🍒الفصل الثالث : صفاء روحكي أذاب فؤادي
سلمان: أرا لهنا ديك التيليفون نديرلك فيه لاكارط أراه
مداتو ليه ودار ليها فيه لكارط ورجعو ليها
ليليان:واعطيني نمرتك وخودي نمرتي باش نبقاو على إتصال
براءة: أه وحتى نمرتي
صفاء مدات التيليفون نليليان : هاكي سجليهم
ليليان شداتو قيدات نمرتها
ليليان:شنو نكتب ليك فيها
صفاء: ديرلي عليها الوردة حمرة كاينة تما باش نعرفك
ليليان:هههه واخا . ونمرة براءة شنو نديرليك عليها
صفاء: ديرلي عليها ديك البنت لي شعرها قهوي
ليليان : هههه واخا . وعطينا نمرتك نتي
صفاء: إدا كتعرفي تجبديها جبديها
ليليان جبداتها وسجلاتها فتيليفونها ومداتو ليها : نبقاو على إتصال ضاروري غادي نخرجو مع بعضياتنا
صفاء: إنشاء الله ضاروري. لمهم أناخاسني نمشي الكاراج كيسايني السيد ماعندو لي يخدم ليه
سلمان: واخا أنا نطلع نبدل وننزل نوصلك .
بلقيس قربات ليها ومدات ليها البرية: شدي بسم الله
صفاء شداتها بإستغارب وحلاتها لقاتها عامرة فلوس: شنو هادو أخالتو
بلقيس:هادو خلصتك الخدمة لي خدمتي البارح
صفاء بتاسمات وهزات من وسط البرية 100 درهم ورجعات ليها البرية لي عامرة فلوس خلاتها مصدومة
صفاء:هادي هي خلصتي أخالتو وماغادي ناخد حتى درهم زايد عليها
بلقيس: لاااا خودي أنا بغيت نعطيهم ليك
صفاء: مبغيتش نحرجك والله لكن سمحيلي مانقدرش نشدهم. إدا شديتهم ماعمرني غادي نقدر نرجع لعندكم ولا نشوفكم ديما غادي يجيني إحساس فحالا طامعة فيكم. إدا بغيتيني نجي عمرك تعاودي تعرضي عليا الفلوس
بلقيس: حنا أبنتي واخا تاخديهم عمرنا ننواو فيك حاجة خايبة
صفاء: ههه المشكلة ماشي فيكم المشكلة فيا أنا لي غادي ننوا فراسي حاجة خايبة وغادي يبقا يأنبني ضميري وكل مرة نقول علاش شديتهم .
بلقيس: ولكن..
صفاء: عااافاك أخالتو ماتضغطيش عليا، هادو مبادئي وماغاديش يتبدلو
بلقيس تنهدات وسلمات عليها : ماتغيبيش علينا وأنا غادي ناخد نمرتك من عند البنات ونصوني ليك وعلاش لا نجي عندك حتى لدارك
صفاء: تشرفيني أخالتو فأي وقت بغيتي
سلمات عليهم كاملين وخرجات كتساين سلمان فالجردة وفهد واقف بعييد غير شافها بقا حاضيها بنص عين مد يديه لجيمو وهو يقيص الرابوز لاح السجارة وجاء وقف عليها وحنحن
صفاء علات راسها شافتو واقف قدامها وبتاسمات: بغيتي شي حاجة أخويا
فهد بصوت مبحوح: شنو واقفة تديري هنا
صفاء كنساين سلمان يوصلني
فهد: احم بعدي من الشمس
صفاء:لا عادي مولفاها (تنهدات وهزات راسها فيه وهدرت بطيبة) شوف يمكن وقع شي سوء تفهم بينا ولا صدرات مني شي حاجة بلا مانقصد ،مابغيتش يبقاو بيناتنا حساسيات أصلا ماكانبغيش شيحد يبقا مقلق مني . بغيتك غير تكون متأكد أن الشر عمرو يجيكم مني ،وعمرني نأدي شيحد فيكم وإدا درت شي حاجة بلا مانقصد سمح ليا
فهد ماداهاش فيها حاضي غير عينيها لي فحال سواد الليل و فيهم بريق فشي شكل والبياض لي داير بيه فيه شعيرات ديال الدم حمراء
فهد بصوت مبحوح:نتي أزماتيك
صفاء قرنات حجبانها مافاهماهش :هااا
فهد تنهد: فيك الضيقة
صفاء توترات:احم علاش كتسول
فهد جبد من جيمو الرابوز لمهرس ومدو ليها،هي غير شافتو علات حاجبها بجوج
صفاء :فيين لقيتيه
فهد:إذن ديااالك فيك الضيقة
صفاء:لاا ماشي الضيقة غير مرة مرة كتجيني واحد الحالة كيتقطع ليا التنفس وهادا كيعاوني
فهد : اممم هرستو بلا مانقصد . جبد من الجيمو الفلوس غير الزرقات ومدهم ليها فالهواء
صفاء بقات كتشوف فيه وتشوف فالفلوس لي مادهم ليها حسات بأسلوبو فحالا كينقص منها ولا باغي يهينها بتاسمات وشدات الرابوز من عندو
صفاء:شكراا بزااف لكن ماغاديش نقبلهم ماوقع باس ماهرستيهش بلعاني إدن ماغاديش نقبل تعوضو ليا
فهد على حاجبو وهو شاد الفلوس فيديه
صفاء شافت سلمان خرج كيقلب عليها ورجعات شافت ف فهد: فرصة سعيدة نتمنى نتشاوفو ففرصة احسن من هادي بسلامة. خلاتو ومشات عند سلمان ركبات معاه وخرجو وفهد بقا تابعها بعينيه فالأخير تنهد و دخل لقصر
