ضحايا بلادي

77

ضحايا بلادي
بقلم يحيى ادريس
77 part

شهد . الو
فارس . شهد رحمه ياشهد رحمه تموت
شهد . دموعها نزلو بعيد سو
فارس . مش قادر نتحمل اكثر والله تعبت
شهد . كورونا جت لعمتي نعيمه تعرف برت منها
فارس . يارب
شهد . ايوا قول يارب وادعيلها هتبقى كويسه
فارس . لو صارلها حاجه انا نموت ياشهد
شهد . لالا متخافش انت من معاك
فارس . محد
شهد . محمد وين
فارس . ماشفتش
شهد . بابا وماما زياد
فارس . مافي حد جا ولا نبي حد الا هي بس نبيها هي
شهد . دموعها ينزلو وقلبها وجعها ع صحبتها وعلى خوها

..

ماتقدريش تضربي لأنك تحبيني
بتول وهي مبتسمه . انا نكرهك
طارق . ابتسم الكره ولد عم الحب ويهز ف راسه
بتول . انت مريض
طارق . معقوله يابتول تخنبي مسدس بوي هو مدايرك بنته
بتول . اسكت ولا كلمه
طارق . تمام
بتول . تبيني مانفرغش فيك
طارق . ابتسم وقال ياريت
بتول . تنفذ شروطي
طارق . تمام تمام
بتول . تردني لهلي وتقول انك هددتني وتراقب ف مكالماتي وتهدد فيا بهلي وانك تراقب فيهم وتخليني ف حالي وتنساني نهائي ..
طارق . مط شفايفه للاسفل الموت احسن
بتول . حركت راسها وقالت انت اللي اخترت وصرخت كانت بتطلق بس هو جا يجري رفع
لسلاح فوق وطيحها ع سرير مهبوله انتي ..
بتول . انا نكرهك يابنادم نكرهك حد يعيش مع حد يكرهه
طارق . اني نعيش واني نحبك عيونك الخضر قنينات
بتول . مشت وسيباته
طارق . ابتسم شاف لسلاح خذا وطلع
المهدي . ماشبحتش سلاحي
طارق . اي اهو اني خديته قلت لما نطلع نلقاه
بتول . تراقب فيهم
المهدي . رد بالك لمرا تشبحه تخاف وتبلغ علينا
طارق . هي ماتندري عن شي
المهدي . ولدي رد بالك طيح ف الهدرزه وتقول عن شغلنا
طارق . مزلت بعقلي يابوي
المهدي . هادي مافيهاش تقه لازم تخليها تعلق فيك لدرجه لو شبحت بعيونها شغلنا ماتقدر تبلغ
طارق . نعرف يابوي هادي نجري وراها
المهدي . توا بعتت جبران يشبح لبضاعه شوي واشبح انت لازم يعرفو وراي رجاله ويخافو وانت
تقدرها شغله هادي المهم تأكد من لبضاعه امليحه
ولا لأن خوك بادي يكبر ومن موت ولده مش زي قبل
طارق . حاضر يابوي
بتول .حطت يدها ع فمها من اللي سمعاته ومنصدمه
...
طلعت ارويدا كيس القمامه حطاته قدام الباب
شافت وليد واقف يصادر ف حوشهم نزل من
سيارته ابتسم وبدا يقرب منها عيونها توسعو
بصدمه وقلبها دق بقوة بدت تذكر ..

وليد تطلع منك كلمه تندمي يرد ف دبشها مافيش مشي
ارويدا دفاته راني ساكته ومتحمله خطاني خيرلك
نسونجي معفن خطاني خلاص معش نبيك
وليد طبس عند كرعيها لالا وراسك لا لا
ارويدا تصكر ف شنطه دبشها انا معش نبيك نتزوج راجل يعرف قيمتي وقدري كيف جت بتمشي هنفضحك في كل مكان صايع نجس صورتك اهي كل حاجه بالاثبات هنطلق وناخذ اللي وراك وقدامك
خذا كرسي اللي قدام زيانه وخبطها ع راسها اسكتي
اسكتي وكم خبطه على راسها وجهها
الآن غمضت عيونها زين وجسمها رعش فجأة
شافاته طول خشت تجري صكرت باب بقوة
حطت يدها ع قلبها ياربي ياربي فتحت ستارة
شافاته مصبي قدام الباب ..
وليد . ارويدا افتحي حبي خلينا نتفاهمو عارفك تسمعي فيا انا غلطت معترف بس ندمت والله
نحبك وكل حاجه تبيها حاضر ..
ارويدا . امشي مانبيش نشوف وجهك وياريت
تحشم ع وجهك وطلقني معش نبيك خلاص
وليد حط باقة الورد قدام الباب مشا لبس نظارته
وركب ف سيارته وتحرك بيها ..
ارويدا خشت تجري لدارها صكرت وقعمزت ع سرير
حطت يديها ع وذانها وتهز مع بعضها وتبكي لعند
دهشت من بكاء ..
...
طلعت منى من دارها معاها بنتها ولدها
وشناطي معاهم ..
صالحه . على وين
منى . سادنا خلاص ماشيه لحوشي
صالحه . كيف كلام هذ
جمعه . خشي لدارك وردي الشناطي
زياد . ياكل وساكت
منى . عيالي كبرو ونقدر نتحمل مسؤولية بروحي
محمد . شن اللي كبرو ولدك مزال طفل كنك انتي
منى . محد يدخل ف حياتي كيف نا مندخلش ف حياتكم وعيالي عندهم رزق بوهم يعيشو فيه
محمد . وتعيشي وحدك
منى .. عيالي معاي
صالحه . يابنتي مزلتي صغيرة انتي صبايا اكبر منك وناس مش رحمتهن يحكو عليهن ..
منى . ناس تحكي تحكي امي تبي تجي معاي مرحبتين لكن نا هنا معش بنقعد سامحيني
محمد . اكسري شر وخشي لدارك
منى . مالكش علاقه محد له علاقه فيني خلاص تعبتوني جننتوني
الاء . تبكي
صالحه . تشوف لبنتها ومصدومه
منى . انا ماشيه وخذت عيالها وطلعت
محمد. بناتك هذين معش دخليني ف قصصهن دارن العار
صالحه . شاكه الحوش فيه سحر مش طبيعي اللي قاعد يصير
اعمر . امي ليش مشينا من حوش جدو جمعه وليش هزبتي خالو حرام يبينا نقعدو
منى . ولعت سيارة ودموعها ينزلو وماردتش ع ولدها
...
شهد . توكل ف ولدها سيريلاك وتحكي مع بتول
بتول . شغلهم مش نظيف ياشهد سمعته ف اسلحه
شهد . بالك قصدهم اسلحه الاطفال لعب
بتول . قاله عاين لبضاعه ويبيني نحبه عشان كان عرفت حاجه منقدرش نبلغ عنهم معناها ممنوعات
شهد . لا حول ولا قوة الا بالله العلي العظيم
بتول . انا خايفه عيشتي معاهم عذاب
شهد . مثلي انك تحبيه وهو يوثق فيك وتبلغي عنه
بتول . هيطلب مني حقه وقتها
شهد . تنهدت بضيق
بتول . شخبار رحمه
شهد . دموعها نزلو وضعها بكلل
بتول . حطت يدها ع فمها خوتي تبرو مني ياشهد
شهد . كان تخليني نقول لحقيقه بس حلفتيني ب راس عويلتي انتي ..
بتول . خايفه عليكم خايفه مجرمين هذول
شهد . ربي يحميك من شرهم يارب شن طيحه هذ
بتول . حسبي الله ونعم الوكيل في زياد كله منه عمري ما هنسامحه ولا نقبله ياريته مات ..
شهد . حرام يابتول خيك ..
بتول . وانا اختك انا اللي قاعده ف ظلم وف العذاب مش هو
شهد . مسحت دموعها كله يمر كله يعدي
بتول . مافي شي يعدي مافي شي
شهد . انا بنمشي اليوم نشوف فارس ورحمه
بتول . غبيه انتي مش خايفه ع روحك
شهد . منقدرش يابتول منقدرش نغيب هذ خوي وهي زي اختي رحمه هذي تعرفي شنو بنسبة لي
واخرى محد صبا معاهم لا محمد ولا امي ولا بوي
بتول . ربي يهديك
شهد . هي مع سلامه
بتول . باي
شهد . اسلام جيت
اسلام . يسلح ف كندرته لا مزلت ف طريق
شهد . نبيك تشيلني لفارس ورحمه
اسلام . انكلبتي تبيني نشيلك لموت ب كرعيك
شهد . وراسك ي اسلام وراسك
اسلام . شهد كنك وراكي عيال انتي مش بطولك زي قبل متخافيش وتخاطري بحياتك عشان ناس الاخرى
شهد . حرام قاعد بروحه لازم نجي نسانده
اسلام . استغفر الله العظيم
شهد . قربت باساته وراسك وراسك متخافش اللي كاتبها ربي تصير
اسلام . شهد خايف عليك يصيرلك حاجه من بينا نا وعيالك
شهد . لو ربي كاتبلي المرض ونا ففراشي يجيني
اسلام . يابنت الناس
شهد . متبيش تشيلني ناخذ تاكسي ونمشي بروحي
اسلام . عليك عناد
شهد . خويا واختي مانغيبش عليهم رحمه ممكن تموت في اي وقت قالتها ونفضتها العبره
اسلام . خذاها ف حضنه وهي تبكي من جد جدها
...
طول طريق ساكتين لعند وصلو للمستشفى ..
نزلت شهد تجري شافت فارس يبكي ..
هزت راسها بالنفي
فارس . نفضاته العبره
شهد . مشتله تجري
اسلام واقف بعيد مش قادر يمنعها ومش قادر يدير شي
الممرضات يعيطن وفارس يقوللها لالا امشي امشي
شهد . حضناته بكل قوة وبكت معاه ..
...
خش طارق لدار شافها مقعمزه
طارق . احنى بنمشو
بتول . شافتله بخوف وين
طارق . لمزرعه اليوم انباتو غاديكا ولمرواح سبت
بتول . كل خميس وجمعه تمشو انتو
طارق . ف صيف بس هي جهزي حوايجك
بتول . انا مانبيش بنقعد هنا
طارق .قصدك بتهربي لا يزوجتي قنينه رجلي ع رجلك
..
ريماس . سم ف الماكله ونرتاحو
لميس . خايفه ياريماس لو انكشفنا عمك مايرحمنا
ريماس . عارفه عمي عشان امانه عنده بس مايحبهاش هادي خوها مجرم وهي محرمه
لميس . معاك حق متأكده مش ننكشفو
ريماس . متقلقيش اختي صيدلانيه وتعرف
لميس . حطت يدها ع فمها اختك عطاتك سم
ريماس . لا سئلتها سؤال عادي بس بطريقه غير مباشره
لميس . اها
..
منى. نزلت من سيارتها ونزلت عيالها شافت لحوشها
وخشت بدت تنظف فيه فجأة الباب طق مشت تفتح وانصدمت باللي شافاته
..
في مزرعه كبيرة طلعت لميس من الحوش
شايله ف يدها صونيه كبيرة مليانه سلاطه
وراها ريماس شايله صفره كبابي يرتبو ع طاوله
صفيه . اسلمتو ع العزومه يا لميس
لميس . سلمك مش قدرك قوليلي وين كنتك
صفيه . ياخيتي ماتتحملش كل يوم شاده تبي راجلها يرفعها لماليها ..
لميس . صح مسكينه اصلا الوحده ماعندها الا هلها اني لما جيت اهني طول وقت شاده ف المهدي شيلني لهلي وطبعا مسافه بين درنة وطرابلس
صفيه . اي والله اللي ماعنده هل ماعنده ضهر
ريماس.اي واللي مافي خير ف ماليه مافي خير ف حد
صفيه . شن مالك اماليك ياريماس
ريماس . الحمدلله البارح كنت عندهم
صفيه . شافت لبتول خيرها ساكته العروس
ريماس . اصلها مسكينه ممنوع تشبح ماليها
صفيه . علاش
لميس تشوف لريماس
ريماس . خوها سبب ف موت وليدي اصلا خداها طارق ع خاطر جريمه خوها لكن طلع مش هو عباره
عن دفشه بس ولما جو اماليها ياخدوها هي رفضت عجبها العز طبعا غاديكا مش زي اهني اهني قصر وحياة ورفاهيه لكن عندهم شي مهم اماليها تبرو منها
بتول ناضت وهي تهزب خلاص خلاص تحشمي ع وجك كنك انتي هك نساير ونقول عشان ولدها متوفي لكن وصلتيها لهن راك انا نسكت مره اثنين
بس لصبر حدود اتقي شر الحليب اذا غضب وصبت خبطت كرسي ومشت من حذاهم ..
صفيه.وووك وك مش ساهله طلعت سكوتي تحت منه كوتي
ريماس . شبحتي بعيونك
لميس . لسانها ملوي
جا طارق جايب معاه تبسي فيه شوايات ..
طارق . وين بتول ..
لميس . مانندري ..
ريماس . ف 60 ودره
طارق . مباش يرد عليها وقعمزو ياكلو وهو يرجى
يرجى ..