فل تثلج❄️مكتملة❄️

❄️الجزء 185❄️

#الجزء_185
#الفـــصــل_التالث : #دعيها_تثلج
#Let_It_Snow ❄️
#🅂🄰🄵🄸🅈🄰_🄽🄰🄶🄰🅃 🔏
#𝓘𝓻𝓲𝓼

هادية و هاينة، وجهان لعملة واحدة ... غريب يكونو جوج ديال الاشخاص كايتشاركو نفس القدر ولكن ماشي مستحيل !
لحد الساعة راهم غاديين فنفس الطريق، سعاد حقدات على هاينة بسبب يوسف، زيرا حقدات على هادية بسبب بهاء... سعاد كادت وخطتها نجحات خلات الام تبقا بعيدة على ولادها و يتحرق قلبها لمدة عشرين عام و باقية مزال ، و زيرا حتى هي كاتخطط ويعلم الله شنو موجدة، و كايبقى السؤال هو: واش حتى هادية غادي تسلك نفس الطريق ديال هاينة !
ريا خدات الوجه، وحبيب خدا المحنة، هادية تاخد الزهر ؟ ولا ماشي فالمكتاب ! ...
ممكن اه وممكن لا، ماشي ضروري يمشيو الامور على طول بحال بحال، يمكن فشي نقطة يتقلبو الموازين ...

الوقت كايجري، العرس كايقرب، وبما انو تقريبا العقبات لي جاو فطريقهم تنحاو خاصهم يرجعو يكملو فين حبسو ... خداو وقت مستقطع جمعو فيه شتات نفسهم و صافي دابا اراك للجرا ياله ياله يوجدو ..

كانت هاينة جالسة فوق الكرسي فالمحل و كاتشوف فيها بحب وهي فرحانة بتواجدها وسطهم، ماسايعاهاش الدنيا حيت طلباتها تمشي معاهم و وافقات ...

🎞️#𝚏𝚕𝚊𝚜𝚑_𝚋𝚊𝚌𝚔🎞️
⚫🎥⚪

#قبل_أيام :

دايرين على الطبلة ديال الماكلة، هادية، ريا، ساندية وحبيب ... كايتسناوها تهضر و تقول اش عندها ..
وساندية كاتخرج فيها عينيها باش تبدا ... حنحنات كاتقلب على الكلمات المناسبين وهي تنقز بلاصتها.. .

ساندية : هادشي لي بغات تقول هادية ، كانتمنى حتى نتوما تفكرو فيه و علاش لا ديرو بيه، (تبسمات) باش ما يوقعش ليكم كيما وقع معاي ..
ريا : (علات حجبانها) شنو وقع ؟ (شدات فيد ساندية) دار ليك ارون شي حاجة ؟
ساندية : الا ويلي (تبسمات) راجلي بريء ..
ريا : ههههه و لباس ..

دور كلام ساندية فراسو وفهم اش بغات تعني وهو ينطق بهدوء ...

حبيب : هادية واش غادي تهضري على ماما ؟
هادية : (هزهزات راسها) غا نهضر على مامانا ... لي مشات وخلاتنا ... (تغرغرو عينينا) من نهار بانت فحياتنا عمري قلت ليكم تصالحو معاها ولا لا، عمري قلت انا كانكرهها حتى نتوما ديرو نفس الشي ... ربي فرق الريوس باش كلها يدير داكشي لي بان ليه على صواب، ونفس الشي درناه مع بابا الله يرحمو ... واخا كاع ديك الحقد لي ربا فينا من جيهتو، نهار طاح فالفراش بدينا نليونو دقة دقة، حبيب لي ما عمرو ما هز فقلبو اصلا، وراه انا و فالتالي ريا ... كان من حقك حيت ماشي ساهل شنو دوز عليك نتي بالخصوص ..ولكن المهم فاللخر تصالحنا ... كون ما مرضو ما كناش غادي نتعاملو معاه مزيان ...

سكتات كاتمسح دموعها حيت تفكراتو وتفكرات شنو داز عليهم ...

ساندية : لي بغات تقول هو كون ما ربي عطانا فرصة و جات على هيئة المرض ما عمرنا كنا غادي نسمحو ... ولكن راه ماشي ديما الفرصة كاتجي ، يقدر تجي فبلاصتها الموت، عن نفسي واخا كاع داكشي لي دارت فيا ماما تمنيت كون لقيتها قبل ما تموت غير قسمين قبل و نتسامح معاها و نشد فيديها عمري نطلق ... هي ماتت حيت ايمانها ضعيف ولكن انا كانشوفها ماتت بسبابي.. وهادشي ذنبو غادي يبقا على رقبي حتى نتبعها .
ريا : (خرجات عينيها) لا علاش نتي ! ماعليك والو، راه نتي ايلا ما سمحتيش ليها ما غاتكونش مرتاحة فقبرها ..
ساندية : فكاع الاحوال ما غا ترتاحش .. راها انتاحرات ...
ريا : ولكن نتي ما عليك والو
حبيب : ساندية دابا كاتهضري بحال شي وحدة جاهلة ... ديال بالصح ما عليك والو
ساندية : (مسحات دموعها) ما نبيغكمش تحطو فهاد الموقف لي انا فيه داكشي علاش كانرغبكم تعطيوها فرصة، انا راه المرحومة ما خلات ما دارت وفاللخر بغيت نتسامح معاها، عساك خالتي هاينة، عاشت مظلومة ، دوزات القهرة و العذاب و الدل ! باركة عليها .
ريا : دابا ماشي غا نتحاسب ولكن ايلا جيتي تشوفي نص حياتها عاشتو بيخير
ساندية : كون كانت بيخير كاع ما تشوفيها كل ساعة تجي دق عليك ونتي كاتنزلي منها العين .. راها محروقة على ولادها .
هادية : نتوما حرين، ماشي حيت ربيتكم غادي نتحكم فيكم وهادشي حنا عارفينو من زمان ... عمري قلت ليكم شنو ديرو و عمري غادي نقول ، انا بغيت غير نعلمكم بلي غادي نحاول ... (هزهزات راسها) لاقية راحتي وانا كانشوفها مامات راجلي وماشي ماما ولكن غادي نحاول ما نبقا هازة فقلبي والو من جيهتها، حياتي كاملة وانا كانقول عمري نسمح ليها ولكن على قبل ساندية (شدات فيديها مزيرة عليها) غادي نسمح ، حيت ايلا جيت نركز فقصتها حتى هي كانت مجبورة و عفى الله عما سلف، بغيت نبدا مرحلة جديدة فحياتي وانا خاوية قلبي ...
ريا : (تبسمات) خير ما درتي !
هادية : و سمحو ليا ايلا شي نهار اترت فقراركم و حرمتكم منها ...
•→