فل تثلج❄️مكتملة❄️

❄️الجزء 142❄️

#الجزء_142
#الفـــصــل_التالث : #دعيها_تثلج
#Let_It_Snow ❄️
#🅂🄰🄵🄸🅈🄰_🄽🄰🄶🄰🅃 🔏
#𝓘𝓻𝓲𝓼

جالسين كايفطرو مجموعين من بعد ما فاقت هاينة و وجدات الفطور بكري ... و كلها كايقول خططو لهاد السبت ...

حبيب : غادي نسد عليا واحد الساعتين نكمل واحد الخدمة و صافي العشية معاكم فلي بغيتو .

شاف فخوتو وهي ريا تبدا تفتف ... عارفينها غادي تهضر ليهم على عثمان.. حيت هي جبهة فكلشي ايلا هو .

ريا : دابا انا كنت معولة نشوفو ساندية ونخرجو مجموعين ياكو ولكن (حنحنات) دابا
هادية : (نطقات داكشي لي فحلق ختها بالزربة) خرج عثمان بشي حاجة من الجنب وخاصك تمشي تشوفيها معاه ياك ؟
ريا : (هزهزات راسها وهي دايرة الضحكة الصفرة) ايوة .. تماما .
هادية : سيرو .. النيت راه خاصنا نتحزمو ما بقا قد ما فات .
ريا : راه شاداني الفشلة !
حبيب : ديرو بناقص وياله نهربو ..
هاينة : (تدخلات) دابا تبغي و تشوف نهربو .
حبيب : (تبسم وشاف فهادية) انا ياله كنت مع لي كانبغي ..
هادية : (شدات على راسها) حبيب .. راه والله حتى شوشتيني .. واش بالصح كاتبغي وحدة كبر منك و عندها ربعة ديال الولاد و ميت ليها الراجل .
حبيب : اه .
هادية : وعوالين تزوجو .
حبيب : اكيـــ (نطق بالزربة منين خرجات عينيها) د لا .. ما تخافيش راني غير ضاحك .
هادية : ما كايهمونيش المظاهر ولكن بالصح جاتني فشكل !
حبيب : وعارف ..
ريا : ونتي اهادية شنو عوالة ديري ؟

نطقات فسرها ...

هادية : نهرب ...

تنهدات وياله بغات تجاوب .. رسل ليها بهاء ميساج .

بهاء : صباح الخير ! فطرتي ؟ غالبا اه، لي معاه الحنانة راه مبارك ومسعود منين ما عمراتوش بالروز ... المهم ربع ساعة نلقاك لتحت .. ما تلبسيش كسوة و ما تلبسيش سباط عالي .. ناوي نخطفك و نهرب بيك .

تبسمات وعضات على شفتها بحماس ... حتى حنحن حبيب وهي تشوف فيهم.

هادية : ها ! انا .. غادي نخرج !
حبيب : مع بهاء ؟
هادية : (هزهزات راسها) اه ...
حبيب : (تنهد) هممم فهمت .

وقفات و شافت فيهم ..

هادية : ياك هانية تبقاي فالدار بوحدك ؟
حبيب : هانا معاها .
هادية : ما غاديش تخرج ؟
حبيب : ايلا بغات تخرج نخرجو .
هاينة : سيرو خودو راحتكم.. حتى فداري لهيه اغلب وقتي كاندوزو بوحدي ..

تبسمات ليهم و دخلات للبيت لبسات حوايجها بالزربة وهي كاتفرفر بالفرحة ... قسمات شعرها على جوج و ظفراتو من القدام حتى لتحت... دارت السانبلوك لوجهها و اكتفات بكلوص لشفايفها و ماسكارا لعينيها صافي .. هزات كاسكيط دارتها على راسها ولبسات السبادري ديالها .
جابتها نيشان مع صونا عليها بهاء ... رشات عطرها و خرجات سلمات عليهم و نزلات مع الدروج . الضغط لي دوزات هاد الايام محتاج خرجة من خرجات بهاء .