رقائق

استغلال البنات في سوق العمل

في ظاهرة غريبة بقيت بلاحظها بعد انتشار البنات في سوق العمل.. وهي إستغلال بعض البنات لجمالهم عشان يوصلوا لوظايف أو يترقوا في مناصب أو يسوّقوا لشغلهم..

يعني بلاقي على السوشيال ميديا بنات كتير شغلهم المفروض معتمد تماماً على علمهم أو حرفة إيدهم وخبرتهم.. ومع ذلك لما تنزل إعلان لشغلها تلاقيها منزله صورتها وهي لابسة محزق وحاطه ميكب وبتاع، ومن غير ما يكون شغلها ظاهر في الصورة أصلاً.. وتلاقي على صفحتها مئات الآلاف من المتابعين اللي ممكن مايكونوش عارفين هي شغاله ايه أساسا، بس بيتابعوها عشان صورها..

وفي الجانب الآخر ممكن يكون في شاب في نفس مجالها وشغله أحسن منها بكتير، تلاقيه صارف كل فلوسه على الدعاية لشغله ولصفحته، وداير يبوس إيد صحابه عشان يعملوله لايك.. وفي الآخر تلاقي عنده 500 متابع ومحدش بيعبره!

مؤخراً برضو بعد ما البنات اكتسحوا شغلانة الميديكال ريب.. بقيت بشوف تصرفات مش بروفيشنال خالص في الشغل.. يعني طول عمرنا بنتعامل مع شباب.. فـ بييجي الراجل لابس فورمال.. يسلم عليك ويعرفك بنفسه ويتعرف عليك.. وبعدين يقولك أنا من الشركة الفلانية ومعايا الدوا الفلاني ويقولك كلمتين عن الدوا.. ولو عندك أي استفسار أو حاجه بيجاوب عليه، ويسيب قلم ولا نوتة ويتوكل على الله..

دلوقتي تلاقي البنت جايه لابسه لبس غريب.. حاطه Full makeup كأنها راحه فرح.. عامله شعرها مش عارف ايه.. وتلاقيها بتقول كلمتين عن الدوا وبعدها تهئ وتمئ شوية وتضحك ضحكات مايعة.. ولو الدكتور اللي بيكلمها مش سالك ممكن يقعد يفتح كلام ويتلاطف معاها وبتبقى حالتهم صعبة خالص يعني..

وأظن إن شركات الأدوية بدأت تلاحظ إن البنات مبيعاتهم أعلى من الشباب، فـ عشان كدا أعدادهم بقت بتزيد في الشغلانة بطريقة ملحوظة، وأعدادا الشباب بقت في النازل..

كنت بتكلم مع واحدة من كام يوم وفضلت تحكيلي عن العروض والترقيات وزيادات المرتب اللي اتعرضت عليها في شغلها لمجرد إن شكلها حلو.. بتقول كنت بقعد مع المدير ألاقيه بيديني رقمه الشخصي ويقولي لو احتاجتي أي حاجه كلميني.. وكانت بترفض طبعاً..

فـ للأسف دا واقع احنا عايشين فيه.. وفي بنات كتير حابين الواقع دا وبيستغلوه ومش مقدرين خطورة الموضوع.. مايعرفوش إنهم كدا بيتخلوا عن احترامهم مقابل الفلوس.. بيستسهلوا وبياخدوا Short cuts على حساب أخلاقهم ومبادئهم.. مفكرة إنها لما تتلاطف مع مديرها عشان علاوة ولا تاخد رقم عميل وتتعرف عليه عشان تحقق التارجت، إنها كدا جامدة ومفيش منها اتنين..!

كلامي اللي فوق مش تعميم.. في بنات محترمين وشغلهم بروفيشنال وعارفين حدودهم في التعامل.. انا بتكلم عن فئة معينة موجودة، وبتكتر مع الأسف.. منهم بيكونوا عارفين هما بيعملوا ايه ومبسوطين بكدا.. ومنهم بيتعاملوا على سجيتهم ومش فاهمين دماغ الرجالة..

فـ خلي بالك عشان في حياتك عموماً نادر إنك تلاقي راجل بيعملك حاجه لله.. من أول بتاع اتحاد الطلبة اللي بيقولك في أول يوم كلية خدي رقمي ولو احتاجتي أي حاجه انا تحت أمرك ويقعد يبعتلك كتب PDF ومحاضرات على الواتساب الساعة 5 الفجر.. لحد مديرك في الشغل اللي بيعرض عليكي علاوة أو ترقية غير مبررة.. فـ عايزك تعرفي إن أي تسهيلات بتاخديها من راجل لمجرد إنك بنت، اتأكدي إن وراها غرض في دماغه..

* وبالمناسبة مفيش مشكلة إنك تبقي لبقة وشخصية وكاريزما وتعلي في شغلك، بس المهم تعلي بمجهودك مش بمقابل تنازلات هتقدميها..
* ومفيش مشكلة برضو إنك تسوّقي لشغلك.. بس لما تيجي تعرضي شغلك إعرضي السلعة.. ماتخليش نفسك السلعة..!