🍒الفصل الرابع: كن لي أبا
♣️الجزء :913
بعد أسبوعين
القصر غالب عليه الحزن دازت جوج اسابيع على موتو ومازال العائلة مارجعوش الضحكة ديالهم ،كلهم حزنو عليه والأكتر ملي عرفو ضحى بحياتو باش يعتق براءة
من وسط غرفتها ناعسة فوق السرير على جنبها اليمين كتشوف فالحيط وعينيها كيقطرو فوق مخدتها ماكتنطق ماكتتكلم دخلات فصدمة نفسية كبييرة ،ملسقين فيديها صيروم حيت ماكتاكل ماكتشرب
دخلات عندها ذكرى عاضة على فمها وشفقانة على حالتها جرات كرسي وجلسات قدامها ومدات يديها كتدوزها على شعرها
ذكرى: ماما حبيبة كيف بقيتي
براءة ماجاوباتش وشنو غادي تجاوب تقول ليها مانعست ماشفتو
ذكرى تنهدات: ماما عاارفة هادشي صعييب واخا نقول لي قلت ماغاديش نريحك ولا نخرجك من هاد الحالة ، كمال ربي بغاه ومكتاب ليه يمشي عندو ، وماتفكريش وتقولي نتي السباب ، هو مكتاب فديك اللحضة يتوفى يا فديك البلاصة يا ناعس فدارو
براءة داخلها كتقول وشنو المهم انا السباب ولا ماشي السباب ، المشكل انه مشى وخلاني
ذكرى: شوفي اماما حنا ربي لي كيخلقنا وهو لي كياخدنا ، واش حنا غادي نعتارضو على قدر الله ، ياك هو لي خلقو وهو بغاه وهادشي عندو حكمة يمكن كمال ماكانش غادي يعيش مرتاح ، يمكن ديك الأكسيدون كانت غادي تشللو ولا تدير ليه شي اعاقة، يمكن ربي بغى يريحو
براءة دمعة هابطة ليها من عينها وماكتهدرش وحتى عينيها ماكترمشهمش
ذكرى: شوفي اماما حنا فهاد الحياة غير ضياف وكل مرة كتجي نوبة فواحد وكيمشي . واش حنا غادي نبقاو خالدين فيها؟ واش غادي نعمرو على طوول؟ لا طبعا ،الموت علينا حق ، ها انا ماتت ليا ماما ومات بابا ،
وحتى باباك ماتو وليديه ، وعرفتي شحال بكيت انا وحزنت على موت والديا، كنت غادي نتسطى وشنو طراا واش رضيتهم ؟
ونتي بهاد الحزن وماكتاكليش واش بهاد الطريقة غادي ترضي كمال ؟ وهو إدا عرفك بهاد الحالة غادي يعجبو الحال، غادي يكون مرتااح؟
نتي كتعذبي رااسك وتعذبيه حتى هو، نوضي دوشي وصلي ودعي ليه وخرجي شوفي المساكين والفقراء وصدقي عليه ، ماتبقايش غير مصدومة ، حتى حاجة ماغادي تبدليها بهاد الطريقة
هو كان إنسان مزيااان وقلبو صاافي وأكيد غادي يكون فرحاان فالجنة ، مع أكتر واحد حنين فيه لي هو ربي، واش كاين فدنيا لي غادي يبغيه ولا يحن فيه بحال ربي ؟ ونتي غادي تكوني كتبغيه بحال كيبغيه ربي لي هو خالقو ؟ لا إذن ربي لي خالقو وكونو وكيبغيه كتر منك بغااه واش غادي نتعاندو مع ربي على شي حاجة ديالو
