ضحايا بلادي

الحادي وستون "61"

ضحايا بلادي
بقلم يحيى ادريس
البارت الحادي وستون "61"

كانت منى طالعه هي وصحبتها من المحاضره ..
إسراء . وووه تعبت راسي انتفخ ..
منى . قالت بضحكه بكلل حمدلله جاينا العيد نعطلو
إسراء . شكلك نسيتي بعد العيد الامتحانات
منى .انتي خطرتي علي اللي يقول ذكرهم ونكد عليهم
إسراء . ورانا هك مواد عرم عرم
رن تليفون منى ..
طلعاته من شنطة ..
الو ياماما نعم ..
اضربيه اضربيه عادي هذا مايفهمش هك ..
صالحه . تسمع قالت اضربيه ..
عموري . يشوفلها بخوف ..
صالحه . امتى جاية ..
منى . محاضراتي اليوم لعند العصر ..
صالحه . نعقبلك يعني ..
منى . شنو الغداء ..
صالحه . طبيخة بطاطا ..
منى . لا كولو صحه ..
صالحه . باهي عينك من روحك
منى . صكرت تليفون وحطاته ف شنطه
إسراء. شكله عموري قلب راسها
منى . بكللل تعالي كافيتيريا نا جيعانه لين بنطيح ع وجهي ..
وهن ماشيات شافت اسماعيل واقف يشوفلها مبتسم ..
عقدت منى حواجبها وطبست راسها ..
قال . احم احم معلش ..
إسراء . انا ماشيه لكافيتيريا نرجى فيك..
منى . خليكي معاي يازفته
اسراء مشت وسيبتها ..
اسماعيل . شنجو ..
منى ، وهي مطبسه راسها ومتباعده عليه تمام
اسماعيل . ابتسم وقال كنك متباعده متخافيش ...
منى رفعت عيونها وقالت بحده من شن بنخاف ..
تفضل شن جاي تبي غلط وقفتك معاي هنا ..
اسماعيل . ابتسم شخبار لعيال ..
منى  . لعيال مش هنا قاعدين ف حوش هلي تقدر تستاذن من بوي ولا حد من خوتي وتقدر تشوفهم
اسماعيل . شن فيك معصبه انا نطمن عليك بس بعد اخر مره اغمى عليك وحد نابشك ف جامعة ..
منى . بارك الله فيك نقدر نحمي نفسي ..
اسماعيل . لو خالد عايش را حتى هو دار نفس شي ..
منى . قلتها بروحك خالد خالد راجلي بس انت من
انا لو وقفت معاك وسمعتك احتراما انك خو خالد
وعم لعيال ياريت متدخلش فيا ومانبيش نشوفك
نهائي مشت وسيباته ..
منصدم في اسلوبها

اسماعيل
خشت لكافيتيريا حطت شنطه ع طاوله ..
إسراء . من طرف هذا وغمزتلها بضحكه
منى بعصبيه واضحه . عم لعويله
اسراء . وعم لعويله يجيك لعند هنا
منى . شن قصدك
اسراء . قصدي واضح ان معجب فيك
منى هي شاكه في تصرفاته بس ضايقت من تلميح
صحبتها مافيش هكي بلا فترشه زي خوي شن طلبتي
اسراء . نرجى فيك
ناضت منى وطلبت بيتزا وهمبورغر وبطاطا ..
...
شافت اختها مقعمزه بروحها ف الحاجر
جت قعمزت حذاها وقالت تقريبا هذي اشاره
استغربت شهد وقالت اشارة لشنو ..
بتول . انتو واسلام تكمل قصتكم ..
شهد . مستحيل
بتول . عليش
شهد . منبيش حد ينأذي بسببي خلاص تعبت نا
بتول.هذين اقدار ف يد الله مش ع اساس انتي مؤمنه
شهد.شن مؤمنه هذي استغفر الله كلنا مؤمنين بالله
بتول . مزال عندكم فرصه فكري ف روحك
شهد . بتول خليني ف حالي بالله عليك
بتول . فكري فكلامي انتي واسلام لبعضكم واضحه
شهد . تشوف لقدامها بضيق رفعت راسها لسماء وقالت يارب ..
..
خش فارس للمعمل ..
رحمه . شقلبت عيونها تفضل
ابتسم فارس يزيد فضلك ..
رحمه . شن تبي
فارس . نبي حلويات العيد
رحمه . ياربي ع ثقالتك
ابتسم فارس بالعكس نا اكثر حد دمه خفيف
رحمه . اوففف
فارس . بنتك
رحمه بإزدراء مريض مريض ..
فارس . مريض فيك
توردو خدود رحمه خجلا وعقدت حواجبها ..
بعدين خذت الموس وقالتله تمشي تنتلف ولا نبطك
وفارس يضحك بصوت عالي وهي متنرفزه وتقدم بالموس وتقول هاه وهاه وهو يضحك لعند مسك
يدها ورفع حواجبه بضحكه هيييه وسعي بالك ..
ويزيد يضحك ..
رحمه . معش تضحك
فارس . مسك ضحكته بالغصب وملامحه مزالو يضحكو حط يده ع فمه يكتم ف ضحكه ..
رفعت رحمه حواجبها بضحكه مقدرتش تخفيها
وقالت استغفر الله ياربي تهز ف راسها يمين يسار
فارس . الحلو مخطوب ولا يرجى ف المكتوب
رحمه . يرجى ف امك صالحه
فارس . عيب الا الام
رحمه . امك تجي تاخذ الحلو
فارس . امي تجيبلك الحلو
رحمه . كيففف
فارس . ف القهوة وطلع وهو مبتسم
ورحمه ابتسمت بعد طلع وحطت يدها ع قلبها
بعدين عقدت حواجبها شن الهبال هذا لا حب بعد
اليوم ع اساس حبيت نا من قبل قصدي من اللي صار مع شهد مش هندير كيفها ونحب ايوا حي عليا
انهبلت وبديت نكلم ف روحي ه البارد هذ طلعلي عقلي ..
...
عادل . شن عندك اليوم ف الجامعة القديمة ..
اسماعيل . كساد مشيت نشوف الجو غادي ..
عادل . وانت من امتى تكسد تمشي ..
كامله . جامعة القديمة تقرا فيها منى ..
عادل . شافلهم بغضب ع اساس مش انتي قايلته
اسماعيل.  وشن حارق رزك انت مش متبيهاش
عادل . هذي مرت خوك ياحمار وام عياله شن تبي وراها ..
اسماعيل . كانت مرته وهو مات خلاص
عادل . ناض بعصبيه ومسكه من فانيلته ماتحشمش ع وجهك ياكلب يامعفن تبحت ف عرض خوك ..
كامله . سيب خوك ياعادل سيبه ...
عادل . لو ماجيت خوي كنت مرمدتك ع الارض
اسماعيل . انا نبيها عجبتني وبناخذها .
عادل . مسكه وطاح فيه ضرب
وكامله تفك فيهم من بعضهم هذا خوك سيبه
واسماعيل يتلقى ف ضرب ويرد عليه بوني ..
عادل . خذا الكبايه وكسرها ع راس اسماعيل
طاح ع الارض وكامله على عيطه وحده طلعت
رحاب من دار تشوف خوها طايح ع الارض ودم
يصب وعادل واقف منصدم وكامله تصرخ ..
...
الحمدلله ع سلامتك وليدي نورت حوشك ..
ابتسم اسلام خش قعمز واروى حطت مخده ورا
ضهره ..
عبدلله كان نلقو ه دلع حتى نحنا توا ننضربو ب رصاصه
نعيمه . بعيد سو ياراجل فال الله ولا فالك
اروى . العيد ما مزال عليه شي وما وتينا شي
عبدالله . ماتخممو ف شي كلمت واحد صاحبي ومسكلي كبش من عين عينه سنة تشبعو شوايات
اروى . بعدك عندنا واحد خاسر دم وجهه منصفر لازم يتغذى لحم لين يطلع من عيونه ..
ضربها اسلام زنقيره ..
وضحكو عليها ..
اسلام . تمنى لو يشوف شهد وتكون معاه العيد هذا
...
شهد . منى فيكي حاجه ..
منى . وهي تقرا ف اذكار المساء لا مافيني شي ..
شهد . شافتلها بعدين رفعت راسها لسماء تشوف للنجوم ..
منى . دموعها نزلو ..
شهد . كنك بسم صبتلها اميه هاك اشربي .
منى . تمسح ف دموعها مانبيش نزيدها عليك ونضايقك ..
شهد . فضفضي ياحنه ..
منى . اليوم اسماعيل جاني ف جامعة ..
شهد . شن يبي ضايقك يهدد فيك ع خاطر لعيال
منى . لالااالا
شهد . مالا شنو كنه الخرا هذا را نمشي توا نكسره
منى . تنهدت وبدت تحكيلها
وراجل مش محتاج تكسيرتك ياشهد ..
مقعمز ع صالون اخته تلفله ف شاش ..
رحاب . شنو الوحوش هذول معقول هك ..
عادل . كي واحد يبقى عيل يستاهل موت
كامله . امشي اطلع الله يربحك
عادل . طالع بس او مزلتي مصره ع اللي ف دماغك ودماغه نخليه لك يرقد جنب خوه ..
كامله . طيح سعدك طيح سعدك
طلع عادل يقربع ف البيبان ..
رحاب . شن في شن اللي دماغكم
كامله . مالكش علاقه انتي
رحاب مطت شفافها للاسفل وخذت عدة الاسعاف ومشت لدارها وسيبتهم ..
كامله . قولي شفتها شن صار بينكم ..
اسماعيل . حول كماده اللي فيها تلج من ع خده
شفتها ومسحت بيا الارض وقالتلي مانبيش نشوف وجهك ..
كامله . ليش شن درتلها يامطيوح سعد ..
اسماعيل . مادرت شي نا مزلت حتى تكليم ماتكلمت
كامله . ما لأنك غبي وغشيم
اسماعيل . شاف لأمه بحده وناض وسيبها
..
شهد . واضح معجب بيك واكيد دامك كنتي ع ذمه خوه رايدك بالحلال اكيد ..
منى . شن تقطفي انتي ..
شهد . بتقنعيني انك مش عاجبك الموضوع ..
منى بصدمه . كيف ،.
شهد . منى انتي من يومك تحبي زحمه حواليك ويكونو عندك معجبين صارحيني يعني مش فرحانه
منى . صدمتيني فيك ياشهد معقوله زمان كنت طايشه وفاضيه بس توا خلاص وراي عيال وحتى
لو ماعنديش مستحيل نخون خالد ..
شهد . خالد مات شن تخونيه هذ لو راجل ناوي الحلال مافيها شي خير من غيره عيالك صغار ومحتاجين اب  ..
منى بحده . خالد مش ميت خالد عايش ف قلبي
وعيالي نا ام واب لهم مستحيل نجيبلهم اب غير بوهم الحقيقي صدمتيني فيك ياشهد لو فتحتي موضوع او لمحتي حتى تلميح لا عد اختي ولا عد نعرفك ناضت وسيبتها ..
شهد . نا شن درت حتى نا عطيني قطعه ف ه لسان
تنهدت بضيق ..
..
كبيرة عيد الاضحى ..
منى تلبس ف البطاطا لمبطنه
وصوت تلفزيون مفتوح ع mbc1 وتكبيرات
خشت شهد عليهم وهي تقول صباح الخير ..
صالحه . صباح النور وين نوم هذا كله ساعة 2 ونص
شهد . رقدت بعد الفجر ..
سمعت صوت محمد ينادي عليها ..
صالحه . شهد عينك من الكوشه نشوف خوك ..
شهد . شافت لمنى وقالت صايمه ..
منى . ان شاء الله..
شهد . منى بكرة عيد عاد فكينا من زعل ..
منى . من قالك زعلانه مافي شي ..
شهد . تغابيني غير فيك حركاتك واضحه
منى . غمضت عيونها بنفاذ صبر را صيام وجو نووو
شهد . انك قلتيها صيام وجوووو نوو بلا نكد الله يربحك
منى . ضيقت عيونها وهي تشوفلها
شهد ضحكت ومنى ضحكت معاها تهز راسها يمين يسار ..
قربت شهد دغدغ فيها ضحكتي شفتك ضحكتي
ومنى زادت اصوات ضحك شهد حضنتها نحبك نا
منى . خلاص بعدي ..
شهد . هئه ..
خشت بتول شافتهن كيف حاضنات بعض ويضاحكن شن جو هذ استغفر الله ...
شهد . انا واختي نحبو بعضنا محد يدخل ..
بتول ب إزدراء . ننننن
شهد . موتو قهر قهر قهر قهر
وبتول ومنى يضاحكن ..
...
والع المكيف اسماعيل يلعب ف بلاستيشن ..
لابس شورت برمودا وماليه نص كم ..
قعمز اعمر يقوله بدال ه الخارب كان تمشي
تجيب الاضحيه معاي ..
اسماعيل . فوتني يابوي ماعنديش مزاج ..
كامله . خليه متريح حمو ماعنده مايبي ف الهم
رحاب . فكيت شاش من على راسك يااسماعيل
اسماعيل . شافلها
اعمر . شاش ايش
كامله . خبط راسه ف روشن
اعمر . وهذي تبي شاش
كامله . اسماعيل وتكبير لشورخ
اعمر . نمشي نا ناخذ اضحيتنا واحد لعويله خالد
كامله . قصدك بتجيبلهم عيد
اعمر . يجو يعيدو عندنا
اسماعيل ابتسم وعدل قعدته قصدك بيجو كلهم
اعمر . انعم كان وافقو مافيش مشكله
اسماعيل . نمشي معاك معقوله تخليك بروحك
اعمر . ماكان ماعندكش مزاج
اسماعيل . جاني توا
اعمر . امشي استر روحك والبس سروال
اسماعيل . من عيوني وناض بسرعه
كامله . معقوله ولدي رضي لهدرجة متشوق يكسب رضاي والله عرفت نربي وثمرت ف واحد فيهم ..
...
اذن المغرب صلو فطرو البنات ناضن للعوايز
وصالحه دير ف عداله شاهي جنب منها جمعة
يتفرج ع فيلم الرساله ..
رن جرس الحوش ناض طلع يفتح ف الباب
فتح جمعه الباب شاف اسماعيل.سلام عليكم عمي
جمعه . وعليكم سلام ..
اعمر . سامحنا ع الازعاج ..
جمعه . او حاج اعمر يامرحبا يامرحبا تفضلو
في الكوجينه ..
يغسلن العوايز
منى . قررتي طب رسمي  ..
بتول . ان شاء الله ..
شهد . ان شاء الله بالتوفيق لكن انتو تبدو ف شهر 2
بتول . عطلة اطول من ليلة بلا عشاء
منى . قاعده طاهقه
جمعه منى بنتي البسي حاجه وتعالي لمربوعه
منى . عليش شن في
جمعه . الحاج اعمر برا ..
منى . حطت الليفه ف طلوه وطلعت ورا بوها
جمعه خذا الاء ف حضنه وعموري طلع يمشي جنبه
اعمر . دمعو عيونه وين شاف عموري
عموري ماسك ف سروال جده ..
ابتسم اسماعيل خذا الاء من حضن جمعه
والبنت بسرعه ماانسجمت مع عمها هو يضحك فيها ويلاعب فيها البنت ف عمر 9 شهور حاليا ..
كابره وجمالها بارز بين امها وبوها وتلمح اكثر شي
لشهد وجدتها صالحه ..
البنت جمالها بخفة دم ..
خطفت قلب اسماعيل زي ماامها خطفت  قلبه
اعمر يشوف فيه عموري كيف لابد ورا جده جمعه
وخايف واعمر يقوله تعال وهو ميبيش
واسماعيل يلاعب ف الاء ويضحك فيها ب اصوات
زي الكرتون وهي تخش لابسه ملايه صلاه ..
قالت بصوت منخفض سلام عليكم عمو وين شافاته
حست بشعور سلبي ماعندهاش علم انه اسماعيل
معاهم كانت تبي تطلع بأي طريقه من المكان
اسماعيل . وعليكم السلام ورحمه الله وبركاته