🍒الفصل الثالث : صفاء روحكي أذاب فؤادي
الكل: ههههههههههههه
سلمان شاف فصفاء: شنو بانليك تسكني معانا هنا الدار كبييرة ونتي عزيزة عندي مابغيتكش تبقاي مكرفصة تما
صفاء: سمحولي والله. بصح أنا ماكرهتش عائلة بحالكم لكن باش نعيش معاكم مانقدرش. نجي نزوركم مرة مرة لكن دييمة لااا مانقدرش
بلقيس: وعلااش عاادي
صفاء: مااشي عادي أخالتو أنا ماشي فرد من هاد العائلة إدن بشمن مناسبة غادي نجلس هنا، أنا ليوم بت معاكم بصيفتي ضيفة لكن ملي تطول المدة شنو غادي تكون الصفة، الصداقة ماشي سبب يبيح ليا نبقا هنا ديما
ذكرى: صحاب ولادي ماكانوش كيخويو من هنا
صفاء: شحال ما بقاو معاكم راه رجعو لدارهم اخالتو كذالك أنا واخا نبقا شحال مابقيت غادي نرجع لداري
ميسون شافت فيها بإستهزاء:إدا كنتي باغيا غير صفة باش تبقاي هنا يمكن نخدموك هنا خدامة وعيشي هنا
سلمان: ميسووووون
ذكرى:شنو كاتقولي نتييي حشومة
ميسون:هااء شنو قلت أعمتي علاش خدامة عيب
صفاء شافت فيها وبتاسمات ببشاشة:لاا ماشي عيب. عمر خدمة الإنسان كتنقص من قيمتو وأنا عمرني كنحشم ولا نخجل من شي خدمة . ولو كنت عرفتكم شحاال هادي كنت نخدم عندكم عادي لكن دابا أنا عندي خدمتي . ولكن إدا شي نهار حتاجيتو خدامة تعاونكم فشي مناسبة ولا حفلة عيطولي نجي على الراس والعين
بلقيس: لا بنتي نتي مرحبا بيك كضيفة أما القصر عامر بالمساعدات
ميسون خنزرات وقلبات وجهها كانت باغية تحشمها لكن ماقدراتش تحشمها
ليليان: وشنو كتخدمي نتي
صفاء شافت فيها وتكلمات بضحكة وكلشي كيشوف فيها. شخصيتها متميزة نهار كتجلس وتتناقش مع شيحد صوتها وهدوئها وأسلوبها فنقاش كيجعلك بزز منك تصنت ليها وتصغي ليها بتمعن فحال دابا هي كتهدر وكلهم كيتصنتو وكيحللو فهدرتها
صفاء: هههههه قولي شنو مكانخدمش
ليليان:كيفاش
صفاء: كنخدم تلاتة دالخدمات فالصباح حمالة فالمارشي ومور لغداء كنخدم فالكراج دالطموبيلات ميكانيسيان وفالعشية كنبيع الخضرة فالسويقة
بلقيس بقات كتشوف فيها عينيها خارجين: هادشي كلو كاديريه نتي وهاد الخدامي صعابين عليك أبنتي
صفاء تنهدات وهبطات راسها نالأرض: هادشي لي مكتاب ليا
فهد لي كان كيتصنت حنحن وتكلم بصوت مبحوح: إدا كنتي راضية وقانعة خدمة وحدة غادي تعيشك وتفوتك لهيه ونتي غير بوحدك . لكن نتي ماقانعاش باغية تعيشي عيشة ماشي قدك
ذكرى عضات على شنوفتها مغددة عليه
سلمان تكلم بعصبية: فااااهد من الأحسن تسكت
ذكرى: ماتدييش عليه أبنتي هو هكا لسانو خضر مع كلشي ماكيعرفش يهدر
فهد علا حاجبو فيها زعما كيفاش مكنعرفش نهدر
صفاء تنهدات وشافت ففهد ورجعت شافت فذكرى: كل واحد أخالتو عندو حرية مطلقة فكلامو منحقو يعبر على وجه نضرو وانا منحقى نتقبل النقد ديالو ولا نعتارض عليه. لكن أنا من النوع لي ماكنفضلش الإعتراض ونبقى نقدم الحجج والدلائل باش نتبت صدق كلامي حيت لي تايق فيك غادي يتيق فيك بلا ماتشرحي وتبرري ولي ماتيقش فيك واخا تعياي تشرحي ليه ماغاديش يتيق حيت قلبو مابغاكش ومارتاحش ليك
