالك ومالهم
محمود : منا بقولك ايه النظام .... لو تعارف ولا حاجه انا معاك
احمد : ااااه ! ( بيسيب الصينية على الترابيزه ) طيب بص ! انا دلوقتى كان ممكن البسك الصينية ف وشك بس مابحبش اخد حقى غير بايدى بس .. وكنت عاوز اعلمك حاجه تفضل فاكرها للزمن .. ف هتتعلمها منى هنا وسط الناس .. ولا تيجى راجل ل راجل اعلمهالك بره ؟
محمود : ( بيعلى صوته ) انت بتتكلم كده ليه
احمد : وعلى ايه الصوت العالى يابن الحلال .. انت مش دكر ؟ ومعاك صاحبك . وانا لوحدى .. تعالى بره واوريك ايه النظام عشان اكل العيش بس اللى انا على فكره مش باقى عليه . بس باقى على سمعته بس مش اكتر .. هتيجى ؟
محمود : جايلك !
.................
احمد : خليكو هنا ماتتحركوش غير لما اجيلكو
سلمى : احمممممممممممد . هتعمل ايه ورايح فين
احمد : قولت خليكو هنا
سلمى : اووووف
.........
احمد : بسمه دقيقتين بالظبط وجاى . رايح الحمام بس خلى بالك
بسمه : بسرعه بقا ماتتأخرش
...............
( بعد عركه دامت لمدة 7 دقايق ف احد جوارى المطعم الخلفيه .. الولدين نايمين ع الاسفلت متكسرين .. وأحمد راجع على شغله زرار قميصه متقطع ودراع القميص متقطع وفيه خبطه سكينه على كتفه بيجيب منها دم )
( بيدخل على الباك إريا بيقلع التيشرت المتقطع .. واحد من الشيفات بيجيله )
الشيف رامى : مالك يابنى . ايه اللى عورك كده
احمد : مافيش .. ماعندكش حاجه اوقف بيها النزيف ده
رامى : استنى .....
احمد : ومعلش يا شيفنا نادى على عبد الله خليه يجبلى تيشرت تانى
رامي : ماشي ماشي بس لازم تعدى ع المستشفى يدوك حقنة تيتانوس وياريت دلوقتى
احمد : شويه بس
...................
سلمى : احمد اتأخر اوى يا ساره .
ساره : ماتوجعيش بطنى بقا ... واد غبى اصلا ماكان سابهم . ماهو فيه من دول كتير . كل واحد هيبص علينا ولا عليكى عشان ابقي دقيقه يعنى ههههههههههه هيعمل فيه كده ؟
سلمى : وهو فيه غيره ممكن يعمل كده ؟ ايه ده استنى . اهو جاي اهو
ساره : على فكره غيًر التيشرت
سلمى : خدت بالى ..
احمد : دلوقتى تقدروا تقومو تمشو
سلمى : ( بتبصله ومركزه ف عينه وسرحانه وايديها على خدها ) أمان يعنى يا باشا ؟
احمد : امان ياسطا .. وتانى مره يا ولاد الجزم ماتبقوش تخبوا عليا ولا تقولوا احنا ماشيين عشان دايخين ولا متزفتين ... ماشي ؟
سلمى : ( بتغمض عينيها الاتنين من الكسوف ) ماشي هههههههههه هنشوفك بكره ؟
احمد : هشوف واكلمك ... من هنا على البيت على طول . مروحه مع صاحبتك يا ساره ولا هتروحى بيتكو
سلمى : لا هتيجى معايا .
ساره : ياباشا انا بقيت ساكنه مع سلمى ... واخدانى ملكيه خاصه ليها
....................
( بعد شهرين . ف منتصف شهر 7 ..ف عز ايام الحراره الحارقه )
سلمى : الو !
كول سنتر احد الفنادق الغاليه جداااا ف شرم الشيخ : صباح الخير مع حضرتك ليلى يا فندم تحت امرك
سلمى : بصى انا كنت عاوزه احجز 5 غرف عندك لمدة 3 ايام . هيتكلفوا اد ايه
ليلى : نوع الغرف ايه يا فندم .. سنجل ولا دابٍل
سلمى : لا دابٍل .
ليلى : طيب بصى انا بعتلك ع الايميل بتاع حضرتك اهو اللى باعتالى عليه انواع الغرف . بصى عليها وقوليلى اختارتى ايه
( بعد 5 دقايق )
سلمى : انا بعتتلك على الايميل الغرف اللى هاخدها
ليلى : طيب بصى حضرتك ! هو قاطعين معايا 22,450
سلمى : طيب ممكن تحجزيلى الغرف . واحنا هنيجى ان شاء الله على الخميس الجاي
ليلى : تمام يا فندم . ممكن بس تبعتيلى بيانات حضرتك على الايميل ؟
سلمى : تمام جدا . انا فاتحه الايميل اهو وهبعتلك كل حاجه
ليلى : تمام . الشيك إن يوم الخميس الساعه 2 ظهرا
سلمى : حلو اوى . مع السلامه
ليلى : مع السلامه
.......
ساره : ايه اللى انتى عملتيه ده يا بنتى . مش كنا ناخد راي العيال الاول . مش هيوافقوا ولا احمد من اساسه هيوافق يا غبيه انتى
سلمى : هيوافق . منا مش هقوله انى هدفع فلوس من اساسه
ساره : يعنى ايه ؟
سلمى : بصى يا ساره ! انا حابه اشيل الضغوطات اللى احمد حاططها على كتفه دى .... عاوزاه يعيش حياته شويه . ناسي نفسه خالص ومابيعملش حاجه غير انه بيشتغل او بيدرس .. ودلوقتى الدراسه خلصت وحلينا كلنا حلو ماشاء الله ومستنيين النتيجه . ليه مانروحش نتفسح بقي .انا مش عاوزه اروح ف اى مكان من غيره . عاوزاه معايا .. وهو مش هيوافق طبعا غير بطريقه واحده
ساره : طريقة ايه يا مصايب انتى
سلمى : هنقول ان الغرف دى كادوه . هديه يعنى من صاحب بابى ليا ولزمايلى بمناسبة ان احنا خلصنا امتحانات وكده ومش هندفع مليم واحد .
ساره : تفتكرى هيخيل عليه الكلام ده يعنى ؟
سلمى : منا ناويه اقول لمصطفى وافطمه بالموضوع كله عشان يبقي معايا .. وعشان لو اتعكت يشيل عنى ف العكه دى شويه هههههههههههههه
ساره : سوسه انتى ماشاء الله .. وناويه هنروح مع مين ومين ؟
سلمى : كلنا ! انا وانتى ومنه وديدا واسراء وايمان . كده احنا سته .. وهما خمسه . ف اوضتين .. احنا 3 غرف والشباب غرفتين هيبقي احمد ومالك ومصطفى وعلى وحسن ..وممكن مالك كمان مايجيش .. واصحابنا بتوع المنصوره مش هييجو كده كده
ساره : ماشي .. شوفى انتى بقي هترتبيها ازاى مع مصطفى
سلمى : ماشي
...................
ابو سلمى : ازيكو يا بنات
ساره : ازيك يا عمو
سلمى : حبيبى ..
ابو سلمى : مش ناويه تيجى تبصى تحت البيت كده تشوفي حاجه
سلمى : لا اوعى تقول انك جبتها
ابو سلمى : ههههههههههههههههههه ادي المفتاح بتاعها ....
سلمى : ههههههههههههههههه احلى بابى ف الدنيا . انا هاخد ساره وانزل الف بيها شويه
ابو سلمى : فضيلى العربيه بتاعتك بقى وهاتيلى مفاتيحها عشان الراجل بتاع المعرض هيعدى ياخدها
سلمى : الليلادى هتكون جاهزه ...
...........
( ف عربية سلمى الجديده )
ساره : هتروحى على فين
سلمى : الود ودى كان هو اول واحد يركبها قبل منى كمان ... انا رايحاله ييجى نتمشي بيها شويه .. واهو بالمره يقولى العربيه تمام ولا نص نص
ساره : طب ماتتصلى عليه
سلمى : منا كلمته يا غبيه وقالى انه ع القهوه اللى بيقعدوا عليها وقالى لما اقرب شويه ارنله وهو هيطلع على اول الشارع
ساره : ماشي
......................
احمد : ايه يا بنات اللى موقفكوا كده
سلمى : ايه رأيك ؟
احمد : رأيي ف ايه ؟
سلمى : ههههههههههه ف دى .
احمد : دى ايه ؟
سلمى : غيرت عربيتى وجبت دى ... ايه رأيك ؟ ( مبتسمه وفرحانه من قلبها جدااا ماتعرفش انها بتبًعد المسااافه بينه وبينها )
احمد : الله اكبر ! حلوه اوى اوى يا لوم .. جبتيها امتى
سلمى : بابى جابهالى لسا من نص ساعه . اول مشوار ليا قولت اجيلك ونلف بيها شويه انا وانت والبت دى
احمد : طيب مانتى عارفه انى مش بركب جنب بنت وهى سايقه
سلمى : وانا من امتى بركب معاك وانا اللى سايقه .؟ انت اللى هتسوق يا بابا . امسك المفاتيح .. ( بتديله المفاتيح ف ايده )
احمد : ( بيبص على المفاتيح وبيمسكها بايده وكأنه بينضرب بالنار ) ماشي يا ستى . لفى اركبى يلا . يا يا ساره
..........
سلمى : ايه يا حمو ! ساكت ليه
احمد : مافيش يا ست البنات .. العربيه حلوه ماشاء الله . سحبها حلو وراكزه زى العربيه اللى فاتت . غيرتيها ليه يا بنتى
سلمى : اللى فاتت كانت عاليه ياعم ع الفاضى . انما دى سبور كده على قدى
احمد : ربنا يديك خيرها ويكفيك شرها
سلمى : المهم عاوزه اقولك حاجه كده
احمد : حاجه ايه ؟
سلمى : واحد صاحب بابى كلمه وقاله انه هيهديه ب 5 غرف ف القريه بتاعته ف شرم . بابى قاله لا مش طالعين شرم السنادى . قومت انا قايلاله انا هاخدها ليا انا وصحابي ... ايه رأيك بقا نطلع نغير جو كلنا مع بعض . احنا اصحاب بقالنا سنه دلوقتى بالظبط و ولا مره طلعنا رحله او اجازه سوا .. ها ايه رايك ؟
احمد : هو فيه حد بيهادى حد ب 5 غرف ف قريه ف شرم الشيخ يا سلمى ؟
سلمى : هههههههههههه ماتعرفش انت ابويا ياحاج انت .. انا لو عاوزه الفندق كله وحياتك هيفضيهولى وبعدين احنا لا هندفع ابيض ولا اسود طول الرحله ... الغرف هديه مع فطار وغدا وعشا . فولبورد يعنى . يعنى احنا هنغير جو بس ف الفندق ... وبعدين هما 3 ايام بس . وحياتى لو ليا عندك معزه وغلاوه .... عاوزين نتفسح سوا يا احمد الذكريات دى هى اللى هتدوم لينا
احمد : ( بيبصلها وبيبص ل ساره )
ساره : عشان خاطرنا يا احمد . احنا عاوزينك معانا ومش عاوزين اصلا نطلع من غيرك ..
احمد : طب وشغلى ؟
سلمى : انت بقالك اكتر من 3 شهور ف المطعم . ولو طلبت اجازه 3 ايام اكيد مش هيرفضوا يعنى .. ده اقل حاجه
احمد : والمفروض انكو حجزتوا الغرف يعنى ولا لسا
سلمى : لا . هى .. هى جاهزه ف اى وقت نروح .. بس انا بقول نروح يوم الخميس احسن
احمد : طب بصى . من هنا لبكره هرد عليك . اشوف دنيتى
سلمى : يا واد بطل رخامه بقا . انت جايب الرخامه دى من مين .. طنط مش رخمه .. وباباك كان سكر يا اخى زى ما بتقول . هااا جايب الرخامه دى منين ؟
احمد : سيبى شعرى يابنت الهبله .. قولتلك من هنا لبكره هرد عليك
سلمى : ماشي يا احمد .. متشكره ( عماله تبرطم ف سرها بكلام مش مفهوم )
احمد : ماتبرطميش يابت
سلمى : براحتى على فكره
احمد : وبعدين الناس كلها من كل حته ف العالم بييجو يصيفوا ف اسكندريه .. واحنا هنسيبها ؟
سلمى : بزمتك انت بتعرف تروح حته ف اسكندريه ف الصيف ؟ دى بتبقي ازحم من القاهره يا اخى ولا بنعرف نروح ف اى مكان ..
احمد : معاك حق ..
سلمى : يعنى موافق خلاص ؟
احمد : ( بيبص لعيونها وأد ايه هتفرح ) موافق يا ستى
سلمى : ( بتنسي نفسها وكانت لسا هتحضنه )
ساره : اححححححححححم ( بتلحقها وبتزقها ) ايه يا سعديه مالك ؟
احمد : ( بينفجر م الضحك ) هههههههههههههههه دانتى قطًاعة ارزاق يابنت الرخمه انتى
ساره : ايوه منا مش قرطاس لب انا قاعده هنا ... هااا ؟ عيب
سلمى : ههههههههههههه احمممم ( بتتكسف )
ساره : دلوقتى مكسوفه ياختى ؟ ابو اشكالكو عيال رمم
احمد : لمى نفسك يابنت المبقعه بدل ما انزلك ف نص الشارع
ساره : قادر وتعملها
احمد : قادر وتعملها دى اغنيه ل محمد محى عامله اعلى ايرادات ف المهندسين على راي حمزه بتاع الباشا تلميذ
ساره : هههههههههههه طب ايه بقي هتودونا فين ؟ ولا هتروحونا
سلمى : عادى يا قلبي احنا ممكن نروحك بيتك ونكمل احنا سهرتنا
ساره : على قلبكوا يا قلبي انتى وهو . مش سايباكو ...
سلمى : احمد ممكن نقعد ع البحر هناك ف المكان ده ؟
احمد : ايش عرفك بالمكان ده ؟
سلمى : مش ده المكان اللى باباك كان بيجيبك تقعد فيه
احمد : اه هو !
سلمى : طب تعالى نقعد فيه شويه ... الدنيا لسا بدرى الساعه لسا 9 ... هتقلب الشيفت بتاعك امتى وتشتغل بالليل
احمد : المفروض من يوم الجمعه هرجع شيفت بالليل
سلمى : طب ايه هتقعدنا هناك ؟
احمد : حاضر . تعالو
.................
( بيقف قدام البحر ووشه للبحر وملامحه هاديه جداااا وايده ف جيب بنطلونه )
سلمى : ايه مش هنقعد ؟
احمد : ( بيبصلها ومهموم بالفجوه اللى بينه وبينها واللى كل يوم بتكبر )
ساره : ( ابتدت تحس بنظرات احمد وتحس باللى جواه ومش عاوزه تبين حاجه ل سلمى )
سلمى : تعالى نقعد تعالى ..
احمد : ماشي يا ستى قعدت اهو
سلمى : اقعدى يا ساره
ساره : هجيب شاى من عند الراجل ده وجايه
احمد : ( بيطلع خمسه جني من جيبه وبيديها ل ساره )
ساره : بردو ؟ الطبع ده مش هيتغير ؟
احمد : امسكي يا ساره
ساره : حااااضر
...........
على : ماتعرفش الواد احمد راح فين ؟
مصطفى : راح مع سلمى ... بقولكو ايه انا عاوزكو ف موضوع كده
حسن : خير
مصطفى : بس الحكايه دى سر بينا احنا التلاته بس .. لان احمد ماينفعش يعرفها
على : حكايه ايه ماتنجز ياعم
مصطفى : سلمى كلمتنى من ساعتين كده قبل ما تيجى تعدى على احمد .. قالت انها حجزت 5 غرف ف فندق ف شرم 3 ايام .. ومش عاوزه احمد يعرف انها هى اللى دفعت ... وانهم عاوزين يغيرو جو وعاوزينا معاهم والكلام ده ..
على : البت دى جدعه اوى يا جماعه والله ... اقسم بالله ما شوفت كده ف حياتى ... بحسها أمه ههههههههههه بتخاف عليه وبتفكر فيه اكتر من اى حد ف الدنيا دى بعد أمه
مصطفى : المهم ! احمد مايعرفش .. ولو هو وافق يروح ف خلاص اعتبروا الكلام ماتقالش .. ولو ماوافقش وقالها لا وكده نحاول يعنى ايه نلطف الجو ونقنعه انهم كام يوم وان الموضوع كادوه وهديه ومش هندفع .. يعنى عشان انتو عارفين انه عزيزه نفسه ومش هيرضى
على : انا معاك . بس خلى بالك ! لو ... بقول لو ... لو صاحبك عرف هتبقي دى الناهيه .. ولو عرف اننا كنا عارفين هتبقي الطامه يا صاحبي
مصطفى : وحد الله ف قلبك بس . مين اللى هيقوله
على : انا بقول لو ! ع العموم انا معاك . لان الواد ده ماشافش يوم عدل من ساعة ابوه ما مات .. وعاوز اشوف ضحكته من تانى . خلينا نطلع الاجازه دى
حسن : معاك يا درش .. هو يستاهل انه يشوفله يومين حلوين
...................
سلمى : احمد !
احمد : عيونه
سلمى : ممكن تحكيلى عن باباك شويه
احمد : ( غصب عنه عينه بتلمع ) أبويا ؟
سلمى : ( بتندم انها سألته السؤال ده لما بتشوف عينه لمعت ف ثانيه ) لا خلاص . مره تانيه بقي
احمد : ابويا كان نقطة الامل اللى جوه قلبي يا سلمى
النور اللى معشش جوه صدرى
الكبرياء اللى عيشت بيه وهو جنبي وف ضهرى
هو الماضي بتاعى والحاضر ومستقبلى
ابويا فرح أوى بيا اول ما اتبشر ان مراته حامل
لأنه جابنى بعد 6 سنين جواز .. وداخ يا عينى كشوفات وفحوصات وكان بيجرى من هنا ل هنا عشان ربنا يجبر بخاطره .. زى حالتك بالظبط يا لوم اللى حكتيلى عنها وعن حكاية صعوبة حمل مامتك
وفيه دكاتره قالوله انه مش مستحيل انه يخلف بس صعب
فيه امل بس امل مش كبير ..
وقالوله كمان ان فيه احتمال انه لو ربنا كرمه بخلفه ممكن ينزل مشوه او باعاقه ...
عشان كده كان خايف
كان ما بين نارين .. ناره هو كأب عاوز يحس باحساس الابوه
ونار تانيه بردو كأب خايف يكون سبب ف وجود طفل مشوه مكروه من المجتمع
وكانت اول مره يسافر السعوديه
كان بيحكيلى بيقولى عملت عمره وكنت بعيط ل ربنا قدام الكعبه انه يرزقنى بطفل واحد بس وانه يكمل كرمه عليه ومايكونش مشوه
وراح عمل فحوصات تانيه وكشف ف السعوديه هناك .. قالوله انه وبسبب غير معلوم يقدر يخلف واحد واتنين وعشره لو حابب
لما نزل اجازه ...و بعد شهرين أمى بشرته البشره الاولى انها حامل
فضل خايف ومرعوب طول ال 9 شهور ... ويقول يارب ارحمنى وارحم طفلى اللى هييجى
وجيت الدنيا .. عشان كده فرح بيا بطريقه هيستيريه
شالنى وانا عندى 6 ايام لف بيا الشارع والحي والبلد كلها كأنه بيورى الناس كلهم ابنه اللى ربنا كرمه بيه .. وبعد خمس سنين جات سالى وبعدها ندى
كان واخدنى أخ ليه ... وانا مكنتش معتبره ابويا بس ؟ كان كل الدنيا
هو وأمى ليهم الفضل عليا انى اكون راجل اعرف الصح م الغلط والاصول..
علمنى ان مافيش حاجه اسمها مستحيل طالما النفس داخل وخارج
وعلمنى ان الرزق مكفول ... قالى ربك ضمن ليك رزقك يا احمد ف ماتخليهوش يجيلك باهانه .. كده كده هيجيلك ف يجيلك وانت كرامتك متصانه وراسك مرفوعه
وقالى لما الدنيا تيجى عليك .. وأكيد هتيجى ... افتكر ان ليك قلوب بتحبك وشايله همك . استمد منهم قوتك ولما تقع . ماتنسحبش م المعركه وخليك فيها .... مهزوم احسن من منسحب ورافع الرايه
بس لما تقوم . تكسر عضم اللى هزمك وتسيبه وهو مش هتقومله قومه
ولما تحب ! ( بيبص لعيون سلمى ) حب بكل طاقتك
حب بقلبك وبعقلك ..دافع عن حُبك واستموت عليه لاخر نفس
انحت ف الصخر وكسر الاسفلت عشان توصل لحبك
لأن الحب مش سهل ... الحب كلمه بتتقال بين العيال الصغيرين مايعرفوش معناها ... الراجل بس اللى يعرف معناها
ولما تدخل على حبيبتك بتمرايه وانت ايدك مشقوقه نصين من صعوبة الشغل احسن ما تدخلها بعقُد ماس وانت ايدك ناعمه كما الحريم
الست يابنى تحب تبقي ست وانها ملزومه من واحد ... مش هى اللى تفكر وتدبر وتحل وتربط ... بس !
سلمى : ( متأثره جدا بكلامه هى وساره ومركزين ف عيونه وف ايده اللى بييفركها ف بعض وهو بيتكلم )
أحمد : أفتكر مره وانا صغير ( بيبتسم وهو بيحكى ) كان قفشنى واقف مع بنت جارنا .. كانت البنت دى ف الطالعه والنازله مدبقانى . كانت مستنيانى ودايما بتدور عليا . لما شافنى واقف معاها ع السلم بعيد عن الناس .. نغزنى كده ف صدرى هنا ( بيعلم على المكان اللى أبوه نغزه فيه ) هنا بالظبط
سلمى : ( ابتدت عيونها تلمع وشكلها هتبكى )
احمد : وقالى لسا بدرى ع الكلام ده يا حمو ... ولما تحب ماتقفش ف الضلمه .. خليك ف النور .. ماشي يلا .. قولتله هى اللى مش عارف ايه وهى اللى موقفانى .... قالى يابنى الحريم ماتخادهمش على قد عقولهم .. خدهم على قد قلوبهم ... وقام منادى على البنت ومديها حتة بسكوته كان جايبهالنا وباسها . البت لقيتها ضحكت وفرحت وجريت وهى فرحانه
قالى شوفت ! أهما كلهم كده مهما كبروا ... ( بيبص على عيون سلمى اللى هتبدا تنزل دموع .... بيمسح على عينيها بإيده )
سلمى : أحمد هو انت تعرف الكلام ده منين ؟ مين علمك وفهمك الدنيا اوى كده . انا اعرف ناس بتعدى ال 30 سنه ولا يعرفوا نص الكلام اللى بتقوله ده .. ازاى واحد زيك ف سنك لسا حياته اساسا مابتدتش ويكون عارف وفاهم كده
احمد : الدنيا يا صاحبي .. الدنيا ياما بتعلم . وانا مع الدنيا من بدرى ...
انتى تعرفى اول شغلانه اشتغلها كانت ايه
سلمى : لا .. كانت ايه
احمد : كنت ف تانيه اعدادى .. طلعت من صلاة الجمعه انا وابويا وقالى تعالى معايا كده .... وصلنا عند بيت وقعدنى وجابلى شاى وقالى استنانى هنا نص ساعه وجايلك ... بعد 10 دقايق قومت اشوفه فين لقيته بيطلع رمل وطوب للدور التالت ... بصلى وهو بيزعق وقالى مش انا قايلك تستنانى جوه ؟ قولتله انت فاكر انى هضايق يعنى لما اشوفك بتطلع رمل وطوب ؟ طب ايه رايك انك انت اللى هتقعد تشرب الشاى وانا هطلعهم ... فضل يزعق ويزعق ويقولى اسمع الكلام .. قولتله انا طالعلك انا دماغى جزمه أكتر منك ههههههههههههه هتستريح وماعدتش هتطلع حاجه .. وانا هطلعهم ... وفعلا كملت انا الباقى ... ولما خلصت وجيت باسنى من هنا ( بيشااور على جبينه وهو صوته محشرج من اللى بيقوله ) وقالى بدات الشقا بدرى اوى مسامحنى ؟ قومت بايس ايده وقولتله اسند عليا .. إسند عليا انت شقيت كتير وانا هشيل عنك ....
سلمى : انت عارف ! انا ف كل مره بتيجى سيرتك قدامى او قدامنا كلنا بنحمد ربنا ان بنى ادم زيك دخل حياتنا ..
احمد : هههههههههه مش اوى كده .. المهم قوموا يلا عشان أروحكوا
ساره : ماتحكيلنا شويه كمان والنبى . انا بحب حواديتك .. ماتكتبلنا قصص كده يا احمد وهاتهالنا
احمد : ههههههههههه عيونى ! هكتبلكوا والله .. ومش بعيد اكتب لكل واحد قصته وحكايته
ساره : اهو كده تبقي صاحبي وحبيبى
احمد : قوموا يلا
سلمى : صاحبك بس يابنت الظريفه . ايه حبيبك دى ماتحترمي نفسك
ساره : اوووووووف عليك دانتى بت رخمه
سلمى : قولى اللى تقوليه . بس تلمى لسانك
احمد : قومو يا شويه معاتيه اروحكوا يلا .. دا ايه ده ؟
...........
( تانى يوم ... يوم الاربعاء قبل السفر بيوم )
منه : الو .. ايوه يابنتى
سلمى : ايوه يابنتى ايه انتى فين يا داهيه انتى عماله ارن على امك من بدرى
منه : بجهز الزفت الشنطه .. مش عارفه اخد ايه واسيب ايه .
سلمى : اى حاجه يا منه بقا هما 3 ايام
منه : ماشي .. هنتحرك امتى
سلمى : بدرى على الفجر كده .. الشباب هيعدوا علينا ...
منه : مطلعناش طيران ليه ؟ الطريق حقنه
سلمى : خلاص هتصل على امانى تحجزلك طيب انتى وفريده ولا ايه ؟
منه : طب وانتى ؟
سلمى : لا انا هاجى مع احمد وساره ف عربيتى
منه : لا بقا خلينى معاكو ع الطريق اهو هتبقي فسحه حلوه بردو زى فسحه شرم نفسها
سلمى : بالظبط .. وبعدين احمد ماشاء الله عليه سواقته حلوه ومش هنحس بالطريق يعنى
منه : هو عارف الطريق صح
سلمى : هههههههههههههه ده سؤال ده ؟
منه : ههههههههههههههه معاكى حق ... الواد ده عرفناه منين يا سلمى بس
سلمى : هههههههه يلا يلا كملى اللى بتعمليه
منه : طب بقولك بقولك ... احنا سته مش كده وهما اربعه
سلمى : اه مالك قال انه مش هيعرف ييجى .. ف هما اربعه واحنا سته . يعنى عشره
منه : طب هنمشي ازاى . ف عربيات مين ؟
سلمى : انا وساره واحمد واسراء وايمان ف عربيه ... وانتى وفريده ومصطفى وعلى وحسن ف عربيه .. بعربيتك
منه : وحياة امك منا جايه لو كده .. اسراء وايمان اصحاب وجيران مصطفى وعلى وحسن ف هما يروحو معاهم . لكن انا هاجى معاكو ف عربيتك يابنت الجزمه يا واطيه
سلمى : ههههههههههه وفيها ايه يعنى
منه : بت .. بطلى الوطينه دى احسنلك معايا .. انا معاك ف عربيتك انتى واحمد وساره يإما والله منا جايه
سلمى : اسراء وايمان هيزعلوا كده وانتى عارفه ان احمد بيحبهم وطالعين اصلا معانا الفسحه دى على مسؤوليه احمد وهو اللى راح لاهاليهم وقالهم على مسؤوليته ف عاوز يخلى باله منهم
منه : ماليش فيه .. وبعدين هما مع مصطفى بردو ابن حتتهم وكلنا هنمشي ورا بعض بالعربيتين
سلمى : ماشي يا منه . انا هكلم احمد واشوف
منه : لا كلميه دلوقتى عشان افضى الشنط لو كلامى مامشاش
.................
سلمى : الو !
احمد : ايوه يا لوم
سلمى : خدت الاجازه ولا لسا
احمد : اه الراجل مضهالى النهارده وقالى يوم الاحد تكون حاضر قدامى
سلمى : طيب تمام .. بقولك ايه . هو احنا هنروح ف انهى عربيات
احمد : مش احنا متفقين يا بنتى . عربيتك وعربية البت منه
سلمى : ماهى منه بتقول هتطلع معانا ف عربيتى ..
احمد : ازاى بقا ماحنا متفقين ان انا وانتى وساره وايمان واسراء ف عربيه .. ومنه وفريده مع مصطفى وعلى وحسن
سلمى : أعملها ايه بقي . مش راضيه وبتقول يا هتركب معانا يا مش جايه .. وبتقول عادى اسراء وايمان تركب مع مصطفى
احمد : عيب ! عيب اللى بتقوليه انا مطلع البنتين دول معانا على مسؤوليتى
سلمى : طب هتعمل ايه
احمد : طيب ناخد عربية فريده . الجيب بتاعتها هتاخدنا كلنا . والشباب يبقو يركبو عربيتك وييجو ورانا
سلمى : اتلم .. لو طلعنا ب عربية فريده .. هتصر انها هى اللى تركب جنبك يا بابا بما انها عربيتها
احمد : انا دماغى لفت الله يحرقكو . ايه الحوارات دى كلها
سلمى : ههههههههههههه الله ! وانا مالى
احمد طب اقفلى ماتشغليش بالك . انا هتصرف
سلمى : هتعمل ايه بس
احمد : هتصرف بقا يا حبيبتى ماتقلقيش
سلمى : يا ايه ؟
احمد : مش وقته
سلمى : وحياة أمك لانت قايلها تانى
احمد : مش وقته . وبعدين انا بقولها عادى على فكره لاحسن تكونى فاكره ان فيه حاجه ولا حاجه هههههههههه
سلمى : بص ! مع انك رخم ومحدش يطيقك اساسا بس كفايه انى اسمعها منك كل فتره كده بتلقائيه منك
احمد : اححححم .! طب ايه بقا . نتلم ونروح نكمل باقي لوازمنا ولا ايه
سلمى : اه فكرتنى صحيح . هكمل باقى الحاجه . يلا باى باى
احمد : سلام
.............
مصطفى : ايه ياعم مالك ؟
احمد : ياعم حوارتهم كتيره صدعونى منهم لله
على : هههههههههههه هما دول البنات يا صاحبي
احمد : المهم بقا يا عجل انت وهو ! هتفق معاكو على حاجه
مصطفى : حاجه ايه
احمد : ماحناش عاوزين البنات دى تصرف مليم واحد .. احنا اللى هنقوم بالليله دى كلها ... واهو كده كده الغرف هديه من صاحب ابو سلمى .. نحط ف عينينا حصوايه ملح بقي ونصرف احنا الباقى ... أنا بصو معايا 2000 جني
مصطفى : احيه . جبتهم منين ؟
احمد : سرقتهم
مصطفى : ههههههههه ماتنطق ياعم
احمد : خدتهم سلفه م الشغل هسددهم على 13 سنه بعون الله هههههههههههه
حسن : ( بيبصله بانبهار وبخوف ف نفس الوقت .. لان اللى يستلف مبلغ زى ده عشان عزه نفسه . يبقي هيعمل ايه لو عرف ان الغرف مدفوع تمنها . وكلهم بلا استثناء نفس تفكير حسن )
مصطفى : طيب وليه يابنى ؟ ليه يا حبيبى كل ده ...
احمد : ياعم الامر مايسلمش . حد م البنات احتاج حاجه احتاجنا نعشيهم ف مكان غالي . نكون ساترين نفسنا ... وانتو اللى يقدر فيكو يجيب مبلغ بقا يبقي يجيبه
مصطفى : انا معايا 500 .
وعلى : وانا مكلم الحاج وقالى هجيبلك 300
حسن : وانا مش دافع انا هجيب سندويتشاتى معايا
احمد : ههههههههههههههه ( بيهزر معاه وبيحط راسه على رجل احمد وبيخبطه ) عسل انت يا حسون ... تعالى خش لاعبنى دورين 31
حسن : ماترروح ياعم حط هدومك وناملك شويه عشان الطريق
احمد : اه صحيح .. انا كلمت الواد زيزو هناخد عربيته معانا
مصطفى : الجيب دى ؟ اشمعنى ؟
احمد : اهو هاخد فيها البنات كلهم معايا وانتو ورانا
مصطفى : ليه . حد قالك اننا كلاب بلدى ؟ وليه تاخد كل البنات كلهم لوحدك ؟ انت ايه ؟ ايه ياعم . يعنى انت طول ال 10 ساعات ولا ال 12 ساعه هتبقي بتهزر وبتغنى ودلع واخر طراوه . وانا وشي ف وش الاشكالات دى
احمد : ( بيبتسم ) طب تيجى مكانى . واركب انا مع الاشكالات دى
مصطفى : ماشي ... موافق ..
احمد : ( بيبص ل على وحسن ) خلاص والله انا موافق ...
مصطفى : اشطا يا صاحبي
احمد : اشطا يا قلب صاحبك
..................
( الرابعه فجرا .. أمام منزل سلمى .. مصطفى راكب العربيه الجيب اللى احمد جابها .. ومستني البنات ... واحمد راكب ف عربية سلمى اللى حدفت مفتاحها لاحمد من شويه وقاعد هو وعلى وحسن )
على : تفتكر البنات هتعمل ايه لما يلاقو مصطفى هو اللى هيسوق بيهم
احمد : ماعنديش ادنى فكره ..
حسن : عليا النعمه انت عيل مش سهل يلا . دول هيلشوحوه
احمد : هششششش اتفرج
........
سلمى : الله ! حلوه العربيه دى يا صاصا
مصطفى : ايه رايكو ؟ ايه رايكو يا بنات
منه : لا جباره ... فين الشباب
مصطفى : اهم ف عربية سلمى ورا .. اركبو يلا وكل واحده تاخد مكانها
سلمى : يلا . انا حاجزه . هركب قدام
مصطفى : ماشي ...
منه : يلا وانا وراكو انا وديدا وساره
ايمان : وانا هيكب ويا انا واسياء عشان هننام
مصطفى : طيب يلا ... الشنط تمام ؟
سلمى : تمام يا عم محمد ؟
محمد : تمام يا ست سلمى
مصطفى : طيب يلا يا بنات ... ( بيركب العربيه عشان يسوق )
( سلمى والبنات بيبصوا ل مصطفى ومستغربين )
سلمى : انت بتعمل ايه ؟
مصطفى : ( بيطلع راسه من شباك الباب ) ما يلا يا جماعه عاوزين نمشي
.......
على : انا همووووووووت متابع الحوار وهفطس
حسن : اصبر اصبر . لسا الاكشن جاى
........
سلمى : يلا ايه .
مصطفى : يلا عشان نمشي .. احمد وعلى وحسن هيبقوا قدامنا واحنا وراهم
منه : انت بتتكلم جد
فريده : بتقول ايه ياسطا
اسراء : لا ياعم سواقتك زفت
ايمان : مش راكبه غير مع الواد اللى ورا ده . هنزل اركب معاهم . سواقته حلوه
سلمى : ( بتروح ناحيه مصطفى وبتمسكه من ضهر القميص ) تعالى كده يا مصطفى خد هقولك ..
مصطفى : ايه
سلمى : انزل بس هقولك حاجه
مصطفى : ايه يا بنتى ؟ خير
سلمى : ( بتمسكه من دراعه ) شايف العربيه بتاعتى اللى هناك دى
مصطفى : اه حلوه . مالها ؟
سلمى : روح اركب مكان احمد وقوله ييجى عشان نمشي وخلو يومكو يعدى على خير .. عشان ماتحولش عليك دلوقتى
مصطفى : ( بيخاف منها وبيبتسم لانه اساسا عارف ان ده اللى هيحصل ) ماشي بس افتكروها ... خلو سي احمد ده ينفعكوا .. يا عالم يا عنصريه
سلمى : يلا يا بابا يلا ... دنا اخاف اركب جنبك لو رايح اخر الشارع
.................
مصطفى : بتضحك يا واطي ؟
احمد : ايه اللى حصل يا بيبي هههههههههههه
مصطفى : يلا ياسطا يلا ...هارون الرشيدى بسلامتك . نص حظك بس اقسم بالله ... الظاهر كده ياعم على انت وحسن ان وشنا ف وش بعض طول الرحله السعيده دى .. وهو ؟ هو لايص .. يابن المحظوظه
.............
( اثناء الرحله )
سلمى : ها يا بنات نشغل ايه
احمد : لا خدو الفلاشه دى حطيها . مش عاوزين اغانيكو الحزينه دى
سلمى : اغانى حزينه ...اسكت اسكت انت من امتى بتفهم ف الاغاني اصلا
احمد : مش عاوزين قلة أدب . وخلو رحلتكوا تبدا على خير
منه : طب خلاص غنيلنا بصوتك الوحش
احمد : ما تتلمى بقا
كل البنات ف نفس واحد : غنًى غنًى غنًى
.............
( ف العربيه اللى وراهم )
مصطفى : ما تفتحلنا ياعم اى كانزايه ولا اى سندويتش ف يومك ده
على : اهدى يابوتاجاز
مصطفى : زمانه لايص ضحك وهزار ابن المحظوظه هههههههههههه
حسن : هههههههههه طب هو كاريزما .. انت كاريزما ؟ سوق وبطل نفخ
............
ساره : لا لا لا لا مش وقت غنى .. انا هطلب من احمد اللى هو احسن من الغنا
احمد : ( بيبصلها من المرايه الاماميه )
سلمى : هتطلبى ايه يا ساره
ساره : يحكيلنا حدوته ... حواديته حلوه اوى ابن اللذينه
سلمى : خلاص احسن
فريده : معاكى حق ... بيحكى حلو .. هتحكيلنا ايه
احمد : بصي يا ستى انتى وهي ...
كان يا ما كان يا ساده يا كرام ولا يحلى الكلام الا بذكر النبى علية الصلاة والسلام
كان فيه بنت ولد اصحاب مقربين من بعض .. جات البنت ف يوم وهى بتبكى وزعلانه . قالها مالك ؟ ايه اللى مزعلك . قالتله صحباتى كلهم ارتبطوا وبيحبوا وانا لسا مافيش حد اعرفه ف حياتى
ضحك وقالها تصدقى وانا كمان
تعالى نعمل فكره مجنونه على صحباتك .. هنمثل اننا حبايب وهنتظاهر قدامهم اننا بنحب .. بس بشرط الكلام ده لمدة 30 يوم بس قدام الناس . وبعد ال يوم ال 30 هنرجع اصحاب تانى .. وافقت بشده
وفعلا قضوا الايام مع بعض . اليوم الاول والتانى والتالت والرابع ... كان اللى يشوفهم يحسدهم ويقول لايقين على بعض وشبه بعض
قابلوا عرافه ف الشارع راحولها وقالولها شوفيلنا حظنا ... بصت العرافه على كفوف ايدهم وقالتلهم حاولو تستمتعوا بكل لحظه ف حياتكو .. وعينيها دمعت وسابتهم ومشيت ومايعرفوش السبب .. وعدت الايام
لغاية اليوم ال 29 .. قبل الساعه 12 بنص ساعه . عزمها وقالها تعالى نحتفل اننا هنبقي تانى اصحاب والمهله هتخلص
قالتله ماشي .. وراحو . وقبل الساعه 12 ب ربع ساعه . قالها هخرج اجيب حاجه نشربها وجاى ... وهجيب حاجه من الكشك اللى قصادنا وراجع . قالتله ماشي
الساعه 12 الا 10 دقايق . لقت راجل غريب داخل عليها بيقولها الشاب اللى معاك عمل حادثه .. وعاوز يشوفك
راحتله لقت معاه علبة عصير وجواب
فتحت الجواب لقت مكتوب فيه " الجواب ده بدات اكتبه من اليوم التانى لمهلة ال 30 يوم .. اكتشفت انى كنت اغبى بنى ادم ف الدنيا انك تكونى صاحبتى بس وانك ماينفعش تكونى غير حبيبتى . علمتينى معنى الحياه ومعنى الدنيا وحليتى ايامى وعيشت معاك 30 يوم ف الجنه .. لو حد سالنى عمرك اد ايه . هقوله 30 يوم بس ... والليله انا نويت افاتحك واقولك انى عاوز اكمل ال 30 يوم لاخر عمرى ... موافقه ؟ "
ويدوب دقات الساعه دقت 12 بالظبط قلبه وقف . والدنيا ضلمت
ضمته لصدرها وقالتله " موافقه " وهى بتعيط
بت يا سلمى ايه يا بنات انتو بتعيطوا ليه خير .. ماعدتش حاكى حاجه
..........
الي اللقاء في الحلقه القادمه
كاتب الروايه هو احمد سعد و تم نشر الروايه مسبقا علي بيدج هو و هي و بيدج stories and novels
لينك الكاتب
https://www.facebook.com/profile.php?id=100010381862587
لينك بيدج/ هو و هي
https://www.facebook.com/howa.weheyaa/
لينك بيدج/ stories and novels
https://www.facebook.com/StoriesAndNovels2020
أنت تقرأ
رواية مهلكتي من جزء 1 : 18
General Fiction#مهلكتى مش مجرد روايه هتقرأها وتمشى دى حياه هتعيش فيها هتفصلك عن الواقع بأكمله .. يمكن لأن الروايه من قلب الواقع احداث وتسلسل هيخطفك من نفسك أحمد وسلمى
