#الجزء_168
#الفـــصــل_التالث : #دعيها_تثلج
#Let_It_Snow ❄️
#🅂🄰🄵🄸🅈🄰_🄽🄰🄶🄰🅃 🔏
#𝓘𝓻𝓲𝓼
خرجات من الكوزينة من بعد ما جمعاتها وطرفاتها مزيان ... حطات للمشيشات ياكلو ومشات للصالة تمدات .. بالها معاه حيت حسو مقطوع من البارح ... مولف يعيط ليها كلشي ليلة واخا فرق التوقيت لي بيناتهم ... و ما بغاتش هي تعيط لا يكون مشغول ... خلات ليه ميساج باقي ما جاوبها عليه .
نفسيتها فالارض، كلشي جا ورا بعضياتو، من السفر ديال ريا، لموت فايزة، لسفرو هو، احداث ثقيلة وهي مع البيريود زادت كملات، خاطرها ضياق و ما بقا عندها فين تزيد ...
صونا تلفونها وغير لمحات سميتو طارت جاوبات وحطات التلفون على وذنيها .
هادية : الو !
بهاء : (تنهد) مولات الشي ديالي ... اش خبارك ؟
هادية : بيخير الحمدلله ونتا ؟
بهاء : الحمدلله ...
هادية : ياك لاباس ؟ ما عيطتيش لبارح، تشوشت ..
بهاء : والو باس .. غير طاح التلفون و كان خاصني نبدلو ...
هادية : (بخوف) غير طاح وصافي ؟
بهاء : اه ما تخافيش، غير طاح وصافي ما وقع والو من غير
هادية : (تنهدات) من الخير، لقف الباس .
بهاء : هذا ما كان ... ايوا توحشتيني !
هادية : (نزلو دموعها لي كانو على سبة كايتسناو غير هاد السؤال) بزاف ... طولتي الغيبة و الثلت ايام ولات سيمانة ...
بهاء: ما بقا قد ما فات ... ان شاء الله قريب تلقايني حداك
صوت السرسار فالباب خلاها توقف من بلاصتها .
هادية : شي حد كايصوني ... حتى نعاود نعيط ليك من بعد واخا ؟
بهاء : تمام ... تهلاي فراسك !
هادية : حتى نتا ...
قطعات معاه ومسحات دموعها عاد باش مشات حلات ... كان واقف و التبسيمة مرسومة على شفايفو ... بقات كاتشوف فيه وهو كايشوف فيها، حتى طرطقات ثاني كاتبكي ... ما تسناهاش دير شي حركة حيت من حالتها باين بلي هاد المرة هو لي خاصو يديرها ....
قرب لعندها عنقها مزير عليها، وحتى هي زيرات عليه كاتبكي فوق كتفو وتشهق ...
هادية : كون غير قلتي لي غادي تجي .... (زيرات كثر) توحشتك بزاف ...
استنشق عبيرها لي رد ليه الروح فذاتو ... باش عنقها و بقا على حالتو حتى رخفات عليه...
هادية : على سلامتك !
شد وجهها بين يديه بجوج، مدوز ابهامو على خدودها ....
بهاء : شششش، انا جيت ، صافي بلا بكا
شدات فيديه مدخلاه وسدات الباب باش ما يخرجوش المشيشات ...
بهاء : بغيت نديرها مفاجأة ... ماشي باش نشوفك كاتبكي ..
هادية : حتى وكنتي علمتيني غا نبكي ...
شد فيديها مزير عليها ...
بهاء : ياك لاباس ؟
هادية : (هزات كتافها) والو غير ما موالفاش نبقا بوحدي .. ما مولفاش الدنيا تخوا عليا ، ساندية لي فيها كافيها وهمها كبر من ديالي ... ريا راها مسافرة مع راجلها الله يتبت الغرس .. نتا غبرتي ما بقيت نعرف نهضر معاك حتى جوج كلمات مقادين .. صافي ضاقت بيا الدنيا و ما عرفت باش نرد بالراس .
بهاء : وهانا جيت صافي ... و ريا غادي ترجع و ساندية الله يفك ضيقتها ... كلشي غا يولي كيما كان بلا بكا
أنت تقرأ
فل تثلج❄️مكتملة❄️
Romance💎مكتملة💎 •°• #Let_it_Snow •°• •Love is a beautiful kind of fear• بقلم : ❄︎⁂𝑺𝒂𝒇𝒊𝒚𝒂 𝑵𝒂𝒈𝒂𝒕⁂ صفية نݣات ⁂❄︎ ...
