#الجزء_172
#الفـــصــل_التالث : #دعيها_تثلج
#Let_It_Snow ❄️
#🅂🄰🄵🄸🅈🄰_🄽🄰🄶🄰🅃 🔏
#𝓘𝓻𝓲𝓼
وصلو لوجهتهم ونزلو .. كيما العادة كلشي كايكون مقاد و واجد كايتسنى حضورهم ... شد فيديها ودخلو جلسو الراس فالراس غير هي وياه و ما كاين لي غا يصدعهم ...
بهاء : هاد البلاصة كاتعني ليا بزاف ..
هادية : (شدات فيديها و تكات على كتفو) حتى انا ... فال خير علينا
بهاء : و جبتك هاد النهار للهنا على قبل (حنحن) واحد الحاجة .
هادية : (هزهزات راسها وهي باقا على وضعيتها) ياك لاباس ؟
بهاء : عقلتي على نهار سافرت باش نتعالج ؟
هادية : (بسخرية) نهار قلتي ليا ما كانبغيكش ... جرحتني ساعتها ..
بهاء : (تزير) سمحي لي ... واخا الكلمة ما عندها ما دير...
هادية : (ضحكات) واش بالصح ؟
بهاء : اش ؟ (تنهد) ايلا كانت شي حاجة فحياتي كاملة ندمان عليها غادي تكون هي ديك الهضرة لي قلت داك النهار ...
هزات راسها كاتشوف فيه ...
هادية : ولكن صافي حنا طوينا الصفحة .. شديت فيديك و كملنا، ديك اللقطة نسيتها بحال ايلا عمرها كانت ... طلبتي السماحة و سمحنا ما عندك لاش تبقا مثقل بيها ...
بهاء : (عض على لسانو وهزهز راسو) متأكدة !
هادية : كانلعبو هنا ؟ واش كون كنت ما تخطيتهاش غادي تلقاني حداك... صافي فهمت شنو لي خلاك تقول ديك الهضرة و فاتت ...
بهاء : واخا هكاك حسيت براسي خاصني نطلب السماحة على ديك اللقطة بالضبط !
حطات يديها على خدو ونطقات كاتضحك..
هادية : شفتي صدقت مدلولة ... ههههه سمحت ونسيت و نتا باقي كاتخمم فيها..
بهاء : (باس راحة يديها) ما تقوليش هكاك .
هادية : (تغرغرو عينيها) كنتي مريض، بين الحياة والموت واخا الاعمار بيد الله ضروري فديك اللحظة ما تكون خايف، و منين خممت فيها لقيت بلي ما عنديش الحق نحاسبك على شي حاجة درتيها و الخوف واكل منك حقو ، وزيد عليها ما قلتيهاش حيت بغيتي تدلني ولا كنتي غير كاتلعب بيا، قلتيها حيت ما بغتينيش نتعذب ايلا مشات حتى وقعات ليك شي حاجة ... و هادشي الله يستر ماشي بالصح، حيت كنت غانموت ايلا سمعت عليك خبار خايبة ساعتها .
بهاء : (تنهد) كاتبغيني ..
هادية : وبزاف ... كانبرر ليك و باغاك دخل هضرتي لعقلك ، نسا بلي انا اعتارفت ليك ونتا رديتيني ... (سكتات كاتخمم) ولا بلاش ، قصة زوينة نبداو بيها التعاويد لولادنا ان شاء الله
بهاء : قصتنا بدات فاسطنبول ..
هادية : (علات حجبانها) توء، بدات فالغابة ، نتا كاتجري من الصداع مع باك، وانا كانجري من غدر الزمان ...
بهاء : (تبسم) ولوكا قربنا
هادية : (نزلات دمعتها وهي كاضحك) الفوبيا ديالك نفعاتنا فشي حاجة ...
بهاء : (هزهز راسو) واخا ماشي فوبيا تقدري تقولي عليها هاكا ...
هادية : ههههه ايه ايه داكشي ... المهم هو تلاقينا
بهاء : كنا غادي نتلاقاو ... فشي نقطة فحياتنا كنا غادي نتلاقاو اكيد .
هادية : مزيان منين جات على بكري...
بهاء : داكشي ..
أنت تقرأ
فل تثلج❄️مكتملة❄️
Romance💎مكتملة💎 •°• #Let_it_Snow •°• •Love is a beautiful kind of fear• بقلم : ❄︎⁂𝑺𝒂𝒇𝒊𝒚𝒂 𝑵𝒂𝒈𝒂𝒕⁂ صفية نݣات ⁂❄︎ ...
