فل تثلج❄️مكتملة❄️

❄️الجزء 187❄️

#الجزء_187
#الفـــصــل_التالث : #دعيها_تثلج
#Let_It_Snow ❄️
#🅂🄰🄵🄸🅈🄰_🄽🄰🄶🄰🅃 🔏
#𝓘𝓻𝓲𝓼

•∆16:05∆•
دخلات لدارهم من بعد ما وصلها باباها ورجع بحالو لخدمتو يكمل اش عندو باش يجي يحضر معاهم للخطبة ...

غير سدات الباب نطقات بسميتها .. لي ولات عندها عادة ..

جيلان : ساندية !

سكتات لوهلة ومنين ما جاها جواب عرفاتها مشات لعند هادية، تنهدات ودخلات للكوزينة، لقاتها مخلية ليها وريقة بلي الغدا فالميكرواوند ...
شعلات عليه باش يسخن ومشات لبيتها كانت كسوتها محددة ومعلقة فبلاصتها ... وسباطها لي كانت كاتقلب عليه فالصبح مجبود ومحطوط حداها ....

تبسمات وبدلات حوايجها باش تاكل على راحتها ... فكات الظفيرة لي كانت دايرة لراسها ... غسلات يديها وخرجات ثاني نيشان للكوزينة حطات الطبسيل فوق الطبلة وجلسات مسمية الله ...
ياله حطات اللقمة ففمها نزلو دموعها .... كاتمضغ وتبكي حاسة بثقل ماشي طبيعي على كتافها ...
حطات الخبز من يديها ودارتهم على وجهها كاتبكي وتشهق ... حتى كاتسمع الباب تحلات ...

ساندية : جيلو !

مسحات دموعها بالزربة وناضت طايرة لعنده‍ا معنقاها بالجهد ... وحتى ساندية عنقاتها بلا ما تحكر .

ساندية : كي كانت القراية ؟

هزهزات راسها وبقات على حالها لاصقة عليها ! خلاتها تتشوش ..

ساندية : مالك ؟ بيك شي ؟

شهقات وزادو نزلو دموعها ...

جيلان: سمحي ليا !
ساندية : (قرنات حجبانها) مال بنتي ؟ اش عندك ؟
جيلان : باقي فيا الحال على الهضرة لي قلت ليكم وعلى البيبي لي مات ! مزال ما قديت نتخطاها، و كل نهار كانزيد نتقال منين كانشوف شنو دايرة معاي وعلى قبلي، لي ولداتني وما عمرها تهولات لي بحالك، كيفاش مهتمة بالتفاصيل ديالي، كيفاش كاتعامليني ... هادشي كامل زاد ثقلني ..

هزات يديها باسها وهي كاتشهق ...

جيلان: سمحي ليا، ما عرفتش كيفاش خفت تتبدلي عليا ورا ما تحملي، لي دير هادشي كامل مستحيل تتبدل !

نزلو دموعها حتى هي، وهزات يديها باستها ...

ساندية : ايما على الحنينة وهازة هم ماشي ديالها ! نتي ما عليك والو وما خاصكش طلبي السماحة !
جيلان : (نفات براسها) انا سبب كلشي !
ساندية : استغفري الله ! هذاك اختبار من عند ربي والحمدلله كانظن راحنا نجحنا فيه ...

جراتها معاها جلسو فوق الكنابي ومسحات ليها دموعها ....

ساندية : حنا سدينا الموضوع و تخطيناه ونتي باقا كاتطلع وتنزل فيك ... عادي ا بنتي، ربي بغاه ربي داه ! ماشي نتي سبابو ، حيت حنا اصلا ما كناش معولين عليه ... وصافي الحمدلله على كلشي ، لاش غا تقهري راسك و تحملي نفسك ذنب ما عندك فيه حتى دخل ؟ عادي، ان شاء الله غادي يجيب ربي بيبيات اخرين ...
جيلان : متأكدة ما مقلقاش مني ؟
ساندية : غا نتقلق منك ايلا بقيتي كاتحملي راسك شي حاجة ما عندك حتى دخل فيها !
جيلان : (مسحات دموعها) قلت راكم سادين السيرة غير على قبلي ...
ساندية : سديناها حيت صافي خاصنا نتخطاو، ما كاين لاش نبقاو عايشين على الاطلال ! لله ما اعطى ولله ما اخد ... وكيما ربي رزقنا بهاد النعمة هو قادر يرزقنا غيرها، وكيما حيد لينا هاد النعمة مرحبا بشنو ما دار من بعد ... هادشي ما كانتناقشوش فيه و ما كانعتارضوش عليه.... و ما كانحملوش راسنا المسؤولية ديالو ... و زعما يا الهشيشة ديالي، نتي هي مولات العقل !
جيلان : بقيتي فيا ! (شهقات) وحتى هضرتي ما كان عند العقل ما يدير فيها !
ساندية : من حقك تغيري على باباك و تخافي على بلاصتك فقلبي ... ولكن كوني هانية حتى حد ما يقدر يبدل شنو كانحس من جيهتك، واخا يكونو ولادي ...
جيلان : ما بقاش عندي فيها شك ! غير ما فهمتش كيفاش درت الاسقاط ديال حالة ماما عليك، بحال ايلا هي كانت مهولة ليا قبل بقا غير دابا
ساندية : (شدات فيديها) كلها وطباعو ...وايلا كان هادشي ديالها ما كايضركش لديك الدرجة بلا ما تحقدي و تعاتبيها، صافي خليها منها للي خلقها، غادي يجي الوقت لي تعرف فيه قيمتك ..
جيلان : فالاول كنت كانقول هادشي ما كايأترش فيا... حيت كان عندي غير بابا، هو واخد بلاصتها ... قلت تبارك الله، بابا داير جوج ادوار و ما حاساش بالنقص ! ولكن نتي جيتي !
ساندية : (بسخرية محاولة تلطف الجو) ههه انا هي الشريرة مجبد البلا !
جيلان : لا حاشا ! بالصح منين جيتي و خديتي دور الام عرفت شنو هي ام ! وبقيت كاندير مقارنة بيناتكم و ديال بالصح بقا فيا الحال خصوصا ورا ما حملات .
ساندية : الله يكمل عليها بالخير وحنا الله يرزقنا من فضلو ...
جيلان : (باست يديها) ان شاء الله فالقريب ..
ساندية : (تبسمات) انا وباباك قلنا حتى يدوز عام على زواجنا !
جيلان : ايه هي هاديك يتزاد فعيد زواجكم !