#الجزء_138
#الفـــصــل_التالث : #دعيها_تثلج
#Let_It_Snow ❄️
#🅂🄰🄵🄸🅈🄰_🄽🄰🄶🄰🅃 🔏
#𝓘𝓻𝓲𝓼
*10:30*
جالسين بثلاتة بيهم على الطبلة ديال الفطور و المساعدة كاتسربيهم ... عطلو الفطور حيت ميسان عطلة والحاج منين رجع بهاء للخدمة طلق عليه كلشي .. هو كان خدام غا باش يعاون عثمان منين ولاو بجوجهم خلاهم يعومو بحرهم .. عارفهم قادين بشغلعم .
ابراهيم : بهاء ما جاش !
- لا ما جاش .
ابراهيم : (تنهد) يعلم الله فين زاد ! (شاف فميسان ما فيه لي يعكر صفو الجو) ايه اش كنتي ناوية تقولي ليا لبارح !
ميسان : (شافت فالمساعدة) غير سيري انا غادي نتكلف !
- غير خلي عليك اختي !
ميسان : ما كاين لاش قلت ليك انا غادي نتكلف ... شوفي خالتي السعدية واش محتاجاك تعاونيها
- سالينا كلشي ..
ميسان : خرجي لعند عمي احمد قولو يوجد الطموبيل .
- و واخا .
دارت فالدورة و ناضت ميسان تبعاتها تشوف ياكما كاتصنت عليهم ... وعاد رجعات .
ابراهيم : ميسان اش هاد التعامل ؟
ميسان : (هزات كتافها) انا راني شاكة فيها هي لي كاتخرج اسرارنا لديك ميخي لي يقيل يعيط لهادية فالراديو .
ابراهيم : خرجي نتي من هاد الشي ...
ميسان : ما غاديش نأمن نهضر حداها ...
هاينة : (تنهدات) ي ياكما شي حاجة كاتخص هادية ؟
ميسان : شبعتو ؟
هاينة : الحمدلله .. قولي شنو كاين ا ميسان !
ميسان : (حنحنات) هادية اليوم تخرج من الكلينيك ...
هاينة : ع علاش ؟ اش دخلات دير !
ميسان : جاها انهيار عصبي ..
هاينة : (شافت فابراهيم) قلتها ليك .. شفتي انا حسيت ببنتي .
ابراهيم : و كي راها دابا ؟
ميسان : اليوم خارجة ما تخافوش .. الحمدلله ازمة و فاتت .
هاينة : علاش ما قلتيهاش ليا .
ميسان : وانا سقت الاخبار فالليل .. ممنوعة الزيارة غير غادي نقلق راحتك وصافي .
ابراهيم : (تنهد) هاينة تهدني ..
هاينة : (مسحات دموعها) دابا غادي نمشي عند بنتي .
ميسان : ماما اليوم هي خارجة ...
هاينة : نتسناها حتى تخرج ؟ تسنيت بلا قياس .. ما عنديش جهد فين نزيد مزال .
ابراهيم : غير تهدني و نمشيو .. (شاف فبنتو) اشمن كلينيك ا ميسان !
ميسان : (هزات كتافها) انا قلت ليه نمشيو قال ليا هي غذا خارجة .. ما عطانيش السمية ...
ابراهيم : سوليه !
هزات التلفون ياله بغات تسيفط ليه ميساج جاها واحد من عندو. ..
حبيب : هادية راها فالدار..
شافت فيهم و حنحنات ..
ميسان : راها فالدار .. شفتو قلت ليكم راها خارجة .
هاينة : (وقفات كاتهضر مع ابراهيم) ندير عباية عليا ونمشيو.
مشات كاتجري لبيتها مخلياهم فوق الطبلة مأسفين على حالتها ...
ابراهيم : اودي .. الله يسمح ليهم منها و يسمح ليها منهم ...
ميسان : امين !
ابراهيم : (شاف فيها وصغر عينيه عافاها نظرة الشك) كنتي كاتهضري مع صاحبتك ولا حبيب فاش دقيت .
ميسان : (حنحنات) السي لحاج !
ابراهيم : (بنفس طريقتها) لالا بنتو .
ميسان : وبابا ما يمشيش عقلك بعيد .. راه عيطت على قبل ماما .
ابراهيم : هممم .
ميسان : ياك كاثيق فيا !
ابراهيم : ثايق فيه هو .. اما نتي عارفك كاطيري من المقلة
ميسان : (خرجات عينيها) يااك .
ابراهيم : (تبسم) غا ضاحك .. انا عارف ترابي يديا ما تخو*نيش .
ميسان : (بسخرية) بحال ايلا مواعداك بالزواج و خويت بيك .. خليني ا با ندبر على راسي .. غا نتا لي تبات تحاب .
ابراهيم : (خرج فيها عينيه) ليوم تمشي لاسطنبول ... ليوم !
أنت تقرأ
فل تثلج❄️مكتملة❄️
Romance💎مكتملة💎 •°• #Let_it_Snow •°• •Love is a beautiful kind of fear• بقلم : ❄︎⁂𝑺𝒂𝒇𝒊𝒚𝒂 𝑵𝒂𝒈𝒂𝒕⁂ صفية نݣات ⁂❄︎ ...
