#الجزء_163
#الفـــصــل_التالث : #دعيها_تثلج
#Let_It_Snow ❄️
#🅂🄰🄵🄸🅈🄰_🄽🄰🄶🄰🅃 🔏
#𝓘𝓻𝓲𝓼
وصبح الصباح، غير العيا ديال الليلة لي قبل خلاهم يبقاو ناعسين حتى قرب اذان الظهر ... حلات عينيها لقات تاني ارون كايشوف فيها كيما عادتو، حاط يديه على خدو وساهي فيها ...
خدات وهلة استوعبات فيها شنو داير بيها وهي كاتحس بالثقل على صدرها، ومع ذلك تبسمات ليه و ناضت تقابلات معاه ..
ساندية : صباح الخير !
ارون : صباح النور .. ارتاحيتي شوية ؟
ساندية : عظامي ضاريني ...
ارون : نوضي نفطرو وخودي فيتامين c .. يوݣدك شوية !
ساندية : (جمعات شعرها لي نازل فوق عينيها) واخا .. فقتي بكري حتى ليوم ؟
ارون : ماشي بزاف باش فقت ... قلت نتسناك حتى تفيقي نفطرو بجوج باش نمشي نشوف خدمتي ..
ساندية : (قربات ليه باست جبهتو بحب) اودي لهلا يخطيك عليا
ارون : امين ...
ناضت من فوق الفراش وجات غادية للحمام وهي تعاود دور عندو ...
ساندية : خلي ليا الفراش انا نجمعو !
دخلات للحمام قضات غرض، و غسلات وجهها ، مشطات شعرها بالخف وخرجات لقاتو خرج من البيت من بعد ما جمعو ...
تبسمات بحب ومشات ناحية تلفونها ... مترددة واش تعيط ليها ولا ترسل ميساج ولكن باغا تطمن حيت الاحساس لي متملكها ما مرتاحاش ليه فمرة ...
ساندية : نسيفط ميساج .. حتى لورا الظهر و نصوني ...
*عروستنا صباح الخير، كي صبحتي مزيان ؟ مرتاحة ؟ الامور هي هاديك ؟*
تنهدات وهي كاتدعي فسرها يكون كلشي هو هذاك، وهادشي لي متملكها غير حيت بعدات وهوما ما موالفين ببعادها .
مع خرجات من البيت تلاقات مع جيلان حتى هي خارجة كي شي زومبي ... شعرها فالسما عين محلولة و الثانية مسدودة و وجها كايقطر بالما ...
ساندية: صباحو !
جيلان : (تبسمات) صباح الخير ..
ساندية : ايلا فيك النعاس باقي رجعي نعسي ..
جيلان : (علات حجبانها وهي كاتفوه) شميت الريحة القهوة و سمعت صوت بابا، نفطر معاه قبل ما يمشي للخدمة
ساندية : (عنقاتها جنب) يخلي ليا المرضية ...
جيلان : (باست خدها) ويخليك ليا .
كان كلشي محطوط فوق الطبلة و ارون واقف قدام البريق ديال القهوة ...
ارون : اليوم عندي ضياف vip .. وانا لي غادي ناكلف بالخدمة ديالهم ... (جر لساندية الكرسي) تفضلي الالا ...
شاف فجيلان تبسم ودار ليها نفس الشي ...
ارون : اش حب الخاطر ؟
جيلان : بوسة على حنكي ...
شد وجهها شبع فيها بوسان ...
ارون : شي حاجة اخرى ؟
جيلان : بوسة على حنك ساندي ديالي ...
شاف فيها لقا حناكها تزنكو وعينيها كايدورو فبلاصتهم ... قرب عندها تقابل معاها خلاها تنزل عينيها وهي حشمانة ... من عند الله بمجرد ما كايوليو محط انظار ما كانبقا تعرف كيفاش تتعامل .. بينها وبينو كاينة ديك الحشمة الحلوة ، واخا زاعمة كايجيها فشي لقطات كايغرقها فبلاصتها ولكن مزال ما مولفات بتعاملو معاهت وقدامهم طرف ثالت ..
أنت تقرأ
فل تثلج❄️مكتملة❄️
Romance💎مكتملة💎 •°• #Let_it_Snow •°• •Love is a beautiful kind of fear• بقلم : ❄︎⁂𝑺𝒂𝒇𝒊𝒚𝒂 𝑵𝒂𝒈𝒂𝒕⁂ صفية نݣات ⁂❄︎ ...
