♣️الجزء :937
غدا فمكان تاني
ناض أشرف فالصباح دار الفطور وفطر ماماه وختو لي مشات الكوليج وخوه لي يالاه عندو عشرة دالسنين
فطرهم مشاو يقراو ولبس عليه باش يمشي لمدراسة بريفي لي بزز عليه فهد يقرا فيها ، واخا كان رافض ولكن ملى فكر لقى مصلاحتو انه يرجع يقرا ، لكن ماوافاقش يبقى بلا خدمة ويصرفو عليه ، تفاهم معاه فهد ملي يسالي من المدراسة كيدوز لشاركة كيدير اي حاجة طلبوها منو واخا يعرف غير يتسخر ليهم
خرج هاز فيديه كتاب وداير ستيلو فجيمو ونزل لشانطي ووقف يشد الطاكسي مازال واقف حتى كيشوف الدراري الصغار كيجريو ورا شي وحدة حمقة وكيلوحو عليها الحجر وهي كتجري حفياانة رجليها مسخين وكتجري لابسة كسوة واصلة تحت ركبتها ومسخة ، الكسوة مابقاش باين لونها الحقيقي من قوة التراب والوسخ شعرها الأسود مشنتف ومسخ بقات فيه مشى كيجري على الدراري وكيفارقها منهم ، هي بسرعة جات ورا ضهرو شادة ليه فالتيشورت ومخبية فيه
أشرف: واااش ماكتحشمووووش شنو هادشيييي كتديييرو
الدراري : وااااعيشة الحمقة واااا عيييشة الحمقة
أشرف بدأ كيقلب قدامو هز واحد العصى فيديه غير شافوه الدراري هربو
اشرف: تخافووو ماتحشموو
مع الدورة مع لقاها شادة ليه فالتيشورت كمل الدورة حتى تلاقاو عينيه مع عينيها المدمعين لونهم فالعسلي ، وجهها مووسخ مغطي ملامحها واخا هاكاك كتبان زوينة بزاااف ماعرفش علااش عينيه مابغاوش يتحيدو عليها ماقدرش ينزل عينيه ومايشوفش فيها
هي بقات مدة واقفة كتشوف فيه فاللخر حيدات يديها من التيشرت وعطاتو بضهرها غادية بحالها بديك الكسيوة والرجيلات حفيانين كوحل من لتحت
اشرف بقى كيشوفها عاطياه بضهرها وشي حاجة فيه كتقول ليه وقفها عرف مالها واش عندها شي مشكل واش بصح حمقة ، ماقدرش يخليها تمشي وتبعها شدها من دراعها ودورها
أشرف: احم واش نتي بيخير محتاجة لمساعدة
بقات غير كتشوف فيه وترمش
اشرف : شنو سميتك
ماجاوباتش
اشرف: واش كتفهميني شنو كنقول ، محتاجة شي حاجة ،شنو مالك واش تالفة ولا طاري ليك شي مشكل
ميلات شنايفها الحمرين ماعارفة باش تجاوبو
اشرف: واش نقدر نعاونك بشي حاجة
