رقائق

الامام الشافعي - رحمه الله -

- كنت بقرأ كتاب "الأم" للإمام الشافعي، ودا من تصنيفاته في الفقة.. وأنا بقرأه كنت منبهر جداً من جمال الاسلوب وفصاحة اللغة.. وبعد ما مشيت فيه شوية رجعت لترجمة الإمام لقيت فيها كلام عَجَب..
- المهم إن في ترجمته قال عنه أحمد الرازي : كان الشافعي والله لسانه أكبر من كتبه، لو رأيتموه لقلتم إن هذه ليست كتبه.. لو رأيت الشافعي وحسن بيانه وفصاحته لعجبت، ولو أنه ألف هذه الكتب على عربيته التي كان يتكلم بها معنا في المناظرة، لم نقدر على قراءة كتبه لفطاحته، وغرائب ألفاظه، غير أنه كان في تأليفه يوضح للعوام..
- والعوام الأيام دي مش فاهمين كتبه، وبتتشرحلهم وبتتبسط ومش بيفهموها برضو.. وييجي واحد يعدل على الإمام الشافعي وعلى غيره من الأئمة ويقولك انا ممكن افهم الدين عادي زي ماهما فهموه، وهو مش حافظ من القرآن غير جزء عم وتبارك..
- زي ياسمين الخطيب اللي كل شهرتها قامت على كام فوتوسيشن على إنستجرام + كتاب "ولاد المرة" اللي محدش يعرف لحد دلوقتي بيتكلم عن ايه! هو كان اسمه شاذ فطلعوها على التلفزيون وشهروها واللي هو واو انتي ازاي بالجرأه دي!
- ياسمين جايبه امبارح مأذونة في فرحها عشان تثير الجدل "ومفيش حاجه في الشرع اسمها مأذونة بالمناسبة" وبتقولها بإستهزاء اشمعنى أبو حنيفة؟! تخيل بت نَكرة زي دي بتقول على سيدنا الإمام أبو حنيفة.. اشمعنى أبو حنيفة!
- تخيل إن الأئمة الأعلام اللي قعدوا طول حياتهم يتعلموا ويعلموا الشرع عشان يوصلنا دلوقتي على الجاهز في كتب، بقت سيرتهم بتتجاب باستهزاء على ألسنة شرذمة الخلق بالشكل دا..
- طبعاً ياسمين ماتعرفش قدر الناس دي.. لو تعرف قدرهم مش هتتكلم عنهم كدا لا هي ولا غيرها.. لو تعرف إن الإمام الشافعي كان حافظ موطأ الإمام مالك عن ظهر قلب وهو عنده 21 سنة.. وكان مُلم بكل علوم الشرع.. وحافظ القرآن.. وهي معدية الأربعين وكل إنجازاتها في الحياة إنها اتجوزت خالد يوسف ومعاها عيل وبتطلع تحزق كل شوية وتقولك حقوق المرأة، وجسمك ثورة مش عورة، وماتتجوزوش يا بنات وخليكم Strong independent.. وهي متجوزة خمس ست مرات قبل كدا.. واخر واحد اللي متجوزاه امبارح دا معاه 3 عيال.. ماكنتش هتقول كدا!
- تخيل واحدة زي دي تروح تقولها الإمام الشافعي كان حافظ موطأ الإمام مالك.. هتقولك ايه موطأ الإمام مالك دا؟ ومين الإمام الشافعي دا؟
- الإمام الشافعي اللي كان بيختم القرآن في رمضان 60 مرة.. اللي كان بيقسم ليله 3 أجزاء.. ثلث يقيم الليل، وثلث يكتب، وثلث ينام.. بيقول بكل تواضع أحب الصالحين ولست منهم لعلي أن أنال بهم شفاعه.. وأمثال دي يقولولك يمكن انا عند ربنا أحسن منهم..
- الإمام الشافعي اللي كان عبقري.. قال أبو عبيد :ما رأيت أحداً أعقل من الشافعي.. وقال يونس ابن عبد الأعلى : لو جمعت الأمة لوسعهم عقله.. وقال عنه يحيى ابن أكثم : كان رجلاً فريش العقل والفهم والذهن صافي العقل والفهم والدماغ سريع الاصابة.. وقال المأمون : قد امتحنت الشافعي في كل شئ فوجدته كاملاً..
- وقال عنه يونس ابن عبد الأعلى : كان الشافعي إذا أخذ في التفسير كأنه شهد التنزيل..
- بقت تيجي واحدة جاهلة ماتعرفش الألف من كوز الدرة تقولك أنا من حقي أفسر القرآن وأفهمه بعقلي زي ماهما فسروه..
- الأئمة نفسهم كانوا في قمة التواضع مع بعض.. كان الإمام الشافعي تلميذ الإمام مالك.. والإمام أحمد ابن حنبل تعلم من الإمام الشافعي.. وكان كل إمام يقول رأي الإمام الفلاني أصح من رأيي.. كان الإمام ابن حنبل بيقول "ستة أدعوا لهم سحراً، منهم الشافعي".. وكانوا كلهم في الآخر بيرجعوا لسنة النبي صلى الله عليه وسلم.. الإمام الشافعي كان بيقول " إذا وجدتم في كتابي خلاف سنة رسول الله فقولوا به ودعوا ما قلته"..
- وبعد ما يقرب من 1400 سنة جايه ياسمين تقولك "اشمعنى أبو حنيفة النعمان"..!