فل تثلج❄️مكتملة❄️

❄️الجزء 198❄️والاخير❄️

#الجزء_198
#الفـــصــل_الرابع : #باقة_حب_لا_تذبل
#Let_It_Snow ❄️
#🅂🄰🄵🄸🅈🄰_🄽🄰🄶🄰🅃 🔏
#𝓘𝓻𝓲𝓼

صبح صباح نهار جديد ... كلشي واجد و مقاد و هادية قد ما تجري ورا التريتور قد ما دايرة بالها مع ريا .. كاتشوف كرشها نزلات بزاف و فاي لحظة تقدر الخنفوسة تشرفنا ...

حلات عينيها من ورا الغفوة لي خدات وهي كاتحس بانقباضات فالرحم ديالها ... والسخانة كاتفور داتها، تقاتلات و وقفات على رجليها .. شادة على كرشها ومزيرة على شفتها ..

حلات الباب وهو يبان ليها ارون واقف قدامها شدات فيه ونطقات بصعوبة ...

ارون : كنت جاي لعندك !
ساندية: فيا الوجع !
ارون : ديالاش ؟
ساندية : غانولد واقلة ..
ارون : ساندية راه باقي الحال ..

حسات بالما نازل مع رجليها ... وهي تبسم ..

ساندية : قلت ليك غا نولد ! السقية طرطقات ا ارون ..

هزها بين يديه وخرج كايجري بيها ..

هادية : مالها ؟
ارون : طرطقات السقية ..
هادية : (حلات عينيها على وسعهم) اويلي ؟ (بارتباك) زعما ساندي ما تخافي ما دهشي .. الله يفكك على خير (باست يديها) واخا !
ساندية : (زيرات على شفايفها كاتوجع و هزهزات راسها) ان شاء الله ..

خرج بيها ارون و بقاو بثلاتة لداخل ... طارت هادية جمعات ليها باليزة ... فيها حوايجها و حوايج البيبي واخا ما غاديش يجيو قدو .. مهما انو مزيود قبل الوقت غا يجيوه كبار ..
الخلعة شاداها و واخا هكاك محضرة راسها و كاتجمع و تأكد من كل حاجة ...

بينما ريا دوات مع التريتور و السرباية باش يخليو كلشي على حالو و يمشيو صافي..

خرجات جارة الباليزة ... وشافت فجيلان ..

هادية : مشينا ؟
جيلان : على بركة الله ..
ريا : حتى انا نمشي معاكم
هادية : علاش عليك؟
ريا : نخلي ساندية فنهارها ؟ لا ما يمكنش ...

شدات فكرشها و زادت بالزربة ... خلات هادية غير كاتشوف ... خرجو سدات جيلان باب الدار ومشات هادية عند حبيب خدات من عندو سوارت الطموبيل ..

هادية : الله يرضي عليك داكشي لي درناه لبيت ريا ديرو حتى لساندية ..
حبيب : صافي غير سيري ما تهزيش الهم !

سبحان مبدل الاحوال من التوجاد للحفلة، للكلينيك كايتسناوه يشرفهم فهاد الدنيا .. زربان على رزقو ...

واقفين قدام البلوك و الرعدة طالعة معاها من صبع رجليها الصغير ... كاتسمعها كاتغوت كايتزاد معاها الزايد ... هي بلا والو خايفة من شنو كايتسناها و زادت كملات ... ومع الوجع لي بدها من الليل قلبها راه فركابيها ... مع كل غوتة كاتغمض عينيها وتدعي .. ليها ولساندية ..
جيلان واقفة غادة جايا فبلاصتها و ما قاداها فرحة، توأم عيد ميلادها غادي يتزاد .. واخا خايفة شوية حيت قبل من وقتو، ولكن ما قاداش تكذب وتخبي فرحتها ..