🍒الفصل الثالث : صفاء روحكي أذاب فؤادي
خرجات صفاء وجلسات حدا الكارد قدام باب القصر.
الكارد كانو شادين فيديهم قهوة كيشربوها غير شافوها جاو وقفو فوق راسها
الكارد: شنو كديري هنا
صفاء علات راسها شافت فيه حشمانة: كنساين العرس يسالي باش يوصلني سلمان لداري
الكارد : دخلي ساينيه لداخل ياك كنتي لداخل
صفاء توترات:لاا مانقدرش ندخل غير خليني هنا
الكارد:لاا فالحقيقة ممنوع تجلسي فباب القصر وحتى حنا ممنوع علينا الجلاس
صفاء:وشنو ندير . نخاف نمشي بوحدي تلاتة ديال الليل وطريق هنا خاوية
الكارد: غير بعدي من الباب وصافي تمشااي واحد شوية غادي تلقاي طاكسي . ولكن قدام الباب ممنوع الوقيف
صفاء تنهدات ماعارفاش شنو دير ماتقدرش ترجع تدخل وماتقدرش توقف فالباب .دارت يديها فجيمها كتقلب على ديك عشرين درهم لصورات فالصباح مالقاتهاش يمكن طاحت ليها وسط الحفل بلا مترد البال. وزيد حتى الخدمة لي خدمات هنا ماتخلصلتش فيها وماتقدرش تقول ليهم خلصوني . حيت خير سلمان سابق فحقها.
الكارد: الأخت بعديلنا من هنا راه العرس قريب يسالي والضياف غادي يبداو يخرجو ماخصش تبقاي هنا
صفاء عيات كتفكر مي مالقات حتى حل دارت يديها فجيابها وقلبت الطريق غادية فطريق طويلة هي لي غادي توصلها لشاريع على الله تلقى طاكسي يوصلها حتى لدار وتخلصو . بقات غادية فديك الطريق حتى خرجات من المنطقة ديال القصر . وقفات فالشاريع باغية تشد طاكسي واالو حسهو مقطووع أصلا هاد المنطقة جات خارجة شوية باش توصليلها خاصك طموبيل ولا الطاكسي غير يجيبك ويرجع بحالو . ماكيبقاش يدور هنا.
عياات واقفة فالأخير تمشات لواحد الجريدة مضلمة تما جلسات فوق الكرسي كتشوف يمين وشمال . الحس مقطوع ماكاينش شي حد كيدور وقليييل فين كتدوز شي طموبيل . جبدات التيليفون من جيمها وصونات لسلمان باش تعلمو ببلاصتها. يالاه حطاتو فوذنيه تأفأفت بسخط وبعداتو. ملي سمعات( إعتمادكم غير كاف) . ردات التيليفون فجيمها وتكات فوق الكرسي ترتاح شوية . النهار داز ليها طوييل من لفجر وهي واقفة وزيد خدمت فالمارشي وخدمات فالقصر. ومن هادشي كلو ماربحات حتى درهم ههه. غمضات عينيها كتتنهد وكتفكر غدا ضاروري خاصها تخدم بزاااف وتعوض خسارة هاد النهار.
حيت هي دايرة بروكرام خاصها تخدم مل نهار . فالمارشي والكاراج دطموبيلات والبيع والشراء فالليل. وليوم تحسب ليها مادارت والو . يعني خصرات نهار كلو . وهي أصلا واخا كتخدم شهر كلو وماكيكفيوهاش الفلوس نالدواء والطبيب .
تنهدات من قوة التفكير وغمضات عينيها شادة التيليفون فيديها كتساين سلمان يصونيلها أكيد ملي مايلقاهاش غادي يصوني
