#الجزء_135
#الفـــصــل_التالث : #دعيها_تثلج
#Let_It_Snow ❄️
#🅂🄰🄵🄸🅈🄰_🄽🄰🄶🄰🅃 🔏
#𝓘𝓻𝓲𝓼
غير كمل اجراءات الدخول ، وقفات عليه ممرضة داتو حتى لغرفة الفحص .. هو العادة ما كايدخل حد من غير الطاقم الطبي ولكن حيت هادية شخصية معروفة نوعا ما ... خلاوه يكون معاها.
فاش دخلوها وسط ديك الانبوب شداتو الخنقة وتفكر راسو فاش كان كايتعالج ... و تفكر حتى فاش ضحك مع عثمان بالشلل و العمى ... تنهد محصر على الخلعة لي خلعو ، ولي خرجات منو مثنية و مثلتة مع هادية، خلاتو ياخد قرار بينو وبين نفسو، انو ما كاينش الضحك فالصحة ...
تسنا حتى سالاو التصوير وخرجوها من تماك .. دخلوها لغرفة عادية، وصلوها بأجزة خفيفة باش يتبعو نبض قلبها و ضغطها، وخرجو مخلينهم بجوج ... جر كرسي حداها وجلس شاد فيديها.
فهاد الاثناء هزات ساندية التلفون و خدمات الراديو على تردد الاذاعة ... وكلها حماس باش تسمع صوت هادية، و ما قادها فخر و اعتزاز بيها .
- السبعة و ثلاتة الدقايق .. الصوت مبدل شوية! العادة هي طلل عليكم هادية، ولكن اليوم استثناء على قبل ظروف استثنائية ... معاكم اسية و ياله نبداو .
قرنات حجبانها وشافت فريا مستغربة ... ومع ذلك كاتحاول تتفائل .
ساندية : هاد السايبة هادي ... مشات لقات الجماعة ما سخاتش .
ريا : (حبسات المضيغ) م موحال !
ساندية : و ما عندها حتى تفسير من غير ، هادية ما يمكنش تغيب غا لله فسبيل الله !
علات حجبانها وياله بغات تهضر قاطعها حبيب ..
حبيب : عفاك ايلا كنتي غادي تفايلي تاني غير سكتي ما بغينا خلعة !
ريا : نتا براسك فكرتي فاش فكرت ...
ساندية : (فهماتهم) زعما يكونو تلاقاو بحاتم ؟
ربا : (دقات الطبلة) سمعات الارض وبلعات.
بلا ما تزيد تقوي فالهضرة، حيت اي فرضية غير غادي تتلف أعصابهم و تخليهم متوترين على والو ... هزات تلفونها صونات عليها ومنين ما جاوباتش صونات على بهاء .
جر الكرسي جلس حداها وياله غادي ينطق صونا التلفون فجيبو... هزو ثاني وغير لمح سمية ساندية، شاف فالساعة وتنهد عرفهم تشوشو عليها.
بهاء : الو !
ساندية : بهاء معاك هادية؟
بهاء : (هزهز راسو) اه
ساندية : (بتوتر) ياك لاباس ؟ واقعة ليها شي حاجة ؟ علاش ما مشاتش للخدمة ؟ علاش ما كاتجاوبش فالتلفون ؟
بهاء : حنا فكلنيك ****
ساندية : (ناضت من بلاصتها مذعورة) علاش كلينيك ؟ شواقع، مال هادية !
بهاء : حتى انا بغيت جواب على هاد الاسئلة !
ساندية : واش سخفات ؟ (بارتباك) ها حنا جايين .
بهاء : تمام .
حط التلفون فجيبو وجهدو مقاضي ... ما قادر يزيد كلمة وحدة وهمو الشاغل هو هادية تفيق بيخير وعلى خير ... شاف فيها بحب ونطق مخطابها .
أنت تقرأ
فل تثلج❄️مكتملة❄️
Romance💎مكتملة💎 •°• #Let_it_Snow •°• •Love is a beautiful kind of fear• بقلم : ❄︎⁂𝑺𝒂𝒇𝒊𝒚𝒂 𝑵𝒂𝒈𝒂𝒕⁂ صفية نݣات ⁂❄︎ ...
