رقائق

احنا مقصرين اوي

فـ كل مره بركب مواصلات وأطلب من السواق يقفل الاغاني بكل أدب وبالكلم الطيب ، كنت بلاقي اختلاف فـ ردود أفعال السواقين....
منهم الـ بيوطي الصوت شوية ويرجع يعليه ، ومنهم الـ بيعمل فيها مسمعش أصلا ، ولو سمع يقولك عربيتي وانا حر وأشغل الـ انا عايزه مع اني انا كمان حر في اني اسمع الـ انا عايزه! ، ومنهم الـ بيستجيب بمنتهي الهدوء والادب ويقفلها خالص فعلا....
لكن الـ حصل معايا النهارده غريب عجيب مريب ، حرفيا صااااااااادم🤐🤐
ركبت العربيه كالعاده والسواق مشغل أغاني كالعاده ، بس المره دي كنت راكب فى الكرسي الاول جنبه بس جنب الشباك والـ قاعد بيني وبينه بنت صغيره تقريبا يعرفها لانه كان بيتكلم معاها زي م يكون قريبها.
فـ قولتله لو سمحت يا اسطي ممكن تقفل الاغاني ؟!
قالى كدا بالحرف الواحد :على فكره انا مستنيك تقولى كدا و عارف لو مكنتش اتكلمت وقولتلي اقفل الاغاني ، كنت هتقل فى نظري وأعرف انك شيخ نص كُم زي كل الـ راكبين ورا دول وانك مبتغيرش على دينك ، أنا عارف انك صح وانا غلط ، بس انا بحب الدين وبحب المتدينين وبحترم جدا الـ بيقولولى اقفل الاغاني وبيزيد فـ نظري .
فـ البنت الصغيره دي قالتله عرفت يا بابا انها حرام!!
قالى شايف الـ قاعده جنبك دي ، دي بنتي فى 2 اعدادي أزهر ، بتقولى يا بابا ألاغاني حرام متشغلهاش فى العربيه وشغل للناس قران ، لان الاغاني بتلم الشياطين فى المكان وكل الـ بيسمعها بياخد ذنوب.
فهو بيقولى لما لقيتك جاي قولتلها لو الشيخ قالى اقفلها تبقي حرام فعلا ولو مقالش تبقي مش حرام .
انا كان رد فعلى اني بلٍمت وعرفت أد ايه احنا مقصرين ، واد ايه احنا بندًعي الالتزام ،ونسينا ان سبب خيرية هذه الامه هو الامر بالمعروف والنهي عن المنكر، " كُنتُمْ خَيْرَ أُمَّةٍ أُخْرِجَتْ لِلنَّاسِ تَأْمُرُونَ بِالْمَعْرُوفِ وَتَنْهَوْنَ عَنِ الْمُنكَرِ".
يا جماعه الحرام حرام حتي لو كل الناس بتعمله.
‏فأصبح العادي هو الـ مشغل أغاني والغريب هو الـ مشغل قران ،،
اصبح العادي هو الاختلاط ، والغريب هو عدم الخِلطه،،
اصبح العادي هو التبرج ، والغريب هو الحشمة ،،
اصبح العادي هو تحديد الدقن وخنفستها ، والغريب اعفائها،،
اصبح العادي هو الروشنه والاستايل ، والغريب هو الالتزام والتدين ،،
اصبح العادي هو العُرف وان كان حراما، واصبح الغريب هو الشرع وان كان ينهي عن العُرف.
والله وصل بينا الحال اننا تركنا النهي عن المُنكر حتى خرج لنا أهل المُنكر ينهونا عن المعروف!