ضحايا بلادي
بقلم يحيى ادريس
عليك حظ نحس وقت جو بيطلعو الفرح ..
حني ماتت بوي اكتئب وشهد قررت تسانده ..
منيره انهارت ع الاخر وقعد مهمه شهد وبتول
مواساة جمعه واما فارس قريب يتخوخم وتأجل
فرح فارس ورحمه ..
كان ف تجهيزات لفرح وليد وخطيبته امل ..
هند ردت فرعنت من جديد كل مانقولو هدت
بعد موت بنتها كان هدوء قبل العاصفه وزادت
ف ضلالها ..
هند . ثاني يوم الفرح صباحيتك توعى اطلقها رسمي
وليد . هز راسه وهو مبتسم بحسره
كامله . تستاهل هي الخاسره وانت كسبت امل
هند . ذوقي حتى هو
...
اسماء . حجزت حتى ف القفطان
ماجده . ساهل احمدي ربك ماخططتي انتي ومحمد وطلعتو معاهم را قعدنا هك وكل حاجه اتعلق
اسماء . بخت كي ه البخت هذ محمد الو حبيبي
محمد . شنجو
اسماء . تمام شخبارك انت
محمد . جو بكل وسنة ثقيلة ع قلبي
اسماء . الله غالب شن تقول فارس ورحمه جهزو كل شي وخسرو ولغو
محمد . فارس قريب يندب يقول كان صبرت بعد الفرح وماتت
اسماء . ضحكت عطه خير
محمد. نقنه يوجع
اسماء . حمدلله قتلك خلينا وحدنا نحنا فرحنا
محمد . اها كان هك را حطينا قدامنا واللي ورانا ع الابيض
..
انفتح باب زنزانه كانو شرطة ماسكين طارق
فكوله الكلبشات وخش شاف المساجين
مرر نظره عليهم كانو ف عالم موازي قعمز
ف تركينه بروحه تذكر شكل بتول وعرايكم
واخر نظرة كانت بينهم وقت ركب سيارة شرطة
كيف كانت حزينه عليه عيونه امتليو دموع وقهر
..
فارس كان مقعمز ف الحاجر وحط يديه ع راسه
بتول . شافت باب مردود تباوعت لقاته مقعمز حزين واضح يخمم طلعت وقالت فارس خش صقع
فارس . ماردش عليها
بتول . الله غالب هدير فرح كبير ان شاء الله كل تأخيرة فيها خيره قعمزت جنبه شوف نا مادرتش
فرح بكل وزواج غصب وحياتي تدمرت بس نحمد
ربي حياتي خير من غيري وانت يافارس ملاحظه فيك حاجه وانت تحكي ع الفرح عارف ومتأكد
انه هيطلع ف اليوم لفلاني ومقرر بس نسيت
حاجه انك قبل كل قرار ديره تقول ان شاء الله او كان عطانا الله عمر او بأذن الله لكن انت تنسى فيهن
فارس . شافلها نحنا مش متعاركين
بتول . توا مش وقت عرايك ننصحك بيش تريح بعدين تعارك على كيفك
فارس . ضحك لك وحشه ياشينه
بتول . وين تذكرت توا
فارس . تعالي هنا
قربت جنبه خذاها ف حضنه وقعدو يبحتو ف نجوم
..
خش وليد شاف بنت ع المسرح ف غاية جمال
ابتسم وقرب باس راسها قعمزو شوي بعدين طلعو
وسط الزغاريت والاغاني خذاها لفندق ..
وليد . نورتي
امل . بنورك
وليد . مبروك علينا
امل . الله يبارك فيك
وليد . بدا يتذكر اول ليلة له هو وارويدا وقت خش بيها نفس غرفة ف نفس الفندق فتح الباب وهي بين يديه وهي تضحك نزلها ع سرير وقال ثقيلة
ارويدا . اللي يبي الورد يتحمل شوكه
وليد . وردتي الجميلة وردتي السمحه
ضحكت ارويدا وناضت باساته
وليد على طول هك
ارويدا انحبك شن اندير
الآن
امل . وليد بنغير دبشي ممكن شوي تسيبني
وليد . طبعا خوذي راحتك طلع من دار طلع تليفونه واتصل ع ارويدا كانت ع الفيس ادور على عمل
غمضت عيونها بنفاذ صبر ..
نعم !
وليد . ارويدا بكرة محكمتنا
ارويدا . عارفه
وليد . ماتبيش تعطي فرصة لأيامنا الحلوة
ارويدا . لا
وليد . انا تزوجت
ارويدا . مبروك
وليد . مزعلتيش
ارويدا . عليش بنزعل طبيعي انك تتزوج مهم تبقى راجل معاها وتصونها
وليد . مش فارق معاك
ارويدا . صكرت تليفونها عزقاته ف ساس وعيطت
طاحت ع سرير وهي تبكي ..
...
منى . الليلة عيد ميلاد مين عيد ميلاد اللوله عيد ميلاد احلى الحلوين وشايلنها ف عيونه ..
شهد . حبيبتي كل سنة وانتي طيبه وباست الاء
الاء . ثنو هديتي
شهد . مفاجأة
الاء تفتح ف الكيس هييه كوجينه
شهد . عجباتك
شهد . تجننن
بتول . تضحك نجكليا كابره
صالحه . منى الله يربحك روحي شن ديري هنا خلاص زعل
منى . يمي هنا منسجمه واخذه راحتي انتي منشغله تعالي هنا بعدين اهو شهد
صالحه . شهد معاها راجل بس انتي
منى . وانا بميه راجل قرصت امها من خدها متخافيش يالوحي ابتسمت صالحه ومنى
قربت من محمد شن الشوايه مزال ما طابت
فارس . مزال
منى . جيعانه جيعانه
شهد . تشوف لحوش منى وتذكرت شقتها غمضت
عيونها وقالت الحمدلله استغفر الله ياربي ...
منى . مدت تبسيها هي حطولي
فارس . حطلها طماطمه مشويه
منى . شافت لطماطم وتبسي انصدمت قالت نبي لحم وكبده
فارس . اها نسيت
منى . حركاتك مش عليا وضحكت
فارس . حطلها ومشت
شهد . ماما
صالحه . نعم
شهد . وين زياد
صالحه . مع اصحابه وتلعب ف جوري
شهد . امي زياد خالط ف شلة مش تمام واحتمال كبير انه يتعاطى
صالحه . شن تفترشي انتي خوك انحبس ظلم لكن طلعي عليه اشاعات متوقعتها منك ياشهد انتي بذات
شهد . كلهم يقولو فيها
صالحه . كذب كذب يتبلو عليه وانتي بدال ماتهزبي ودافعي جايه تنقليلي ف الكلام تفتني فيا عليه وتغلضي قلبي
شهد . نا خايفه عليه
صالحه . اسكتي الله ونبي اشقي بهمك واللي عندك
شهد . عيونها امتليو دموع وبلعت ريقها
بتول . حصلت شغل استقبال ف عيادة
منى . ابتسمت ماشاء الله وتاكل ف لحمتها وقرايتك
بتول . نروح من جامعة ع العصر وشغلي ع العصر
منى . مافيش راحه
بتول. مش مشكله لفلوس مهمات ولازم نعتمد ع نفسي
منى . معاك حق هذ صح ان شاء الله نشوفك احسن دكتورة ونفرحو بيك
بتول . ابتسمت
اعمر يلعب ف كورة مع محمد وفارس يشوى
وجمعه مقعمز ويشوفلهم ب ابتسامه بسيطه
...
في المحكمه
ثاني يوم ..
ارويدا . انا بنطلق شافت لوليد بتحدي
محاميه وليد . معلش ياحضرة القاضي نعرفو عليش بتطلق المدام ممكن في شهود يثبتو انها تطلع من
حوشها وقت كانت عند هلها زعلانه من زوجها وتختفي ب ساعات
ارويدا . تشوفلهم بصدمه
رقيه . شافت لهند
هند . تبكي اه ياوليدي طحت ه طيحه سوده
نادو على شاهد الاول ..
خشت جارتهم اللي من قبل شهدت ع بتول وشهد
استخدمتها هند جارتهم مطبسه راسه ..
قولي اقسم بالله العظيم ان اقول الحق
وقسمت وبدت تحكي عن ارويدا ف كلام صار وكلام ما صار وهاتك ياهتك ف الاعراض وان هي وامها يدللن ع وحده تسحر وليد وسحر جا ف بنتهم تقوى
ارويدا منصدمه وعيونها قريب طلعو وليد يفرك ف يديه ومطبس راسه مره مره يسرقلها ف نظر
ارويدا واقفه وترتعد وتقول كذب كذب كذب
بس صوتها مش قادر يطلع ورقيه تحسبن عليهم
والقاضي حكم بالطلاق وارويدا ماعندهاش اي حق
من اضرار زواج اللي تعرضتلهم شافتله بعيون غارقه
ف دموع ..
أنت تقرأ
ضحايا بلادي
Romanceتضحيات الحب الحرب المرض اليأس كل سنة معينة لها ابطالها تتكلم عن جمعة اب بخيل ظالم وعن عائلته وكيف هتكون حياتهم ومواجهتهم مع ظروف الحياة القاسية من 2013 الى 2023
