رقائق

كيف تأمر بالمعروف

في ناس أول ما تيجي سيرة "الأمر بالمعروف والنهي عن المُنكر" قدامهم يتخيلوا ناس لابسين جلاليب وماسكين عصيان وسيوف ومطلوقين على الناس يجروا وراهم في الشوارع ويقتحموا خلاوتهم في البيوت ويراقبوهم ويتجسسوا عليهم تحت شعار إن هو ده الأمر بالمعروف والنهي عن المنكر.. رغم إن دي صورة هزلية صورها الإعلام للناس عشان يشوه رُكن أصيل من أركان العقيدة في الإسلام..

رغم إن الشروط إللي لازم تتوفّر عشان نقدر نسمح لحد يقول أنا بأمر بالمعروف أو بنهى عن المنكر لازم تتحقق مجتمعة أو حتى معظمها يتحقق في حالات نادرة.. والشروط دي كالتالي..

1- أن يكون المُسلم عالماً بالمنكر.
يعني شايفه قدام عينيه مش عن سمع أو نقل وفي نفس الوقت مُلم بكل الأحداث والظروف المرتبطة بالفعل إللي عايز ينكره.. بحيث إنه ميبقاش شايف نص الحقيقة أو شايف من زاوية واحدة بس..

2- أن يكون المُسلم عالماً بكيفيّة إنكاره.
لأن إنكار المنكر مش بالضرب ولا بالتنظير ولا بالاستهزاء أو الاستعلاء أو المعايرة.. ولا إنكار المُنكر بتقييد حريات الناس غصباً أو تتبّع عوراتهم أو مراقبتهم.. الإنكار لازم يكون بنفس أساليب النبي ﷺ.. بالحُسنى والتلطّف والتذكير والتماس الأعذار والظن بالخير.. على طريقة ما بال أقوام.. لست بأحسن ولا بأعلم منك ولكني أحب لك الخير.. وهكذا..

3- قادراً على إنكاره.
يعني عارف الأحكام الفقهية المتفق عليها وإللي مفيش عليها خلاف في الفعل.. حاجة زي ضرب طفل في الشارع.. التهجم على سيدة.. تخريب ممتلكات للغير بدون وجه حق.. والقادر هنا مش الشخص القوي إللي عنده عضلات.. لا القدرة هنا قدرة فقهية.. يعني علمه يسمحله بتفصيل الضرر على الناس واستحضار الآيات القرآنية والأحاديث الشريفة والتراث بين الصحابة..

4- مصلحة الإنكار راجحة
ودي لأن مش كل منكر وجب إنكاره.. لو مثلا انت عارف إن في شخص عنيد وطبعه عصبي.. جيت تنهاه عن المنكر كابر وأتى بمنكر أكبر منه.. تنهاه مرة تانية كابر وعاند أكتر وهكذا.. انت كده بتتحمل معاه وزر.. أو مثلا حد مشهور بطول اللسان والسفه جيت تقوله الدين بيقول راح سابب الدين.. ساعتها لا.. الأفضل إنك تلزم الصمت وتتجاوز واستغفر الله لك وله وتدعوا له بالهداية..

5- لم يمكن إنكاره من غيرك، أو كانت لك ولاية على فاعله.
ودي قد تكون أهم الشروط.. بنت ماشية في الشارع مع أبوها .. زوجة ماشية مع زوجها.. ملكش أنك توجهلها أي كلام أو حتى تتطوّع بالوصاية عليها أو توجهلها أي تعليقات.. المُنكر إللي هتنكره لازم يكون مفيش غيرك يقدر ينكره بعد اكتمال الأربعة شروط السابقة.. بحيث إن لو كل واحد شاغل نفسه بكل الناس المجتمع هيتحول إنه مشغول بأفعاله غير وبيتلصص على غيره وهمه بس إنه يراقب غيره وينسى نفسه.. وده مش مطلوب أبدا ولا مقبول..

** كل ده طبعا في حالة إن شخص قرر يتدخل ويمنع منكر بلسانه أو بيده.. إنما لو فرضنا إن بيحصل حاجة غلط في مكان أنت فيه والشروط دي متحققتش.. الواجب عليك إنك تحاول تستميل من تحسبه على خير وتتركوا المكان وده هو الإنكار بالقلب.. ساعتها كل نفس بما كسبت رهينة.. وكل واحد هيشيل شيلته هو لواحده ومسؤول قدام ربنا عن نفسه..

اما أساطير تكسير البيوت وضرب الناس وغلق المحلات بالقوة أثناء الصلاة أو عقاب الناس بدون وجه حق.. كل دي افلام هندي غرضها انك تخاف وجسمك يقشعر من مجرد سماع الجُملة..

ده ربنا ﷻ في أكتر من موضع بيعظّم من الأمر بالمعروف والنهي عن المنكر بشكل جميل وكله لطف واستحسان.. ومنها قوله تعالى.. وَلْتَكُنْ مِنْكُمْ أُمَّةٌ يَدْعُونَ إِلَى الْخَيْرِ وَيَأْمُرُونَ بِالْمَعْرُوفِ وَيَنْهَوْنَ عَنِ الْمُنْكَرِ وَأُولئِكَ هُمُ الْمُفْلِحُونَ

وأي محاولة لمخالفة الشروط دي بحجة تحقيق المصلحة أو الخوف أو التدين أو أو.. قد تكون منكر أكبر من المُنكر إللي بتحاول تنكره من غير ما يكون مطلوب منك إنك تنكره.. انكر بقلبك واستغفر الله وغادر واعتزل.