رقائق

اجعل حياتك كلها علي هدي الدين 💜

هل فكرت تعمل تصميم(ديزاين) لحياتك  مبني على مرجعية إسلامية؟

مقصدي هنا للمرجعية الإسلامية مش حصره في الحلال والحرام فقط لإن دا أول حاجة بتيجي في بالك. ولكن لكل شيء سواء كان ديني بحت أو متعلق بحياتك العملية( اللي هي جزء من الدين أيضا بس الناس مش واخدة بالها).

يعني على سبيل المثال

في الأكل:

تبني نظامك الغذائي على حديث سيدنا محمد-صل الله عليه وسلم:
بحسب ابن آدم لقيمات يقمن صلبه..الخ

في عدم الندم على شيء:

تبني عقليتك على حديث: ولاتقولن لو أني فعلت لكان كذا وكذا ولكن قل قدر الله وماشاء فعل..الخ.

في آداب الحديث:

على آية: "و اغضض من صوتك إن أنكر الأصوات لصوت الحمير"

وحديث:  من كان يؤمن بالله واليوم الآخر فليقل خيراً أو ليصمت.

في الاستيقاظ:

على حديث:  بُورِكَ لأُمَّتي في بُكُورِهَا.

في الحياة بكافة تفاصيلها:

على الحديث العظيم الشامل: "إن الله كتب الإحسان على كل شيء".

اللي هـو كـلت طـب كـل كـويس. شـربت اشـرب كـويـس. نمـت نـام كـويـس. بتشتغل اشتغل كويس. بتعمل حمام اعمل حمام كويس. بتجامع مراتك جامع كويس!.. أه والله العظيم زي مابقولك كدا.. ماتستغربش.

وهكذا على نفس المنوال..

عظمة الدين الإسلامي إن مافيش حاجة بتعملها في حياتك اليومية- ودا حرفيا مش على سبيل المجاز- إلا وكان ليه رأي فيها وبيقولك إيه الأفضل ليك.

من دخولك الحمام لحد شغلك وجوازك ولا أصغر من ذلك ولا أكبر إلا والدين ليه رأي فيه سواء بالتفصيل أو بشكل عام.

والعظمة إن كتب التراث العلماء شرحوا فيها كل حاجة باستفاضة اللي هو ممكن تلاقي كتاب عن آداب دخول الحمام مثلا!

كل دا حلو ومريح ليك نفسيا لإنك بتشعر إن فيه حد متوليك وبيرتبلك حياتك،  لأ و كمان صح يعني مش محتاج تراجع وراه، لإن انت زي الآلة وربنا هو اللي صنعك، فاهو اللي عارف السوفت وير والهارد وير بتوعك بيشتغلوا ازاي و إيه أفضل سيستم انت ممكن تمشي عليه.

يعني تقدر تقول:

اللَّهُ وَلِيُّ الَّذِينَ آمَنُوا يُخْرِجُهُم مِّنَ الظُّلُمَاتِ إِلَى النُّورِ.

من الظلام المطلق إلى النور المطلق..

بقلم/ عبدالرحمن حمادة
٢٣/١٢/٢٠٢٠