🍒الفصل الثالت:صفاء روحك أذابت فؤادي
♣️الجزء :769
بعد ساعات وهي مليوحة على وجهها وسط الشانطي الطموبيل لي كتدوز كتتخطاها جنب وكتمشي مايقدروش يوقفو فهاد المنطقة حيت كاريان وبلاصة مشبوهة ومضلمة يخافو يكون هدا نوع من الكريساج غير ينزلو من الطموبيل يهجمو عليهم
بعد مدة طويلة بدأ كيضهر الضوء ديال الفجر وبدأت تعمر الطريق عاد الناس وقفو ليها ودارو بيها تلاتة ساعات وهي مليوحة غايبة ماكتحركش عيطو الإسعاف لي جات هزاتها وخداتها للمستشفى حكومية نزلوها داخلين بيها بالباص وجهها شاااحب ومع طاحت عليه الضربة جاتها فجبهتها وزراقت ليها
داخلين بيها المسعفين وسط المشفى لي عااامر داير بحال شي سوق موسمي الصدااع وكلشي كيغوت هالي كان مضارب وجاي يخيط وجهو هالي هاز ولدو داخل كيجري بيه وكيغوت هالي شادة كرشها وكتقول عتقوووني هالي راسو مضروب وكلو دمايات وها لي مهرسة وجالسة كتبكي بالحريق
اشكال وأنواع دالمرضى كلشي كيبكي وكلشي كيغوت ويشكي اما هي الدرويشة داخلة فسكووون مغيبة وماعارفاش راسها فين كاينة
بقاو داخلين بيها حتى لغرفة الفحص لي الباب ديالها عااامر كلشي كيساين نوبتو، وحيت هي مغيبة دخلوها لقاو الطبيبة كتحيد الطبلية شافتها وعوجات فمها
الطبيبة :مالها
المسعف :كانت طايحة وسط الشانطي مغيبة
الطبيبة خليوها هنا انا سالات نوبتي ، ملي تجي الطبيبة نادية تفحصها هزات صاكها وخرجات مخلياها مغيبة فوق الباياص والناس لي علا برا كيساينو
بقات ساعة وهي فقاعة الفحص مليوحة حتى وصلات الطبيبة لي فيها النوبة على خاطرها داخلة من الباب كتصوط شافت فيها وقلبات عينيها
الطبيبة :سعيييد سعيييييد
دخل السيكيريتي : نعام ادكتورة
الطبيبة: كأس دالقهوة عافاك راسي كيتشق عليا الفطور مافاطراهش
السيكيريتي :واخا ادكتورة
خرج يجيب ليها القهوة وهي هزات الطابلية كتلبسها وكتشوف فصفاء مرخية فوق الباياص كتبان مبهدلة بداك الخمار لي تطبع وتوسخ ملي جلسات فالكاريان وملي طاحت ، وملطخ بالدم لي كان نازل من فمها والصباط البيض لي رجع مارو بالوسخ ،الطبيبة ميلات شنايفها بانت ليها بحال شي سعاية
♣️الجزء :770
السيكيريتي دخل هاز القهوة مدها ليها جلسات بشوية عليها فالمكتب كتجغم من القهوة حتى سالاتها عاد وقفات
الطبيبة :سعيييد
السكيريتي دخل تاني :نعام ادكتورة
الطبيبة: شكون مع هادي
السيكيريتي : ماعرفتش جابها يونس
الطبيبة:سير شوفو يجي عندي
