🍒الفصل الثالث : صفاء روحكي أذاب فؤادي
يوم جديد وأحدات جديدة واقفة صفاء فباب المول كيف ديما لا بسة سورفيط فالرمادي وكاسكيطة فراسها مغطية بيها رأسها .
كتساين فبراءة توصل بعدما كانت مصونيا عليها ودايرة معاها موعد يتلاقا و هنا .
صفاء واخا مضغووطة فالفلوس ماعندهاش حشمات تقوليها لا مانشوفكش حيت أول مرة غادي تعيط عليها
بقات واقفة كتساين فالباب دايرة يديها فجيبها حتى كتوقف قدامها طوموبيل كبيرة فالأسود أخر موديل ونزلات من اللور براءة لابسة كسوة طويلة شوية تحت الركبة وصاك هازاه فكتفها شعرها العسلي مطلوق ودايرة سبرديلة فرجلها .
نزلات مبتاسمة وشيرات ليها جايا لعندها . ومن وراها نزلات حتى ميسون لابسة كسوة قصييرة وطالون عالي وهازا صاك صغير فيديها وغادية كتتعوج لجهيتهم
براءة قريات لصفاء مبتاسمة وعنقاتها : الزويينة لاباس عليك
صفاء بتاسمات وبادلاتها العناق :لاباس حبيبتي مزياانة
براءة: عرفتي درتي بلاصتك دغيا خليتي لينا فرااغ ملي مشيتي .كون غير بقيتي معانا
صفاء: ههههه فين غادي نبقا الله يهديك
وقفات عليهم ميسون وطلعات وهبطات فيها وبتاسمات بإستهزاء مدات ليها يديها بشكل سلام، صفاء بقات كتشوف فالأخير حتى هي مدات يديها
ميسون سلمات عليها بأطراف صبعانها ودارت إبتسامة صفرة
ميسون: مابغيتش يبقا بيناتنا سوء تفاهم. داك النهار كنت مقلقة ونتي جيتي فطريقي أحم سمحيلي
صفاء بتاسمات بنية صافية: عاادي أختي ماوقع بااس ماديريش فباالك
ميسون بتاسمات بزز وقلبات عينيها وتمشات داخلة لوسط المول
وبراءة جرات صفاء دارت يديها تحت دراعها وتبعوها
براءة: ماكنتش باغياها تجي معايا ولصقات فيا
صفاء: مافيها بااس واخا تجي معااك
براءة : لاا ماكانتفاهمش معاها وماعنديش معاها وغير سمعاتني جايا نتلاقاك لصقات فيا
صفاء: ههه ماشي مشكل
براءة: هي غير مخنزرة وحاسة براسها ماكنبغيهاش تخرج معايا
صفاء: كل واحد وطبعو أبراءة ، يمكن قلبها مزياان غير كتبان هكاك وهاهي عتاذرات ليا إذن قلبها مزياان
براءة: ماعرفت ليها واخا ماكانضنش
صفاء: هههه ماتبقاايش تسوئي الضن بالإنسان
براءة: نتي لي ماتبقايش تيقي فأي واحد
براءة جراتها لبوتيك لي كانت دخلات ليه ميسون وقربات ليها لوذنيها
براءة: ماعرفت شنو بغات تاخد هاد بلارج
صفاء: هه أويلي حشومة علييك
براءة: ومالني كذبت طويلة بزااف
صفاءة: خلق الله ماكيتعاابش أبراءة
براءة تنهدات: نااري كانت خاصني تخرج معانا ليليان هي لي كتبرد ليا جنوني فالهضرة
قربات ليهم ميسون شادة فيديها واحد الكسوة
ميسون : أنا داخلة نقيسها
براءة وصفاء جلسو فالأريكة كيساينوها
صفاء: علاش ماجاتش معاك ليليان ضريفة ديك البنت كتدخل لخاطر
براءة: كتدخل نالخاطر وسكتي هاديك الحب ،هاديك نصي التاني مابغاش يخليها يوسف تجي ملي عرف ميسون جايا معايا خليتها فالدار كتبكي
صفاء: حشوومة كون غير جبتيها
براءة: مابغااش راجلها شنو ندير ليها مرة أخرى نخرجو حنا بتلاتة دابا وليتي حتى نتي صاحبتنا
صفاء: إنشاء الله علاش لا . الوقت لي بغيتي عيطي عليا
