روايتي العاشره " ياربة الشعر والأحلام غنيني "

١٩

-
يوم جديد
صحت وهي تسمع اصوات بالمطبخ
مرت وناظرته يشرب من كوبه ويصب بكوب ثاني مويه
لف لها ونزل كوبه:صباحك خير
بشرى:صباح النور،صحيت بدري ؟
عبدالله؛اي
جلست بهدوء وهمست؛متى نروح ؟
عبدالله؛الطياره الظهر ١٠ ونص نحرك
مشى وهو ياكل وحط الصحن قدامها ومشى للتليفزيون
ناظرت الصحن داخله كوب قهوة وساندويتش
ورفعت راسها له وهو يشغل التليفزيون ويرجع يجلس
وهو ياكل همست؛قهوه! على اساس معاك حرقه بالمعده؟
عبدالله رفع كوبه:شاهي
بشرى ناظرت الكوب وهمست:عشاني !
لف لها وماسمعها؛هلا؟
بشرى؛يعافيك
عبدالله:بالعافيه
لف وهو يقلب بالتلفزيون وياكل بيده الثانيه
بدأت تاكل بشرى ورفعت رجلينها وضمتها لصدرها
وتكت لورا وبهدوء:حنين معانا؟
عبدالله لف لها وعقد حاجبينه؛ما ادري ماظنتي
بشرى هزت راسها وحرك راسه عبدالله:ليش السؤال !
بشرى هزت راسها بالنفي:ولاشي
حطت كوبها بعد وقت قصير وطلعت لفوق
ناظرها عبدالله وبلع ريقه بهدوء ماوده ينقضي هالوقت
ولا تباعده وتروح بعيد عن عينه شلون يرجع السعوديه
وتصير بعيده عنه! مايشوفها الا ساعه او نص ساعه
تنهد بضيق وهو يلم اغراضه اللي بالصاله
ويستعد للطلوع مشى وفتح الباب وطاع شنطته
ولف ناظرها نازله بشنطتها؛ما تتوبين؟
مشى لفوق وانحنى يمد يده للشنطه ومن لامس كفه كفها
رفع عينه لها حس ان الجاذبيه من تحته اعدمت
وانه طاير ومو حاس وسامع الا بارتباك قلبه اللي يدق
سحبت كفها من ناظرته شلون يطالعها وهمست:طابت رجلي
مشت قبله وغمض عيونه عبدالله انحنى يتكي على الشنطه
من صعوبة الموقف وتنهد تنهيده طويله
لفت بشرى وناظرته واقف محله وهمست؛يالله !
بلع ريقه وهز راسه واخذ الشنطه ونزل لعندها
طلع المفتاح من جيبه ومده للحارس:ماني مطول وراجع ان شاء الله خل عندك النسخه واكلمك قبلها بوقت ترتبها وتنظفها
هز راسه الحارس:بالسلامه يارب
مشى عبدالله وركب سيارته وحرك وهو يناظر الطريق وهادي
ناظرته بشرى بغرابه وفضول طول الطريق للمطار
-
محمد
نزل عكازه من وصل البيت
ودخل وراه عبدالرحمن؛ابوي وين كنت؟ جيت دقيت الباب مافتحت انتظرتك لين جيت
محمد؛كنت برا
عبدالرحمن عقد حاجبينه:وين؟
محمد:اصرف عن اخوك الشر
عبدالرحمن همس:شسويت؟
محمد ناظره :قفل الباب وامش
مشى عبدالرحمن وقف باب البيت بخوف كبير
ومشى لمحمد يسمع منه ويفهم
-
تركي
يناظر كفينه وواقف يمثل القوه والثبات
وداخله براكين من الحزن والاسى
٤ سنوات ما كانت كفيله تربيها ! ترجع لها عقلها؟
معقوله غلط بتربيتها؟ معقوله بنته واكبر عياله تغلط مرتين؟
وين يلاقي لها عذر اليوم ؟ كيف يقدر يتحمل تعيش !
اللي سمعه عنها قبل اربع سنوات كثييير
واللي سمعه من محمد اليوم اكثر واكبر
-
بشرى
نزلت من الطياره وهي خلف عبدالله
لف عبدالله ومد لها بطاقتها واوراقها؛حمدلله على السلامه
بشرى اخذتها وناظرته:ماشفنا حنين
عبدالله عقد حاجبينه وهو يمشي:شتبين انتي على سيرتها من امس؟
بشرى رفعت كتوفها؛ولاشي فضول بس بشوفها مره ثانيه
عبدالله هز راسه بقل حيله وهو يمشي
وقف ولف لها؛اوصلك؟
بشرى:لا بطلب لي سياره
عبدالله:ترا بروح بتاكسي سيارتي ماوصلت
بشرى هزت راسها بالنفي:لا
عبدالله ابتسم:يانصيحه مشوار رخيص
ضحكت وهي تسحب شنطتها منه:مشكور
بلعت ريقها وجمدت ملامحها وتحولت للاصفرار من هول اللي شافته
لف عبدالله وعقد حاجبينه من الرجال اللي يوقف قدامهم
كل ملامحه غضب وحزن وانفجار تام
همست بشرى؛ابوي !
بلع ريقه عبدالله وبتوتر رجع خطوه تتساوى وقفته جنبها
وتركي امامهم واقف
همس:فهميني انا ارخيت التربيه والا انتي تمردتي؟
بشرى تجمعت الدموع بعيونها بخوف وماصدقت الصدمه اللي شافتها وكيف تقدر تفهم وتحكي ماتبي تخسره ماتبي هالمره يصير اكثر:تكفى
تركي رفع كفه:جاني ابوه هاللي جنبك
عقد حاجبينه عبدالله وكمل تركي:يقول ان بنتي تحوم حوالينه مايبي يخسر ولده زي ماخسر عقيل ولده
عبدالله شد من قبضة يده؛عمي كنا بشغل
تركي:مالي كلام معك
بشرى تقدمت له وهي تلم كفوفها:ابوي اسمعني تكفى سا..
قاطعها وهو يبعد يدينه:وخري عني اصحك اصحك تناديني ابوي والا يخيل لك اني ممكن ارجع واسامح توبه
بشرى بكت بخوف من كلامه وبرجفه؛وربي اني شريفه
تركي:ليش السفر ؟ ماكفتك طلعات الجامعه ! نوديك تدرسين تروحين تدشرين ؟ حسفي عليك والله
بشرى بخوف مسكت كفه وفلتها بقوه
وقفت بصدمه وهي تناظره يناظرها بنظره ماتمنتها ابد
بلع ريقه عبدالله وهو يحاول يصحح هالموقف
تركي:لا اشوفك ابد
مشى وتركها وبشرى مارمش لها جفن وهي تناظره رايح
معطيها ظهره وتاركها قشعر جسدها وارتخت عظامها
جلست جنب شنطتها وهي تناظره من بعيد
غمض عيونه عبدالله وضرب رجله بالجدار جنبه بغضب
-
ذكرى
نزلت ركض وهي تلبس عبايتها
وقفت لطيفه:بسم الله شفيك؟ وين رايحه؟
ذكرى؛امي ضروري اطلع
عقيل لف وعقد حاجبينه بخوف؛وش صاير؟
ذكرى؛ابوي تكفى بطلع
عقيل؛اي وين؟
ذكرى؛لبشرى
لطيفه:لا لا لا انتي وش عرفك بهالبنت؟
ذكرى:امي لا تصيرين حقوده البنت مالها ذنب
عقيل:وش فيها بشرى؟
ذكرى؛صاير لها مشكله تكفى ابوي بروح اشوفها
عقيل:انا اوصلك ماتروحين لحالك
لطيفه؛لا توديها يا ابو زياد
عقيل ارتخت عضلات وجهه من لفظها لاسم ولده
ولف لها:عشان هالزياد بوديها
لف لذكرى:امشي
مشت ذكرى وخرجت معاه وركب سيارته وحرك عقيل
-
عبدالله
جلس جنبها وهمس بخوف؛تكفين خلينا على الاقل ندخل
بشرى ماردت عليه وهي تبكي:وين اروح ؟
عبدالله:قومي معاي طيب اجلسي داخل
بشرى؛مهدود خاطري ومكسور حيلي هذا ابوي عبدالله
عبدالله بتعب من صوتها وشكلها مسك ذراعها؛تكفين عشان قلب هالعبدالله قومي
وقفت بمساعدته وهي تجلس جنب البوابه
اخذ اغراضهم وتركها جنبهم وجلس جنبها
رفع بدون تردد لكفها ولفها لجهته؛بصحح كل شي صدقيني
بشرى هزت راسها بالنفي؛علي الغلط
عبدالله:لا
بشرى:استاهل
عبدالله:لا بشرى لا خلاص قلت لك بحل الموضوع بس اهدي انتي
رفعت عيونها بشرى لذكرى ومن وصلت
ووقفت وهي تبكي وتحظنها وضمتها ذكرى بخوف
وقف عبدالله من شاف عقيل اللي عاقد حواجبه يناظره
مو فاهم سبب تواجد عبدالله هنا ! ولا فاهم شصاير مع بشرى بالمطار؟
لف عبدالله يناظر ذكرى اللي حاظنه بشرى وتناظره
وعقيل تقدم له وهمس؛شسالفه؟
سكت عبدالله بضياع ويحس راسه بينفجر
جلس عقيل جنب عبدالله
ولف له عبدالله؛تأجل الكلام لبعدين؟ البنت مالها مكان
عقيل ناظر بشرى وذكرى اللي تناظره بضيق
ماقدر يرد عيون ذكرى وطلبها الساكت وهز راسه
ووقف؛يابنتي امشي امشي معانا تعالي
بعدت بشرى عن ذكرى وهي تناظره وعقيل هز راسه
:تعالي معانا نفهم الموضوع وتهدين ويحلها ربك
بشرى هزت راسها بالنفي:لا
ذكرى:بشرى مارح اخليك تسمعين مارح اتركك تعالي تكفين
بشرى؛تكفين انتي ذكرى مابي زيادة كلام قلبي تعبان
عقيل:امشي وعد مني مابتلقين الا كل خير
بشرى ناظرت عبدالله خلفهم اللي واقف بارتباك وحزن
مشت معاهم ولف عقيل لعبدالله:تعال ابيك
هز راسه عبدالله ومشى عقيل وذكرى وبشرى
ركبوا وحرك عقيل وشد شعره بغضب عبدالله
وقف تاكسي وهو يدخل الشنطه بالخلف ويركب
-