فل تثلج❄️مكتملة❄️

❄️الجزء 127❄️

#الجزء_127
#الفـــصــل_التالث : #دعيها_تثلج
#Let_It_Snow ❄️
#🅂🄰🄵🄸🅈🄰_🄽🄰🄶🄰🅃 🔏
#𝓘𝓻𝓲𝓼

حلات الباب وبقات واقفة صافنة فالمرا لي كاتشوف فيها وجهها مألوف ولكن ما عقلاتش فين شافتها .. بينما هي قرنات حجبانها بعصبية و نطقات ...

فايزة : شكون نتي ؟
جيلان : (قرنات حجبانها و مع ذلك بقات محافظة على ادابها) اش حب الخاطر ؟ كاتسولي على شي حد ؟

دفعاتها ودخلات مدرمة كاتعيط بسمية ساندية ... خلات هاينة تخرج من الكوزينة مخلوعة بسبب غواتها ... غير جاو عينيهم على بعضياتهم هدوء رهيب عم المكان ... كل وحدة فيهم كاتشوف فلوخرا وشلا كلام عندهم يقولوه لبعضياتهم ... سنين وهو محفوظ فقلوبهم ... الجو مشحون و شحناتو حسات بيهم جيلان داكشي علاش نطقات ملطفة الجو .

جيلان : ن نتي هي مامات ساندي واقلة ياك ؟ تشرفت بمعرفتك الخالة !
فايزة : فين ساندية !
جيلان : م مسافرة ..
فايزة : فين ؟ كيفاش مسافرة ؟ علاش ؟
جيلان : ح حيت (بلعات ريقها) م مشات لمانيلا عند باباها تشوفو
فايزة : (ترسمات ابتسامة استهزاء على شفايفها) اها ! سبحان الله شحال مرضية هاد البنت .. خلات مها مرمية فالدار بوحدها لا برية لا تلفون و ماشية مسافرة عشرين ساعة باش تشوف باباها .. يا سلام .
هاينة : فايزة قصري الشر ونعلي الشيطان .
فايزة : الشيطان هو نتي (ضربات على كرشها و عينيها حمرين) منين خليتي بنت كرشي تقلب عليا
هاينة : (بتحذير) فايزة قصري الشر
فايزة : وايلا ما بغيتش ؟ اش غادي ديري ؟ اش عندك ما ديري ؟
هاينة : انا من نهار عرفتك عمري درت ليك شي حاجة ! علاش جايا دابا كاتعاتبيني على شي حاجة نتي درتيها بيديك .
فايزة : ناقصك دابا غير تبكي بحال عادتك و تكمل الصورة (ضربات على صدرها) طينتك انا لي كانعرفها.
هاينة : (بقهرة) حسبي الله ونعم الوكيل فيك الى يوم الدين، ايلا نتي شتتي شملي و مزال مكملة فطغيانك و رادة ليا اللومة .
فايزة : (تبسمات) يا حرام ... و هانتي رجعتي ! فاللخر رجعتي وقلبتي بنتي عليا !
هاينة : فعايلك لي قلبوها عليك .

جيلان بقوة الخلعة، خايفة لا ينوضو يتشادو ولا توقع لشي وحدة فيهم شي حاجة وسط الدار صونات لهادية وبلا ما تهضر خلاتها تسمع اش واقع .

فايزة : علاش رجعتي !
هاينة : علاش كاتسولي ؟ شكون عطاك الحق؟ ديك زمان هاينة الهوينة باح، ما بقيتش نية ولي جا يتحكم فيا .
فايزة : حيت لقيتي معامن تفرعني ! (تبسمات جنب) رجعتي باش تقولي ليهم شوفوني فين وليت ؟
هاينة : رجعت باش نرد شنو ضاع مني ... هادية، ريا، حبيب و حتى ساندية ، هي مسكينة ما تستاهلش ام بحالك، محسادة و مغيارة و كاتموت وتحيا ايلا شافت شي عائلة سعيدة ... حتى انو الطمع عماك و كنتي غادي تزوجيها بنصاب ... حياة البنت ضاعت معاك و مزال باغا تزيدي تكفسيها ... تاقي الله فكبدتك
فايزة : بنتي هادي وماشي شغلك فيها، نحرقها حية نتي ماشي شغلك، ياك نتي سمحتي فكبدتك باش يعشيو مرتاحين، ماشي شغلك فيا انا ! نقت*لها نحييها ماشي نتي لي تحليتي عليها وماشي نتي لي تقولي ليا اش ندير
هاينة : (غوتات بالجهد) حتى نتي ماشي شغلك فيا دابا ... خرجي من حياتي و عطيني بالتيساع .. (نتفات شعرها بعصبية) خرجي من حياتنا ، كيما عطيتكم التيقار و بعدت منكم ها العار ايلا ما بعدو مننا ...
فايزة : ايه زيدي زيدي خرجي اش عندك فقلبك اديميمة ...
هاينة : كرهتك ، والله ايلا كرهتك، ويمكن سمحت لسعيد الله يرحمو ولكن نتوما عمري نسمح ليكم، وعند ربي ما نسمحش ليكم ... (ضربات على صدرها) حسبتك صاحبتي صدقتي حتى نتي بحالها . علاش ، حيت صبرت على خلا عشتي ! حيت كنت نموت كل نهار وفينما نحل عليك لباب تلقايني مزرقة من شي قنت ... هادشي كامل حسد و غيرة !
فايزة : (تبسمات) هانتي مشيتي ! شنو وقع من بعد تزوجتي بما احسن و عشتي اميرة ... بلا ما تجي دابا تلعبيها ضحية علينا ...