روايتي العاشره " ياربة الشعر والأحلام غنيني "

الجزء الثالث

بشرى
خلص دوامها وطلعت باستعجال للمكان والزمان
اخيراً بتشوف اخته اللي كانت اقرب وحده له
واللي كانت تنافس غلاتها بقلبه
اخيراً بتشم شوي من ريحته ! تشوف شوي من صورته؟
جلست على الكرسي قدام البحر وهي تناظر قدامها
شدت على يدينها بقوة وخوف من اللقاء
ولفت من سمعت صوتها؛بشرى!
ماقدرت توقف ولا قدرت ترد ولا قدرت تسلم
بلعت ريقها وتجمعت الدموع بعيونها وهي تناظرها
ابتسمت ذكرى بنفس الشعور وماقدرت ماتسيطر
على دموعها من شافت شي من حب زياد اخوها
جلست جنب بشرى وهي تناظرها وهمست؛كيفك!
بشرى مالت شفتها وراسها وهمست؛كيف حالي بدونه؟
نزلت راسها ذكرى ماتبي تستلم للدموع ورجعت ناظرتها
:محد عنده خبر اني بقابلك والا كان سوو لي مشكله بس في خبر لازم تعرفينه وتساعديني فيه
عقدت حاجبينها بشرى وهمست :خبر ايش!
ذكرى؛انتي تدرين ان زياد اخوي فصلوا عنه الاجهزه بعد ما تأكد انه ميت دماغياً ومافي امل يعيش ؟
ماردت بشرى وهي ترمش بخفوت
ذكرى:عرفوا ان له تعهد وقع عليه من اكثر من ٣ سنين من موته يتبرع فيها بأعضائه
بشرى عقدت حواجبها وتقدمت لها؛تعهد؟
ذكرى؛اي انه لو حصل وتوفي موافق يتبرعون بالشي المفيد من جسمه
بشرى:وليش توني ادري!
ذكرى:لاني عرفت بالصدفة من ابوي وامي ماعندها خبر
بشرى بصدمه؛يعني تبرعوا باعضائه!
ذكرى هزت راسها؛ابوي يقول كليته عيونه واعصاب وقلبه
بشرى رجعت على ورا بصدمه؛قلبه؟
ذكرى؛ماتركوا شي
بشرى هزت راسها بصدمه ونزلت دموعها:ومين سمح لهم! كيف تركتيهم يعذبونه حتى بموته
ذكرى بتعب:ماكنت ادري وماعلموني الا بعد العزا انهم فصلوا الاجهزه مامات من ربي
بشرى لفت لقدام وغطت فمها بصدمه:حمار لانه حمار
بكت بشرى من تذكرت جنونه ومغامراته وذكرى بلعت ريقها
لفت بشرى وهمست؛انتي مع اهلك!
ذكرى هزت راسها بالنفي:يمكن انا اعقل وحده بالبيت حتى زياد انا اعقل منه
بشرى بضيق ناظرتها وكملت ذكرى
:اللي صار قسمة ونصيب ويومه انتي مالك شغل فيه ابد
بشرى مسكت يدينها من انفتح الموضوع ورجعت السالفة
:والله ما اشغلته وقتها عن السيارة ولا كنا مسرعين وهذاك اليوم كان بيرجع وبيقول لامك عني ويعطيها رقم امي ونكشف عن اللي بيننا
ذكرى؛ادري بشرى كان يقولي وكان يوريني صوركم وطلعاتكم واختار لك الهدايا ادري وقلت لامي وابوي بس مصرين على نظرتهم
بشرى:كنا بس نطلع نتمشى ونضحك وناكل ويرجعني البيت ماعشت مع زياد بمكان غير السيارة واذا نزلنا ! ننزل للبحر
ذكرى ماردت وهي تناظرها بضيق
بشرى؛بس هذاك اليوم ! مدري ليش كان احلى يوم وكان طول اليوم ساكت ويتأملني وكنه يودعني
سكتت بعد اخر كلمة نزلت معها دمعه ومسحتها
شدت على يدين ذكرى:للحين مستحيل اعيش بدونه للحين مستحيل احب غيره للحين زياد بحياتي ذكرياته تضمني رسايله
شهقت بتعب وشط الحكي:اسمع فويساته وصوته كل يوم
ذكرى ضمتها بقوه وهي تقاوم دموعها
اقرب انسان لها كان زياد اخوها كان ضحوك
كان يحب الحياة ويحب يسعد اللي حوله
همست ذكرى؛الناس الطيبة ماتعيش
بشرى ماردت وهي تبكي بحظنها
-
عامر
واقف بسيارته على الرصيف ويراقب الطريق
ناظر اللي السيارة اللي قطعت الاشاره
وتافف وشغل السفتي وحرك الدورية خلف السيارة
رفع اللاسلكي وهو يردد:ياراعي المرسيدس جنّب جنّب
شغل الونانه وجنبت السياره ونزل مع دفتر القسايم
ومشى للسيارة ووقف عند الشباك ودقه
فتحت الشباك وناظرها عامر وابتسم بضحكه
:اوك فهمت ،رخصه استمارة اختي
عقدت حاجبينها؛ليش تضحك؟
عامر لف لها وبحزم؛رخصه واستماره
لفت لشنطتها جنبها وطلعت اوراقها ومدتها
اخذها من يدها اللي تزينها المناكير الحمرا
وهو يقرا اسمها:وليش قطع الاشارة! والسرعة! والتظليل؟
اخذت نفس:تأخرت على شغلي
رفع نظره لها وقرا الاسم:اختي ملاك درينا بالتطور والنساء صار لهم نصيب بالقيادة بس اكيد مو مثل قيادتك
ملاك ابتسمت وهي تقرأ اسمه على صدره؛اخوي عامر انا اعرف اسوق واسوق بانتظام بعد والدليل اني ماسببت اي حادث لا سمح الله كله عشان شغلي
عامر هز راسه:بسجل قسيمة
ملاك:مو مشكلة
مشى عامر قدام السياره وهو يكتب اللوحه والبيانات
وبداخله سيارة جديدة! وشغل ! هذي مين تكون !
رفع راسه يناظرها تناظره وتنتظره يخلص
مشى وقص الورقة ومدها لها؛تفضلي
اخذتها واخذت بطايقها؛يعطيك العافية
هز راسه ومشى لسيارته وركب وهو يناظرها تغيب عن عينه ذكرى
:تعرفين اسم الدكتور؟
ذكرى هزت راسها؛واسم المستشفى بعد بس ساعديني
بشرى سكتت ثواني:وليش ناخذ اسمائهم ؟
ذكرى؛ابي اعرف من عايش من روح زياد؟ من ماخذ قلب زياد!
بشرى سكتت وكملت ذكرى بقوة ودافع:انتي معاي؟
هزت راسها بشرى وتنهدت؛وكيف بنلقاه؟
ذكرى؛هذي يبي لها تخطيط انتي روحي الحين وريحي تعبك هالحوار كثيير ومبين
بشرى تنهدت وهزت راسها؛بيننا الو
هزت راسها ذكرى ووقفت بشرى ومشت
لفت ذكرى للبحر وهي تفكر
-
عبدالله
دخل المستشفى وبيده ملفه وانتظر دوره
رفع راسه وهو يناظر رقمه ومشى ودخل
لف الدكتور وابتسم:هلا هلا
ابتسم عبدالله:هلا فيك كيفك!
طارق:بخير حياك
جلس عبدالله وناظره طارق؛هاه اخبار القلي؟
ضحك عبدالله؛بخير على حاله
طارق:زين زين اخر مره سوينا التخطيط كويس وهالمره بنتأكد
رفع يده؛روح ريح
هز راسه عبدالله وتنهد انسدح على السرير
وجلس قدامه طارق وهو يلبس قلفز
نزع تيشيرته عبدالله وتثبتت الاجهزه على صدره
بدأ طارق يشغل الجهاز ويهمس:بدون حركة فقط تفكير وهدوء
غمض عيونه عبدالله وهو مرخي جسمه ويدينه
وطارق يصور التخطيط اللي على الجهاز ويناظره
رجعت له نفس الصورة عبدالله واسمها ونظرتها
وابتسم تلقائياً ولف له طارق يناظره مغمض ومبتسم
ورجع ناظره اتزان قلبه ونبضاته وهمس:حبّيب؟
ابتسم باتساع عبدالله ولا رد عليه
وطارق ابتسم بضحكه ورجع يناظر تخطيط القلب
مرّ وقت طويل والتخطيط يتصور وبعد انتهاء الجلسة
قام عبدالله يلبس تيشيرته وطارق مشى للمكتب
:علمنا اسمها يصير لو قلبك توقف ننعشه
ضحك عبدالله وهز راسه بالنفي:شتبي !
طارق ضحك وفتح الكمبيوتر؛تعال لي بكره بعطيك الصور
عبدالله؛طارق
رفع نظره طارق له وكمل عبدالله:مابي صور ابي بس تقرير يقول اني سليم واقدر ارجع اطير بالسما، ابي ارجع لشغلي
طارق تنهد؛اكيد بعد مانتطمن عليك
مارد عبدالله وهز راسه؛يعطيك العافية
طارق:يعافيك
خرج من المستشفى وطلع مفتاحه وشغل سياره وحرك