ضحايا بلادي

الخامس وخمسون

ضحايا بلادي
"مجزرة العشاق"
بقلم يحيى إدريس
البارت الخامس والخمسون  "55"

مارس 2017 ..

مقعمزات يتفرجن ع مسلسل ذكريات لا تموت ..
بتول ف يدها المذكرة وتقرا ماهي ثالثه ثانوي ..
وجنبهم الاء راقده وعموري يلعب ع تليفون امه
وصالحه مرلعه ع العداله والبنات يتفرجن ..
شهد . سبيكه تشبه لمن ..
ضحكت منى وقالت لهند ..
بتول ضحكت عطكن دعوه ماتخلن الواحد يقرا ..
صالحه وهي تلقم ف شاهي قرايه قدام تلفزيون
وجنب لعداله ..
بتول . كساد وانتو مايخطر عليكم الاجواء سمحه فات ونا نقرا وعندي امتحانات ..
شهد . زياد السنة شهادة حتى هو ..
منى . وانتي تفكري ف دنيا كلها ..
شهد . شافت لمنى بتضييق عيون ..
بتول . متخافيش ساهله ثالثه الاعداديه دق كله عندي نا ..
شهد . ساهله قلتيلي من اللي شيبتني وقتها
بتول . لكن جبت تقدير ولا ماجبت
صالحه ابتسمت وهي تشوفلهن ..
...
السلام عليكم ..
رفعت رحمه عيونها انصدمت فيه ..
فارس . السلام لله
رحمه . وعليكم سلام شهد مش هنا ..
فارس . عارف شنو اخبارك ..
رحمه . تمام تبي حاجه ..
فارس . ابتسم ويشوفلها خذا طرف بيتيفور وكلاه امم لذيذ ..
رحمه . ياريت تستأذن قبل ماتمد يدك
فارس . هنشكي فيك اختي
رحمه . ننن
فارس . لسانك طويل تبيله تقريض
رحمه . قرضه تقرض عظامك عندي معاك بصاره نا
هز فارس راسه وبضحكه قال . اها عندك ..
رحمه . عيطت بغيظ وهو طلع وهو يضحك
فتح باب سيارة ولعها وتحرك ..
رحمه . اتصلت ب شهد
شهد . وهي تشرب ف شاهي حطت طاسه وردت ايوا
رحمه.خوك ثقيل هذا لو سيبت شغل اعرفي منه هو
شهد . ضحكت وسعي بالك من
رحمه . من يعني سي فارس
شهد . كيف قصدك فارس هنا
صالحه شافت لشهد وقعدت مركزه معاها ..
رحمه . اها ويخفف ف دمه
شهد ، بس الحق هو دمه خفيف
رحمه .انتلفي انتي وياه ..
صكرت شهد مكالمه من هنا انفتح الباب وخش فارس بشنطته
ناض عموري يجري فالت فالت ..
فارس طبس ع ركابه وفتح يديه الاثنين
خش عموري ف حضنه ياعيون فالت انت
وضحكن امه وخواته ع تقليد فارس لصوت عموري
اعمر . جبتيلي حاجه
فارس . جبتلك عرم حاجات
صالحه . حمدلله ع سلامه
باس راسها ويدها وسلم ع خواته وقعمز يحكي معاهن وعموري مقعمز حذاه بعدين فتح فارس
شنطة وزع الهدايا ..
فارس  . وين محمد وباتي
صالحه . بوك يخدم ف مزرعه منى ومحمد ماسك محل من محلاتها
ابتسم فارس ماشاء الله ..
...
نفس القعده بس مش نفس صفاء النيه ..
رقيه مقعمزه قدام لعداله وجنبها ارويدا ..
وسن جابت قمحي وشماري هذي قرعتك يومتا
حشيناهن انا والحسن ..
ارويدا . قمحي وحشيناهن ضحكت ..
وسن شافت ل ارويدا ب استغراب ..
رقيه شيليهن من قدامها وهاكي مصمصي طواسي
خذتهم وشن ومشت لكوجينه ..
رهف مدت كراعها عن قصد تلتقط وسن طيح
بصفره ع جسمها كلها ع الارض وطواسي يشحترن
ورهف ورغد يضاحكن من قلبهن ..
رقيه . نعن عمى وضربه على كلى كسرتي طاسات ..
ارويدا . مرخيه بكل وسن ..
وسن قريب تبكي ..
رقيه فزي ضمي طواسي ونشفي الارضيه يا بومه ..
ناضت وسن وهي تقول شن درت انا بيش تعيطي عليا هك التقطت مش قصدتها ..
رقيه . ولك عين تردي عليا بدال ماتشكريني وانا عطيتك وليدي وحيدي كبيري وقرعتي ياللي ماتحشمي
وسن . شن درت لهذا كله ..
رقيه . اقلبي خلقتككك مانبيش نشوفك ويجي الحسن يعرف كيف يتصرف معاك ..
خش الحسن ع عياط امه وبكاء وسن
الحسن . شن في هنا
رقيه . مرتك طيحتلي طواسي
الحسن . معلش ياامي عندك بدال البنت ثلاثه جايه تخدمي ف المسكينه هذ مرتي مش خدامه اشتغلت بارك الله فيها مادارت حاجه ماتجبروهاش
هي وسن تعالي معاي خذاها ومشو لدار ..
رقيه شافت ل ارويدا ريتيه نحلف عليها ديرتله خطين ..
ارويدا . ماانتي اللي جوزتيها له ..
رقيه . كنت خايفه من بتول جتني وسن ..
ارويدا . فكينا منهن وخليني ف همي نا  ..
رقيه . حلك عند وليد زمان كنا بنكسبو هند عشان تضمني مكانك بس توا ضمنتي شن باقي تخلي وليد
يتلوى كيف ديري روحك زعلانه ومتبيش تحكي معاه
ومضايقه وكمليها مرقد وحزينه هو بروحه هيرايف
وينفذ طلباتك ابتسمت ارويدا وابتسمت معاها رقيه
ف دار
سلح جاكته وعزقها ع سرير كنك ماتتكلمي
وسن . شن بنقول
الحسن . قولي ان مش عاجبك اي حاجه
وسن . امك هي امي
الحسن . فكيني من المثاليه انا مارضيتش فيك كيف راضيه ع نفسك الاهانه هذ
وسن . عشانك
الحسن . ما ديري شي عشاني يابنت ناس جبتك لي نا مش تخدمي هلي
فرحت وسن بكلامه ابتسمت
الحسن شافلها وقال شن يضحك فيك
وسن . شكرا
خبط الحسن يديه ف بعضهن لا حول ولا قوة الا بالله العلي العظيم
وسن . نديرلك شاهي
الحسن شافلها ومش عارف شن يدير فيها 😂
...
طلعت شهد شافت فارس مقعمز
قعمزت حذاه ابو الفوارس ف شن يفكر ..
ابتسم فارس . شي شخبارك انتي ..
شهد.يعني الاخبار عندك انت شن دير ف محل عندنا
فارس . جاي نشوفك
شهد . تشوفني ولا تشوف رحمه
فارس . شن نبي ف خلقتها صاحبتك هذي تنحه
ابتسمت شهد بخبث . تمشي لمحل قبل ماتجي لحوش هنا يعني تشوفني نا قبل ماتشوف امك ..
فارس . جا خاطري ف حلو وخذيت منه ..
شهد . اهم شي عجبك الحلو
فارس . امم عاجبني
شهد . تحبه من زمان ولا
فارس . من هذا
شهد . الحلو
فارس . اها البيتيفور عشقي
شهد . حتى هو يعشقك
فارس . من هذ
شهد . البيتيفور
فارس . عدي ارقدي ياشهد
شهد . حتى نا ماشيه راقده
خشت لدارها وهي تضحك شافت غيث يتصل
بك زفرت بضيق دارتله مشغول ورقدت ..
وغيث قريب ينكلب ناش تحفه محطوطه ع طاوله
تكسرت وبعدين قلب طاوله وهو يعيط حط يديه
ع شعره خشت امه منفجعه وهي تقول شن في
غيث . اطلعي براااا ..
وخرت سميره وصكرت باب وهي خايفه ..
قعمز غيث ع الكرسي بتعب وخر راسه وغمض عيونه وهو يشوف لشهد قدام عيونه مافيش
قدامه الا حل واحد ..
وليد   . حبي الزعلان انا اسف ..
ارويدا . لا مش زعلانه وطبق ف دبش ..
مسكها من ذراعها تأسفنا خلاص ..
ارويدا تخليني نرد مدرسة ..
حط يديه ع وجهها يلمس ف خدودها وشعرها
حبيبتي انا نغار عليك من الهوا طاير مانبيش حد
يلمحك انا لو نحصل نخفيك محد يشوفك غير انا
وهي مثل ساذجه ، ابتسمت وقالت صح ..
ابتسملها وهز براسه بعدين باسها ..
ارويدا . وانا نحبك باسته وحضناته بقوة ..
وليد خذا نظاراته انا عندي محاضره توا تبي حاجه ..
ارويدا . دير بالك ع روحك ..
ابتسم وليد وطلع صكر باب ..
وهي فرحانه مبتسمه وسعيده ..
رن تليفونها ..
خذاته وردت ها ماما ..
رقيه  . درتي اللي قتلك عليه ..
ارويدا . خلاص هو تأسف مني ورضاني ..
رقيه . ورضيتي ب سهوله هذ ..
ارويدا . شن ندير قلبي ماتحملش جفاه ..
رقيه . عبيطه هكي عمرك ماتوصلي لحاجتك
ارويدا . مانبيش مشاكل انا نبي نعيش مرتاحه
رقيه . معناها معش تشكيلي لا من امه لا من اخته
ارويدا . ما وقبل ماتكمل كلامها رقيه صكرت فوجها
تنهدت ارويدا بضيق وهي تشوف لقدامها ..
نزل وليد من ع دروج بسرعه
هند . صباح الخير ياطير ..
وليد .ابتسم وهو يمسح ف نظارته صباح الفل ياست الكل ..
هند . وين نوم هذ كله تحسبو روحكم مزلتو عرسان
وليد . رفع حواجبه اها تأخرنا شوي ف نومه وباس راسها
هند . شنو اللا ماتبيش تنزل ..
وليد . شوفيها اكيد هتنزل شوي ..
هند . وعليش شوي بتقعد بلا فطور
وليد . نا نفطر ف جامعه
هند . نحكي عليها هي مرات تقعد حامل ولا حاجه
وليد . اتصل بيها
ردت ارويدا ها حبيبي رايفت علي بسرعه هذ ..
وليد . قالتلك امي انزلي افطري
ارويدا . حاضر صكرت ونزلت
هند . ياصباح الخير ياصباح الخير
ارويدا . صباح النور اعميمه
هند . امشي ديريلنا فطور هي
خشت ارويدا لكوجينه وهي قريب وتموت من قهر
...
في المحل
اللي يشوف وجه محمد يخاف ويطلع
ومحمد رغم ان ينتابه شعور بالضيق والإزدراء
بس يجي على نفسه ويتحمل ويتذكر شهد شن
تقوله وين ما تضايق من حاجه استغفر اذكر الله
بدا يستغفر ويسبح بحمد الله وبعظمته ع خشة
فارس جايبله صونيه مسلفره ..
ابتسم محمد شنو هذ ..
فارس ابسط ياعم فطيره هتاكل صوابعك وراها
محمد . من امي
فارس . لا من امك
ضحك محمد وقال اصبر جاب براد شاهي وصب
بدو ياكلو ويحكو ..
محمد . يعني بتقنعني انك ماكليتش ف الحوش
فارس . والله ماكليت مجتنيش نيه ناكل بدون
محمد . اكذب اكذب صدقتك نا
ضحك فارس وقال نق ع ه لقمه
محمد . كول كول ان شاء الله يثمر
رفع فارس حاجبه وقال نا اللي جبتهن
محمد . ع اساس بفلوسك
وكملوها يتناقرو ..
...
شهد وهذ اللي صار ..
رحمه . حيه وحيه ..
شهد  . تريحتي توا نبطت دماله ..
رحمه . ديري روحك ماتعرفي شي ..
شهد . كيف هك نا ميته من الرعب ..
رحمه . تعبطي ياشهد
شهد . مانقدرش يارحمه مانقدرش
رحمه . وراك امتحانات وبحث ومناقشه فكري ف نفسك لو شك 1‎%‎ انك تعرفي حاجه هيدمرك هذ
شهد . غمضت عيونها بخوف
رحمه . نا خايفه عليك
هزت شهد راسها ..
رحمه اهو يرن ردي عليه ..
خذت شهد تليفون وقالت بصوت يرجف الو ..
غيث بعصبيه . كنك ماتردي ع تليفونك
شهد . ماشفتش
غيث . لي كم نرن عليك
شهد . اسفه
غيث . متأسفيش شن اخبارك
شهد . تمام
غيث . حتى نا تمام مع انك مسئلتيش عني
شهد . لاهيه امتحانات واخر سنه وهك
غيث . بعدها تبقي معاي ومافيش حاجه تلهيك عني
شهد . تبي حاجه
غيث . بنشوفك
شهد . مانقدرش
غيث . وعليش
شهد . اءءء
غيث . حطي ف بالك ان غداك اليوم معاي مافيش مهرب
ابتسمت شهد مجامله ..
غيث . اتفقنا
شهد . اتفقنا
..
بتول مقعمزه تحكي مع صحباتها جدد وتضحك
اسماء سنة جت رسمي تقرا وتلاقت مع بتول ..
ف نفس المدرسة وقعدن مع بعضهن ..
اسماء . شخبار عمتي صالحه
بتول . الحمدلله كويسه
اسماء . وعمو جمعه والبنات وعيال منى
بتول . كويسين
هزت اسماء راسها وقالت مافيش جديد ..
بتول بلا لف ودوران وقولي شن حال محمد ..
فنصت اسماء وضربتها ع ذراعها يامعفنه ..
ضحكت بتول وقالت كويس ياحنه يشتغل توا ..
اسماء . ماينشدش عني
هزت بتول راسها بالنفي
اضايقت اسماء وقالت نمشي لفصل عندي امتحان
لازم نراجع وخشت وسيبتها وبتول ردت لصحباتها
صحباتها . هذي مش ليبية صح
ضحكت بتول لا هذي بنت خالي ..
وحق الله مانحسبها الا سورية ولا تركية
تحسيها تركية ولا اجنبية مش من هنا بكل
ضحكت بتول عليهن ..
وف مدرستها القديمة
تقوى مع صحباتها تحكيلهن ع لعبة ..
تقوى . تجنن بكل
كيف ندير
تقوى . تحطي الافلام هك تكتبي Yes. no
سلسبيل . بس سمعت انه لازم تلعبيها ف الحقيقه
ف ***
تقوى . نا نلعب فيها هك
عايشه . لعبه تخوف را
تقوى . كذب خرافات را ولعبة مافيها شي لعبتها كم مره صارتلي حاجه اهو قدامكم زي جن
سلسبيل . بس انتي مالعبتيهش ف الحقيقه وف لليل
تقوى . خوافات انتن هنلعبها وتشوفن انها
سلسلبيل نشوفو ..

طلعت منى من المحاظره ..
اثنين شباب ..
البنت هذي سمحه يرا ..
تحسها ابله دين ..
رد عليهم ثالث هذي ارمله بعيالها ..
تحكي من جدك ..
والله جد ..
لنقني كبدت فيها ياهو ان شاء الله تبقى حتى متزوجة ..
ع كيفكم وراهي تقرا معاي بنيه محترمه ف حالها
لا خلاص خشت دماغي رسمي ..

وهي تمشي مش باين منها شي شاربه مغطيه نص وجهها حتى لبسها مافي شي ملفت كله جلباب واسع
وكندره ساده لا كعب لا شي لا نقطه مكياج ويديها مغطيات ..
القصة ماوقفتش هنا اسماعيل نزل من سيارته
بعد ماانق نفسه وتعطر ودار جو كله من تعليمات
كامله عشان يلفت انتباه منى وهي مش مركزه مع
حد ولا تبي خلطه لحد حتى صحبات مادارتش ..
هي تمشي شافت شاب فلسطيني ركع ع الارض
وتقدم لزواج لحبيبته ف وسط جامعة وعياط وتصوير
"القصة حقيقية تحديدا جامعة جديدة "
ابتسمت منى وكملت طريقها واحد قال نعلي
من شيخه وهي تضحك عقدت حواجبها وقعدت
تمشي مشيه فيها شي من سرعه الشاب قال ياسمح
عبرنا يامدمرنا منى قلبها يدلف بقوة وهي خايفه
واسماعيل مره وحده يهجم ع شاب ويطيح فيه
ضرب وجامعة انقلبت من عرض زواج لمعركه
وزحمه منى خافت مشت تجري للمجمع ..
خشت للحمام غسلت وجهها وبعدين بطنها بدت
توجع فيها دفت الباب وشافت شي صدمها وخرت
وعيونها جاحظات منظر اول مره تشوفه بنت مشنقه روحها وجبل اللي صمد انهار مره وحده
وفقدت منى وعيها من هول المنظر ..
للحديث بقيه ..