ضحايا بلادي

البارت 20

ضحايا بلادي
بقلم يحيى إدريس
البارت 20

في السوق

شهد . شن ماعجبك شي
اسماء . مزالت تفرج
شهد . تشوف لجاكات وهي تقلب فيهم شافت عيون تعرفهم فنصت وردت دبش وبعدين ردت
وسعت لدبش شافاته مطبس ويضحك
شهد . اسلام
اسلام . مرحبا
شهد . شن ادير هنا
اسلام . نراقب فيكم
شهد . ابتسمت امشي بسرعه قبل مايشوفك حد
اسلام . رايفتلك
شهد . اسلام
اسلام . روحه وقلبه
شهد . امشي
اسلام . لا
شهد . خذت بلوزه ومشت ل اسماء عجبك شي
اسماء . لا كله يقهر
شهد . هي نمشو نشوفو محل ثاني وخشت يدها ف ذراع اسماء وطلعت واسلام طلع وراهن شهد تلفتت
شافاته يلحق فيها فنصت وتشيرله بمعنى امشي
اسلام يضحك ويهز راسه بالنفي
وشهد . راقيلها منه وفرحانه وخايفه حد يكبسها

يوم عرفة

الله اكبر الله اكبر لا اله الا الله

كانت صالحه تفرج ع mbc1
شهد . طلعت من دارها خالي عيسى جايين فاطرين عندنا
صالحه . عارفه قالوها لي
شهد . شن نديرو فطور
صالحه . دزيت محمد ع خضرا براك ومفروم ولحم
ندير براك وشربه ومبطن ورز بالخلطه
شهد . كويس بكل
بتول . تشرب ف اميه
شهد . فاطره انتي
بتول . مش رمضان هو
شهد . ربي يهديك
بتول . سيبتها وخشت لدار
طق الباب خش محمد ف يده لسبيزه
صالحه تصفق وتغني سلمك جياب عليك حجاب يااحميدا سلمك جياب
شهد . خذت الاكياس وخشت كوجينه

خالد . جبنا الحواله تنزلي تشوفي حولينا
منى . لا فكني بننزل نساعد عمتي
خالد . باه
منى . نزل معاك طاجين بسبوسه
خالد . تمام خذا طاجين بسبوسه ومنى نزلت بالبوريك
منى . خير ياعمتي كل سنة وانتي طيبه
كامله من راس خشمها . وانتي طيبه
منى . كنت ندير فوق قلت مانلبزش كوجينتك
كامله . كان غير جيتي وساعدتيني
منى . سامحيني شن تبي ندير معاك
كامله . خلاص كملت نظفي كوجينه بس
منى. حاضر شفتي الحوالى
كامله . ماردتش عليها طلعت وسيبتها
منى . ربي يجيبك ياطولة البال عجوز نحس
خالد . وين منى
كامله . ف كوجينه متخافش منيش وكلتها
خالد . كنك ياكوكو من مزعلك
كامله . الله يرحم رجالة
خالد . اوباااا نشيل طاجين هذ لصاحبته ونتفاهم معاك
كامله . امشي امشي هابا
خالد . شن في مزعله امي انتي
منى  . عشان طولت مانزلت تحسبني هاربه
خالد . ساهل نعرف كيف نضحك عليها امي هذ طيبه ينضحك عليها بكلمتين
منى . اممم
خالد . افردي وجهك خلاص وطلع
منى.تصنعت الابتسامه بكل من طيابه مقطعه روحها
خالد . ها ياكوكو شن مزعلك
كامله . نا وعليش نزعل في حاجه تزعل
خالد.كنك ياكوكو كله الا زعلك انتي ف كفه وكون كله ف كفه
كامله . العقيد خالد اعمر على سنه ورمح وليه تذهبله شيرته تخليه خيخا يشيل موالح ف يديه
خالد . اسمها منى
كامله . اللي هي
خالد . يمي كنك مع البنت كويسه وتحبك
كامله . صدقت انا تحبني اكذب غادي
خالد . والله ديما تشكر فيك وتقول عمتي كويسه عمتي حنونه عمتي دمها خفيف ..
كامله . قالت دمي خفيف
خالد . والله
كامله . شن قالت اخرى
خالد . قالت عمتي من طيابه لين امقطعه روحها
كامله . ابتسمت صدقت صدقت طيبتي معطبه حالي
خالد . وتقول عمتي عندها ذهب عمري ماريته على وليه
كامله . هذ كلهم يقولو فيها عادي ويش جديد
خالد . ولا تسوايها تي تحب وكالك اكثر من امها
كامله . طبعا شن جاب لجاب
خالد . نزيدك من الشعر بيت
كامله . قول
خالد . قالتلي امك تبان اختك كيف جاباتكم
كامله . اصلا زوجوني ونا عمري 13 عشان هك جبتكم
خالد . ربي يحفظك لنا وكب على راسها
كامله . ويحفظك ياغالي ويحفظلك الغاليه ونفرحو ب عويلتك
خالد . قريب ان شاء الله
كامله . والله باهي يامنى يامنوشه
منى . طلعت تمسح ف يديها نعم عمتي
كامله . تعالي تريحي جنبي قعمزي هن
منى . ب استغراب انا
كامله . ها مالا امك
منى . ابتسمت وقعمزت جنبها
كامله . شخبارك ياسمحه
منى . الحمدلله
كامله . نقولك نكته
منى. قولي
كامله . مره مصنع قهوة انفجر قال بنننن صفقت بيديها وبدت تضحك يانعلي ياجنابي وووه
ومنى تشوفلها وساكته
كامله . كنك ماتضحكي ماعجبتكش
منى . لا كيف عجبتني وووه علي نزيكه ياعمتي هاهاه
كامله ب إزدراء . بومه
منى . قلتي حاجه ياعمتي
كامله . قتلك منوره منورره