ضحايا بلادي

الرابع وستون "64"

ضحايا بلادي
بقلم يحيى ادريس
درست سيارة قدام الحوش نزل منها ..
هو يشوف لشارع بدا يقدم خطوات ..
له كم ماجاش معش تذكر اخر مره زارهم ..
سنه اثنين ثلاثه هو نفسه مش عارف ..
وقف عند الباب  ..
انفتح الباب شافاته امه انصدمت وقعدت تشوفله
حضناته بكل قوتها وقعدت تبكي وهو حاول يحط
يديه ع ضهرها هو مش حاس انه مذنب او داير شي
غلط حتى شعوره ناحيه امه بالبرود خش وهي تبوس
فيه وتنشد فيه عن قرايته وخش سلم ع بوه ..
من بعدها خواته ..
بتول . متوقعتش روحي نرايف عليك حضناته ..
زياد . ابتسم
منى . زيزو ياجحش نورتنا نجك ليا قاعد طرف ..
زياد . عيالك كبرو ..
منى . زي ماانت كبرت ..
زياد . وين فارس ومحمد ..
صالحه . ف المانيا هيجو هيجو
هز زياد راسه ع خشة شهد بصفره العصير حطتها
قدامه وتشوف لامها تمشي ف يدها ع شعر ولدها
وفرحانه ..
منى .قول شن خلاك تذكرنا وتجي اكيد وراك حاجه ..
زياد شاف لشهد كانت تشوفله بذات نظره ..
قبل اسبوع ..
شهد . تروح تحضر رمضان والعيد معانا والفرح وبعدها امشي كان تبي ..
زياد . ماتفهميش انتي بيش تفهمي نا مستحيل نروح لشرق منسجم وجوي سمح تبيني نجيكم ونجي لنكد والفقر ..
شهد . زياد ماعنديش خاطر عندك معقوله ..
زياد . سامحيني ياشهد ..
شهد .. تمام تمام بكل لكن لو صارت فينا حاجه هتجي تقول ياريتني وتاكل صوابعك ندم العيلة ماتعوضش يازياد ومن غير سلام صكرت خط عليه..
الآن ..
زياد ابتسم وقال رايفت عليكم ..
صالحه . نجكًلي يامصماص الكرشه وحضناته
وكلهم يضحكو عليه ..
رمضان 2018 ..
مقعمز جمعه يتفرج على اعلان احدى قنوات  ..
جاري ياجاري ياحتت سكرة خلقك ضيق قايسينو
بمسطرة لكن دمك خفيف وضحكة منورة رمضان
عايزك لطيف جاري ياجاري يامأجر جديد يكسر ف الحيطه ومصحي قريب وبعيد مع ان كلامك سكر
بيلين الحديد رمضان عايزك جارتي حبيبتي صديقة
الحيوانات عندها كلبه قولدي بتهوهو بالساعات
نستحمل اي حاجه علشان ست الستات دول الكل
بيشهد ليها من طبق الحلويات جاري ياجاري يحتة
مننا جه الوقت يقرب ويلم شملنا رمضان كريم عليك وعلينا كلنا ..
شهد . احلى حاجه ف رمضان الدعايات ..
جمعه حط تبسي لكنافه وشاف لصالحه ..
جمعه . شخبارك مع رقيه ..
صالحه . تمام ..
جمعه . غريبه معش دزيلها زي زمان كل رمضان ملاحظ اخر كم سنة بعدتن عن بعضكن وف حالة
الوفاة مشيتي غير مره مش من عوايدك ..
صالحه . مشاكل صبايا ..
جمعه . نعرف قلبك طيب وكبير ..
صالحه . زمان
جمعه . هي بس ياصلوحه ايام مفترجة صبي ودزيلها من كنافتك هي ياوليه ..
صالحه . ناضت من جنبه وجمعه يشوفلها
هي خطمت من قدام دار ..
كانت منى تقرا في قرآن وجنب منها بنتها راقده ..
حطت من لكنافة في تبسي 6 طروف فتحت باب
الكوجينة اللي يطلع ع الحاجر كانو زياد وعموري
يلعبو في كورة ..
صالحه . زياد زياد امشي شيل تبسي هذ لحوش عمتك رقيه ..
زياد . فكينا منها ياامي مش وقتها ..
صالحه . را نطلع بروحي ..
زياد . امشي ..
صالحه . خشت وقالت زياد ميبيش يمشي
شهد . احسن خليه خساره فيهم ..
جمعه . شهد منعرفكش حقوده ..
شهد . ف ناس تستاهل هك ..
صالحه توا نمشي نا ..
بتول خليكي توا نشيله لها نا ..
جمعه . لليل خليكن توا ناخذه
صالحه . ايواه انت ميت ع طلعه ونا نقول كنه منشغل ماشي نشوف ست رقيه شافلها بصدمه
وضحك وشهد زادت ف ضحك وصوت صاله امتلى بضحك طلعت منى كنكم شن في ..
جمعه بضحكه . امك تغار عليا
صالحه . تشوفله برفعه حاجب
منى . معاها حق حتى انت ماكرينا ماكرينا
وقعدو يضحكو طلعت بتول مشت شور حوش رقيه
طقت الباب فتحتلها وسن الباب وف حضنها ولدها
تصنعت بتول الابتسامه وقالت هذ من امي تقوللكم
كل سنة وانتو طيبين والحسن كان دوبه جاي وين
شافها قلبه هبل
وسن بحده شكرا وخذت منها تبسي وهي تقول حبيبي جيت نذوري بابا جا شوف ..
الحسن ، شاف لبتول اللي طبست راسها وطلعت
تجري ماشيه ف اتجاه حوشهم خشت لدار طول
وماعدلتش ع بوها ولا امها اللي يعيطولها خشت
لدارها وطول رقدت وعلى عيون منى اللي كلها استغراب ..
الحسن . شن تبي جايه هنا هذي ..
وسن . جايبه كنافه ..
الحسن . خذا منها ولده وخش جوا ..
وسن . مشت لكوجينه وعزقتها ف كناسه ..
...
ثاني يوم جو محمد وفارس ..
ويافرحه صالحه تحضن وتبوس ف محمد ..
شهد . اخيرا رديت لجمالك ..
محمد . عدت لساحه وبقوة ..
بتول . حمدلله ع سلامه
محمد . الله يسلمك عبقرينو
زياد . حمدلله ع سلامتك وحش
محمد . الله يسلمك يالاصفر كابر ياوحش
منى بضحكه . قعد كيف جحش
صالحه . في عينكم عويلتي هم ثلاثه تقول اغزله ماخلو ف الخاطر بله ..
البنات ثلاثه رفعن حواجبهن وقالن واللهي .
...
في المربوعه
شهد . عندي شروط
اسلام . قولي
شهد . نبي نكمل قرايتي
اسلام . مش متخرجه انتي
شهد . بنقرا دراسات بنبقى استاذه ف جامعة
اسلام . حاضرين
شهد . وشي ثاني بنخدم معاك
اسلام . حاضر ياقلبي انتي تأمري امر
شهد . ضحكت واسلام قال نجيها ضحكه
اسلام . لكن نقولك را نعيشو ف درنة عندك علم
شهد . نعيش معاك حتى ف جزيرة اخر العالم
اسلام . لان غادي بنشرف ع منتجع بنبقى قريب منه
شهد . اووو منتجع بنخش حتى نا فيه
اسلام . توا نديرو الخريطه مع بعضنا ياقلبي بعد الفرح ساهل
ابتسمت شهد وهو ابتسم
...
اسماء  . مانبيش نمشي ..
ماجده . احسن حتى نا مش ماشيه ماعندي نيه ..
اسماء  . امشي انتي عادي نقعد بروحي ..
ماجده . لا خليهم عائلة ف بعضهم ..
اسماء . ناضت لكوجينه دير ف حلا الكاسات
رن تليفونها ..
شهد . سيمو شن جو ..
اسماء . تمام وانتي حبيبتي ..
شهد . تمامو قتلك تعالو بكرة عندنا فطور عشان محمد دار عملية نبوكم تجو من اليوم ندزولكم
فارس يجي ياخذكم ..
اسماء . بكرة معزومين اسفه ..
شهد . من عازمكم
اسماء . بلعت ريقها خالي روح من مصر هو وعيلته
شهد . هذ مش كان في مصر من ايام معمر شن خطرها توا يروح
اسماء . اطمن ان البلاد بخير روح
شهد . باهي حمدلله ع سلامته سلمي ع خويله ماجده
اسماء . يوصل سلمي ع عمتي وبنات واعتذريلنا
شهد . حاضر صكرت تليفون وشافت اخوانها بضيق
منى . شن تبي تجي
شهد . لا تكذب ع اساس ان خالها جاي ..
منى . خوالها مش عدو كلهم في الحرب ..
بتول . حتى نا سمعت ان معش قعد عندهم حد
شهد . واضح تتهرب من محمد
منى . ربي يهدي سرهم ..
خشت الاء وهي ادب عليهم ..
منى . ياروحي ياعمري انتي خذتها ف حضنها وباستها
..
نصف رمضان ..
شهد واسماء وبتول في بلكوني مقعمزات ياكلن ف كوكتيل سلطة فواكه ..
وصالحه وماجده ف صاله ..
صالحه ماجيتوناش جيناكم بروحنا ..
ماجده . تانسونا ..
صالحه . شخباره خوك ..
لون ماجده تغير وقالت كويس الحمدلله ..
صالحه . شي مره توا نمشولهم ..
ماجده . ان شاء الله وين منى كنها ماجت معاكن ..
صالحه . منى ف عشر الاواخر متحبش تطلع من الحوش حتى دبش العيال خذاته ف اول ايام رمضان
تكملها ف دارها صلاة وقرآن ..
ماجده . عطاها الله ماشاء الله ..
صالحه . ابتسمت ..
.
شهد . الاحباب يسألو عنك ..
اسماء . اي احباب ..
شهد . ضيقت عيونها الاحباب اللي شاغلين البال ..
اسماء . ناضت نزيدكم
شهد . بيش تعقبي للاحباب يموتو فيها
واسماء خشت راقيلها مبتش ترد عليها ..
بتول ضحكت وهي تشوف لشهد تحشمت
شهد . مش مخليتهم لعند يتصاحبو ..
بتول . معاكم شهد قرداحي في المسامح كريم
شهد . اها نخش في الخير بين ناس وبدت تضحك
...
ورمضان سنة كان جوه اريحي اكثر كلهم ملتمين
منى ختمت 3 ختمات السنة 2 على روح خالد
وختمه لله حاضر هي شوية وجايه تمام تمام ..
درست سيارتها فتحت شنطه سيارتها ونزلت اكياس
كانت لابسه نقاب وقفازات عشان محد يشوفها ..
خشت لملجأ الايتام مدتهم لمديرة الملجأ شكرتها
وهي مشت بعيد تشوف لاطفال كيف فرحانين بلبس العيد طلعت بسرعه ومشت شور مكان معين
طقت ع الحوش فتحتلها صاحبة الحوش
رفعت منى النقاب ..
الوليه فرحت بيها مرحبتين تفضلي تفضلي
وخشت منى قعمزت ..
الوليه . لولا ان صيام كنت ضيفتك حاجه
منى . ابتسمت ومدتلها الكيس هذا لولدك
الوليه . بدت تبكي ربي يجزيك كل خير ويعطيك ع قصاد نيتك الباهيه
منى . ادعي لخالد بالرحمه
الوليه . والله كل مانشوف تيم ونتذكر الكليه ندعيله ع طول
منى . بارك الله فيك هذي اللي نبيها الدعاء واي حاجه يحتاجها تيم مصاريف مدرسة اي حاجه قوليلي طول ماتحشميش
ابتسمت الوليه وطلعت منى والوليه تدعيلها ..
ومشت لصندوق زكاة حطت مبلغ معين بدون محد يشوفه وردت للحوش خشت وجايبه معاها حاجات
لحوش امها مش متحبيش تطلعي ف رمضان وين مشيتي ..
منى . عندي شوية مواضيع نهيتهم هي توا نجي نساعدك
صالحه . من امتى تلبسي ف نقاب
منى . صيام مش وقت حد يشوفني ناخذ ذنبه
...
وانتهى شهر رمضان 2018
وحل العيد الفطر بالخير واليمن والبركات ..
خذت شهد تبسي الحلويات وهي طالعه ..
منى واقفه تصور في محمد وبتول وزياد ..
شهد اصبرو بنصورو معاكم وخشت ف صورة ..
ومعاهم فارس ومنى خذت سلڤي بعدين حطت
تليفون ع طاوله ودارت تصوير ع دد ثواني وكلهم
خشو في صورة حتى من عيال منى وجمعه وصالحه
للحديث بقيه