رقائق

حكم فيسبوكية بورفؤادية

- كتير من البنات عايزين يعملوا ميكس فيمينيزمي إسلامي شقي ياخدوا بيه كل المزايا "الظاهرية".. بغض النظر عن تمسكهم بـ فكرة معينة.. وبغض النظر عن الصح والغلط..

- مثلاً لما قولت إن الست شغلتها الأساسية البيت، وممكن تشتغل وتعمل كارير وفلوس لنفسها من غير ماتقصر في بيتها.. والراجل مهمته الأساسية المصاريف وممكن يشارك في شغل البيت تكرماً..

- قالوا لأ.. شغل الراجل في البيت واجب عليه مش تكرماً ولا حاجة.. وأصلاً شرعاً المفروض يجيب لمراته خدامة..

- تقولها تمام.. يعني انتي مرجعك الشرع؟  طاب يا ستي.. نفس المشكلة دي حصلت بين السيدة فاطمة وسيدنا علي رضي الله عنهم.. وراحوا للنبي صلى الله عليه وسلم عشان يحكم بينهم..

- وسيدنا النبي حكم على سيدنا علي بالأعمال الظاهرة اللي هي أي حاجه برة البيت.. وحكم على السيدة فاطمة بالأعمال الباطنة اللي هي شغل البيت..

- والعلماء استدلوا بالواقعة دي إن مفيش حاجه اسمها الزوج يجيب خادمة ولا حاجة وإن شغل البيت على الزوجة، والشغل برة البيت على الزوج..

- وحتى العلماء اللي قالوا إنه يجيب خادمة.. ربطوا الموضوع بشرط من اتنين..
الأول إنها تكون مش متعودة تخدم نفسها "يعني كان ليها خادمة وهي في بيت والدها"..
أو التاني إنها تكون مريضة أو عاجزة عن خدمة نفسها.. فـ ساعتها يجيبلها خادمة..

- تقتنع وتسكت؟ لأ ازاي..

- تقولك احنا مش زي النبي والصحابة.. والزمن غير الزمن.. ودلوقتي الحياة صعبة.. وفي أوروبا والدول المتقدمة في مساواة بين الراجل والست.. فـ المفروض جوزي يشتغل في البيت زيه زيي، هو مش أحسن مني في حاجه..

- تقولها طاب في أوروبا والدول المتقدمة بيشاركوا في كل حاجه مش في شغل البيت بس.. إيجار البيت بيبقى بالنص.. كل الفواتير بالنص.. الأكل والشرب بالنص.. يعني كنتي المفروض تعترضي برضو لما قولت إنك تشتغلي لنفسك..

- تقولك لأ.. أصل النفقة شرعاً على الزوج، والمفروض انا مادفعش ولا مليم وجوزي هو اللي يجيب كل حاجه.. الشقه ويوضبها، والعفش، والأجهزة الفول أوتوماتيك، وشبكة بـ خمسين ألف، ومهر عشروميت ألف، وفرح في جراند لامور، وشهر عسل في دهب، ويصرف عليا وعلى البيت وعلى العيال..

- تقولها ماشي كل دا حقك طبعاً.. بس أنا برضو شرعاً ليا حقوق، أبسطها الطاعة.. تقولك لأ انت مش هتتحكم فيا، الستات بره طلعوا القمر وانت عايز تقولي أعمل ايه وماعملش ايه! .. تقولها طاب بره بيتجوزوا بـ دبلة بس، وكل حاجه بتبقى بالنص في حدود إمكانياتهم من غير ما الراجل يقعد يعمل جمعيات خمستاشر سنه عشان يحوش مليون جنيه يتجوز بيهم.. تقولك بس ربنا قال...

- المهم إنك تجيبها بالدين.. تقولك مساواة.. تقولها ماشي يا ستي مساواة.. تقولك قال الله وقال الرسول.. تقولها ماشي يا ستي قال الله "وللرجال عليهن درجة".. تقولك انت مش حافظ غير الآية دي؟ عايزين مساواة.. ماشي يا ستي واحنا بنتجوز وبعد الجواز هنقسم كل حاجه بالنص.. تقولك ربنا قال "اسكنوهن من حيث سكنتم" وقال "وأنفقوا عليهن".. طاب يا ستي هجيبلك سكن واصرف عليكي بس تديني حقوقي وتسمعي كلامي.. تقولك لأ بس ليدي جاجا قالت إني Independent ومش محتاجه أوامر من رجاله.. طاب خلاص مش هأمرك بحاجه بس انتي كمان ماتطلبيش مني حاجه واعتمدي على نفسك.. تقولك النبي قال "كفى بالمرء إثماً أن يضيع من يقوت".. تقولها يعني انا اللي هصرف عليكي اهو، يبقى تسمعي كلامي.. تقولك بس الأستاذة أمال ماهر قالت إني قادرة ع التحدي و ع المواجهة وماجبتش سيرتك في الأغنية..

- المهم يعني انها هتلففك في دايرة مفرغة، وهتاخدك رايح جاي، وهتقعد تلاعبك شيكا ع العالي وشيكا ع الواطي.. وفي الآخر هتأكلك جاتوة وتكسب النقاش، وهتطلعك ذكوري، وهتبان في وسط صحابها أنها بهذه القوة..

هو انا مش عايز أصدمكم.. لكن لما كنت بقول إني بنقل خبرات صحابي المتجوزين.. كنت بنقل وجهة نظر الشباب المتفتحين اللي شايفين إن الست المفروض تشتغل شغل خفيف توازن فيه بين كاريرها وبيتها..

لكن الحقيقة إن شباب كتير تفكيرهم إنهم مش هيخلوا زوجاتهم يشتغلوا أصلاً.. ويقعدوا في البيت مكرمين وطلباتهم كلها مجابة..
بس أنا ماطرحتش الفكرة دي أساساً عشان اتسبّلي لما قولت إنها تشتغل شغل خفيف.. ما بالك لو كنت قولت إن في حد هيقعدها في البيت!

عموماً يعني سواء عايزة تشتغل ع الهادي أو ماتشتغلش خالص.. مش هتفرق.. هي حرة..
إنما اللي يخلي مراته تشتغل شغل تقيل وتشقى وتتبهدل وتاخد شيفت 10 ساعات وتبات برة البيت باليومين والتلاته تحت أي مسمى.. يبقى نطع وعايز يعيش على قفاها.. وشكراً..

هيفضلوا يفركوا ويحركوا ويتشالوا ويتهبدوا.. وبرضو هتفضل الست ست شغلها الأساسي البيت والأولاد.. والراجل راجل شغله الأساسي إنه يصرف على البيت.. وبينهم تبادل مهام.. هي ممكن تشتغل وتجيب فلوس "لنفسها" من غير ما تقصر في شغل بيتها.. وهو ممكن يشتغل في بيته "تكرماً" من غير مايقصر في شغله ومصاريف مراته وعياله.. وبينهم مهام مشتركة زي تربية الأولاد.. وشكراً..

انت عايز تختار البنت اللي هتتجوزها؟! انت مفكر نفسك رايح تشتري علبة زبادي من كارفور يا ذكوري يا متعفن يا شنب الصرصور!

نفس البنت : مش هتجوز غير واحد طويل وعنده دقن وعروق وغمازات وتفاحة آدم ويكون ظابط دكتور مهندس في ناسا..

هتموت.. وهتندفن.. وهتتحلل.. ورفاتك هيتكنس لما القبر يتملى عشان يساعي جثه تانيه.. مش هتبقى ذكرى، محدش هيفتكرك.. هيكتبوا عنك بعد كام سنه من موتك وبعديها مش هيجيبوا سيرتك.. والجيل اللي بعد جيلك مش هيبقى عارفك أصلا عشان يجيب سيرتك.. هتبقى زي أي واحد عاش ومات في زمنٍ ما، لا حد عارفه ولا عارف زمنه.. الكون مش هيفتقدك، في مليارات غيرك.. حياتك أتفه بكتير من إنك تزعل عليها، أو تزعل على أي حاجه فيها..