#الجزء_140
#الفـــصــل_التالث : #دعيها_تثلج
#Let_It_Snow ❄️
#🅂🄰🄵🄸🅈🄰_🄽🄰🄶🄰🅃 🔏
#𝓘𝓻𝓲𝓼
جرات باها وخرجات بالزربة من الدار ... و هادية باقا واقفة قدام الباب حتى خرج لعندها بهاء و عثمان ...
بهاء : نمشيو حتى حنا !
هادية : (ببرود) اهاه ، بسلامة عليكم !
بهاء : مولات الشي بيك شي حاجة ؟
هادية : (نزلا شفتها السفلية و هزات حاجبها) لا عادي ! شنو ممكن يكون !
بهاء : ياكما تقلقتي من هضرتي .. زعما على الحنانة ؟
هادية : علاش غادي نتقلق وانت اصلا ما قلتي غير لي كاين !
بهاء : لا ما قلتش !
هادية : (هزات كتافها) برأيي كفيتي و وفيتي .
بهاء : هادية !
هادية : عيانة ا بهاء باغا نرتاح ...
باس راسها بلا ما يقوي الهضرة وخرج هو وعثمان من بعد ما سلمو على كلشي ...
دخلات هادية لبيتها طلقات فوق الفراش ...وشادة دموعها بالزز .. خايفة تبكي ثاني و يمشي ليها الشوف .
بينما على برا بقات جالسة ريا مع ساندية وجيلان وهاينة ...
ساندية : ما سخيتش بجماعتكم ولكن !
ريا : حتى نتي بوصولك بالمشاكل كيف الشتا ...
ساندية : استغفر الله، علاش كاتقولي هاكا ؟
ريا : جا شي ورا شي ..
ساندية : عادي المهم هو يمشي ... غير بغيت نزيد نولف على الدار .. مزال ما رديت حوايج السفر لبلاصتهم و باقي ما جلست مع بنتي الراس فالراس .
جيلان : اوهوووو شحال تابعنا .
وقفات ومدات لجيلان يديها ..
ساندية : نمشيو ؟
جيلان : مشينا. ..
سلمو عليهم بجوجات و مشاو طللو على هادية ... نطقات سميتها ساندية جوج مرات منين ما جاوباتش عرفاتها ناعسة ، سدات عليها الباب وخرجو غاديين لدارهم .
دخلو و علقات ساندية سوارتها ... تنهدات بصوت مسموع و شاف فجيلان .. حلات ليها يديها و ترمات الثانية فحضنها مزيرة عليها .
جيلان : كانتمنى الامور تتصلح و يرجعو المياه لمجاريها .. هوما مع مامهم و نتي مع ماماك .
ساندية : (حنحنات) بخصوص ديكشي لي وقع !
جيلان : (دورات عينيها) اش وقع ؟
ساندية : عاودو ليا هادية وريا !
جيلان : ا اه انا نسيت ...
ساندية : (تبسمات) حسن ما ديريش فبالك ... ماما من ديما كاتبغي غير راسها ...
جيلان : ولكن كاتبقى ماماك !
ساندية : وانا ما ناكراهاش .. ما كرهتش صراحة ولكن ما بغيت ندي ذنوبها باطل .. خليها منها للي خلقها
جيلان : الله يفك ضيقتكم .
ساندية : امين ا عسيلتي ... امين ... حتى نتي الله يصلح احوالك مع ماماك .
جيلان : هههه كلنا داروها بينا الامهات .
ساندية : انا عمري نديرها بيك ... يمكن ما ولدتكش و ما ربيتكش و تلاقيت بيك و نتي كبيرة بعقلك ولكن كيما قلتي ديك النهار ايلا بغيتي عيطي ليا ماما وديريني بالصح ماماك ، غادي تلقايني كانتسناك باش تعاودي ليا تفاصيل نهارك، عندك شي حاجة فقلبك قوليها، محتاجة معامن تشاوري ما تحشميش ... عارفة هادشي كامل كنتي كاديريه مع ارون ولكن غادي نفرح بزاف ايلا شركتيني معاكم حتى انا . و نفس الشي غادي يكون بالنسبة ليا ... ما تحشميش مني ولي فخاطرك قوليها، حنا ماشي مرات اب ورييبة .. حنا صحابات، وام مع بنتها .. تفاهمنا ؟
جيلان : ما تحتاجيش توصي هادشي كنت نديرو قبل حتى ما تزوجو ماشي ايلا عاد منين وليتي معاي تحت سقف والو (باست يديها) لهلا يخطيك عليا .
أنت تقرأ
فل تثلج❄️مكتملة❄️
Romance💎مكتملة💎 •°• #Let_it_Snow •°• •Love is a beautiful kind of fear• بقلم : ❄︎⁂𝑺𝒂𝒇𝒊𝒚𝒂 𝑵𝒂𝒈𝒂𝒕⁂ صفية نݣات ⁂❄︎ ...
