ضحايا بلادي

85

كانت جاية فرحانه وبتعطيه فرصه بعد صكرت ع باب الحب وين وصلت فيه كان هو عاطيها ب ضهر
ويحكي مع صاحبه ،..
سعيد . توا ياطيري انت منك جد بتتزوجها
احمد . ضحك وعفس ع دخان بكندرته مهبول قالولك
ها مالا شنو ليش تجري وراها ..
نحب الحاجه صعبه ف البداية نحسابها فريسه ساهله ارمله وتنجر بسرعه بس طلعت واعره وبهدلتني مننكرش انها سمحه وعجبتني وهي
تنفع ست بيت محترمه واصيله وقد روحها
لكن نصوم نصوم ونفطر ع فضلة غيري
ضحك سعيد  وقاله والله صدقت ..
تجمعو لدموع ف عيونها وردت من وين ماجت
قلبها انكسر انخذل ه المره واتخذت قرار لا رجوع فيه ركبت ف سيارتها ملامح دموع ع وجهها شافت
صورة خالد انا نستاهل كل اللي صار فيا ماعدا انت
تستاهل احسن مني انت واجد عليا واجد حطت
راسها ع دومان وتبكي ..
...

خذت شهد تليفونها واتصلت ع امها بعد ماعرفت من رحمه اللي ..
شهد . الو
صالحه . عليش متصله شامته ف خوك
شهد . ليش بنشمت يمي انتي عارفه كيف نحبه
صالحه . كلكم بطلعوني غلطانه ونا سبب كل واحد يجي يعاير فيا كملي كملي فيلسوفه شهد اطلقي لسانك قولي اهو اللي عاديتينا عشانه تقهرو فيا
وتسمو فيا بكلامكم لكن عندكم عويله يردوها لكن
شهد . منصدمه وهي تسمع ف امها
صالحه . الله لا يربحكم ضنوه سوده نوده كانك شامته مانيش مسامحتك وحسبي الله ونعم الوكيل
شهد . اسفه خلاص بنصكر
صالحه . صكري صكر حلقك مافيكن فايده
نزلت تليفون نزلو دموعها تحكي مع روحها ياريتني
ماجيت ع دنيا ! يكونو فرحانين من غيري !! مزالو
يلوموني ع كل شي ! انا كل حاجه يحطوها ف راسي
تعرفو شن اكثر حاجه مزعلتني ؟! كأني دايره ذنب كبير وجعتني روحي وخاطري مكسور حطت يدها
ع وجهها شن ذنبي نا حتى اسلام شن درتله ليش دار فيا هك ليش
..
كانت بتول راقده وعيت ع صوت جوري
جوري تبكي اااه اءءءء
بتول . نطت من نوم جوري حبيبتي خويله كنك
جوري . ابي ماما ابي ماما
بتول . مش قالتلك هي وانتي قلتيلها بنقعد
جوري . ماما ماما
بتول . ان شاء الله غير تبقى واعيه
جوري . تشوف لبتول
بتول . خذت تليفونها وضربت ع رقم شهد
شهد . مقعمزه ع الارض تبكي سمعت تليفونها
خذاته وردت الو
بتول . سامحيني وعيتك لكن جوري ناضت من نوم تعيط
شهد . لا واعيه هاتيها
بتول . كنه صوتك
شهد . مريضه شوي
بتول . هاك حطت تليفون ع وذن جوري ساكته
شهد . الو جوري الو مامتي
جوري. ماما
شهد . ياعيونها
جوري . ابيك
شهد . مش امس قتلك هي ومابيتيش
جوري . اثفه
شهد . انتي وخوتك اغلى حاجه عندي ف دنيا هذ كلها
جوري . ساكته
شهد . بيش تحبيني ياماما باهي
جوري . هبك نا
شهد . غمضت عيونها ونفضتها العبره حتى نا نحبك
بتول . تضحك وين الحب عقاب الليل
شهد . تمسح ف دموعها ف بشكوط ف حافظه ورديه هذ تحبه عطيه لها توا ترقد
بتول ناضت جابت بشكوط لجوري
خلاص ارقدي فجعتيني عقاب الليل
جوري تضحك بتول تضحكي ياقرده ودغدغ فيها
ثاني يوم ..
هدوء ماقبل العاصفة !!
10.9.2023
وعت شهد كان جو مافيه شي عادي نوعا ما كيفه
كيف اي يوم من ايام الله وعيت الفجر صلت وقرت
اذكار صباح ووردها ولعت قرآن نظفت الحوش توتي
ف الفطور مع وعيه عبد الرحمن يحك ف عيونه
شهد . ابتسمت وشافتله صباح الخير حبيبي
عبد الرحمن . باح نول
شهد . كنه الحلو زعلان
عبد الرحمن . جولي سينه باتنا جوري شينه سيبتنا
شهد . ضحكت توا اليوم نمشو نجيبوها باهي
عبد الرحمن . باهي
شهد. حي خيتك الهبله الاخرى وعت ناضت جابتها
حطتها ف القعاد وهي دير ف الغداء وهم يفطرو
بعدها الغداء ومافيش اي خبر عن اسلام شربت
قهوتي وحكينا مع بتول وجوري شوي وضحكنا
وعبدرحمن وجوري قريب ساعه بعدها قلتلها عطيني امي حكيت معاها
شهد . يمي تعالو عندنا قولي لبوي يجيبكم صقع البيضاء اقوى
صالحه. انتي شن ديري عندك مش قالو اخلاء
شهد . محد طلع يمي بعدين نحنا مانسكنوش ع البحر
صالحه . يستر الله
شهد . هو صاحب الستر غير قلت ننشد عليكم
وصالحه مزالت تكابر وماعتذرتش من شهد ..
كان عبد الرحمن يلعب ب سيارة والعابه ...
..
بتول اوف نت راح
صالحه حي وحيه ضي طفا
نزلو فارس ورحمه من فوق شقتنا غرقت
صالحه . لالا
رحمه . مسيبين حراره بلكوني مصكره ومطر خشت من تحت باب
فارس . خرب النت والفرش مبدري نحنا نسيقو
رحمه . الجو برا يخوف
صالحه . خذت كشاف وشافت صالتها كان ساس منتفخ من قوة ل اميه مطربق وسيسان كلهن يقطرن
بتول . نت راح
محمد . تغطيه رايحه بكل مافيش حتى نقطه
رحمه . الجو يخوف
صالحه . محمد ومنى حي علينا
..
شهد بديت نتفرج ع مطر من بلكوني ونا مبتسمه
وكنت دايره العشاء حساء صليت العشاء وتعشينا
وقريت اذكار المساء ورقدت ساعتين صوت المطر
عالي والريح قوية الرعد وبرق وعيت نرتعد خذيت
صلايه طرحتها وجابت المصحف خذت ساعه تتلي
ف الآيات وبعدين سمعت صوتها بكاء عبد الرحمن
خذاته ف حضنها متخافش مطر مطر
عبد الرحمن . آيف ماما آيف خايف
شهد.ربي معانا متخافش توا نتصلو ببابا يجي ياخذنا
اتصلت ع اسلام الرقم المطلوب مقفل
دزتله مسج اسلام وينك روح لشقه الوضع يخوف برا
بعدين تسمع ف عياط اطراف جسمها صفعو فتحت
بلكوني وطلعت شافت الميه تكر ف سيارات وعياط
البشر وقف ل اميه ياربي حي علينا حي علينا
كل الاصوات تسمع فيهن ياربي ياربي ياربي وهي
ف حاله صدمه من اللي تشوف وتسمع فيه
قالت بصوت مخنوق يارب
ماذا اعددت لهذه اللحظة ؟!
هل ربي راض عني ؟!
ماذا كان حجابي ؟!
هل كان كما يحب الله ؟!
لم امنح في حياتي للقرآن وقتا كثيرا
هل سأموت شهيدة ويتقبلني ربي من الشهداء ؟!
ام غير ذلك رددت آيات قصة نوح {﴿ وقال اركبوا فيها بسم الله مجراها ومرساها إن ربي لغفور رحيم ﴾
بكيت واجد نادت ب اسمائه الحسنى وصفاته العلى
ان يسترني دنيا وآخرة ويرفع عنا البلاء ويغفر لنا ذنوبنا وتقصيرنا ان يشملنا بعفو منه وبر وحسن الخاتمة ويقبل منا صالح الاعمال ويغفر لنا كل زلة
ياربي ياربي شفت عبد الرحمن يبحت معاي ومصدوم جسمي قشعر حبيبي خش جنب خيتك
عبد الرحمن بنموتو
شهد حضناته لالاالاااه لا مش هنموتو وقلبها مقبوض خذاته وخشت بيه تجري لدار وصوت عياط البشر كأنه ف شقه جوا اتصلت ع بوها رقم مطلوب خارج نطاق تغطية امي رقم مطلوب خارج نطاق تغطيه صوتها يرجف محمد نفس شي كلهم خارج
تغطية واسلام مقفل خذت ملايه صلاة وبنتها وعبد الرحمن ف حضنها هم الاثنين وكانت طالعه بس ل اميه راقيه لدور ثالث دموعها نزلو يارب يارب يارب
شافت سهر تبكي
سهر . حي علينا بنموتو يا شهد بنموتو خلاص
شهد . تشوفلها بصدمه ومش قادره تحكي
سهر . ياربي سامحني ياربي ياحبيبي ياربي
شهد . شن نديرو نحنا كيف كيف حل
تسنيم . معش فيه حل ف كل الاحوال ميتين
شهد . لااااه وخشت لشقتها تجرب كل مره ف حد
والارقام كلهن مقفلات قعمزت بهده فتحت تليفونها كاميرا وصورت مقطع لروحها وبعد كملت دزاته لبتول ع الماسنجر ..
وحضنت شهد عيالها تذرف ف دموعها ع فراشها
حضنتهم بكل قوة وتسمع ف عياط ناس كانو جيران
كلهم مولعين فلاشات ع سطاح العماره ويطلبو ف حد ينقذهم ويحركو ف تليفوناتهم بس عبث
شهد . غمضت عيونها زين وهي تحس ب ل اميه ف شقتهم والعماره تتحرك
صالحه . منى يامنى شوفي شن جبتلك
منى . الله يجنن ياماما
شهد . تشوف ل امها ونا وين
صالحه. يالله نجيب لوحده فيكن منى عندك قفطان يجي ع شهد عطيه لها
منى . سلحت قفطان اللي عليها هاكي
شهد . دمعو عيونها تذكرت امها وقت ضربتها ودعت عليها اكسر سعدك طيح سعدك ان شاء الله
فيك ان شاء الله تموتي تذكرت ضرب بوها وقت كسرلها يدها وتذكرت منى وقت تنمرت ع كيكتها
وتذكرت اسلام وحبه لها وبعدين كيف تخلى عنها
وتذكرت كل شي مر ف حياتها دموعها نزلو يارب
وسيل خذاها ...
نشهد بالله ادردرنا
هاج بحرنا من اللي صايرلك يادرنة
نشهد بالله انها شينه غير مراد الله الساير
نشهد بالله تكدينا من اللي ساير فيك خساير
في ناسك ب الاف ارزينا من قو سيل اللي جاير
واللي بالحيل مكدينا مكتوفين اقلال دباير
لا عاد تنفع فيك العينه لا فزعة لا قول ثماير
سيلك قاطع بيك وبينا متكفيك بدور الداير
يامنكوبة يالحزينة في رجالك ونساء الحراير
وعيالك فيهم رازينا سيل قهرنا لكن مولاك يصبرنا
نشهد بالله ادردرنا من اللي صايرلك يادرنة