ضحايا بلادي

السادس والاربعون

ضحايا بلادي
"مزلت انتظرك على امل ان تعود "
"مجزرة العشاق"
بقلم يحيى ادريس
البارت السادس والاربعون 

★هذا الكلام ينطبق على شهد:-
لا يحرق الشمعه إلا ذلك الخيط الذي يسكن بداخلها ..... كذلك نحن البشر لا يؤلمنا إلا من سكن أرواحنا بعمق
من متابعتنا العفراء الورفلي

عيونهم ف عيون بعض هي تشوفله بتحدي ..
وهو يشوفلها بااستفزاز بيحاول يكسرها ..
بعد مرر نظره ع المكان ابتسم ب استهزاء ..
وضحكته طلعت بصوت شافتله برفعه حاجب ..
ابتسم وقال . شوفي نا وين وانتي وين ..
اكتفت بصمتها ..
كمل وقال .قاعده تبيعي ف حلويات وانا بنبقى عريس
شهد . ربي يسعدك ويهنيك ان شاء الله زواجة الدهر
اسلام.لو تعرفي ديري رز وموالح نخلوكي ديري العشاء
شهد . ماعندكش مشكله سيب رقمك بس ..
اسلام . هتبقي محصوره طول عمرك ف زاوية المسكينه الضحيه ..
شهد . انت مش بس غيرت لبسك وشكلك غيرت حتى طبعك والا طبعك كان هكي ياربي صح انت
عندك وجهين انا مكنتش نعرف بس ..
رحمه . طلعت وشافاته خذت الموس وقالت
اطلع من هنا ولا نشرحك نخليك قديد يديرو بيه رز وامقطع جاري ..
ضحك ولبس نظارته وطلع من المكان ..
شهد . عليش تعبي روحك هذ مايستاهلش ..
رحمه . مش عارفه شن كنتي تحبي فيه ..
شهد  . سلحت المريول انا خلاص كملت لازم نروح
رحمه . خليك قويه زي ماعرفتك رد بالك تبكي
شهد . سلام طلعت ركبت سيارتها وتحركت بيها
لعند وقفت في مكان ما جمعهم قبل قعمزت ع
كرسي وشافت اسمائهم ع الكرسي ومعاها القابهم
رفعت حيطه وبدت تخربش ع الأسماء ع قد ماتقدر
معش بديت سينانو خلاص لا انت سينانو ولا نا لوز وتخربش  لعند تعبت وركبت ف سيارتها عضت يدها بقهر تقول كيف هنت عليك كيف وتخبط يديها ع دومان وهي تبكي نستاهلها نستاهلها نستاهل كل
اللي يصير معايا هذ اللي تغضب ربها ودير علاقه غير
شرعيه بس حبيته حبيته ياربي حطت يديها ع دومان ودفنت راسها ف دومان وتبكي بقهر بوجع و بألم
..
الحسن هز راسه بالنفي اسف ياامي الا هذي ..
رقيه . لو تحبني ..
الحسن . انتي امي وضي عيوني وهي قلبي مانقدرش
رقيه . بدلتني بالصايعه يالحسن
الحسن . ياام انا عمري مارفضتلك طلب الا بتول منقدرش على فراقها ..
رقيه . قلبت وجهها ..
الحسن . باس راسها وشاف ل ارويدا وقال عينك منها ..
طلع وهو قاعد ف دوامه بين امه ومعشوقته
مش عارف يرضي امه او قلبه اللي انخطف مع
بنت الجيران ..
رقيه . واللهي الا سحرتله هي هذا مش ولدي
ارويدا . متعصبيش ياامي مش كويس عليك
رقيه . اسكتي كله من دبايرك خليتيها قدام عيونه لعند طاح بوجهه
ارويدا . والله بتول كويسه
رقيه . اقطع كوسها وكوسك
..
صالحه . رقدت الا بالمهدئ
جمعه . استنجدت بيا ومادرتلها حل
صالحه قعمزت حذاه وشبكت اصابعها ف بعض
بنتخوخم انا كيف جابو ه المعلومات عنها زارعه
جاسوس وبصدفه عينها في عين بتول ..
بتول . رفعت كتفها كنك تبحتي فيا طبعا مش نا ..
صالحه ضيقت عيونها . يعني متحكيش ل ارويدا شي
بلعت بتول ريقها . نحكيلها عادي م مش قصدي
صالحه . برافو واستخدمو ضد اختك يا ذكيه
جمعه . بلا عياط خلينا نفكرو نشوفو حل
صالحه . حل شنو وهما معاهم كل شي يخليهم يكسبو الحضانه ..
درست شهد قدام الحوش مسحت دموعها
خذت نفس عميق ونزلت فتحت الباب طلقت
سلام وهي تشوفلهم ب استغراب شن في ..
ماكملت كلمتها الا وسمعت عياط اختها ...
حد يفهمني شن صاير كنها منى ...
حكولها اللي صار وطلعت بدون ماتسمع باقي كلام
وامها تعيطلها وشهد الغضب عاميها طلعت ماتشوف قدامها ركبت سيارتها وتحركت بيها طول ..
وصلت قدام حوش عيلة خالد نزلت وصكرت باب
سيارة وخشت لحوش طول طق ع باب بمفتاح سيارتها لعند فتحت هند وع وجهها ملامح الاستغراب
شهد . خشت وملامح الحده مرسومه على وجهها
كامله وهي تلاعب في حفيدها ف وسط صاله ..
انتي شن جابك هنا ..
شهد . نقول وليه حازنه ع ولدها المتوفي عيب ومايجيش اكبر حتى من امي نسكت ونهلب ..
لكن انتي مااحترمتيش ولدك المتوفي لذلك ..
مش هنحترمك لانك متبيش احترام ولا قدر ..
ضحكت كامله ريت من يتكلم عن الاحترام ..
شهد . ولد اختي يرد ف حضنها والا مايصيرش طيب
هند . تبي يلمع قرونه كيف باتك وخوته وهو يشوف ف خالاته كل وحده متضبطه راجل وان شاء الله امه
شهد . فنصت فيها شن قلتي
هند خافت وخرت ماقلت شي ..
شهد غزت ع سنونها . العيل يطلع معاي توا والا نجرجكم ف المحاكم
كامله . امشي طز اعلى مافي خيلك اركبيه ..
شهد . عموري حبيبي تعال خالتو ..
اعمر يمد ف يديه لشهد ويبكي ..
كامله هند خوذيه فوق ..
شهد . مافيش هذ ولد اختي مش طالعه الا بيه
كامله . تبيه يتربى مع مكلوبه اختك
شهد . اختي مش مكلوبه حزينه على راجلها
كامله. منها هي كان هو متريح را ما خش ه المعمعه
شهد . تبي ولدك يتريح ف قبره خلي العيل مع امه
كامله . نجوم سما اقربلك نا غلطانه اللي تبعته
وخليت اختك وحده منا ويصير بينا نسب ودم
لكن خلاص بح مايشرفنش ولا نخلي حفيدي ..
وسطكم حتى بوكم عارف اللي فيكن شلة صايعات
منحرفات وزيدها يازايد اختك المجنونه ..
شهد . نحنا اشرف منكم معش تجيبي سيرتنا ..
كامله . سيرتكم لميها من افواه العرب جيرانكم شهدو ضدكم كلهم ماحد شكركم ..
شهد . كذب كذب كذب ..
كامله . خذت تليفونها من فوق طاوله هذ شنو
توري فيها صورة لشهد واسلام كانو وسط حاجر
حوشهم الاخرى لبتول والحسن غمضت شهد عيونها
كامله . ميلت راسها وضحكت
شهد . ماعندي مانقول غير حسبي الله ونعم الوكيل
كامله . ع اساس يقبل منك التحسب ياصايعه ..
طلعت شهد وهي تحسب وخنقتها العبره ..
تحاول تاخذ نفسها حطت يدها ع قزاز سيارتها ..
درست سيارة غيث تويوتا إف جي كروزر ..
نزل منها بعد شاف خالة شهد قدملها بسرعه ومدلها شيشه اميه انتي كويسه شهد ياشهد ..
عقدت حواجبها انت من وين تعرفني انت الاخر حول كذا خليني ف حالي ..
غيث . رفع يده وقال اهدي انا غيث كنت دكتور عليك من عامين فاتو ..
شهد . معلش اسفه بس شن جابك هنا ..
غيث . انا نبقى ولد خالة خالد متعرفيش ولا شنو ..
شهد . معلش انا تعبانه وبنمشي ..
غيث . نقدر نساعدك في حاجه ..
شهد . خالتك خطفت ولد اختي وتهدد فينا عيني عينك يانرضو بالامر الواقع ياطلع صوري نا وخطيبي
غيث . كيف صورك انتي وخطيبك ..
شهد . مش زي ماانت فاهم صور عاديه بس .
غيث . امتى فرحكم انتو واسلام ..
شهد . تعرفه انت من وين ..
غيث . ماكنت دكتوركم بعدين اسلام كان ديما يجي ونعامل فيه زي خوي ..
هزت شهد راسها ع العموم نحنا فسخنا ..
غيث . عارف قصدي ماتخمميش ف خالتي اطيب من قلبها مافيش ..
شهد . عن اذنك ركبت سيارتها وتحركت
وهو ابتسم بعد اختفت من قدامه بدت تتجاوب
معاي في فرصه يعني بينا وليش لا ابتسم اكثر ..
هند . تخوف يمي شفتيها الموضوع بدا خطير
كامله . واللي في يدينا اخطر
هند . شفتي نظرتها هذين مجرمات مرات ديرلنا شي بدعه ..
وانفتح الباب خش غيث ..
كامله . بسم الله كيف خشيت انت ..
غيث . خالد زمان قايلي ع مكان مفتاح احتياط
كامله . الله يرحمه ويسامحه وبدت تبكي
غيث . شن في حسكم مزعلين لضيوف
هند . اي ضيوف
غيث . بنت خالتي منحبش الاستعباط ..
هند . غيث عهدي بيك متحبش قطاف صبايا ..
غيث . الا هذي اللي يوصل فيها كأن وصل فيا نا ..
كامله . تصبي مع كمشه سناكيح ضد خالتك ياوليد اختي
غيث . نصبي ضد عزرائيل عشانها
كامله وهند شافن لبعضهن ..
...
ع اذان المغرب
كان لون سماء بالأزرق ..
مقعمزه ف بلكوني متكيه بيديها ع سياج الحديد ..
وراسها ع يديها عيونها يشوفن لقدام ..
بتول وهي تكلم ف الحسن كانت تبكي ..
الحسن . كنك ياعمري شن مبكيلي وردتي ..
بتول . منى حالها يخوف الحال بكل بكل ..
الحسن . مش قلتي قعدت احسن ..
بتول . الكوابيس بطلن يجنها بس كل يوم تقعد قدام بلكوني وترجى فيه تحسابه يجي ..
لا حول ولا قوة الا بالله
بتول . خايفه عليها زيدها اليوم خذو عموري منها ..
الحسن . بإزدراء ناس ماتخاف الله ..
بتول تمسح ف دموعها . حسبي الله ونعم الوكيل
خشت شهد بعد غيرت دبشها قربت منها وقالت منى
شافتلها بعيون ذابله وقالت خالد جا
دموع شهد طاحو وحضنتها ..
منى .كنك تبكي نرجى ف خالد عشان يجيبلي عموري
شهد . زادت بكاء ف حضن اختها
منى . طبطب ع ذراع شهد وصالحه تشوفلهن بألم
ملامح منى تذبل يوم عن يوم وزنها نزل بسرعه غريبه واللي يشوفها يقول مستحيل في كائن حي داخلها ..
خصوصا انها ف شهر 7 ف حملها واخرى الجنين بنت ..
..
كان محمد يمشي للعلاج الفيزيائي ..
واسماء من بعيد لبعيد تراقب فيه ..
وقلبها واكلها عليه ومحمد حلف مايقرب شعره
ولا حد يقصه عشان يغطي وجهه بيه وكانو يسايرو
فيه ..
..
اعمر عيب اللي ديري فيه هذي زي بناتك ..
كامله . حشا وكلا انا نجيب جيبه سوده هذي ..
اعمر . ردي العيل ف حضن امه حرام عليك ..
كامله . متدخلش ف خبر صبايا يااعمر اطلع منها ..
اعمر . شنو خبر صبايا هذا حفيدي وتبعدي فيه عن امه
كامله . ونبعده عنك لو اظطر الامر سادني ساكته وكامده ماهو منك انتي اللي خليته يخش الكليه هذي ويخدم الخدمه هذي وشجعته يطوع يااب
العازه ..
اعمر . منصدم فيها وشير ع نفسه انا انا هذا كله نا
كامله . اها انت وهذك الكلبه من جرايركم الله لا
تسامحكم ولا تربحكم ..
..
طقت ع باب المكتب سلام عليكم عليكم ..
شافلها ابتسم وقال تفضلي ..
شهد . يزيد فضلك وقالت انا موافقه ع طلبك ..
توسعت ابتسامه غيث ابتسم بدهشه ...
للحديث بقيه ..
اسف ع تأخير عشان مرضت زي ماتعرفو الڤيروس المنتشر ربي يبعده عنكم ويشفي كل مريض ..